Heb 13 | KxfSCKRC | STEP | Mo̤ǐhè lǒkho nû̌û tapwa̤ ta tapwa̤ pwǐ Khrî̌stuphû̌ tobǎ mo̤ǐ nû̌û tapwa̤ ta tapwa̤nu nî̌.

Hebrews 13

Ta̤ma̤to Cǒmara asò̌phlǒ

1 Mo̤ǐhè lǒkho nû̌û tapwa̤ ta tapwa̤ pwǐ Khrî̌stuphû̌ tobǎ mo̤ǐ nû̌û tapwa̤ ta tapwa̤nu nî̌. 2 Shope̤ kaǎshǔ lǒkho pûma̤ shǐpwa̤shǐmè̤ ma̤ nî̌. Kòyò toǒǒnu asî kaǎshǔ lǒkho shǐtè̤mè̤ dě a ta̤gènè̤ to̤tò̤ akûnu, a kaǎshǔ lò̤to tanamǒkhû̌phû̌ toǒ. ^a 3 Sî̌ya ma̤jèkû̌dǒ kòyò lòte̤ apo̤kû toǒ dě bè̌ na sò̌phlǒ pwǐ na lòte̤kû̌dǒ ta asî apo̤kû hǐnu nî̌꤮. Gènè̤ ma̤jèkû̌dǒ kòyò htě a khòjîkhòjû ta̤ toǒ dě bè̌ na sò̌phlǒ pwǐ na khòbǎkû̌dǒ ta̤ ta asî hǐnu nî̌꤮.

4 Kòyò lǒ̤bò htě a ǒ ta hǐtaphò toǒ ayalè̌ dě, a ǒ ta aphû̌ama htǒo akhû̌akhî, a bǎ bè̌dubè̌na̤ lǒkho a ǒ ta hǐtaphò htǒonu. Ma ta wṳ̂nu bǎ ma̤bò̌ nû̌ûkhû̌ tò̤, bǎ cǒtè̤ nû̌ûkhû̌ tapwa̤ ta tapwa̤. Kòyò htě asò̌phlǒ patǎ phû̌mò̤nu toǒ ta kòyò htě a cû̌sǔnṳ kòphû̌kòma toǒnu Cǒmara cèrò asî pě. 5 Ǒtephe lǒkho ta ta̤mo̤ǐ wû toǒ nî̌꤮. Sò̌phlǒtobǎ lǒkho ta ta̤ htě a ǒ ta nanu toǒ, ma̤tè̤hî̌dě Cǒmara hî̌,

“He bè̌kè nǒ na dî̌kî̌꤮ tò̤, he wîkè na dǐkhò̌꤮ tò̤,” ^b a hî̌ hǐnu.

6 Hǐnudě,

“Cǒmara mî̌ pwa̤ htě a ma̤jè he. Kò ma̤ he hî̌tètè̌꤮ bǎbǎ, he ǐsha tò̤,” ^c pa hî̌ hè̌o numî̌ anî̤ pwǎ.

7 Gènè̤htò̌nṳ dǒ lǒkho kòyò htě a htûhto sî hǐkǒdû̌ dě a dǒhtû̌ǐhto bǎ sî ta Cǒmara ale̤ayo̤nu toǒ nî̌꤮. Gènè̤kè̌ lǒkho asî ta̤ǒhtûpwa̤ htě awǒnu toǒ, dě gûkè̌mò̌mṳ dǒ lǒkho asî ta̤yṳ htǒonu toǒ nî̌꤮. 8 Ye̤shǔkhrî̌stu htǒonu, bǎhǎno bǎbǎ, khò̌ti̤ni̤ bǎbǎ, pe̤wo̤pě bǎbǎ, a htû̌lè̌jò tò̤, tṳ̂gûla̤la̤ pwǎ.

9 Nolǒǎplò̤ǎ cû̌sǔ pûma̤ sî ta ta̤sû̌ǐtòwòǐ lǒ̤bò htě a kî̌yanu toǒ ma̤ nî̌꤮. Gûcû̌kû̌ pûma̤ nî̌꤮. Sî sò̌phlǒ htǒonu, a to khû̌ǎshû̌shohtò̌ ta Cǒmara abwǐasîrî akhû̌akhî pwǎ. Sî gana̤de gûma̤kû̌ shǎǎshǎo a ta̤sû̌ta̤tòwò toǒ akhû̌akhî, sî sò̌phlǒ khû̌ǎshû̌shohtò̌ tǒ̤ hǐnu mè̤tò̤. Sî gana̤de gûma̤kû̌ ta̤sû̌ta̤tòwò akhû̌akhî htǒonu, a nî̤bwǐnî̤sîrî sîya dǐcǎ꤮ tò̤. 10 Pa yṳǎ Khrî̌stu toǒ ayanu, pa ǒ ta pa ta̤lṳhtò̌wa̤. Pwǎ̤ta Yṳ̌daphû̌ pwa̤lṳhtò̌ta̤ htě a lṳhtò̌ǐ ta̤ dě a ma̤ta̤ hǐphû̌dû̌ cahtǐ akû toǒnu, ta̤lṳhtò̌ htě pa ǎ yǎmî̌ anî̤nu asî ǎjò kû̌kò tò̤.

11 Yṳ̌daphû̌ pwa̤lṳhtò̌ta̤ hǐkǒdû̌gutṳ̌ tapwa̤nu, a phî̌nṳ ta̤phû̌ta̤li̤ asǐ a cû̌nṳ ta̤gûla̤ cahtǐgutṳ̌ htǒoto̤to̤ dě a nṳlṳhtò̌ bǎ kò ta̤lṳhtò̌ dě a glè bòlû̌kè kò ta̤sǔ htǒonu toǒ. Pwǎ̤tadě ta̤phû̌ta̤li̤ ana̤klû toǒnu kò bǎ cû̌ shû̌gèkèbò yǎ dě ta̤lṳhtò̌ho khlo. ^d 12 Hǐnudě ma̤pûhǐ Ye̤shǔ ma̤ cahtǐ bǎ kòyòhǎkhû̌phû̌ htǒotoǒ ta asǐ ayanu, a bǎcû̌ khòsi ana̤ dě wî̤khlo tò̤glò. 13 Hǐnudě pa cû̌ khòplǒdǒ ta̤pi̤jishǐcǒ ta a dě wî̤khlo htǒonu hò̌꤮. ^{▼▼Pa cû̌khòplǒdǒ ta̤pi̤jishǐcǒ ta a amûasǎ mî̌, pa yṳ gûma̤kû̌pe Yṳ̌daphû̌ a ta̤lṳta̤tò̌ toǒ ta a ta̤subusaba ala̤klo toǒ tò̤hǒ. Mî̌tanu, pa bǎ yṳǎ tû̌pwǎ Ye̤shǔ pwǎ. Pa gû akò dě pa yṳǎ yǎ akhû̌akhî, kò glè pi̤jishǐcǒ pa pwǎ̤tadě pa ǐshape tò̤ hǒ.} 14 Ma̤tè̤hî̌dě payanu wî̤ htě a ǒměgle tûjûpwa̤ dě hǎkhû̌ bǎonu a ǒ dǐwî̤ tò̤. Pa kè̌lǎ wî̤ htě a glè hè pě htǒonu tî̤wî̤.

15 Hǐnudě, pa Běcǎ Ye̤shǔkhrî̌stu a ta̤ma̤jè pa akhû̌akhî, pa lṳhtò̌ pa ta̤htû̌sò̌ǐ a ta̤lṳhtò̌htǒo dě Cǒmara a ǒ pṳ̂̌꤮ taplǎ dě Ye̤shǔ mî̌ pa Běcǎ, pa olò̤ pwǐhè̌onu hò̌꤮. 16 Ma̤ta̤wǒ toǒ bǎbǎ, ta̤ma̤shû̌ma̤jo nû̌û tapwa̤ ta tapwa̤ toǒnu bǎbǎ shope̤ lǒkho pûma̤ nî̌꤮, ma̤tè̤hî̌dě htǒotoǒ numî̌ ta̤lṳta̤tò̌ htě ato Cǒmara asò̌phlǒ. 17 Gana̤de lǒkho sî ta̤subusaba a hǐkǒdû̌ toǒ ayo̤ dě gûma̤kû̌ pwǐ asî hî̌lò̤nu nî̌꤮. Asî ǒpo̤ kè̌ǐkhwè̌ǐ sî ta̤htûpwa̤ dě ta̤ htě asî ma̤ toǒnu, a bǎ pwe̤ǐlṳgesǒ Cǒmara pě. Sî dè gana̤de tò̤ hî̌dě a ma̤ ta ta̤sǎpla̤sǎyṳ pě. Dě a htûbwǐhtûsîrî sîya dǐcǎ꤮ tò̤.

18 Kwisabapo̤ bǎ lǒkho paya. Pa sî̌ya te̤mǎ ta dě pa sò̌phlǒkû htǒonu mo̤mo̤ a mo̤pwǎ, a bè̌ pa ta̤sǔ dǐcǎ꤮ tò̤. Htodě pa ma̤ta̤ titètè̌꤮ bǎbǎ, pa sò̌yṳ ma̤còcè̌pwǎ ta̤ htě ato toǒ pṳ̂̌꤮ taplǎ. 19 Dě sî kwisaba akhanu, he kwigwèbǎǐ gutṳgla sî ta ma̤pûhǐ Cǒmara sûge lǎgesǒ he dě sîǒnu dě, kwi sabashoshopo̤ bǎ lǒkho heya nî̌꤮.

Ta̤kwisaba gutṳ̌lò̤

20 – 21 Ma̤pûhǐ sî ma̤toma̤bǎ ta̤pè̤ta̤dû a Cǒmara htǒotapwa̤ asò̌phlǒnu dě, ta̤wǒ lǒ̤꤮ bò htě sî lo̤bǎ toǒnu, a ǐ bòmṳ̂sîglî tû̌ta sî nî̌꤮. Ye̤shǔkhrî̌stu akhû̌akhî, Cǒmara ma̤ta̤ dě pakû pwǐ a to tû̌ta asò̌phlǒnu toǒ nî̌꤮. Cǒmara ma̤htûpwa̤gehto pa Běcǎ Ye̤shǔ ta ta̤si hǒ. Dě Běcǎ Ye̤shǔ khòsi asò̌ dě asǐ bǎ mèlò̤ akhû̌akhî, a ma̤měma̤glekèhto Cǒmara a ta̤wṳ̂dò asa htě a ǒ tûjûpwa̤ htǒonutûmû hǒ. Dě a ma̤ hǐnu akhû̌akhî, Ye̤shǔ htû pa pwa̤gèǐsophû̌ htě adû̌khlokò tapwa̤ hǒ. Pa mî̌ asophû̌ toǒ hǒ. Kò ma̤sîrîdû̌sîrîhtû tû̌ta Ye̤shǔkhrî̌stu tûjûpwa̤ talakhǎ nî̌꤮.

Yo̤sǎ gutṳ̌lò̤

22 He khobǒsû̌ sî, lî̤ htě he khwè̌ ǐkhû̌ǐǎ sî htǒonu a htû nǒtò̤. Htodě he kwigwèbǎǐ sî ta sî khòsò̌do gana̤de he ta̤ǐkhû̌ǐǎ sî htǒonu nî̌꤮.

23 He sò̌yṳ ǐsî̌ya sî ta kò plûhǎhtò̌ pa pṳwè̤ Timò̤̌te dě apo̤kû hǒ. A dè hèto̤ lǎkû̌ he pě hî̌dě htû̌꤮ he hè ǒlèkû̌ sî pěnu, he kaǎhènṳ yǎ pě.

24 Pwe̤ǐlṳcû̌ bǎ pa ta̤hî̌mo̤hî̌wǒ htǒotoǒnu ta sî hǐkǒdû̌ lǒ̤꤮ bò ta bò Cǒmara akòyònu toǒ nî̌꤮. Htodě pa pṳwè̤ Khrî̌stuphû̌ Italiganu toǒ sûhè bǎ sî ata̤hî̌mo̤hî̌wǒ toǒ.

25 Cǒmara abwǐasîrî ǒkû̌ tû̌ta sî lǒ̤bò nî̌꤮.