Hebrews 5
1Pwa̤lṳhtò̌ hǐkǒdû̌gutṳ̌ pṳ̂̌꤮ pwa̤nu, kò wû̌lǎpwǎ yǎ dě kòyòhǎkhû̌phû̌ toǒ akla dě kò bè̌htò̌ a dě a glè ma̤ bǎ Cǒmara ata̤ma̤ ta kòyò lǒ̤꤮ bò agûla̤. A glèlṳtòhtò̌ bǎ kò ta̤toǒ, htohǒtò̤ ma̤pûhǐ kòyò toǒ ta̤sǔ bòlû̌kè ayanu, a lṳhtò̌ bǎ kò ta̤phû̌ta̤li̤ toǒ dě Cǒmara a ǒ pě. 2Asî htûpwǎ kòyòhǎkhû̌phû̌ akhû̌akhî, a ma̤sǔma̤plě lǒkho pwǎ. Hǐnudě kòyò htě a sî̌ya te̤mǎ kû̌kò ta̤te̤ta̤mǎ tò̤ dě a ma̤sǔma̤plě ta̤ toǒ ayanu, asî gènè̤ gwèbǎǐjò kû̌kò tò̤. 3Htodě asî sana̤nu, a ma̤sǔma̤plě ta̤ akhû̌akhî, asî bǎ lṳhtò̌ bǎ tû̌pwǎ kòyò htǒotoǒ ata̤sǔ toǒnu mè̤tò̤, asî bǎ lṳhtò̌ ǐdǒ asî ta̤sǔsǔ. a 4Tapwǎ̤꤮ mî̌ kò bè̌htò̌jò tû̌ kòna̤ ta kò glè htûhtò̌ pwa̤lṳhtò̌ hǐkǒdû̌gutṳ̌nu dǐpwǎ̤꤮ tò̤. Pwǐ Cǒmara bè̌htò̌ Aro ta a htû pwa̤lṳhtò̌ hǐkǒdû̌gutṳ̌ tapwa̤nu, kòyò htě a glè htû pwa̤lṳhtò̌ hǐkǒdû̌gutṳ̌ tapwa̤ numî̌, a mî̌ pwǎpǒ̤ Cǒmara tapwa̤ bǎ wû̌lǎ yǎnu pwǎ. b 5Hǐnuhǒ, ma̤pûhǐ Khrî̌stu htû pwa̤lṳhtò̌ hǐkǒdû̌gutṳ̌ htǒonu, a bè̌htò̌ tû̌ ana̤ mè̤tò̤, a bè̌ sîrîdû̌sîrîhtû tû̌ ana̤ mè̤tò̤, Cǒmara bè̌htò̌pwǎ nû̌û. Dě Cǒmara hî̌ yǎ, “Na mî̌ hephû̌khû, khò̌ti̤ni̤, he htû napha hǒ,” c a hî̌ nû̌û hǐnu. 6Cǒmara hî̌po̤ ahǔwa̤ tûmû, “Na htû pwa̤lṳhtò̌ta̤ tûjûpwa̤ htě alò̤ta pwa̤lṳhtò̌ta̤ Malakhǐsèdè̌ dě nukha tapwa̤,” d a hî̌po̤ nû̌û hǐnu. 7Ye̤shǔ ǒhtûpwa̤ hǎkhû̌bǎo akhanu, a kwisaba lǒ̤sû̌lǒ̤sò̌htò̌ Cǒmara htě a ma̤lû̌htò̌jò nû̌û ta ta̤sihtǒo tapwa̤, dě a yi̤kǒhtò̌ mi̤sǎshi lò̤. A shò̌lò̤ asò̌phlǒ dě a sò̌phlǒsho gana̤de Cǒmara yo̤ akhû̌akhî, Cǒmara gana̤de nû̌û ta̤kwisaba. e 8Ye̤shǔ htû Cǒmara aphû̌khû tapwa̤ pwǎ̤tadě bǎ a khòbǎ ta̤jîta̤jû akhanu, a phî̌nṳ tṳtṳpe ta̤gana̤de yo̤ dě Cǒmara ǒ. 9Bǎ Khrî̌stu gana̤dehtobò Cǒmara ayo̤ pṳ̂̌꤮ tacǎ akhanu, a htûhtò̌ bǎ kòyò lǒ̤꤮ bò htě a gana̤de nû̌ûyo̤nu toǒ a ta̤ma̤lû̌htò̌ge tûjûpwa̤ a kòshî̌kòtṳ hǒ. 10Dě Cǒmara bè̌htò̌ nû̌û ta pwa̤lṳhtò̌ta̤ hǐkǒdû̌gutṳ̌ htě alò̤ta pwa̤lṳhtò̌ta̤ Malakhǐsèdè̌ ma̤ta̤ dě nukha tapwa̤nu hǒ.Ǐsè̌rè̌nǎ ta kò glè wîkè pûma̤ ta̤yṳ ma̤
11Lo̤bǎ hî̌po̤ sî ta ta̤wi̤ta̤kè̌ htǒonu aǒplṳ̂ pe. Sî sî̌yaphlo pò̤ya̤tû̌ sîya akhû̌akhî, he dǒhtû̌ǐphlo bǎ sî dě apò̤. 12Khònò̤dě sî to htûkû̌ lǒkho sara toǒhǒ. Pwǎ̤ta sî cû̌ lo̤bǎpe tû̌ lǒkho pwǎ kò bǎ sû̌ǐ gesǒ sî ta Cǒmara ale̤ayo̤ akòshî̌ pwǎlè. Sî to ǎkû̌ kò shǎǎshò̌ pwǎ̤tadě sî cû̌ ope tû̌pwǎ lǒkho nṳ̂shi. f g 13Kòyò tapwa̤pwa̤ dě a ope tû̌pwǎ nṳ̂shi numî̌ a lò̤pwǎta phijaû̌ htě a onû̌penu pwǎ. Ta̤cǒta̤tè̤ awi̤akè̌nu, a sî̌yaplṳ̂kû̌ kò hǒtò̤. 14Pwǎ̤tadě, shǎǎ ashò̌ numî̌ kòyò dû̌pwa̤ htě a sû̌ǐ sî̌yahè bǎhto ana̤ dě a glè mèpa̤ sî̌yajò ta̤wǒ ta ta̤phû̌mò̤nu toǒ aya pwǎ.
Copyright information for
KxfSCKRC