Genesis 38

Yṳ̌da ta Tama

1Bǎnukha, Yṳ̌da bè̌kè apṳawè̤sî toǒ a lò̤cû̌ǒkhǒkè dě Adulamǐwî̤ bǎ Hǐrǎ ǒǐnu tî̤wî̤. 2Dě bǎ Yṳ̌da ǒ bǎnu akha a kè̌shǐ Khana̤ khlilèpha Shua aphû̌mamǔ tapwa̤. Dě Yṳ̌da phî̌ nû̌û ta ama dě a hǎmoǒhtu nû̌û. 3Htodě a mo̤do a phû̌ǒnṳ aphû̌makhû tapwa̤, dě Yṳ̌da kaǎ nû̌ûmi̤ ta Ěra. 4A mo̤dopo̤ taplǎ dě a phû̌ǒnṳpo̤ aphû̌makhû tapwa̤, dě a kaǎlè̌ nû̌ûmi̤ ta Ò̌na̤. 5A phû̌ǒpo̤ tapwa̤ dě a kaǎpo̤ nû̌ûmi̤ ta Shelǎ. Bǎ a phû̌ǒnṳ Shelǎ akhanu, asî ǒ lǒkho bǎ Khesěbawî̤. 6Yṳ̌da htû̌bǎ aphû̌wè̤pwa̤ Ěra ama tapwa̤, dě ami̤ ta Tama. 7Pwǎ̤tadě Yṳ̌da aphû̌wè̤pwa̤ Ěra htǒo asò̌phlǒ phû̌mò̤shî̌hto mè̤mè̤̌ dě Cǒmara tûjûpwa̤ alo̤mo̤ akhû̌akhî, Cǒmara ma̤sikè nû̌û. 8Htǒotaplǎ dě Yṳ̌da hî̌ aphû̌makhû Ò̌na̤, “Pala̤klo ǒ ta, ma̤pûhǐ nakhi phû̌ǒ bǎ nawè̤ ayanu ta̤ma̤ lò̤bǎ nakhû̌ hǒ. Hǐnu akhû̌akhî nṳmò̌, nṳhǎmoǒhtumò̌ ta nakhi dě ma̤lǒma̤be tû̌mò̌ ta̤lò̤bǎ nakhû̌ htǒonu.” 9Pwǎ̤tadě Ò̌na̤ sî̌ya ta phû̌ toǒ dè ǒpě hî̌mî̌, a htû ta aphû̌ mè̤tò̤ akhû̌akhî, ma̤pûhǐ a phû̌ǒ bǎ awè̤ aya tò̤nu, pṳ̂̌plǎplǎ bǎ a nṳhǎmoǒhtu ta akhi akhanu a plûhtò̌kè ata̤khlishi akhlo. 10A ma̤ ta̤ htǒotoǒnu, a phû̌mò̤shî̌hto dě Cǒmara tûjûpwa̤ alo̤mo̤ akhû̌akhî, Cǒmara tûjûpwa̤ ma̤sipo̤kè nû̌û.

11Htǒotaplǎ dě Yṳ̌da ǐsha ta aphû̌ Shelǎ sikû̌po̤ pwǐ awè̤sînu toǒ hè̌ a gènè̤ dě a hî̌ adè̌ Tama, “Geǒkû̌pû pwǐ mamǔǒkhwè̌ tapwa̤ dě napha ahǐnu to̤htû̌ hephû̌ Shelǎ tolò̤te̤hǐlò̤te̤phò pěnu nî̌꤮.” Hǐnuakhû̌akhî Tama geǒkû̌ gesǒ ta apha sî.

12Dě nǒkò ayî̤ tîkî̌ akhanu Shua aphû̌mamǔ, Yṳ̌da ama sikè dǒ hǒhǒ. Bǎ Yṳ̌da sǎpla̤pǒ akhanu, a kaǎnṳ akho Adulamǐwî̤phû̌ Hǐro dě a cû̌ ǒlè lǒkho Tǐmanǎhawî̤ pwa̤dî̌ bǎ nû̌ûsophû̌shû̌nu tapwa̤ aǒ. 13Bǎ kò pwe̤ǐ bǎ Tama ta, “Nami̤pwa̤ cû̌dî̌ asophû̌shû̌ Tǐmanǎhawî̤ dě acû̌ klè̌lo̤ hǒ,” hǐnu akha, 14A htû̌lè̌kè amamǔǒkhwè̌ hǐdo htodě a hǔbǐ ana̤ ta hǔgòpwî̌ la̤hǔbǐ ta mi̤sǎ, a jîsûlû ana̤ hǐnu dě a cû̌ hǎnòò̌lò̤ bǎ Ěnewî̤ takhadû̌htu, la̤cû̌ Tǐmanǎhawî̤nu tobo. Ma̤tè̤hî̌dě a sî̌ya ta Shelǎ dû̌htò̌ tophî̌ ma hǐnudě ami̤pwa̤ htû̌bǎ nû̌û ta Shelǎ tò̤tò̤. 15Bǎ Yṳ̌da kè̌shǐ nû̌û akhanu a hǔbǐ ami̤sǎ akhû̌akhî, a gènè̤ nû̌û ta mamǔpò̤lò̤. 16Mamǔ htǒotapwa̤ mî̌, adè̌ pwǎnu a sî̌ya tò̤ akhû̌akhî, a cû̌to nû̌ûǒ dě a hî̌ nû̌û, “He sò̌le̤ hǎmoǒhtu ta na,”

dě Tama gwèshǔ nû̌û, “Na dè hǎmoǒhtu ta he hî̌dě na glè̌ ǐ he titè pě?”

17“He sûhè bǎtû̌ na pè̤ tolophû̌ dě hesophû̌ ta pè̤mṳkûnu tado pě,” a hî̌shǔ nû̌û hǐnu.

Dě Tama gwèpo̤ nû̌û, “Bǎ na sûhè bǎ he pè̤ hǒtò̤ akhanu, na ǐmǎnǎ pû he ta̤le̤dû̌pwî̤htû tacǎcǎ pě ya?”

18Yṳ̌da hî̌shǔ yǎ, “He tobǎ ǐnǎwǐkè na titè?”

Dě a hî̌shǔ nû̌û, “Ǐmǎnǎkè he ta nata̤ma̤dòǐ htě a ǒhtu ta nami̤ la̤kǒlo̤ǐ htǒonu ta na nò̌htǒ dě nacǔdekû htǒonu.” Hǐnuakhû̌akhî a ǐkèbò nû̌û dě a hǎmoǒhtukè nû̌û, dě anǒkònu a mo̤dokè. 19Htodě Tama ihtǒgesǒ ahǐ dě a plû̌lò̤te̤kè hǔgòpwî̌ htě la̤hǔbǐ nû̌ûta ami̤sǎnu, dě a kûsǒhtò̌ gesǒ mamǔǒkhwè̌ hǐdo.

20Bǎ Yṳ̌da geto̤ ahǐ akha, a nocû̌ǐ akhobǒsû̌ Adulamǐwî̤phû̌ Hǐro pè̤ tolophû̌ tado ta mamǔnu tapwa̤, dě a nocû̌ phî̌gesǒ nû̌û ta a ta̤kî̌ta̤kû̌ htě a ǐmǎnǎkè nû̌ûta Tamanu toǒ, pwǎ̤ta Hǐro cû̌kè̌shǐ Tama tò̤. 21Dě a gwè kòyò ǒ bǎnu toǒ, “Mamǔpò̤lò̤ htě a hǎnòò̌lò̤ bǎ Ěnewî̤ klè̌dû̌htu htǒo tapwa̤ lè?” Dě asî hî̌shǔ nû̌û, “Mamǔpò̤lò̤ ǒnǒ bǎo dǐpwǎ̤꤮ tò̤.”

22Hǐnuakhû̌akhî a gesǒ Yṳ̌da ǒ dě a ge hî̌ nû̌û, “He kè̌shǐ a dǐglò̌꤮ tò̤, htohǒtò̤ kòyò htě a ǒ bǎnu toǒ hî̌ lǒkho he ta, ‘Mamǔpò̤lò̤ ǒnǒ bǎo dǐpwǎ̤꤮ tò̤.’”

23Yṳ̌da hî̌shǔ nû̌û, “Ta̤kî̌ta̤kû̌ htě he ǐmǎnǎkè yǎ toǒnu, a phî̌měǐkè tû̌ bǎbǎ, Pěmî̌ kò luya̤bò pa hè̌. He nocû̌sû na ta pè̤ tolophû̌ htǒo dě aǒ hǐnudě na kè̌shǐ a tò̤tò̤ nǔ.” 24A ǒ sula akhanu, kò hè pwe̤ǐ Yṳ̌da, “Nadè̌ Tama cû̌htû mamǔpò̤lò̤ dě a cû̌ ma̤sǔma̤plě ta̤ akhû̌akhî, a mo̤do hǒ.”

Dě Yṳ̌da sò̌phlǒdû̌ dě a hî̌lò̤ ayo̤, “Kaǎhtò̌ a kòlo̤mo̤ dě shû̌sikè a ta mî̌nu!”

25Bǎ kò kaǎhtò̌ Tama akhanu, Tama nocû̌sû ta̤kî̌ta̤kû̌ htǒoginǐ̤kǔ dě ami̤pwa̤ makhû aǒ, dě a nocû̌hî̌ kò ta, “He mo̤do ta ta̤kî̌ta̤kû̌ htǒotoǒ ana̤běcǎ hǒ, kè̌mò̌, la̤kǒlo̤ ta̤ma̤dòǐ htě a ǒhtu ta ami̤ htǒo ta nò̌htǒ htǒo mî̌ ûpèta pè?”

26Yṳ̌da to̤ǐ gesǒ ata̤kî̌ta̤kû̌ htǒotoǒ dě a hî̌, “A ma̤ta̤ htǒo atokhlo ta he, ma̤tè̤hî̌dě he tohtû̌ a ta hephû̌ Shelǎ dě he htû̌bǎ a tò̤nu.” Dě nǒkònu, a hǎmoǒhtupe ta Tama tò̤ hǒ.

27Bǎ a tophû̌ǒ akhanu, dě aphukûnu a phû̌ǒsègwè nû̌û. 28Bǎ a phû̌ǒ akhanu tapwa̤ mî̌ a yṳ̂htò̌wǐ acǔde tokho, dě pwa̤kè̌phû̌ǒnu tapwa̤ phî̌ lǔlî̤pi̤sǐ tobo dě a coměkè nû̌û cû̌golo̤ dě a hî̌, “Htǒomî̌ adû̌khlo tapwa̤.” 29Pwǎ̤tadě bǎ a yṳ̂nṳ gesǒ acǔde akhanu ahǔwa̤ tapwa̤ ǒhtò̌wǐ gesǒ nû̌û, dě pwa̤kè̌phû̌ǒnu tapwa̤ hî̌ phijaû̌ htě a ǒhtò̌wǐnu tapwa̤, “Na cû̌ ǒhtò̌phwèwǐ gesǒ ma̤tè?” A hî̌ dě, kò kaǎ phijaû̌nu tapwa̤ ami̤ ta Perè̌. (Perè̌ amûasǎ mî̌ ǒhtò̌phwè.) 30Htodě phijaû̌ htě kò coklomě nû̌û ta lǔlî̤nu tapwa̤ ǒhtò̌ nǒ nǒkò, dě kò kaǎ nû̌ûmi̤ ta Serǎ. (Serǎ amûasǎ mî̌ lî̤pi̤sǐ.)