Gen 40 | KxfSCKRC | STEP | Bǎ꤮ anǒkònu, kò htě Khwǐ yṳǎ nû̌û dě a okè̌bǎ Egyptga akhwǐ asobîshisî̌yo̤ ahǐkǒlǒkòdû̌ htǒo ta pwa̤ma̤ bǎ Khwǐmû̌ ahǐkǒlǒkòdû̌ htǒosò̌gini̤ ma̤sǔma̤plě lǒkho aběcǎ Egyptgakhwǐ htǒo.

Genesis 40

Jǒjè pwe̤ǐlṳ bǎ pwa̤lò̤te̤apo̤kû toǒ ata̤hǎmoǒmi̤mò̤ amûasǎ

1 Bǎ꤮ anǒkònu, kò htě Khwǐ yṳǎ nû̌û dě a okè̌bǎ Egyptga akhwǐ asobîshisî̌yo̤ ahǐkǒlǒkòdû̌ htǒo ta pwa̤ma̤ bǎ Khwǐmû̌ ahǐkǒlǒkòdû̌ htǒosò̌gini̤ ma̤sǔma̤plě lǒkho aběcǎ Egyptgakhwǐ htǒo. 2 Hǐnuakhû̌akhî, Khwǐ sò̌phlǒdû̌ mè̤mè̤̌ ahǐkǒlǒkòdû̌ htǒosò̌gini̤. 3 Dě Khwǐ pṳ̂ dǒlò̤te̤ asî apo̤kû. Dě apo̤ htǒonumî̌ aǒ pwa̤ǒpo̤ma̤kwaǐ Khwǐ ahǐkǒdû̌nu tapwa̤ ahǐ. Dě gûla̤ bǎnumî̌ tucupwǎ ta kò dǒlò̤te̤ Jǒjènu tò̤glò hǒ. 4 Dě pwa̤ǒpo̤ma̤kwaǐ Khwǐnu tapwa̤ nopǒ kè̌ǐkhwè̌ǐ asî ta Jǒjè dě Jǒjè khwè̌ǐ asî. Dě asî bǎ ǒ mṳni̤mṳsayî̤pe lǒkho bǎ apo̤kûnu. 5 Bǎ asî ǒ bǎ apo̤kû akhanu, tasakha, kò htě Khwǐ yṳǎ nû̌û dě a okè̌bǎ nû̌û asobîshisî̌yo̤ ahǐkǒlǒkòdû̌ ta pwa̤ma̤ bǎ Khwǐmû̌ hǐkǒlǒkòdû̌ dě kò dǒlò̤te̤ asî apo̤kû htǒosò̌gini̤ a hǎmoǒmi̤mò̤ po̤lǒkho tasa꤮ akû, dě tapwa̤꤮ ta tapwa̤ ata̤hǎmoǒmi̤mò̤nu aǒ tû̌ta amûasǎ.

6 Bǎ lṳmṳlî akhanu, Jǒjè cû̌ asî ǒ dě a kè̌shǐ ta asîsò̌phlǒpî̌bò lǒkho. 7 Dě Jǒjè gwè Khwǐ apwa̤ma̤ta̤ htě alò̤te̤kû̌ apo̤kû ta a dě aběcǎ ahǐkû htǒosò̌gini̤, “Khò̌ti̤ni̤ sî cû̌ sò̌phlǒpî̌bò lǒkho mî̌ ma̤tè?”

8 Dě asî hî̌shǔ nû̌û, “Pahtǒosò̌gini̤bò pa hǎmoǒmi̤mò̤ tapwa̤ tacǎ, dě kò pwe̤ǐjò bǎ pa amûasǎ dǐpwǎ̤꤮ tò̤.” Dě Jǒjè hî̌shǔ asî, “Kò htě a hî̌htò̌jò ta̤hǎmoǒmi̤mò̤ amûasǎ mî̌ tǒ̤꤮ Cǒmaradû̌ tapwa̤ pwǎ. Ma̤hǐnudě pwe̤ǐlṳ bǎ kè̌ he ta sîta̤hǎmoǒmi̤mò̤ htǒonu.”

9 Hǐnuakhû̌akhî kò htě khwǐ yṳǎ nû̌û dě a okè̌bǎ Pharǒ asobîshisî̌yo̤ ahǐkǒlǒkòdû̌nu tapwa̤ pwe̤ǐ nû̌û, “Dě he ta̤hǎmoǒmi̤mòkûnu he kè̌shǐ sobîmṳ ǒ helo̤mo̤ tṳmṳ, 10 Dě aphò ǒ suphò, he kè̌shǐ a phoja htò̌htò̌ ta a pho tadǎhtò̌, ǒteděsǎphû̌ dě a sǎcǒlǒ sobîsǎ dě a mihèbò. 11 Dě he pṳ̂měǐ Pharǒ ^{▼▼Pharǒ ta Egyptga Khwǐ mî̌ asǒsǒpwǎ nû̌û.} abalo̤ dě he bě sobîsǎ he cînṳ ashi Khwǐ abakû dě he hèǐo yǎ.”

12 Dě Jǒjè pwe̤ǐlṳphlo nû̌û, “Nata̤hǎmoǒmi̤mò̤ amûasǎ mî̌ a sò̌le̤hî̌ ta, aphò suphò numî̌ suni̤. 13 Htû̌ abehtò̌ suni̤ pěnu, Khwǐ plûhtò̌ gesǒ na dě apo̤kû pě dě a nogema̤sǒ ta̤ma̤ htě na ma̤ a awǐkha nutò̤glò pě, dě na tîwî̌tòwò bǎ gesǒ Khwǐ asobîshisî̌yo̤ pě. 14 Dě htû̌꤮ ta̤lǒ̤꤮ bò htûhtò̌ te̤bǎte̤tobò bǎ naya pě akhanu, khòsò̌do shope̤nǎǐkè pû he ma̤ nî̌꤮, bè̌dû̌ he dě pwe̤ǐlṳ bǎ hewi̤hekè̌ ta Khwǐ dě ma̤lû̌htò̌pû he dě apo̤kû htǒo nî̌꤮. 15 Hî̌bòbò꤮ mî̌ he ǒ Ebrega dě kò pṳ̂hè tû̌ he bǎo. Bǎ he ǒ bǎo akhanu bǎbǎ he ma̤sǔma̤plě nǒ dǐcǎ꤮ tò̤ pwǎ̤tadě kò dǒlò̤te̤ he dě ta̤jîta̤jû agûla̤.”

16 Bǎ pwa̤ma̤ bǎ Khwǐmû̌ ahǐkǒlǒkòdû̌nu tapwa̤ gana̤de ta Jǒjè pwe̤ǐlṳ bǎ kò htě Khwǐ yṳǎ nû̌û dě a okè̌bǎ Khwǐ asobîshisî̌yo̤ ahǐkǒlǒkòdû̌nu tapwa̤ ata̤hǎmoǒmi̤mò̤ amûasǎ awǒ akhanu, a gana̤de ta a hî̌lṳ bǎdǒ Jǒjè ta, “He dě he hǎmoǒmi̤mò̤ kû̌ tacǎcǎ, dě he ta̤hǎmoǒmi̤mò̤ akûnu he dò̌guǐ mû̌sû̌ susû̌. 17 Dě akhû̌lǒ tûsû̌ dě kò bè̌ǒ yǎta mû̌ pṳ̂̌tacǎ dě awǐashu mè̤mè̤̌ ta Khwǐ aya toǒ, pwǎ̤tadě htû̌phû̌ toǒ pè̌ǎbò mû̌ htě he dò̌guǐ yǎ sû̌kûnu toǒ.”

18 Jǒjè pwe̤ǐ nû̌û ta, “Sû̌ suma amûasǎ mî̌ suni̤. 19 Htǒo suni̤ akû, Khwǐ pe̤tṳkè nagobo pě dě a colě̤lṳhtò̌kè nana̤klûhtǒo dě sǒmṳlo̤ pě, dě htû̌phû̌ toǒ hèǎkèbò nayî̌ pě.”

20 Bǎ abehtò̌ suni̤ ti̤ni̤ akhanu, atotǐ ta Khwǐ ǒphijaû̌lò̤ amṳni̤, dě a ma̤ bǎ bò꤮ apwa̤ma̤ta̤ adû̌ahtû toǒ ta̤ǎhtuohtu nû̌û. Dě a kaǎhtò̌ kò htě Khwǐ yṳǎ nû̌û dě a okè̌bǎ Khwǐ asobîshisî̌yo̤ ahǐkǒlǒkòdû̌ ta pwa̤ma̤ bǎ nû̌û mû̌ ahǐkǒlǒkòdû̌nu sò̌gini̤, dě kò kaǎhè asî dě Khwǐ apwa̤ma̤ta̤ toǒ lǒ̤꤮ bò alo̤mo̤. 21 Dě Khwǐ noma̤ gesǒ pwa̤ htě Khwǐ yṳǎ nû̌û dě a okè̌bǎ Pharǒ asobîshisî̌yo̤ ahǐkǒlǒkòdû̌nu tapwa̤ ata̤ma̤ pwǐ agûla̤li̤nu, dě a phî̌hè bǎ gesǒ Pharǒ asobîshisî̌yo̤ba dě khwǐacǔdekû. 22 Pwǎ̤tadě pwa̤ma̤ bǎ khwǐmû̌ ahǐkǒlǒkòdû̌nu tapwa̤ lè̌dě kò cû̌ colě̤lṳhtò̌kè nû̌û sǒlo̤, dě pwǐ Jǒjè pwe̤ǐlṳnǎ bǎ asî ta̤hǎmoǒmi̤mò̤nu a htûhtò̌bò.

23 Pwǎ̤ta pwa̤ htě Khwǐ yṳǎ nû̌û dě a okè̌bǎ Khwǐ asobîshisî̌yo̤ ahǐkǒlǒkòdû̌nu tapwa̤ dě a gènè̤bǎto̤pe Jǒjè tò̤. A sho꤮ pe̤ǐkè nû̌û.