Genesis 28
Isǎko nocû̌ Yǎ̤kò dě Laba aǒ
1Hǐnudě Isǎko kaǎhè Yǎ̤kò dě a hî̌mo̤hî̌wǒkè nû̌û htohǒtò̤ a mǎnǎ nû̌û yo̤, “Na bǎ phî̌nṳ ta mamǔ bǎ Khana̤gakû htǒonu dǐpwǎ̤꤮ tò̤. 2Cû̌phwè taplǎpa cû̌mò̌ namo̤ apha Betuělè ǒ ǐ Pada aragakûnu. Dě cû̌phî̌ nama bǎnu, dě phî̌gesǒtû̌ ta naphadû̌ Laba aphû̌mamǔ sîtoǒ akla tapwa̤ nî̌. 3Cǒmara htě apo̤aphǎ htǒotapwa̤ howi̤homò̤tû̌ na pě nî̌꤮. Dě na phû̌ǒwo̤li̤ǒphǎtû̌ dě ǒwo̤ǒhtò̌ lǒkho nî̌꤮, dě na htûhtò̌ kû̌tû̌ khlilèphû̌dû̌꤮ tacǎ ta khlilèphû̌ pṳ̂̌꤮ cǎ apha toǒ pě. a 4Ma̤pûhǐ na nî̤bǎ shiga htě Cǒmaradû̌ ǐ nû̌ûta napha Abraham dě na ǒǐyǎ a pwǐ shǐtè̤mè̤ htǒotaga ayanu, ta̤howi̤homò̤ htě Cǒmaradû̌ ǐ Abrahamnu a ǐtû̌ na ta nakhlinalè htǒotoǒ nî̌꤮.” b 5Htodě Isǎko nocû̌ Yǎ̤kò dě Ribè̌ka awè̤ Laba ǒǐ Pada araganu taga. Betuělè mî̌ Laba ta Ribè̌ka apha dě a mî̌ Aramǐ khlilèphû̌. Ribè̌ka mî̌ Yǎ̤kò ta Ětò̌ amo̤.Ětò̌ phî̌po̤ ama tapwa̤
6Khònò̤ Ětò̌ sî̌ya ta apha Isǎko howi̤ apṳ Yǎ̤kò dě a sûcû̌ nû̌û Pada araga ta a nocû̌phî̌ nû̌ûma bǎnu hǒ. Dě Ětò̌ sî̌yapo̤ ta bǎ apha howi̤ Yǎ̤kò akhanu a hî̌ nû̌û, “Na bǎ phî̌nṳ ta Khana̤gamo̤ tò̤.” 7Yǎ̤kò gana̤de amo̤aphayo̤ dě a hǎhtò̌cû̌kè Pada araganu, Ětò̌ sî̌ya te̤mǎkèhǒ. 8Htohǒtò̤ khònò̤dě Ětò̌ sî̌ya te̤mǎpo̤ ta apha Isǎko sò̌yṳ nophî̌ aphû̌makhû toǒ ta Khana̤mo̤ tò̤. 9Htǒotaplǎ dě Ětò̌ hǎhtò̌cû̌phî̌po̤ ama ta Ǐshameělè aphû̌mamǔ Mahalǎ, Abraham ali̤mamǔ, Nabayǒ a pṳmamǔ. Ětò̌ maǒhtotû̌ toǒhǒ pwǎ̤ta a cû̌phî̌po̤.Yǎ̤kò hǎmoǒmi̤mò̤ Betelǎ gûla̤
10Yǎ̤kò ǒ Berashabǎga dě a hǎhtò̌cû̌kè bǎ Harawî̤. 11Bǎ a cû̌to̤ gûla̤ tò̤glò akhanu, lṳmṳhǎlò̤ lǎ nû̌û akhû̌akhî, a hǎmoǒkè bǎnu tasa. Dě a phî̌ lo̤ tama dě a ma̤ nû̌ûta ala̤hǎmoǒkhû̌khǒ dě a hǎmoǒ bǎnu. 12Dě a hǎmoǒmi̤mò̤ ta a kè̌shǐ khǔbo tabo ǒ hǎkhû̌ dě a po̤htò̌to̤ mǒkhû̌, dě Cǒmaradû̌ atanaphû̌ sîtoǒ kihtò̌kilò̤ lǒkho bǎnu. c 13Cǒmara tûjûpwa̤ ihtǒ ǒ khǔbokhi dě a hî̌, “He mî̌ Cǒmara tûjûpwa̤ htě a mî̌ naphi Abraham acǒmaradû̌ ta napha Isǎko acǒmaradû̌ tapwa̤hǒ. Ga htě na hǎmoǒ ǐyǎ a khònò̤htǒo taganu, he ǐ yǎta na ta nakhlinalè toǒ pě. d 14Nakhlilèhtǒo a ǒwo̤ǒphǎ sǒsǒta hǎmǔ bǎ hǎkhû̌nu toǒ pě. Asî ǒpîshî cû̌bòtû̌ mṳhtò̌ mṳlò̤ cǔmû cǔcî̌ pě. Dě na ta nakhlilèhtǒo akhû̌akhî, khlilèphû̌ dě hǎkhû̌ htǒotoǒ lǒ̤꤮ bò nî̤bǎ tṳtṳ kû̌ ta̤howi̤homò̤ pě. e 15Dě nacû̌ bǎtè tò̤glò tè꤮ bǎbǎ, he ǒkû̌ ta na pě, he ma̤kwaǐ tû̌ na pě. He kaǎ gesǒtû̌ na bǎ gahtǒo taga pě. Pwǐ he olò̤hto na htǒonu, a dè lǒbehtò̌ hǒtò̤ hî̌mî̌, he wîkè nǒ na tò̤,” Cǒmaradû̌ hî̌ Yǎ̤kò hǐnu. 16Dě bǎ Yǎ̤kò shî̌nǎ akha, a hî̌, “Kǒ꤮ Cǒmara tûjûpwa̤ ǒ mè̤mè̤̌ bǎo lè, a ǒ bǎo dě he sî̌ya tò̤tò̤.” 17A ǐsha dě a hî̌, “Kǒ꤮ gûla̤ bǎo tò̤glò mî̌ sò̌gònò̤ ǐsha mè̤mè̤̌! Htǒomî̌ a sǒsǒnòta Cǒmaradû̌ ahǐ ta mǒkhû̌ atakhakûnu hǒ.” 18Anǒto̤wo̤ lṳmṳlîwosò꤮ akhanu, Yǎ̤kò ihtǒ dě a phî̌ lo̤ htě a hǎmoǒkhû̌khǒ ǐnu tama dě a doihtǒ ma̤dòǐkè ta ta̤sî̌yahtò̌. Dě ta̤bè̌cahtǐ lo̤ hǐnutama ayanu, a lò̌lò̤ htěshi dě lo̤ hǐnutama akhû̌. 19Dě a kaǎǐ gûla̤ bǎnu tò̤glò ami̤ ta Betelǎ, dě awǐkha wî̤nu tî̤wî̤ mî̌ kò kaǎ nû̌ûmi̤ ta Lṳ̌sawî̤. (Betelǎ amûasǎ mî̌ Cǒmaradû̌ ahǐ.) 20Dě Yǎ̤kò bè ayo̤ dě a hî̌, “Cǒmaradû̌ dè ǒkû̌ ta he, a dè ma̤kwaǐ he ta he cû̌yî̤klè̌ htǒotaplǎ, dě a dè ǐ he la̤ǎla̤o la̤kûla̤sǒ, 21Htohǒtò̤ he dè geto̤mo̤ geto̤wǒbò̌ gesǒ hepha ahǐ hî̌mî̌, Cǒmara tûjûpwa̤ htǒo a htû he Cǒmaradû̌ pě. 22Htodě lo̤ htě he doihtǒ ma̤dòǐkè yǎta ta̤sî̌yahtò̌nu tamanu, a htûtû̌ Cǒmaradû̌ ahǐ pě, ta̤ lǒ̤꤮ bò htě na ǐ he toǒnu, he ǐ gesǒ yǎta na apû̌shǐ tûpû̌ pě.”
Copyright information for
KxfSCKRC