Genesis 46
Yǎ̤kò ta ahǐphû̌phòphû̌ toǒ cû̌ dě Egyptga
1Hǐnuakhû̌akhî, Yǎ̤kò ▼▼Yǎ̤kò ta Israel mî̌ tapwǎ̤pa.
to̤nṳbò ata̤kî̌ta̤kû̌ a hǎhtò̌cû̌ dě bǎ a cû̌to̤ Berashabǎwî̤ akhanu, a ma̤si ta̤phû̌ta̤li̤ dě a lṳhtò̌ nû̌ûta apha Isǎko ▼▼Isǎko tèhtò̌ tû̌ ta̤lṳwa̤ tawa̤ ta lo̤ dě a sabahtò̌ tû̌ Cǒmara tûjûpwa̤ bǎ gûla̤bǎo tò̤glò̌꤮ papwǎ.
acǒmaradû̌. c 2Dě bǎ lṳmṳkhǐ akhanu, Cǒmaradû̌ hî̌bǎ ta Yǎ̤kò dě ta̤dǔlè̌nǎ akû “Yǎ̤kò, Yǎ̤kò,” a kaǎ nû̌û, dě “He ǒpwǎ,” a hî̌shǔ Cǒmaradû̌ hǐnu. 3Dě Cǒmaradû̌ hî̌ yǎ, “He mî̌ Cǒmaradû̌, napha acǒmaradû̌, ǐshacû̌ pûma̤ dě Egyptga ma̤. He nohtûhtò̌ na ta khlilèdû̌꤮ tacǎ bǎnu pě. 4He cû̌plǒkû̌ta na dě Egyptga pě, dě he kaǎge mè̤mè̤̌sǒtû̌ nakhlinalè toǒ bǎ gabǎo taga akû pě. Na sǎlò̤te̤kè dě Jǒjè acǔdekû pě.” 5Htodě Yǎ̤kò ǒ bǎ Berashabǎwî̤nu dě a hǎhtò̌cû̌. Dě aphû̌ toǒ dò̌cû̌ apha Yǎ̤kò ta asî aphû̌ama sîtoǒ ta lo̤ htě Khwǐ ǐgenṳ asî ta la̤gedò̌hè yǎta Yǎ̤kònu toǒ alo̤. 6Htodě asî to̤nṳbò asîta̤phû̌ta̤li̤ ta asîta̤kî̌ta̤kû̌ htě a kè̌lǎnṳ bǎ Khana̤gakûnu toǒ, dě Yǎ̤kò ta aphû̌ali̤ toǒ hǎhtò̌cû̌ lǒkho Egyptga. d 7A kaǎcû̌nṳ aphû̌sî, ali̤sî ta akhlialè lǒ̤bò. Kòyò htě a gûcû̌kû̌ ta Yǎ̤kò dě Egyptga toǒ
8Mi̤ htě ala̤ htǒotoǒ mî̌ Israel akhlialè Yǎ̤kò aphû̌makhû htě a gûcû̌kû̌ ta a dě Egyptganu toǒ ami̤hǒ. Asî mî̌ kwè̌꤮ ûpè hî̌dě Yǎ̤kò aphû̌wè̤pwa̤ Rube, 9ta Rube aphû̌makhû Hano, Phalu, Hesaro ta Kami sîtoǒ. 10Ta Simeo aphû̌makhû Jemuělè, Jami, Oha, Jakhe, Soha ta Shòlǎ, dě Shòlǎ numî̌ Khana̤ khlilèmo̤ aphû̌. 11Ta Lě̤wǐ aphû̌makhû Gerèsho, Koha ta Merari sîtoǒ. 12Ta Yṳ̌da aphû̌makhû Ěra, Ò̌na̤, Shelǎ, Perè̌ ta Serǎ sîtoǒ. Pwǎ̤tadě Ěra ta Ò̌na̤ mî̌ a sikè dě asî ǒpe bǎ Khana̤gakû akhanu. Ta Perè̌ aphû̌makhû Hesaro ta Hamula sîtoǒ gûcû̌kû̌dǒ. 13Ta Isakarǒ aphû̌makhû Tola, Pǔa, Jobǎ ta Shǐmaro sîtoǒ. 14Ta Sabulo aphû̌makhû Sera, Elo ta Jaleělè sîtoǒ. 15Bò꤮ kòyòmi̤ htě dǒlṳhto htǒotoǒ mî̌ Le̤a ta Yǎ̤kò aphû̌makhû, ali̤makhû ta akhlialè htě a ǒphijaû̌lò̤ lǒkho dě Pada aragakû hǒ. Dě Yǎ̤kò ta Le̤a aphû̌mamǔ Dǐna cû̌htu kû̌ta asî. Yǎ̤kò ta Le̤a aphû̌ali̤ mamǔmakhû lǒ̤꤮ bò mî̌ aǒ apwa̤ sushi ta sò̌su. e 16Gǎ aphû̌makhû htě a cû̌kû̌ toǒ mî̌, Sephi, Hagǐ, Shuni, Esabo, Eri, Arò̌dǐ ta Arelǐ. 17Ta Asharu aphû̌makhû Imanǎ, Ishawa, Ishawi ta Berǐa. Asî pṳmamǔ mî̌ Serǎnu hǒ. Htodě Berǐa aphû̌makhû Heba ta Malakhǐělè sî cû̌kû̌kû̌. 18Lǒ̤꤮ bò kòyòmi̤ htě dǒlṳhto htǒotoǒ mî̌ Yǎ̤kò ta Sǐlapa aphû̌ali̤ ta alṳ̂ toǒ hǒ. Dě Sǐlapa numî̌ Laba ǐ bǎ aphû̌mamǔ Le̤a ta pwa̤ma̤jè nû̌ûnu tapwa̤ hǒ. Dě lǒ̤꤮ bò mî̌ aǒ shǐsusǒ. 19Yǎ̤kò ta Rakhelǎ phû̌ǒlò̤ phû̌makhû sò̌gini̤ dě ami̤ta Jǒjè ta Bejame. 20Bǎ Egyptgakûnu Jǒjè ta ama Asenǎ phû̌ǒlò̤ phû̌makhû sò̌gini̤, dě ami̤ta Manǎshe ta Ephare, dě Asenǎ numî̌ Onawî̤ apwa̤lṳhtò̌ta̤ Pò̌tǐphera aphû̌mamǔ. f 21Bejame aphû̌makhû toǒ mî̌ Bela, Bekha, Ashabělè, Gera, Nama, Ehi, Rò̌shǎ, Mupe, Hupe ta Arǔdǎ sîtoǒ hǒ. 22Dě lǒ̤꤮ bò dǒlṳhtò̌hto htǒo shǐsò̌li̤ numî̌ Yǎ̤kò ta Rakhelǎ aphû̌ali̤ toǒ hǒ. 23Da aphû̌makhû mî̌ Hushe. 24Natali aphû̌makhû toǒ mî̌ Jaseělè, Guni, Jesa ta Shile sîtoǒ hǒ. 25Lǒ̤꤮ bò dǒlṳhto htǒotoǒ mî̌ Yǎ̤kò ta Bǐlaha aphû̌ ta ali̤ makhû toǒ hǒ, dě Bǐlaha numî̌ Laba ǐ bǎ aphû̌mamǔ Rakhelǎ ta pwa̤ma̤jè nû̌ûnu tapwa̤ hǒ. Dě lǒ̤꤮ bò mî̌ aǒ susǒtapwa̤. 26Yǎ̤kò aphû̌ali̤ htě a gûcû̌kû̌ ta a dě Egyptganu toǒ mî̌ lǒ̤꤮ bò aǒ ashisusǒ ta apwa̤susǒ dě kò dǒpa Yǎ̤kò adè̌ sîtoǒ tò̤. 27Jǒjè ǒ bǎ Egyptgakû akhanu, aphû̌makhû ǒ sò̌gini̤, dě Yǎ̤kò ahǐphû̌phòphû̌ htě a ǒbò lǒkho bǎ Egyptgakû numî̌ lǒ̤꤮ bò aǒ apwa̤ susǒtishi. gJǒjè hèkè̌shǔ apha dě Gòshega
28Ma̤pûhǐ Jǒjè hèkè̌shǐshǔ apha Yǎ̤kò ta apṳwè̤ toǒ dě Gòshega ayanu, anocû̌ kè̌shǐwǐ nû̌ûta Yṳ̌da. Dě bǎ asî cû̌to̤ Gòshega akhanu, 29Jǒjè htò̌dò̌nṳ atîsî̌lo̤ dě a cû̌kè̌shǐshǔ ta apha dě Gòshega. Bǎ asî kè̌shǐshǔ nû̌û akhanu, Jǒjè phǒhtò̌ apha gobo dě a hǎsihǎǒ yî̤꤮ mè̤mè̤̌. 30Dě Yǎ̤kò hî̌ Jǒjè, “Na ǒhtûpwa̤pe pwǎnu he kè̌shǐtû̌ ta hena̤ hǒ akhû̌akhî, he sikè khònò̤ mî̌꤮ amo̤shû̌ he hǒ.” 31Htodě Jǒjè hî̌ apṳwè̤ toǒ ta apha akhlialè ahǔwa̤ toǒ, “He bǎ cû̌pwe̤ǐ Khwǐ, ‘He Pṳwè̤sî ta hepha ahǐphû̌phòphû̌ ǒ Khana̤ga dě a hèto̤ lǒkho heǒ hǒ. 32Asî mî̌ pwa̤gèǐ sophû̌, pwa̤bǔǐta̤phû̌ta̤li̤ toǒ, htodě asî bohè ǐbò lǒkho asîsophû̌ ta pè̤mṳ, pṳ̂pa̤na̤mṳ toǒ, htodě a to̤hènṳbò asîta̤kî̌ta̤kû̌ htě aǒ ta asînu toǒ hǒ,’ he bǎ cû̌hî̌ yǎ hǐnu. 33Dě bǎ Khwǐ kaǎhè sî dě a gwè sîta̤phî̌ta̤ma̤ akhanu, 34Sî tobǎ hî̌shǔ ta, ‘Pwǐ paphipaphu toǒ bǔǎhèhto ta̤phû̌ta̤li̤nu, najû htǒotoǒ mî̌꤮ a bǔǎhèdǒ ta̤phû̌ta̤li̤ dě pa phijaû̌kha tǒ̤ khònò̤,’ hî̌ lǒkho hǐnu nî̌. Sî dè hî̌ hǐnu hî̌mî̌, a noǒ sî bǎ Gòshega htǒonu pě. Ma̤tè̤hî̌dě Egyptphû̌ toǒ mî̌ awi̤ja mè̤mè̤̌ pwa̤gèǐ sophû̌ toǒ,” a hî̌ asî hǐnu.
Copyright information for
KxfSCKRC