Heb 1 | KxfSCKRC | STEP | Cǒmara hî̌bǎlò̤ sala̤ paphipaphu děwǐkha toǒ ta klè̌ pṳ̂̌bo. Dě a nohî̌bǎ tṳtṳ nû̌ûta pwa̤po̤ toǒ.

Hebrews 1

Cǒmara hî̌bǎlò̤ tṳtṳ ta aphû̌khû

1 Cǒmara hî̌bǎlò̤ sala̤ paphipaphu děwǐkha toǒ ta klè̌ pṳ̂̌bo. Dě a nohî̌bǎ tṳtṳ nû̌ûta pwa̤po̤ toǒ. 2 Pwǎ̤ta mṳni̤gutṳ̌lò̤ htǒotoǒnu, a hî̌bǎlò̤ tṳtṳ pa ta a phû̌makhû hǒ. Cǒmara nobǒlò̤ tṳtṳ aphû̌khû ta hǎkhû̌ mǒkhû̌ ta ta̤lǒ̤꤮ bò. Dě gutṳ̌lò̤ pěnu, ta̤htǒotoǒ lǒ̤꤮ bò ma̤pûhǐ a htûbò nû̌ûta pěnu dě Cǒmara wû̌lǎ yǎ hǒ. 3 Kò kè̌shǐ tṳtṳ Cǒmara a ta̤sîrîdû̌sîrîhtû dě akû pě. A mî̌ asǒsǒ bòmṳ̂sîglî ta Cǒmara hǒ. Ma̤pûhǐ hǎkhû̌ ta mǒkhû̌ ta ta̤bǒlò̤ lǒ̤꤮ bò toǒ ǒ hèsělěpo̤nu, a pṳ̂měǐjè ta̤bǒlò̤ lǒ̤꤮ bò htǒonu ta ayo̤ htě apo̤aphǎ shû̌sho htǒotoǒ. Bǎ a ma̤htoma̤phlǔhto ta̤bòlû̌kèbò kòyòhǎkhû̌phû̌ ata̤sǔ toǒ akhanu, a gekihtò̌ mǒkhû̌ dě a htò̌hǎnòò̌ Cǒmara htě apo̤aphǎ adû̌ayǒgutṳ̌ htǒotapwa̤ acǔdemû tokho.

Cǒmara aphû̌khû dû̌khlo ta mǒkhû̌tanaphû̌ toǒ

4 Cǒmara aphû̌khûhtǒo a htûhtò̌ pwa̤ htě adû̌ayǒkhlo ta tanaphû̌ ǒ dě mǒkhû̌nu toǒ. Htǒonumî̌ alò̤ta a ǐ aphû̌khû ami̤ dě adû̌ayǒkhlo ta mǒkhû̌tanaphû̌nu toǒ ami̤ hǒ.

5 Lî̤cahtǐkû khwè̌nǎ ta Cǒmara hî̌ aphû̌khû pwǐhè̌o,

“Na mî̌ hephû̌khû, khò̌ti̤ni̤, he htû napha hǒ,” ^a a hî̌ hǐnu. Pwǎ̤tadě Cǒmara hî̌nǒ mǒkhû̌tanaphû̌ hǐnu dǐpwǎ̤꤮ tò̤. ^b

Lî̤cahtǐ khwè̌nǎpe ahǔwa̤ to̤to̤ dě a hî̌,

“He htû apha pě, dě a htû hephû̌ pě,” ^c ta̤hî̌bǎ hè̌onu a hî̌nǒ mǒkhû̌tanaphû̌ dǐpwǎ̤ tò̤tò̤.

6 Bǎ Cǒmara nolò̤ aphû̌khû wè̤pwa̤ ^{▼▼Yṳ̌daphû̌ ala̤klo ǒ ta phû̌wè̤pwa̤ mî̌ a nî̤bǎ kî̌yatû̌ ta̤bè̌dubè̌na̤ nû̌û ta û̌cata̤ya̤ toǒ.} dě hǎkhû̌ akhanu, a hî̌,

“Cǒmara a tanaphû̌ lǒ̤꤮ bò bǎ sabahtò̌ phû̌khûhtǒo,” ^e a hî̌ hǐnu.

7 Pwǎ̤ta Cǒmara hî̌lè̌ mǒkhû̌tanaphû̌ toǒ awi̤akè̌ ta,

“Cǒmara nohtûhtò̌ a tanaphû̌ toǒ pwǐ gili̤nu. Asî toǒnu mî̌ Cǒmara pwa̤ma̤ta̤ toǒ dě a nohtûhtò̌ asî pwǐ mî̌plo̤nu,” ^f a hî̌ hǐnu.

8 Pwǎ̤ta, bǎ a hî̌lè̌ aphû̌khû awi̤akè̌ akhanu,

“Kǒ꤮ Cǒmara, nashinaganu, a ǒyî̤tû̌ tûjûpwa̤ talakhǎ pě꤮. Na pǒǐtû̌ na kòyò toǒ ta ta̤cǒta̤tè̤ pě꤮. ^g 9 Na mo̤ǐ ta̤ htě ato toǒ dě na sò̌khě ta̤ htě asǔ toǒ. Dě htǒo akhû̌akhî, Cǒmara htě a mî̌ na Cǒmara htǒo wû̌lǎ na dě a nodû̌ayǒkhlo na ta nasû̌nakho toǒ hǒ. A bè̌dû̌bè̌htû na, a ǐ na ta̤sò̌le̤sò̌lò̤ hǒ,” ^h a hî̌ nû̌û hǐnu.

10 Htodě a hî̌po̤ aphû̌khû,

“Kǒ꤮ Běcǎ, ta̤ ǒhtò̌ dǐcǎ꤮ hǒtò̤ akhanu, na bǒlò̤tû̌ hǎkhû̌, na bǒlò̤tû̌ mǒkhû̌ toǒ ta na cǔde. ⁱ 11 Hǎkhû̌ ta mǒkhû̌ toǒ pî̌kèbò pě pwǎ̤ta na ǒhèsělě tûjûpwa̤ pě. Hǎkhû̌ ta mǒkhû̌ toǒ htò̌lè̌htò̌phwekè pwǐ hǐdohǐyò̤li̤ hǐdohǐyò̤yò̤nu toǒ pě. 12 Na gakhlî̌wǒkè asî toǒ pwǐ hǐdokhlodû̌nu pě. Na htû̌lè̌ tèplè̌ khǒkèbò hǎkhû̌ ta mǒkhû̌ toǒ pwǐ kòyò tapwa̤ htû̌lè̌ tèplè̌ ahǐdohǐyò̤nu pě. Pò̤̌ta na bè̌ tṳ̂gûla̤pwǎ na sò̌phlǒ pě. Na mṳni̤nu, a gutṳjò tò̤,” ^j a hî̌po̤ hǐnu.

13 “Hǎnòò̌ dě he cǔdemû htǒotokho, hǎnòò̌ to̤htû̌ he nopǒǐ na ta pwa̤ htě a sò̌khě na htǒotoǒ hè sabahtò̌ to̤ na dě na khò̌lopo̤ kòshî̌ pě,” ^k Cǒmara hî̌nǒ amǒkhû̌tanaphû̌ toǒ pwǐhè̌onu dǐmû̌꤮ tò̤.

14 Dèhî̌hǐnudě, mǒkhû̌tanaphû̌ toǒ mî̌ ûpè? Asî mî̌ yolahtûpwa̤ htě a ma̤ bǎ Cǒmara ata̤ma̤ toǒ. Cǒmara noma̤jè asî ta kòyò htě a nî̤bǎ ta̤ma̤lû̌htò̌ge pě toǒ aya pwǎ.