Gen 33 | KxfSCKRC | STEP | Htodě Yǎ̤kò kè̌cû̌ dě a kè̌shǐ Ětò̌ ta akòyò makhû lǐ̤ya̤ hè dě aǒ. Hǐnudě a bè̌ǒkhǒkè tû̌ Le̤a ta aphû̌toǒ, Rakhelǎ ta aphû̌ toǒ ta ajûmo̤nu sò̌gini̤ aphû̌toǒ hǐnu.

Genesis 33

Yǎ̤kò kè̌shǐglashǔ ta awè̤ Ětò̌

1 Htodě Yǎ̤kò kè̌cû̌ dě a kè̌shǐ Ětò̌ ta akòyò makhû lǐ̤ya̤ hè dě aǒ. Hǐnudě a bè̌ǒkhǒkè tû̌ Le̤a ta aphû̌toǒ, Rakhelǎ ta aphû̌ toǒ ta ajûmo̤nu sò̌gini̤ aphû̌toǒ hǐnu. 2 A bè̌ ajûmo̤nu sò̌gini̤ ta aphû̌ toǒ dě alo̤mo̤gutṳ̌, htodě a bè̌ Le̤a ta aphû̌ toǒnu akǎmakû, dě Rakhelǎ ta aphû̌ Jǒjè dě a bè̌ nû̌û nǒkò. 3 Yǎ̤kò sana̤ tû̌nu a cû̌gutṳ̌ nû̌û lo̤mo̤ dě bǎ a hèphǔ awè̤ ǒ akha, a dǔlṳ ata̤bè̌dubè̌na̤ ta awè̤ dě a hè ta a û̌gene̤lò̤ a hè ta a û̌gene̤lò̤ hǎkhû̌ susǒtaplǎ.

4 Ětò̌ lè̌dě a khlè̌hè kè̌shǐshǔ apṳ Yǎ̤kò dě a hèphǒmě gomo̤ nû̌û, htodě asî sò̌gini̤bò a hǎplǒ lǒkho nû̌û bǎnu. 5 Ětò̌ kè̌cû̌ dě a kè̌shǐcû̌ mamǔ ta phijaû̌ toǒ dě a gwè nû̌û, “Kòyò htě a geplǒkû̌ ta nanu toǒ mî̌ kwè̌꤮ ûpè?”

Dě Yǎ̤kò hî̌shǔ nû̌û, “Asî mî̌ hephû̌ sîtoǒ htě Cǒmaradû̌ ǐlò̤ najû mî̌ he htǒo aya toǒ hǒ.”

6 Htodě jûmo̤nu sò̌gini̤ ta aphû̌ toǒ hèphǔ Ětò̌ ǒ dě a dǔlṳ ata̤bè̌dubè̌na̤ dě a hègene̤û̌lò̤ lǒkho hǎkhû̌. 7 Sǒsǒ hǐnuhǒ Le̤a ta aphû̌ toǒ dǔlṳ ata̤bè̌dubè̌na̤ dě a hègene̤û̌lò̤ lǒkho dǒdǒ, htodě agutṳ̌lò̤nu Rakhelǎ ta aphû̌ Jǒjè dǔlṳpo̤ dǒ ata̤bè̌dubè̌na̤ dě a hègene̤û̌lò̤ dǒdǒ.

8 Ětò̌ gwèpo̤ nû̌û, “Na cû̌sûhè ta̤phû̌ta̤li̤ heǒ bǎotoǒ mî̌ nata̤yè̤lò̤ ǒ hî̌tè?”

Dě Yǎ̤kò hî̌shǔ nû̌û, “Ma̤pûhǐ heběcǎ glè sò̌phlǒmo̤ hekhû̌ ayanu dě he sûgewǐ bǎ naya sû toǒ pwǎ.”

9 Pwǎ̤ta Ětò̌ hî̌shǔ nû̌û, “Kǒ꤮ hepṳ, heta ǒlǒǒbebò tû̌ hǒ, bò꤮ ta̤ htě a ǒ ta nanu toǒ tûrû̌꤮ phî̌bòtû̌ mò̌ yǎta nayanu.”

10 Yǎ̤kò hî̌po̤ nû̌û, “Mè̤tò̤, khòsò̌dodě tûrû̌꤮ phî̌ mò̌. Na dè kè̌mo̤ he hî̌dě phî̌shǔkû̌ he sûhtǒo. Khònò̤htǒo he kè̌shǐ nami̤sǎ ta nata̤kaǎshǔ he htǒodě, a sǒsǒta he kè̌shǐ Cǒmaradû̌ ami̤sǎ. 11 Khòsò̌do phî̌shǔkû̌ mò̌ sû htě he phî̌ge bǎ nanu, ma̤tè̤hî̌dě Cǒmaradû̌ ma̤bwǐma̤sîrî plṳ̂ he akhû̌akhî, he lo̤bǎ titètè̌꤮ mî̌ heta ǒlǒǒbe lǒ̤bò.” Yǎ̤kò hî̌ tûkûla̤ nû̌û dě a phî̌shǔ gesǒ nû̌û.

12 Dě Ětò̌ hî̌ nû̌û, “Cû̌ pa cû̌ sělěpo̤ hò̌꤮, dě he cû̌ kû̌ta na.”

13 Pwǎ̤ta Yǎ̤kò hî̌ nû̌û, “Heběcǎdû̌ sî̌yatû̌ ta phijaû̌phû̌ toǒ mî̌ anějalajape. Htohǒtò̤ he bǎ kè̌ǐkhwè̌ǐwǒpo̤ hesophû̌mo̤ ta pṳ̂mo̤ htě aphû̌ onû̌pe nû̌ûnu toǒ. Ti̤ni̤ akû, pa dè bocû̌ shosho asî hî̌mî̌, ta̤phû̌ta̤li̤ lǒ̤꤮ bò htǒotoǒ mî̌ a sibò pě. 14 Běcǎdû̌, khòsò̌do tûrû̌ ge wǐmò̌ he mî̌ najû htǒo, sò̌dodo꤮ he gûge kû̌tû̌ ta heta̤phû̌ta̤li̤ ta phijaû̌phû̌ htǒotoǒ nǒkò pě. Dě he ge kè̌shǐ glashǔ ta běcǎdû̌ bǎ Serǎganu pě.”

15 Ětò̌ hî̌ nû̌û, “Dèhî̌hǐnudě he bè̌kèdǒ bǎ na ta hekòyò toǒ.”

Dě Yǎ̤kò hî̌shǔ nû̌û, “A lo̤bǎ bè̌kè nǒtò̤, Na kaǎshǔ kaǎwǒ he htǒonumî̌ a lǒbetû̌ hǒ.”

16 Gutṳ̌lò̤nu Ětò̌ getîkhîsǒ Serǎga bǎnu ti̤ni̤ hǒ. 17 Yǎ̤kò lè̌dě a ge Sukǒwî̤ dě a ge ma̤htò̌ ahǐ ta ta̤phû̌ta̤li̤ apo̤ toǒ bǎnu. Hǐnudě kò kaǎkè gûla̤ bǎnutò̤glò ta Sukǒwî̤. (Sukǒ amûasǎ mî̌ ta̤phû̌ta̤li̤ apo̤.)

18 Nǒkòdě Yǎ̤kò cû̌ǒ tṳtṳpo̤ Pada araga dě a geto̤mo̤geto̤wǒ Khana̤gakû Shekewî̤, dě a ma̤htò̌ hǐphû̌ bǎ wî̤nu tî̤wî̤ akòshî̌. ^a 19 Hǎkhû̌ htě a ma̤htò̌ hǐphû̌nu tò̤glò mî̌ a pwî̤ bǎ Sheke apha, Hamo aphû̌ sîtoǒ aǒ dě a pwî̤ nû̌ûta wûyî̌ ta̤ya̤. ^b 20 Dě a tèhtò̌ ta̤lṳwa̤ tawa̤ ta lo̤ bǎnu tò̤glò dě a kaǎ nû̌ûmi̤ ta Ěla Elohe Israel. (Amûasǎ mî̌ Israelphû̌ acǒmaradû̌ htǒomî̌ Cǒmara.)