Genesis 50
Kòhǎkòwo ǐ Yǎ̤kò
1Bǎ Yǎ̤kò sǎlò̤te̤ akhanu, Jǒjè û̌lò̤ phǒměphǒgle apha dě a hǎyi̤kǒyi̤hta ta a gomo̤ apha. 2Htodě ma̤pûhǐ Jǒjè aphalṳto̤ alǒaso pûtò̤ aya, Jǒjè nobè̌nṳ apwa̤ma̤ta̤ ta̤khû̌saradû̌nu toǒ ta ta̤khû̌ta̤ti̤ htě anṳmû̌ toǒ dě aphana̤kû. ▼▼Bǎ kò bè̌nṳ ta̤khû̌ hǒtò̤ akhanu, kò lè̌phò̌ nû̌û dě kò phî̌htò̌kèbò nû̌û aphuapwe̤
Hǐnudě ta̤khû̌saradû̌ toǒ bè̌nṳ lǒkho ta̤khû̌ dě Yǎ̤kò ▼▼Yǎ̤kò ta Israel mî̌ tapwǎ̤pa.
ana̤kû. 3Kò ma̤hǐnumî̌ ayî̤ mṳni̤li̤shi. Dě Egyptphû̌ toǒ sǎpla̤sǎyṳ hǎwoǐ nû̌û ani̤ susǒtishi. 4Bǎ asî sǎpla̤sǎyṳ hǎwohto mṳni̤ susǒtishi akhanu, Jǒjè hî̌ Khwǐ apwa̤ma̤ta̤ htě aǒ bǎ Khwǐhokûnu toǒ, “Sî dè mo̤ǐ he hî̌dě, khòsò̌do cû̌pwe̤ǐ te̤mǎ pû bǎ he Khwǐ ta ta̤wi̤ta̤kè̌ htǒo nî̌꤮, dě hî̌ yǎ, 5‘Bǎ hepha glè̌ si akhanu, a nobè he ta̤hî̌bǎ dě a hî̌, “He glè̌ phǔsi hǒ, lǔnṳ he dě lo̤kû htě he khǔnǎ tû̌ yǎta hena̤ Khana̤gakûnu tûkû nî̌꤮,” hǐnudě khòsò̌do ǐge kihtò̌ lǔ dò̌ǔpû hepha nî̌꤮. Htopědě he gesǒ tû̌ pě.’” c 6Khwǐ hî̌shǔ nû̌û, “Pwǐ na bèhto napha ta na glèma̤ bǎ yǎnu, gekihtò̌ lǔmò̌ yǎ.” Kò lǔ Yǎ̤kò
7Hǐnudě Jǒjè gekihtò̌ lǔtû̌ apha. Lǒ̤bò pwa̤htûdû̌htûpwa̤ Khwǐ ahohtakû toǒ, apwa̤ma̤ta̤ toǒ ta lǒ̤꤮ bò pwa̤htûdû̌htûpwa̤ bǎ Egyptgakûnu toǒ gûge kû̌bò lǒkho ta Jǒjè. 8Jǒjè ahǐphû̌phòphû̌, apṳawè̤, apha ahǐphû̌phòphû̌ lǒ̤꤮ bò gûgekû̌bò ta Jǒjè. Dě Gòshega numî̌ a ǒkè tû̌pwǎ asî phijaû̌phû̌ toǒ, asî sophû̌, pè̤ ta pṳ̂pa̤na̤ toǒ pwǎ. 9Tîsî̌lo̤ la̤htò̌shě ta̤shě ta kliphû̌ pwa̤dò̌ tîsî̌ toǒ gûgekû̌bò yǎyǎ. Dě kòyò saprṳ̂nu toǒ lǒ̤꤮ bò gûge kû̌bò nû̌û. 10Bǎ asî geto̤ Ata htě kò kaǎ nû̌ûta la̤po̤bǔgûla̤, Jòda shilo̤ mṳhtò̌nu tò̤glò akha, asî hǎwo yi̤kǒyi̤hta sǎpla̤sǎyṳ lǒkho bǎnu. Dě Jǒjè hǎwo sǎpla̤sǎyṳǐ apha bǎnu susǒti̤ni̤. 11Bǎ Khana̤gaphû̌ ǒ bǎnu toǒ kè̌shǐ kòyònu toǒ hǎwo lǒkho bǎ Ata la̤po̤bǔgûla̤ akhanu, asî hî̌ lǒkho, “Egypt khlilèphû̌ toǒ hǎsihǎǒ sǎpla̤sǎyṳjî mè̤mè̤̌ le,” hǐnudě kò kaǎkè agûla̤nu tò̤glò ami̤ ta Abelǎmisare. Dě gûla̤nu tò̤glò mî̌ a ǒ dě Jòda shilo̤ mṳhtò̌ tokho. (Abelǎmisare amûasǎ mî̌ Egyptga ata̤hǎta̤wo) 12Hǐnuakhû̌akhî, Yǎ̤kò aphû̌toǒ ma̤ lǒkho pwǐ apha mǎnǎ asî ta̤hî̌bǎnu. 13Dě asî ò̌ge nû̌ûlṳto̤ Khana̤ga dě a gelǔnṳkè nû̌û bǎ lo̤kû ǒ Mèpelǎ hǔklakhû̌nu tûkû, dě a ǒphǔ ta Mè̌mare agûla̤, bǎ Khana̤gakûnu, gûla̤nu tò̤glò mî̌ Abraham pwî̤ Hǐtǐ khlilèphû̌ Ephro acǔdekû dě a ma̤kè nû̌ûta ala̤lǔnṳ akhlialè gûla̤. d 14Bǎ Jǒjè lǔnṳhto apha akhanu, a ta apṳwè̤ toǒ ta kòyò htě a hèsûkû̌ lṳnu toǒ gegilò̤ wo̤wǒ̤kû̌sǒ lǒkho nû̌û dě Egyptga.Jǒjè ǐkhû̌ǐǎ apṳawè̤sî
15Bǎ kò lǔnṳhtokè Yǎ̤kò dě asî geto̤sǒ Egyptga akhanu, Jǒjè apṳwè̤ toǒ hî̌ lǒkho, “Jǒjè dè sò̌phlǒ pòhò ǒtò̤pe pa dě a dè ma̤ geshǔ mè̤mè̤̌ pa ta ali̤ pwǐ pa ma̤pò̤ma̤shahto yǎnu toǒ hî̌mî̌, a htûhtò̌ kwè̌꤮ hî̌tèpě?” 16Hǐnuakhû̌akhî, asî nocû̌pwe̤ǐ kò ta̤wi̤ta̤kè̌ Jǒjè ǒ dě asî hî̌, “Bǎ napha si hǒtò̤ akhanu, a mǎnǎ pa ta̤hî̌bǎ. 17Dě pha nohî̌ pa ta, ‘Sî tobǎ hî̌ Jǒjè hî̌tè hî̌nudě, khòsò̌do bòlû̌kèpû napṳnawè̤ toǒ ata̤ma̤sǔma̤plě phû̌mò̤shî̌hto nanu toǒ ta asîta̤sǔnu toǒ nî̌꤮,’ hǐnuakhû̌akhî, khònò̤dě khòsò̌do bòlû̌kèpû napha acǒmaradû̌ apwa̤ma̤ta̤ toǒ ata̤ma̤sǔma̤plěnu toǒ nî̌꤮.” Bǎ Jǒjè gana̤de ta̤hî̌bǎ hǐnu akhanu, a mi̤sǎshilò̤. 18Htodě apṳwè̤ toǒ hènṳ û̌gulò̤ lǒkho nû̌ûlo̤mo̤ dě asî hî̌ nû̌û, “Khònò̤htǒo pa htû mè̤mè̤̌ najû hǒ.” 19Pwǎ̤tadě Jǒjè hî̌shǔ asî, “Ǐsha lǒkho pûma̤, he mî̌ Cǒmaradû̌ ya? He cèrò sî mî̌ anî̤ tò̤. 20Sî gènè̤ ta sî ma̤jîma̤jû he hǐnudě pwǐ sî kè̌shǐtû̌ khònò̤htǒonu hǒ, ma̤pûhǐ kòyò saprṳ̂ asò̌phlǒhtûpwa̤ lû̌htò̌ ayanudě, Cǒmaradû̌ ma̤tèplè̌kè ta̤wǒ tokho hǒ. 21Hǐnuakhû̌akhî, ǐsha lǒkho pûma̤ nî̌꤮. He ǐǎǐotû̌ sî ta sîphû̌sîli̤ toǒ pě.” Htodě a ǐkhû̌ǐǎ asî dě a hî̌bǎmo̤hî̌bǎkwǐ asî.Jǒjè si
22Jǒjè ta apha ahǐphû̌phòphû̌ toǒ ǒsělěhè lǒkho bǎ Egyptganu. Dě bǎ Jǒjè si akha aněǒ ta̤ya̤ ta shǐ. 23Jǒjè kè̌shǐ nṳlǎpe aphû̌ Ephare aphû̌ali̤ to̤htû̌ ali̤alṳ̂ toǒ, htohǒtò̤ a bǔǐ nṳlǎpe alṳ̂ toǒ mî̌ Manǎshe aphû̌ Makhǐra aphû̌nu toǒ sǒsǒta aphû̌ ta asana̤tû̌nu hǒ. (Makhǐra amûasǎ mî̌ kò shaǎ nû̌û.) 24Htodě a hî̌ apṳwè̤ toǒ, “He ǒhtûpwa̤ yî̤pe tò̤ hǒ, Cǒmaradû̌ hèlò̤ ma̤jè mè̤mè̤̌ sî pě dě a kaǎhǎhtò̌kè sî ta ga bǎo taga dě a sûge sî ga htě a bèlò̤hto ayo̤ ta Abraham, Isǎko, Yǎ̤kònu taga pě.” 25Htodě Jǒjè nobèlò̤ Yǎ̤kò aphû̌ toǒ ta̤bèlò̤ tacǎ, dě a hî̌, “Cǒmaradû̌ hèlò̤ ma̤jè mè̤mè̤̌ sî pě, dě sî bǎ phî̌ge kihtò̌ǐbò hekhwǐ toǒ pě nî̌꤮.” e 26Jǒjè něǒ ta̤ya̤ ta shǐ dě a sikè. Htodě ma̤pûhǐ Jǒjè lṳto̤ alǒaso tò̤ aya, kò bè̌nṳ ta̤khû̌ta̤ti̤ htě anṳmû̌nu toǒ dě ana̤kû, htodě kò bè̌nṳkè nû̌û lo̤kû bǎ Egyptgakûnu.
Copyright information for
KxfSCKRC