Genesis 44

Jǒjè sèlèkè̌bǎ apṳwè̤ sî

1Htodě Jǒjè nopwa̤pǒǐ bǎ nû̌û hǐdǒkûnu tapwa̤ ta, “To̤nṳ bǎ asî bǔkû̌lǎ dě asî huěkû pwî̌ asî dò̌ge pè̤nu, dě tapwa̤꤮ ta tapwa̤ awûnu bè̌nṳsǒ bǎ asî huěkû akhû̌gutṳ̌nu. 2Htodě shû̌nṳ hebawû dě apî̌tî̌gutṳ̌nu tapwa̤ ahuěkû akhû̌gutṳ̌nu, abǔpwî̤sî dě shû̌nṳdǒbò yǎ bǎnunu nî̌.” Dě a ma̤ pwǐ Jǒjè hî̌ nû̌ûnu.

3Bǎ lṳmṳlî wosò꤮ akhanu, Jǒjè apwa̤ma̤ta̤ toǒ gesûkè asî ta asî mòû̌lǎ toǒ. 4Pwǎ̤tadě bǎ asî geto̤yî̤ lǎ hǒtò̤ akhanu, Jǒjè hî̌ pwa̤pǒǐ bǎ nû̌û hǐdǒkûnu tapwa̤, “Lṳ̂ pwèpwè kû̌mò̌ kòyònu toǒ akò, dě bǎ na lṳ̂lǎ asî akhanu, hî̌ asî, ‘Kò ma̤wǒ sî dě sî cû̌ ma̤geshǔ kò ta ta̤kěta̤shǒ hî̌tè? 5Sî cû̌ ǎhǔge ǐtǒ̤ heběcǎ abawû ma̤tè? Hǐnumî̌ abala̤o, htohǒtò̤ a noǎǐ nû̌ûta ala̤kè̌shǐlṳnǎjò ta̤ nî. Sî ma̤ pwǐhè̌o numî̌ sî ma̤ ta̤phû̌mò̤shî̌hto hǒ.’”

6Bǎ pwa̤pǒ bǎ Jǒjè hǐdǒkûnu tapwa̤ lṳ̂lǎ asî akhanu, a hî̌ asî pwǐ aběcǎ nohî̌ nû̌ûnu. 7Pwǎ̤tadě asî hî̌geshǔsǒ nû̌û, “Běcǎdû̌, na cû̌nè̌cû̌yṳ̂tǒ̤ pa hǐnu ma̤tè? Najû mî̌ pahtǒo, pa bè payo̤ ta pa ma̤nǒ hǐnu dǐkhò̌꤮ tò̤. 8Běcǎ sî̌ya tû̌ta wû dě awǐkha tuhu pa kè̌shǐ dě pahuěkûnu toǒ, pa ǒ Khana̤ga dě pa phî̌hè gesǒ yǎ běcǎǒ hǒ. Ma̤hǐnudě wû bǎbǎ hta bǎbǎ pa cû̌ ǎhǔtǒ̤pe dě naběcǎhǐkûnu hî̌tè? 9Běcǎdû̌ dè kè̌shǐ bawû ǒ dě najû htǒotoǒ alo̤ tapwa̤pwa̤ hî̌dě ma̤sikè tû̌yǎ nî̌. Htodě pa lǒ̤꤮ bò mî̌ pa htû tû̌ paběcǎdû̌ ajû pěpě.”

10Dě a hî̌shǔ asî, “Awǒ hǒ, a htûhtò̌tû̌ pwǐ sî hî̌nu pě nî̌, pwǎ̤tadě kòyò htě a bǎhtû hejû numî̌ a bǎhtû pwǎ pǒ̤꤮ a phî̌ banu tapwa̤ pwǎ, ahǔwa̤ toǒ dě a lû̌htò̌ge tû̌ pě.”

11Asî tapwa̤ ta tapwa̤ tṳplṳtî̤wî̤ jolò̤te̤tû̌ lǒkho ahuě dě a bòphlǔ lǒkho ahuě. 12Htodě Jǒjè apwa̤ma̤ta̤nu tapwa̤ sahtò̌ kè̌lǎwǐ adû̌gutṳ̌ htodě hǎte̤gilò̤ to̤dě apî̌tî̌gutṳ̌꤮ tapwa̤ ahuěkû. Dě a cû̌kè̌shǐ bawûnu tabǎ dě Bejame ahuěkû. 13Htǒotaplǎ dě asî sò̌phlǒpî̌ mè̤mè̤̌ akhû̌akhî, a cǐlè̌bò ahǐdo, htodě asî pṳ̂̌꤮ tapwa̤ dò̌htò̌bòge ata̤kî̌ta̤kû̌ asîmòû̌lǎ toǒ alo̤ dě asî gekhîbòsǒ dě wî̤kû.

14Bǎ Yṳ̌da ta apṳwè̤sî geto̤sǒ Jǒjèhǐ akhanu, Jǒjè ǒpepwǎ bǎ hǐnu tama. Dě asî gene̤ û̌tṳglulò̤ bè̌dubè̌na̤ lǒkho jûkhû̌ bǎ alo̤mo̤. 15Dě Jǒjè hî̌ asî, “Sî cû̌ ma̤tǒ̤ hǐnu ma̤tè? Kòyò pwǐ he htǒo a kè̌shǐlṳnǎjò ta̤ numî̌ sî sî̌ya tò̤ ya?”

16Dě Yṳ̌da hî̌shǔ nû̌û, “Kǒ꤮ běcǎdû̌, pa glè̌ hî̌jòpe hî̌tè? Pa glè̌ htè̌shǔjòpe běcǎdû̌ hî̌tè? Pa mî̌ kòyòcǒkòyòtè̤ toǒpwǎnu pa glè̌ khòlṳjòpe hî̌tè? Cǒmaradû̌ dǔlṳ pata̤ma̤sǔ hǒ. Dě khònò̤htǒo kòyò htě kò kè̌shǐ bawû dě ahuěkûnu tapwa̤ htû tǒ̤꤮ tû̌ Běcǎ ajû mè̤tò̤, pa lǒ̤꤮ bò glè htûbòtû̌ běcǎ ajû hǒ.”

17Pwǎ̤tadě Jǒjè hî̌shǔ asî, “Tò̤, he ma̤bò̌ hǐnu tò̤. Pwa̤ htě a bǎhtû hejû numî̌ tǒ̤꤮ pwǎ kò kè̌shǐ bawû dě ahǔěkûnu tapwa̤ pwǎ. Ahǔwa̤ toǒ dě gemo̤gekwǐ lǒkho tû̌ dě sîpha ǒnu.”

Yṳ̌da kwigwèbǎǐ bǎ apṳ Bejame aya

18Htǒotaplǎ dě Yṳ̌da hè Jǒjè ǒ dě a hî̌ nû̌û, Kǒ꤮ běcǎdû̌, khòsò̌do ǐhî̌bǎ kû̌pû najûhtǒo yo̤sǎtûmû nî̌꤮. Na lò̤kèta Khwǐ pwǎ̤ta sò̌phlǒdû̌pû najûhtǒo ma̤ nî̌꤮. 19Běcǎdû̌ gwè najû htǒotoǒ ta, sîpha ǒpe pwǎ ya? Sî pṳ ahǔwa̤ ǒpe ya? 20Dě najû htǒotoǒ hî̌shǔ běcǎdû̌, papha mo̤pwa̤ ǒ tapwa̤, htodě papṳkònò htě phahtǒo phû̌ǒǐ nû̌û bǎ a mo̤pwa̤ akhanu aǒ tapwa̤. Dě awè̤ mî̌ asihto hǒ, dě asî mo̤ phû̌ǒlò̤ǐ nû̌û aklanu, a ǒkètû̌ a tapwǎ̤ pa, dě apha mo̤ǐ mè̤mè̤̌ nû̌û.

21Htodě běcǎdû̌ hî̌ najû htǒo, Ma̤pûhǐ he kè̌shǐ yǎta hena̤nu, kaǎhè yǎ bǎo. 22Pwǎ̤tadě pa hî̌shǔ běcǎ, a cû̌tephe ta apha mî̌ anî̤ tò̤. A dè cû̌khǒ ta apha hî̌mî̌, apha si pě. 23Pwǎ̤ta běcǎdû̌ hî̌shǔ najû htǒo, sî dè kaǎhènṳ sîpṳkònò tò̤ hî̌mî̌, sî hèkè̌shǐ he mî̌ anî̤petò̤ hǒ. 24Pwǐ běcǎdû̌ hî̌ najû htǒonu, bǎ najûhtǒo geto̤ dě papha ǒ akha, najûhtǒo gepwe̤ǐlṳbò yǎ pwǐ běcǎdû̌ hî̌ panu. 25Nǒkòdě, papha hî̌, Cû̌pwî̤gesǒ lǒkho shǎǎshǎo tîkî̌phû̌nî̌꤮.

26Pò̤̌ta pa hî̌shǔ yǎ, papṳkònò dè cû̌kû̌ ta pa tò̤ hî̌mî̌ pa cû̌bò̌ nòtò̤ hǒ. Ma̤tè̤hî̌dě papṳkònò dè cû̌ kû̌ta patò̤ hî̌mî̌, pala̤kè̌shǐ běcǎnu tapwa̤ ami̤sǎnu a yûtò̤. 27Papha hî̌ najû htǒotoǒ ta, sî sî̌ya tû̌ta hema Rakhelǎ phû̌ǒ bǎ he phû̌makhû sò̌gini̤. 28Tapwa̤ mî̌ a hǎmǎkè hǒ. Ta̤mi̤ta̤mò̤ ěmǔěplěkèbò nû̌û hǒ, sahtò̌ bǎnu dě he kè̌shǐ nǒpe yǎ dǐkhò̌꤮ tò̤ hǒ. 29Na dè kaǎcû̌ apî̌tî̌gutṳ̌ htǒotapwa̤ hî̌dě, pěmî̌ a cû̌htûhtò̌tò̤ po̤ tacǎcǎ hè̌. He mo̤pwa̤ hǒ, pěmî̌ he si ta sî ma̤guma̤gè sǎpla̤jî he hè̌o akhû̌akhî pě, a hî̌ pa hǐnu.

30Papha ta̤ǒhtûpwa̤nu a ǒhtupwǎ ta phijaû̌phû̌ htǒo tapwa̤ pwǎ akhû̌akhî, khònò̤dě a dè ge kû̌ta pa tò̤ hî̌mî̌, pa gejò dě papha khòsò̌do aǒ tò̤. 31Dě papha dè kè̌shǐ ta a gepakû̌ ta najû htǒotoǒ tò̤ hî̌mî̌, a sikè pě. Papha mî̌ a mo̤pwa̤ hǒhǒ, dě pa ma̤guma̤gè yǎ hè̌o akhû̌akhî, a sikè pě. 32He bèhto hepha ta he khwè̌ǐ ma̤kwaǐwǒ꤮ tû̌ yǎ pě hǒnǔ, dě he hî̌ yǎ, he dè kaǎ gesǒ a dě naǒ tò̤ hî̌dě, na bè̌tû̌ he ta̤sǔ tûjûpwa̤ mî̌ anî̤ pwǎ, he hî̌yǎ hǐnu.

33Ma̤hǐnudě běcǎdû̌꤮, agûla̤nu he ǒkè bǎo dě he htûtû̌ běcǎ ajû pě꤮. Dě a dě plûge kû̌kè yǎta awè̤sînu toǒ nî̌꤮. 34A dè gûgekû̌ta he tò̤ hî̌dě he cû̌geto̤jò hephaǒ hî̌tè? He sò̌yṳ kè̌shǐ bǎ hepha khòbǎ ta̤sò̌phlǒgusò̌phlǒgènu dî̌kî̌꤮ tò̤ hǒ.