Genesis 34

Kò ma̤phû̌mò̤ Dǐna

1Ti̤ni̤kha, Yǎ̤kò ta Le̤a aphû̌mamǔ Dǐna hǎhtò̌cû̌ ǒlèbǒsû̌ kû̌ mamǔ toǒ bǎ gakûnu. ^a 2Bǎ pwa̤pǒshipǒga Hǐwǐ khlilèphû̌ Hamo aphû̌ Sheke kè̌shǐ nû̌û akhanu, a kaǎcû̌kè nû̌û dě a cû̌ma̤phû̌mò̤kè nû̌û. 3A sò̌yṳ Yǎ̤kò aphû̌ Dǐna, dě a hî̌bǎ lǒplò̤ Dǐna dě a glè sò̌yṳ nû̌û. 4Dě Sheke hî̌ apha Hamo, “Ma̤pûhǐ mamǔ htǒotapwa̤ htû hema ayanu, tîwî̌ bǎ mò̌ he.”

5Bǎ Yǎ̤kò gana̤de ta Sheke ma̤phû̌mò̤ aphû̌ Dǐna akhanu, aphû̌makhû toǒ hègèǐpe lǒkho ata̤phû̌ta̤li̤ toǒ dě mi̤kla akhû̌akhî, a hî̌ dǐcǎ꤮ tò̤, pwǎpwǎ꤮ a ǒ to̤htû̌ aphû̌ toǒ geto̤ dě hǐ.

6Ma̤hǐnudě Sheke apha Hamo hǎhtò̌cû̌ hî̌bǎ ta Yǎ̤kò. 7Taplǎpa Yǎ̤kò aphû̌ toǒ gana̤de ta̤wi̤ta̤kè̌ htǒo ta asî ǒ mi̤kla dě a gebò hǐ. Dě asî sò̌phlǒsha mè̤mè̤̌ dě a sò̌phlǒdû̌ jòjî̌꤮ lǒkho tò̤. Ma̤tè̤hî̌dě Sheke cû̌cǐma̤phû̌mò̤kè Yǎ̤kò aphû̌mamǔ pwǐhè̌onumî̌ ta̤sòwò̤ dû̌꤮ na̤cè̌ tacǎ ta Israel htǒotṳmṳ tacǎ aya, dě ta̤ma̤ pwǐhè̌o toǒnu a to ma̤tò̤.

8Pwǎ̤ta Hamo hî̌ asî, “Hephû̌ Sheke sò̌phlǒǒ naphû̌mamǔ htǒo, dě khòsò̌do htû̌ bǎpû a ta ama hò. 9Ma̤khòmò̤ǐ nû̌û hò, htû̌ bǎ naphû̌mamǔ ta pa, dě sî phî̌ lè̌tû̌ paphû̌mamǔ hò. 10Sî cû̌ǒ kû̌ pakla mî̌ anî̤nî̤, sî sò̌yṳ ǒ bǎtè tò̤glò tè꤮ bǎbǎ anî̤ pwǎ. Ǒ kû̌ lǒkho bǎo dě ma̤guma̤khè̌ pwî̤sha lǒkhotû̌, pwî̤nǎ lǒkho hǎkhû̌ bǎo.” Hamo hî̌ hǐnu.

11Htodě Sheke hî̌ Dǐna apha ta awè̤makhû toǒ, “Khòsò̌do phî̌shǔpû heta̤sò̌yṳ htǒo dě sî kwi he titètè̌꤮ bǎbǎ, he ǐtû̌ sî pě. 12Pwa̤khòmò̤mamǔ tokho aya bǎbǎ, asû aya bǎbǎ, sî sò̌yṳ kwi ale̤apwî̤ pwî̌tè bǎbǎ kwi mò̌, he ǐtû̌ pwî̌꤮ sî kwinu pě. Htû̌ pwǎ he ta Dǐna htǒomî̌ pǒhǒ.”

13Sheke ma̤phû̌mò̤hto asî pṳ Dǐna akhû̌akhî, Yǎ̤kò aphû̌makhû toǒ hî̌lǒhî̌plò̤ geshǔ Sheke ta apha Hamo pwǐhè̌o: 14Dě asî hî̌, “Pa htû̌jò papṳmamǔ ta pwa̤ htě a dǔtṳ kû̌kò phě tò̤nu toǒ tò̤. Pa dè htû̌ hî̌mî̌, a htûhtò̌ ta̤sòwò̤dû̌ ta paya pě. ^b 15A ǒ pwǎ tacǎpa, lǒ̤꤮ bò makhû dě sîkhlisîlè aklanu toǒ dè dǔtṳ kû̌bò asîphě pwǐ pahtǒo mî̌, pa jûkû̌ pwǎ. 16Hǐnudě pa htû̌ paphû̌mamǔ toǒ ta sî pě dě pa phî̌ lè̌ ta sîphû̌mamǔ toǒ pěpě. Dě pa ǒplǒǒhtu dǒkû̌ ta sî dě pa htûhtò̌ kû̌tû̌ sî ta khlilèphû̌ tacǎpa pě. 17Pò̤̌ta sî dè jûbò̌ kû̌ dě sî dǔtṳphě htǒo tò̤ hî̌mî̌, pa kaǎgekèsǒ papṳmamǔ pě.”

18Asî ata̤pwe̤ǐ htǒo atoabǎ Hamo ta aphû̌ Sheke asò̌phlǒ. 19Sheke sò̌yṳtûlû̌shû̌ Yǎ̤kò aphû̌mamǔ akhû̌akhî, pwǐ asî hî̌ nû̌ûnu a ma̤pò̤ya̤pò̤shape tò̤. Dě a ǒ ǐ wî̤kû lǒ̤꤮ bò numî̌ kò bè̌dubè̌na̤ mè̤mè̤̌ nû̌û. 20Htohǐnudě Hamo ta aphû̌ Sheke cû̌ asî wî̤takhadû̌ la̤ǒhtuhî̌bǎplǒ kè̌shǐshǔ nû̌û agûla̤ dě a cû̌hî̌bǎ ta makhû bǎnu toǒ. 21Dě asî hî̌, “Yǎ̤kò ta aphû̌ sîtoǒ mî̌ a bǒsû̌khǎkho pwǎta pa, pa ǐǒ asî pashipagakû dě nocû̌noge ma̤guma̤khè̌ peletû̌ asî hò꤮, ma̤tè̤hî̌dě hǎkhû̌gûla̤ htě pagakû htǒo a ǒdǎlè̤pe ta asîla̤ǒ ya. Pa khòmò̤ kû̌ta asîkhlilè phû̌mamǔ toǒ dě asî khòmò̤ kû̌ta paphû̌mamǔ toǒ mî̌ anî̤nî̤. 22Tû̌꤮ tacǎpa htě pa lo̤bǎ ma̤ mî̌ mî̌pwǎ pamakhû lǒ̤꤮ bò htǒotoǒ dè dǔtṳ kû̌ phě pwǐ asînu hî̌mî̌, asîsò̌phlǒ to kû̌ta a htûhtò̌ kû̌tû̌ pata khlilèphû̌ tacǎ꤮ pa pě. 23Pa dè ma̤hǐnu hî̌mî̌, asîta̤phû̌ta̤li̤ ta asîta̤kî̌ta̤kû̌ toǒ htûhtò̌ pata pě, mè̤ tò̤ya? Ma̤hǐnudě pa jûkû̌ pwǐ asî hî̌ panu hò꤮, dě asî ǒdǒ kû̌tû̌ ta pa pě.”

24Lǒ̤꤮ bò makhû htě a hǎhtò̌cû̌ǒ lǒkho wî̤takhadû̌htunu toǒ sò̌phlǒto kû̌bò Hamo ta aphû̌ Sheke hî̌ asî toǒ, dě lǒ̤꤮ bò makhû htě a ǒ bǎ wî̤kûnu toǒ a dǔtṳbò lǒkho aphě.

25Nǒkò suni̤ ti̤ni̤nu, asî dǔtṳphě dě ashasadape asî akha, Yǎ̤kò aphû̌makhû, Simeo ta Lě̤wǐ, Dǐna awè̤makhû sò̌gini̤htǒo phî̌nṳ lǒkho nǒshe tapwa̤ tabǎ htě kò gènè̤to̤ dǐcǎ꤮ tò̤ akû a cû̌nṳ sumṳ lǒkho wî̤nu tî̤wî̤ akû, dě a cû̌nṳ pe̤si bòmṳ̂sîglî makhû ǒ bǎ wî̤kûnu toǒ pṳ̂̌꤮ tapwa̤. ^c 26Asî pe̤si Hamo ta aphû̌ Sheke ta nò̌she dě a cû̌ kaǎ gesǒ Dǐna Sheke ahǐ dě a hǎhtò̌gekè lǒkho. 27Yǎ̤kò aphû̌makhû ahǔwa̤ toǒ hènṳ kè̌shǐ ta makhû toǒ sibò bǎ wî̤nu tî̤wî̤ akû. Dě wî̤nu tî̤wî̤ ma̤phû̌mò̤ asî apṳmamǔ akhû̌akhî, asî phî̌sigwibò kòta̤dû̌yò̤htò̌sa. 28Lǒ̤꤮ bò kòsophû̌ ta pè̤ toǒ ta kòpṳ̂pa̤na̤ ta kòmòû̌lǎ toǒ, ta lǒ̤꤮ bò ta̤ htě a ǒ bǎ wî̤kûnu toǒ bǎbǎ, wî̤khlo hǔklakhû̌nu toǒ bǎbǎ, a phî̌geǐ lǒ̤bò. 29Asî phî̌geǐbòpo̤ kòta̤dû̌yò̤htò̌sa toǒ ta kòphû̌kòma kòphû̌kòli̤ toǒ lǒ̤꤮ bò. Htohǒtò̤ a phî̌sigwige lǒ̤꤮ bò a ǒ bǎ hǐdǒkûnu toǒ.

30Dě Yǎ̤kò hî̌ Simeo ta Lě̤wǐ, “Sî ma̤pò̤ma̤sha mè̤mè̤̌ he, Khana̤ khlilèphû̌ ta Perisǐ khlilèphû̌ htě a ǒ bǎ gakû htǒo toǒ sò̌khěkhû̌khwè mè̤mè̤̌ he pě hǒ. Pakòyò ǒ pî̌tî̌ pwǎ, asî dè nî̤dû nû̌û dě a dè hèshě lǒkho he hî̌mî̌, a ma̤pî̌ma̤lṳ̂ ma̤sima̤hǎmǎ lǒ̤bò he ta hehǐphû̌phòphû̌ toǒ pě hǒ.”

31Pò̤̌ta asî hî̌shǔ lǒkho, “A cû̌ma̤ papṳmamǔ pwǐ mamǔpò̤lò̤ tapwa̤ numî̌ atoabǎ ya?”