Gen 23 | KxfSCKRC | STEP | Sharǎ něǒ aně ta̤ya̤ gini̤shi ta susǒtaně hǒ.

Genesis 23

Sharǎ si dě kò lǔnṳ nû̌û

1 Sharǎ něǒ aně ta̤ya̤ gini̤shi ta susǒtaně hǒ. 2 Dě bǎ aněǒ pwî̌nu akha a sikè bǎ Khana̤ga Kǐria arabawî̤nu, khònò̤dě kò kaǎ nû̌û ta Hebrowî̤nu. Dě Abraham hǎwoǐ nû̌û.

3 Htodě Abraham ǒ bǎ ama lṳto̤ kòshî̌nu dě a ihtǒcû̌ Hǐtǐ khlilèphû̌ toǒ aǒ dě a cû̌hî̌ asî, 4 “He mî̌ shihǔwa̤gakhlophû̌ tapwa̤ dě a hèǒkû̌ ta sî, shaǎpa̤ he ta sîlṳkhû̌ dě he ǒtò̤ lǔnṳ yǎta hema.” ^a

5 Dě Hǐtǐphû̌ toǒ hî̌geshǔ Abraham, 6 “Kǒ꤮ phadû̌, khòsò̌do gana̤de kû̌pû pa hî̌ htǒo, dě paklanu phadû̌ mî̌ sîrîshû̌shokhlo ta pa. Phadû̌ sò̌yṳ lǔnṳ mo̤dû̌ palṳkhû̌htǒonu awǒgutṳ̌ bǎtè tò̤glò tè꤮ bǎbǎ, jǔ꤮ tû̌ phadû̌ sò̌phlǒ pwǎ. Phadû̌ dè lǔnṳ mo̤dû̌ lṳto̤ bǎ palṳkhû̌ htǒo mî̌, tapwǎ̤꤮ kò ma̤dǐdò nǒ phadû̌ tò̤.”

7 Abraham ihtǒcû̌ dě a ta̤bè̌dubè̌na̤ akû a cû̌û̌gulò̤ Hǐtǐ khlilèphû̌ htě a ǒ bǎ ganu taga toǒ a lo̤mo̤. 8 Dě a hî̌ asî, “Sî dè sò̌phlǒ ǒ mè̤mè̤̌ nòta sî sò̌yṳ nolǔnṳ hema bǎo hî̌dě he hî̌ sî, gana̤de kû̌pû dě cû̌gwè bǎ he Soha aphû̌ Ephro htǒonu nî̌. 9 Noshaǎpa̤ he lo̤kû dě Mèpělǎ gûla̤ htě Ephro ahǔklahtunu tò̤glò. Ma̤pûhǐ a htûtû̌ helṳkhû̌ ayanu, a hî̌ ale̤apwî̤ pwî̌ tètè̌꤮ bǎbǎ, he ǐtû̌ apwî̤ dě sî htû phû̌jo htǒotoǒ alo̤mo̤ pě.”

10 Bǎ Abraham kwipwî̤ nû̌û hǔkla akhanu, Hǐtǐ khlilèphû̌ Ephro htǒo hǎnòò̌ akho sîtoǒ akla. Ma̤pûhǐ bò꤮ akhokhlilèphû̌ htě a hèǒhtuhî̌bǎplǒ wî̤takhadû̌htunu toǒ gana̤de ayanu, a hî̌shǔ Abraham dě asîlo̤mo̤. 11 Dě a hî̌, “Kǒ꤮ phadû̌, hǐnu mè̤ tò̤, khòsò̌do gana̤de kû̌pû he hî̌ htǒo, hǔkla bǎbǎ, lo̤kû bǎbǎ, he ǐkobò tû̌ta na he khlilèphû̌toǒ alo̤mo̤ dě lǔnṳ mò̌ yǎta mo̤dû̌ nunî̌꤮.”

12 Abraham ata̤bè̌dubè̌na̤ akû a û̌gulò̤ gesǒ Hǐtǐphû̌ toǒ alo̤mo̤. 13 A hî̌ Ephro dě kò pṳ̂̌꤮ pwa̤ alo̤mo̤, “Khòsò̌do, gana̤dewǐ he hî̌ na htǒo. He ǐtû̌ nahǔkla ale̤apwî̤. Ma̤pûhǐ he lǔnṳ yǎta hema ayanu, phî̌shǔ pû he ale̤apwî̤ htǒo nî̌꤮.”

14 Ephro hî̌shǔ Abraham, 15 “Phadû̌, gènè̤kè̌mò̌, hǔkla htǒomî̌ a pwî̤ǒ wûyî̌ shèke lǐ̤ya̤ pò̤̌ta he ta na mî̌ lo̤bǎhî̌ nû̌û ale̤apwî̤ tò̤, lǔnṳ mò̌ yǎta mo̤dû̌nu.”

16 Htǒotaplǎ dě Abraham sò̌phlǒto ta Ephro hî̌ nû̌û apwî̤ htǒonu hǒ. Dě a jèbǎ nû̌û wûyî̌ shèke lǐ̤ya̤. Wûyî̌ shèke lǐ̤ya̤ htǒomî̌ Ephro pwe̤ǐlṳ bǎ Hǐtǐphû̌ toǒ alo̤mo̤nu hǒ. A jè wûyî̌ pwǐ kò pwî̤shaǎ nû̌û dě klǎkû asî htukhanu.

17 Abraham pwî̤kè Ephro hǔkla Mèpělǎ gûla̤, a ǒphǔ ta Mè̌mare nutò̤glò. Dě a ǒpa dǒbò ta lo̤kû ta bò꤮ sǒmṳwû̌bo ǒ bǎ hǔklakuhtunu toǒ. 18 Hǐnudě hǔklahtǒo a htûhtò̌kèbò Abraham ata hǒ. Dě Hǐtǐphû̌ lǒ̤꤮ bò htě a hè ǒplǒbò bǎ wî̤takhadû̌htunu toǒ sî̌ya to̤mǎǐkèbò ta Abraham pwî̤ htohǒ. 19 Abraham pwî̤ htodě a lǔnṳkè nû̌ûta ama Sharǎ bǎ Khana̤ga Mèpělǎ lo̤kû htě a ǒphǔ ta Mè̌mare nutò̤glò. Khònò̤dě Mè̌mare agûla̤ mî̌ Hebrowî̤ htǒonu hǒ. 20 Hǐnudě Hǐtǐphû̌ ahǔkla ta lo̤kû htǒonu a htûhtò̌kè Abraham ata dě ala̤lǔnṳ nû̌ûta lṳ gûla̤ hǒ.