Gen 16 | KxfSCKRC | STEP | Abra ama Sharè̌nu a shodophû̌ dě a phû̌ǒlò̤nǒ dǐpwǎ̤tò̤. Pò̤̌ta ajû Egypt khlilèphû̌ ǒkû̌ nû̌û tapwa̤ mî̌ ami̤ ta Haka.

Genesis 16

Haka ta Ǐshameělè

1 Abra ama Sharè̌nu a shodophû̌ dě a phû̌ǒlò̤nǒ dǐpwǎ̤tò̤. Pò̤̌ta ajû Egypt khlilèphû̌ ǒkû̌ nû̌û tapwa̤ mî̌ ami̤ ta Haka. 2 Hǐnudě a hî̌ awṳ̂ Abra, “Cǒmara tûjûpwa̤ noshodophû̌ he hǒ. Cû̌hǎmoǒplǒ mò̌ ta hejûmo̤nu. Htopěmî̌ he nî̤bǎ tṳtṳ kû̌ hephû̌khû ta akhû̌akhî pě kǎlè.” Dě Abra jû kû̌pwǐ ama Sharè̌ hî̌ nû̌ûnu. 3 Dě Sharè̌ ǐ ajûmo̤ Haka htǒo ta awṳ̂ dě a glè htû nû̌ûma tapwa̤. Htǒomî̌ a htûhtò̌ bǎ Abra cû̌ǒ dě Khana̤gakû behtò̌ aněshǐ akhanu hǒ. 4 Hǐnudě Abra hǎmoǒplǒ ta Haka dě a mo̤dohtò̌.

Bǎ a sî̌ya ta a mo̤do akhanu, a phî̌htò̌yî̤ ana̤ dě a gènè̤ pî̌tî̌kè aběcǎmo̤ Sharè̌. 5 Htǒotaplǎ dě Sharè̌ hî̌ Abra, “Haka gènè̤pî̌tî̌ he htǒonumî̌ mî̌htě nata̤sǔ htǒo akhû̌akhî pwǎ. Ma̤pûhǐ a htû nama ayanu, he ǐ a ta hena̤ pwǎ̤tadě khònò̤ a sî̌ya ta a mo̤do dě a gènè̤ pî̌tî̌kè he. Ma̤hǐnudě he ta nahtǒo bǎtè tapwa̤ta atokhlonu, Cǒmara tûjûpwa̤ cèròtû̌ bǎpa pě nî̌꤮.”

6 Dě Abra hî̌shǔ nû̌û, “Awǒ hǒ, a mî̌ najûmo̤ ta nana̤, a ǒ dě nacǔde kû, na gènè̤ ta awǒkhlo hî̌tènu, jǔ꤮ tû̌ na ma̤ a rǒ.” Htǒotaplǎ dě Sharè̌ ma̤jîma̤jû Haka dě a hǎhtò̌khlè̌cû̌kè Sharè̌la̤.

7 Cǒmara tûjûpwa̤ amǒkhû̌tanaphû̌ kè̌shǐ Haka bǎ lo̤semě lò̤rṳ̂khû̌ gûla̤ shihtǎpo̤kû kòshî̌ tò̤glò. Gûla̤ nutò̤glò mî̌ a ǒ bǎ klè̌ la̤cû̌ dě Shǔraga nutobo alo̤. 8 Dě a hî̌ nû̌û, “Sharè̌ ajûmo̤ Haka, na ǒ bǎtè hè, dě na glè̌ cû̌ bǎtè?”

Dě Haka hî̌shǔ nû̌û, “He hǎhtò̌khlè̌cû̌kè heběcǎmo̤ Sharè̌ ala̤.”

9 Dě Cǒmara tûjûpwa̤ amǒkhû̌tanaphû̌ hî̌ geshǔ nû̌û, “Ge htûsǒ mò̌ ajûnu.” 10 Dě a hî̌po̤ nû̌û, “He noǒplṳ̂ǒphǎ htò̌dû̌ nakhlinalè toǒ pě dě tapwǎ̤꤮ mî̌ kò dǒbò̌pè̤ asî pětò̤.

11 Na phû̌ǒnṳ phû̌makhû pě tapwa̤,

dě na bǎ kaǎ ami̤ ta Ǐshameělè pě, (Ǐshameělè amûasǎ mî̌ Cǒmara tûjûpwa̤ gana̤de.)

Ma̤tè̤hî̌dě Cǒmara tûjûpwa̤ gana̤de nasò̌phlǒgugè htě na yi̤kǒhtò̌ htǒonu hǒ.

12 Pwǎ̤tadě naphû̌makhû htǒotapwa̤nu a sǒsǒta tîsî̌mi̤ pě,

a ma̤shǔshěshǔbò kò pṳ̂̌꤮ tapwa̤ pě,

dě kò pṳ̂̌꤮ tapwa̤ ma̤shǔshěshǔbò nû̌û pěpě.

A ǒtepheyî̤ khǒkè tû̌ ta akhlialè toǒ pě.” ^a

13 Haka kaǎ Cǒmara tûjûpwa̤ htě a hî̌bǎ ta a htǒonu tapwa̤ ami̤ ta, na mî̌ Cǒmara htě a kè̌shǐ henu tapwa̤ hǒ. Dě a hî̌lò̤ tû̌ ana̤, “Kǒ꤮! khònò̤dě he kè̌shǐbǎ Cǒmara htě a kè̌shǐ he htǒotapwa̤ hǒ.” 14 Mî̌tǎ shikoǒ htǒotokoǒnu kò kaǎ nû̌ûmi̤ ta, Beralahè̌ro. Shikoǒ htǒonu a ǒ bǎ Kadeshǎ shihtǎpo̤ gûla̤ ta Berè̌wî̤ aplǎkûnu tǒ̤ khònò̤. (Beralahè̌ro amûasǎ mî̌ pwa̤htûpwa̤ htě a kè̌shǐ he htǒotapwa̤ ashikoǒ.) ^b

15 Dě Haka phû̌ǒnṳ bǎ Abra phû̌makhû tapwa̤, dě Abra kaǎ nû̌ûmi̤ ta Ǐshameělè. ^c 16 Bǎ Haka ta Abra phû̌ǒlò̤nṳ Ǐshameělè akhanu, Abra něǒ shilǐ̤sǒ ta něsusǒ hǒ.