Genesis 45

Jǒjè ǐsî̌ya tû̌ ana̤ ta apṳwè̤ makhû toǒ

1Bǎ Yṳ̌da hî̌ hǐnu akha, Jǒjè khòǐpè̤pe ana̤ dě apwa̤ma̤ta̤nu lǒ̤꤮ bò toǒ alo̤mo̤ tò̤ akhû̌akhî, a yi̤kǒhtò̌ apwa̤ma̤ta̤ toǒ, “Hǎhtò̌kèbò dě hǐdòkû̌ pṳ̂̌꤮ tapwa̤!” Dě bǎ a pwe̤ǐlṳ ana̤ ta apṳwè̤ sî akhanu, kò ǒkû̌pe yǎ dǐpwǎ̤꤮ tò̤, ǒ tǒ̤꤮ pwǎ apṳwè̤ toǒ pwǎ. ^a 2A hǎyi̤kǒshû̌ mè̤mè̤̌ akhû̌akhî, Egyptphû̌ ǒ dě hǐdòkû̌ toǒ gana̤debò, htohǒtò̤ kòyò ǒ dě Khwǐhokû toǒ gana̤de kû̌bò.

3Jǒjè hî̌ apṳwè̤sî, “He mî̌ Jǒjè hǒ, hepha ǒhtûpwa̤pe pwǎ ya?” Pwǎ̤ta apṳwè̤sî ǐsha tûlû̌꤮ shû̌ nû̌ûla̤ akhû̌akhî, a hî̌geshǔbò̌ nû̌û dǐmû̌꤮ tò̤.

4Dě a hî̌ gesǒ apṳwè̤ toǒ, “Khòsò̌do sǒsǔhèphǔ kû̌ lǒkho pû dě he ǒ bǎo,” dě asî sǒsǔhèǒphǔ lǒkho, dě a hî̌ asî, “He mî̌ sîpṳwè̤ Jǒjè htě sî shaǎcû̌kè yǎta pwa̤ma̤guma̤khè̌ dě Egyptganu tapwa̤ mè̤mè̤̌ hǒ. 5Dě sî shaǎcû̌kè he bǎo akhû̌akhî, bǎgubǎgè lǒkho ma̤ nî̌, htohǒtò̤ sò̌phlǒdû̌ tû̌ lǒkho pûma̤ sîna̤ ma̤ nî̌. Ma̤tè̤hî̌dě ma̤pûhǐ he ma̤lû̌htò̌nṳ kò ta̤ǒhtûpwa̤ ayanu dě Cǒmaradû̌ sûcû̌wǐpwǎ dě alo̤mo̤. 6Bǎ gakûbǎo gawi̤gakohto ginǐ̤ně hǒ, kò ma̤nṳhtěnṳpe lè̤ tò̤, kǎnṳpo̤nṳ bǔkû̌lǎ tò̤nu a ǒpo̤ yè̤̌ně pě. 7Ma̤pûhǐ sîkhlisîlè toǒ ǒkè kû̌kò hǎkhû̌bǎo dě sî lû̌htò̌khǒ tû̌ ayanu, Cǒmaradû̌ sûcû̌wǐ he dě sîlo̤mo̤ bǎ ga htǒotaga akûhǒ.

8“Hǐnuakhû̌akhî, pwa̤ htě a sûhè he bǎo numî̌ sî mè̤ tò̤, Cǒmaradû̌ pwǎ. A nohtû he ta pwa̤ǐsî̌yajè Khwǐ, a nohtû he pwa̤pǒǐ Khwǐho tamabò htě adû̌khlo tapwa̤, htohǒtò̤ a nopǒǐbò he ta Egyptga sagala̤ hǒ. ^b 9Khònò̤dě gephwè mò̌ hephaǒ dě gehî̌ yǎ, ‘Naphû̌khû Jǒjè hî̌ na, “Kǒ꤮ pha, Cǒmaradû̌ nopǒǐbò he ta Egyptga sagala̤ hǒ, hèlò̤ dǒmò̌ heǒ bǎo, hèlò̤ phwèphwè mò̌ khònò̤ nî̌. ^c 10Pha ta aphû̌ali̤ sîtoǒ, ta pha asophû̌ ta pè̤mṳsî ta ta̤ htě a ǒ ta pha lǒ̤꤮ bò toǒ hèǒphǔbòtû̌ ta he bǎ Gòshega htǒonu pě. 11Pha hèǒ bǎo pě dě he kè̌ǐkhwè̌ǐma̤jè tû̌ pha pě. Dě gawi̤gakodû̌ ǒkèpe yè̤̌ně pě. He sò̌yṳ noǒti̤wi̤ pha ta phahǐphû̌phòphû̌ ta phata̤phû̌ta̤li̤ toǒ tò̤,”’ gehî̌ yǎ hǐnu nî̌.”

12Jǒjè hî̌bǎ sělěpo̤ asî, “Kòyò htě a hî̌bǎ ta sî htǒotapwa̤ mî̌ Jǒjè mè̤mè̤̌nu sî kè̌shǐ sana̤ ta sîna̤ hǒ, hepṳ Bejame mî̌꤮ a kè̌shǐ sana̤ tû̌ta ana̤ hǒhǒ. 13Gepwe̤ǐlṳ bǎmò̌ hepha ta bǎ Egyptgakûhtǒo kò bè̌dû̌bè̌htû mè̤mè̤̌ he, htodě pwe̤ǐlṳbò yǎta lǒ̤꤮ bò sî kè̌shǐ htǒonu toǒ nî̌꤮. Gekaǎlò̤phwè bǎmò̌ hepha bǎo.”

14Htodě a phǒměǐ apṳ Bejame gobo dě a hǎ, dě apṳ mî̌꤮ a hǎkû̌ nû̌û bǎnunu. 15Htodě a gomo̤ apṳwè̤ toǒ dě ahǎ. Ahǎhto lǒkho dě apṳwè̤ toǒ hî̌bǎ lǒkho nû̌û.

16Bǎ kò pwe̤ǐlṳ bǎ Khwǐ ta apwa̤ma̤ta̤ htě a ǒ dě Khwǐhohtakû toǒ ta Jǒjè apṳwè̤ toǒ hèto̤bò akhanu, asî sò̌le̤sò̌lò̤ mè̤mè̤̌. 17Dě Khwǐ hî̌ Jǒjè, hî̌ napṳwè̤ toǒ, dò̌htò̌ mò̌ ta̤kî̌ta̤kû̌ dě sîta̤phû̌ta̤li̤ toǒ alo̤ dě ge mò̌ Khana̤ganu. 18Dě gekaǎhè sîpha ta sîhǐphû̌phòphû̌ dě heǒ bǎo. He ǐ sî hǎkhû̌ htě awǒgutṳ̌ dě Egyptgakû htǒo pě dě sî ǎbǎobǎ shǎǎshǎo htě awǐasowo gakû htǒo pě.

19“Dě hî̌po̤ asî, ma̤ lǒkho hǐnu, sî la̤kaǎhèǐpo̤ sîphû̌sîma ayanu, wṳ̂genṳpo̤ lǒkho tîsî̌lo̤ bǎ Egyptgakû bǎotoǒ dě kaǎhèǐ sîphanu. 20Sîta̤dû̌yò̤htò̌sa toǒ ǒkè bǎbǎ a la̤hî̌ǒ tò̤, ma̤tè̤hî̌dě ta̤ htě awǒgutṳ̌ bǎ Egyptgakû bǎotoǒnu, a htûhtò̌bòtû̌ sîta pě.”

21Hǐnudě Yǎ̤kò ▼

▼Yǎ̤kò ta Israel mî̌ tapwǎ̤pa.

aphû̌ toǒ ma̤ lǒkho pwǐ Khwǐ hî̌ asînu. Dě Jǒjè ǐgenṳ asî tîsî̌lo̤ toǒ pwǐ Khwǐ hî̌lò̤ nû̌ûnu, dě a ǐgenṳ asî shǎǎshǎo klè̌lo̤ aya. 22Dě a ǐgenṳbò bǎ apṳawè̤ lǒ̤꤮ bò sînu toǒ hǐdosa tapwa̤ tṳpṳ, tapwa̤ tṳpṳ, pwǎ̤ta Bejame aya lè̌dě a ǐ nû̌û wûyî̌ sujè ta hǐdo yè̤̌pṳ. 23Htodě apha aya dě a sûge bǎ nû̌û Egyptga ta̤kî̌ta̤kû̌ htě awǒgutṳ̌ toǒ dě a dò̌ge nû̌ûta mòû̌lǎ adoshǐ gûla̤, htohǒtò̤ a dò̌geǐpo̤ nû̌û bǔkû̌lǎ, mû̌ ta shǎǎshǎo htě aphala̤ǎ klè̌lo̤ aya htǒotoǒ ta mòû̌lǎmo̤ adoshǐ gûla̤. 24Htodě a cû̌ sûgekè apṳwè̤sî, bǎ asî hǎhtò̌ge akhanu, a hî̌ apṳwè̤ toǒ, “Cû̌to̤klî̌ ge pûma̤ nû̌û klè̌lo̤ ma̤ nî̌꤮.”

25Hǐnudě asî ǒ bǎ Egyptgabǎo dě a hǎhtò̌ge lǒkho apha Yǎ̤kò la̤ǒǐ Khana̤ga. 26Dě asî gehî̌ lǒkho apha, “Jǒjè ǒhtûpwa̤pe pwǎ! Dě a pǒǐbò Egyptga sagala̤!” Dě ata te̤pe̤kè Yǎ̤kò dě a yṳǎbò̌pe asî tò̤. 27Pwǎ̤ta bǎ aphû̌sî pwe̤ǐlṳbò nû̌ûta lǒ̤꤮ bò Jǒjè hî̌ asînu toǒ htohǒtò̤ bǎ a kè̌shǐ tîsî̌lo̤ htě Jǒjè nogekaǎshǔ nû̌ûta anu toǒ akhanu, asò̌phlǒ shû̌htò̌shohtò̌ gesǒ. 28Dě a hî̌, “Khònò̤dě he yṳǎ hǒ, hephû̌ Jǒjè ǒhtûpwa̤pe pwǎ. Bǎ he si hǒtò̤ htǒo he bǎ cû̌kè̌shǐ yǎ.”