Hebrews 3
Ye̤shǔ htû pwa̤tòlûhtò̌ hǐkǒdû̌
1Hǐnu akhû̌akhî, pṳwè̤ Khrî̌stuphû̌ htě Cǒmara kaǎ sî htǒotoǒ gènè̤kè̌ lǒkhomò̌ Ye̤shǔ htě Cǒmara nohè htû yǎta pwa̤dǒhtû̌ǐ Cǒmara ale̤ayo̤ ta pwa̤tòlûhtò̌ hǐkǒdû̌gutṳ̌ htǒotapwa̤nu. 2Pwǐ Mǒ̤jè cǒtè̤ ta ata̤ma̤ ta Cǒmara ahǐphû̌phòphû̌ toǒ ayanu, Běcǎ Ye̤shǔ htǒo, acǒatè̤ ta Cǒmara dě a bè̌htò̌ nû̌û a noma̤ nû̌û ta ata̤ma̤ htǒonu tapwa̤. a 3Kòyò htě a ma̤ hǐ htǒotama tapwa̤nu, kò bè̌dû̌bè̌htûkhlo yǎta hǐhtǒo tama. Hǐnuakho Ye̤shǔnu kò to bè̌dû̌bè̌htûkhlo yǎta Mǒ̤jè. 4Hǐ pṳ̂̌tamanu kò pwa̤ma̤htò̌ yǎ a ǒ tapwa̤pwa̤nu amè̤lè. Pò̤̌ta pwa̤ htě a ma̤htò̌ ta̤pṳ̂̌꤮ tacǎ numî̌ Cǒmara pwǎ. 5Mǒ̤jè htǒonu acǒatè̤ ta ata̤ma̤ ta Cǒmara ahǐphû̌phòphû̌ toǒ aya pwǐ pwa̤ma̤ta̤ tapwa̤nu hǒ. Dě Mǒ̤jè ta̤ma̤ toǒnu, a dǔlṳnǎwǐ la̤kè̌mò̌mṳ ta̤te̤ta̤mǎ ayo̤ toǒ htě Cǒmara dǔlṳ kò htû̌꤮ anǒkò toǒ aya pě. 6Pwǎ̤tadě, Khrî̌stu htǒonumî̌ alò̤ta Mǒ̤jè htě a htû pwa̤ma̤ta̤ dě Cǒmara ahǐkûnu tapwa̤ mè̤tò̤. A mî̌ Cǒmara aphû̌khû tapwa̤. A mî̌ acǒatè̤ ta ata̤ma̤ dě a kè̌ǐkhwè̌ǐ apha Cǒmara ahǐphû̌phòphû̌ toǒ. Pa dè gû khukhuhaha hèsělě Khrî̌stu to̤htû̌ agutṳ htohǒtò̤ ta̤ htě Cǒmara glè ǐ pa htǒonu, pa dè kè̌shuǐ hèsělě to̤htû̌ agutṳ hî̌mò̌nu, pa mî̌ Cǒmara ahǐphû̌phòphû̌ hǒ.Khrî̌stu mî̌ adû̌khlo ta Mǒ̤jè
7Hǐnudě Běcǎ sǎcahtǐ hî̌, “Khò̌ti̤ni̤, sî dè gana̤de Cǒmara ayo̤po̤ hî̌dě, 8Hǐkǒshò̌ lǒkho pûma̤ pwǐ sîphisîphunu toǒ ma̤ nî̌꤮. Bǎ sîphisîphu toǒ ǒ dě lo̤měshǒkla akhanu, a htè̌shǔ Cǒmara dě a gana̤de lǒkho nû̌ûyo̤ tò̤. A ma̤kè̌ lǒkho Cǒmara. b 9Ně li̤shi akû, he ma̤ kwè̌꤮ bǎ asî hî̌tènu, asî kè̌shǐhtohǒ pwǎ̤ta a ma̤kè̌ lǒkhopepwǎ he. 10Hǐnudě he sò̌phlǒdû̌ asî dě he hî̌ asî, ‘Asî mî̌ kòyò htě asò̌phlǒ cǒtè̤ lǒkho ta he tò̤ toǒ. Asî sî̌yaphlo lǒkho ta̤ htě he noma̤ asînu toǒ tò̤,’ he hî̌ asî hǐnu. 11Hǐnudě he sò̌phlǒdû̌ asî dě he hî̌lò̤kè asî ta̤hî̌bǎ tûmû, ‘Shiga htě he olò̤ ta he glè ǐ yǎta asî la̤ǒkǔ htǒotò̤glònu, asî nṳbǎpe tò̤ hǒ,’ he ǐsholò̤kè asî hǐnu.” c 12He pṳwè̤ sî꤮, sè̌rè̌ ǐtû̌ lǒkho sîna̤ nî̌꤮. Bè̌ phû̌mò̤shî̌hto lǒkho pûma̤ sî sò̌phlǒ ma̤, sî bè̌ sî sò̌phlǒ ta sî yṳǎ kû̌kò Cǒmara htě a htûpwa̤ htǒotapwa̤ tò̤, sî cû̌tephekè tû̌ sîya hǐnu toǒnu ma̤ lǒkho pûma̤ dǐpwǎ̤꤮ ma̤ nî̌꤮. 13Mî̌tanu, khònò̤htǒo ta̤ma̤lû̌htò̌ge htě Cǒmara ǐ pa htǒo ma̤pûhǐ ta̤sǔ lǒplò̤ pû sî dǐpwǎ̤꤮ tò̤, ma̤pûhǐ sî hǐkǒshò̌ lǒkho pû dǐpwǎ̤꤮ tò̤ ayanu, pṳ̂̌ti̤ni̤꤮ ǐkhû̌ǐǎ ma̤jèkè̌khînû̌û tapwa̤ ta tapwa̤ nî̌꤮. 14Ma̤tè̤hî̌dě, pa ta̤yṳǎ Cǒmara dě khû̌lû̌khanu, pa dè pṳ̂měǐwǒ yǎ to̤htû̌ agutṳ hî̌mò̌nu, pa htû pwa̤ma̤htuta̤ ta Khrî̌stu hǒ. 15Lî̤cahtǐkû hî̌, “Khò̌ti̤ni̤, sî dè gana̤de Cǒmara ayo̤po̤ hî̌dě, hǐkǒshò̌ lǒkho pûma̤ pwǐ sîphisîphu htě a htè̌shǔ Cǒmara dě gana̤de nû̌ûyo̤ tò̤nu toǒ ma̤ nî̌꤮,” d a hî̌ hǐnu. 16Kòyò htě a gana̤dehto lǒkho Cǒmara ayo̤po̤ pwǎ̤tadě a htè̌shǔ Cǒmara, a gana̤de nû̌ûyo̤ tò̤ toǒ numî̌ ûpè? Kòyònu toǒ mî̌ Mǒ̤jè kaǎhǎhtò̌ge asî dě Egyptgakûnu toǒhǒ. e 17Cǒmara sò̌phlǒdû̌ asî aněli̤shinu toǒ mî̌ ûpè? Kòyò htě a ma̤sǔ Cǒmara dě a nosikè asî bǎ lo̤měshǒklanu toǒ mè̤tò̤ ya? 18Bǎ Cǒmara hî̌lò̤kè asî ta, shiga htě he ǐ asî ta a la̤ǒkǔ ayanu tò̤glò mî̌ a nṳbǎpe tò̤ a hî̌ nû̌ûnu toǒ mî̌ ûpè? A hî̌lò̤kè ta̤hî̌bǎhtǒo numî̌, a hî̌ kòyò htě a gana̤de nû̌ûyo̤ tò̤nu toǒ hǒ. 19Hǐnudě asî yṳǎtò̤ akhû̌akhî, asî nṳjòpe ganu tebě tò̤ numî̌ pa sî̌yaphlobò tû̌hǒ.
Copyright information for
KxfSCKRC