Genesis 17

Ta̤dǔtṳphěkhi mî̌ ta̤wṳ̂dò ta̤ma̤dòǐ tacǎ

1Bǎ Abra něǒ lǐ̤sǒ tishi ta lǐ̤sǒtaně akhanu, Cǒmara tûjûpwa̤ ǒlṳhtò̌ bǎ yǎ dě a hî̌ nû̌û, “He mî̌ Cǒmara htě apo̤aphǎ ▼

▼Ebrephû̌ ayo̤ mî̌ “Ělashodè̌.”

tapwa̤. Gana̤de heyo̤ dě ǒhtûpwa̤ ma̤toma̤bǎ hesò̌phlǒ pṳ̂̌꤮ taplǎ nî̌꤮. ^b 2He ma̤měma̤gle he ta̤wṳ̂dò ta na htǒonu pě, dě he noǒplṳ̂ǒphǎ htò̌po̤ nakhlinalè pě.” ^c

3Hǐnudě Abra gene̤û̌lò̤ dě Cǒmara hî̌ nû̌û, 4“He ma̤ ta̤wṳ̂dòyo̤ ta na pwǐhè̌o, he olò̤mèlò̤tû̌ ta na htûplṳ̂ kòyò khlilèphû̌ apha pě. ^d 5Kò kaǎpe nami̤ ta Abra tò̤, kò kaǎkhǒ nami̤ ta Abraham pě, (Amûasǎ mî̌ khlilèphû̌ ǒplṳ̂ǒphǎ apha) Ma̤tè̤hî̌dě he nohtûhtò̌ na ta khlilèphû̌ apha hǒ. ^e 6He noǒwo̤ǒphǎhtò̌ nakhlinalè toǒ pě. He noǒhtò̌ khlilèphû̌ toǒ dě nakhlinalè akla pě, htohǒtò̤ Khwǐ toǒ ǒhtò̌ dě nakhlinalè akla pě. ^f 7He sò̌yṳ ma̤měma̤gle heta̤wṳ̂dò yo̤sǎ htǒo tûjûpwa̤ ta na ta nakhlinalè hǎte̤gilò̤ děnǒkò toǒ tuhtu hto tuhtu. He htû na Cǒmaradû̌ pě htohǒtò̤ he htû nakhlilè hǎte̤gilò̤ nǒkò toǒ acǒmara pěpě. ^g 8Khana̤ga tagabò htě na ǒǐtû̌ a sǒsǒta shigahǔwa̤khlophû̌ tapwa̤ khònò̤htǒonu, he ǐ yǎta na ta nakhlinalè hǎte̤gilò̤ nǒkò toǒ tûjûpwa̤ pě dě he htû asî Cǒmaradû̌ pě.” ^h

9Cǒmaradû̌ hî̌ Abraham, “Na lè̌dě, na bǎ pṳ̂gleměǐ heta̤wṳ̂dò yo̤sǎ ta na htǒonu, tû̌꤮ na mè̤tò̤, nakhlinalè hǎte̤gilò̤ nǒkò toǒ bǎ pṳ̂měǐdǒ ta̤wṳ̂dòyo̤sǎ htǒo pěpě. 10Ta̤wṳ̂dò htě na ta nakhlinalè hǎte̤gilò̤ nǒkò toǒ tobǎ pṳ̂gleměǐnu mî̌titè hî̌dě, sîkhlisîlè akla makhû toǒnu, a tobǎ dǔtṳphěkhi pě pṳ̂̌꤮ tapwa̤. ⁱ 11Sî bǎ dǔtṳphěkhi, dě ta̤dǔtṳphěkhi htǒonumî̌ a dǔlṳ sî ta he ta̤wṳ̂dò ta̤ma̤dòǐ tacǎ hǒ. ^j 12Bò꤮ makhû htě sîkhlisîlè akla a hǎte̤gilò̤ tuhtu hto tuhtu toǒnu, a dè beni̤lǐ̤sǒ hî̌dě a bǎ dǔtṳphěkhi. Dě kòyò htě a ǒlò̤ bǎ sîhǐdǒkûnu toǒ bǎbǎ, sîkhlilè mè̤tò̤nu toǒ bǎbǎ, shigahǔwa̤khlophû̌ pwǎ pwǎ̤tadě sî pwî̤ge asî ta wû pwǐ jûnu toǒ bǎbǎ, asî bǎ dǔtṳbòphě pṳ̂̌꤮ tapwa̤. ^k 13Jûmakhû htě a ǒlò̤ dě sîhǐdǒkû toǒnu bǎbǎ, sî pwî̤ge asî ta wûnu toǒ bǎbǎ, kò bǎ dǔtṳbò bǎ asîphě. Sî dè ma̤ hǐnudě heta̤wṳ̂dò htǒo a ma̤dòǐ sîphěsîyî̌lo̤ hǒ, dě a dǔlṳhtò̌ ta ta̤wṳ̂dòhtǒo a ǒměǒgle tûjûpwa̤ hǒ. 14Makhû tapwa̤pwa̤nu a dǔtṳ kû̌kò phě tò̤nu toǒ mî̌ a ma̤pî̌kè heta̤wṳ̂dò akhû̌akhî, bǎ phî̌htò̌kè ami̤ dě akhokòyò akla.”

15Cǒmaradû̌ hî̌po̤ Abraham, “Nama Sharǎ lè̌dě, na bǎ kaǎpe a ta Sharè̌ tò̤, bǎ kaǎkhǒ ami̤ ta Sharǎ pě. 16He howi̤ a pě dě a phû̌ǒlò̤ bǎ naya phû̌makhû tapwa̤ pě. He howi̤homò̤ a pě akhû̌akhî, a htû khlilèphû̌ toǒ amo̤ pě, htohǒtò̤ khlilèphû̌ Khwǐ toǒ ǒhtò̌ bǎ akhlilè aklanu pě.”

17Abraham gene̤û̌lò̤ ya̤ dě a hî̌lò̤ tû̌ asò̌phlǒkû, “Kòyò htě aněǒ ta̤ya̤ tapwa̤pwa̤ numî̌ a phû̌ǒjòpe ya? Sharǎ lè̌dě aněǒ lǐ̤sǒtishi dě mî̌ a phû̌ǒjòpe ya?” 18Htǒotaplǎ dě Abraham hî̌ Cǒmaradû̌, “Khòsò̌do nonî̤bǎ na ta̤howi̤nu ta hephû̌khû Ǐshumelǎnu tò̤̌꤮?”

19Dě Cǒmara hî̌ yǎ, “Tò̤, a bǎ mè̤ ta Ǐshameělè tò̤. Nama Sharǎhtǒo phû̌ǒnṳ bǎ na phû̌makhû tapwa̤ pě, dě na bǎ kaǎ ami̤ ta Isǎko pě. He ma̤měma̤gle heta̤wṳ̂dò ta a pě, dě ta̤wṳ̂dò htǒonu a mî̌ ta̤wṳ̂dò tûjûpwa̤ talakhǎ aya ta aphû̌li̤hǎte̤ nǒkò tuhtu hto tuhtu pě. (Isǎko amûasǎ mî̌ a ya̤, ma̤tè̤hî̌dě bǎ a gana̤de ta glè nî̤bǎ phû̌makhû akhanu, a ya̤.) ^l 20Ǐshameělè ayalè̌dě, he gana̤de na kwi he htǒohǒ. He howi̤ tû̌ a pě. He nophû̌ǒwo̤li̤ǒphǎ a pě dě akhlialè hǎte̤gilò̤ ǒplṳ̂ǒphǎ mè̤mè̤̌ pě. A htûtû̌ Khwǐphû̌ shǐsò̌gini̤ apha pě, dě he nohtûhtò̌ a ta khlilèphû̌dû̌ tacǎ pě. 21Pwǎ̤ta heta̤wṳ̂dò htǒonu, he ma̤měma̤gle Isǎko htě Sharǎ glè phû̌ǒ nû̌û htû̌꤮ něbǎ pwǐ khònò̤kha htǒonu pě.” 22Bǎ Cǒmaradû̌ hî̌bǎhto ta Abraham akhanu, a ge kihtò̌kè nû̌ûla̤.

23Bǎnu ti̤ni̤ hǒ, Abraham kaǎ aphû̌khû Ǐshumelǎ ta bò꤮ makhû htě a ǒlò̤ bǎ ahǐkûnu toǒ ta jû htě a pwî̤ nû̌ûta wû sîtoǒ ta bò꤮ makhûdû̌ ǒ bǎ ahǐkûnu toǒ dě a nodǔtṳbò asîphě pwǐ Cǒmaradû̌ mǎnǎ nû̌û yo̤nu. 24Bǎ kò dǔtṳ bǎ Abraham phěkhi akhanu, aněǒ lǐ̤sǒtishi ta lǐ̤sǒtaně hǒ. 25Aphû̌ Ǐshameělè dě aněǒ shǐsuně hǒ. 26Abraham ta aphû̌ Ǐshameělè sò̌gini̤bò a dǔtṳplǒ nû̌û phě ti̤ni̤pa. 27Bò꤮ makhû ǒ bǎ Abraham hǐkûnu toǒ ta bò꤮ kòyò htě a ǒlò̤ bǎ ahǐkûnu toǒ ta shigahǔwa̤khlophû̌ htě a pwî̤ge nû̌û toǒnu, asî dǔtṳplǒ nû̌û phěkhi ta Abraham ti̤ni̤pa pwǎ.