Hebrews 7

Pwa̤lṳhtò̌ hǐkǒdû̌ Malakhǐsèdè̌

1Malakhǐsèdè̌ mî̌ Shalewî̤ akhwǐ tapwa̤, a htû Cǒmara htě adû̌gutṳ̌ htǒotapwa̤ a pwa̤lṳhtò̌ta̤ tapwa̤. Bǎ Abraham cû̌shěpè̤hto Khwǐ sò̌li̤ dě a ge klè̌lo̤ akhanu, Malakhǐsèdè̌ cû̌ kè̌shǔ nû̌û dě howi̤homò̤ nû̌û. ^a 2Dě Abraham ǐbò nû̌û ta̤kî̌ta̤kû̌ htě a nî̤bǎgenu toǒ pû̌shǐtûpû̌. Malakhǐsèdè̌ ami̤ amûasǎ awǐgutṳ̌ tûmû mî̌ “Ta̤cǒta̤tè̤ akhwǐ.” Htodě Shale amûasǎ mî̌ sò̌phlǒ gûjûkabǎ akhû̌akhî, ami̤ ǒpo̤ kû̌ta, “Sò̌phlǒ ta̤gûjûkabǎ akhwǐ.” ^b 3Malakhǐsèdè̌ apha bǎbǎ, amo̤ bǎbǎ, aphiphu khlilè toǒ bǎbǎ, Kò khwè̌mǎǐ yǎ dǐcǎ꤮ tò̤. A ta̤ǒlò̤ ta ata̤si awi̤akè̌ toǒnu bǎbǎ, kò khwè̌mǎǐ nû̌û tò̤tò̤. a mî̌ alò̤ta Cǒmara aphû̌khû tapwa̤. A htû pwa̤lṳhtò̌ta̤ tûjûpwa̤.

4A htǒo, a htûdû̌ pwî̌꤮ tènu gènè̤kè̌ lǒkho mò̌. Papha Abraham htě ami̤ lṳshilṳga htǒotapwa̤nu a ǐ nû̌û pû̌shǐtûpû̌ ta ta̤ htě a cû̌shěpè̤ dě a phî̌genṳnu toǒ. 5Khònò̤dě ta̤sû̌ta̤tòwò hî̌ Lě̤wǐ akhlialè htě a htû pwa̤lṳhtò̌ta̤ htǒotoǒ ta, asî glè kwi pû̌shǐtûpû̌ dě apṳwè̤ Israelphû̌nu toǒ a ǒ. Israelphû̌ htǒotoǒ numî̌, Abraham akhlialè hǎte̤gilò̤ tṳtṳ pwǎ̤tadě Lě̤wǐ akhlialè htǒotoǒ bǎ kwipwǎ asî. ^c 6Malakhǐsèdè̌ mî̌ akhlialè hǎte̤ ta Lě̤wǐ mè̤tò̤ pwǎ̤tadě a phî̌ pû̌shǐtûpû̌ dě Abraham a ǒ. Dě a howi̤ Abraham. Abraham mî̌ pwa̤ htě a nî̤bǎ Cǒmara a ta̤olò̤ tapwa̤ hǒ. 7Kòyò htě a howi̤ kò htǒotapwa̤nu adû̌khlo ta kòyò htě a nî̤bǎ ta̤howi̤ htǒotapwa̤ numî̌ sò̌phlǒ wò̌wè̌ la̤ǒ dǐcǎ tò̤. 8Yṳ̌daphû̌ pwa̤lṳhtò̌ta̤phû̌ htě akhlialè hǎte̤gilò̤ ta Lě̤wǐphû̌ ǒ htǒotoǒnu, a phî̌shǔ pû̌shǐtûpû̌ htǒonu dě kòyò htě a bǎ sipwǎ pěnu toǒ a ǒ. Pwǎ̤tadě Malakhǐsèdè̌ htǒonu, pa sî̌yatû̌ Cǒmara ale̤ayo̤ hî̌ ta a ǒhtûpwa̤ pwǎ. 9Htohǒtò̤ pa hî̌bǎ ta, Lě̤wǐ akhlialè htě a kwi pû̌shǐtûpû̌ htǒotoǒnu a ǐ nû̌ûta Abraham dě Abraham ǐ tṳtṳ nû̌ûta Malakhǐsèdè̌ hǒ. 10Ma̤tè̤hî̌dě, bǎ Abraham kè̌shǐshǔ ta Malakhǐsèdè̌ akhanu, Lě̤wǐ htǒotapwa̤nu, a ǒlò̤ hǒtò̤. A ǒpepwǎ aphiphu Abraham ana̤klû phěyî̌ akû pwǎ.

11Bǎ Cǒmara ǐ Yṳ̌daphû̌ toǒ ta̤sû̌ta̤tòwò akhanu, a bè̌htò̌ pwa̤lṳhtò̌ta̤phû̌ htě akhlialè hǎte̤ ta Lě̤wǐphû̌nu toǒ a ǒ. Asî bǎ lṳhtò̌ǐ bǎ kò pwǐ ta̤sû̌ta̤tòwò toǒ ǒnu. Lě̤wǐphû̌ pwa̤lṳhtò̌ta̤phû̌ htǒotoǒ ma̤ ata̤ma̤ htǒotoǒ pwǎ̤tadě ma̤pûhǐ kò htûhtò̌ kòcǒkòtè̤ ayanu, asî ma̤jòtò̤. Hǐnudě Cǒmara bǎ nohèkhǒ tèplè̌tû̌ pwa̤lṳhtò̌ta̤ ahǔwa̤ tapwa̤. Pwa̤lṳhtò̌ta̤ htǒotapwa̤nu akhlialè hǎte̤ ta Lě̤wǐphû̌ dě akhlialè hǎte̤ tṳtṳ ta Aro a ǒ htǒonu mè̤tò̤. Pwa̤lṳhtò̌ta̤ htǒotapwa̤nu, alò̤ta Malakhǐsèdè̌nu hǒ. 12Ma̤tè̤hî̌dě bǎ kò htû̌lè̌tèplè̌ pwa̤lṳhtò̌ akhlialè akhanu, kò bǎ htû̌lè̌tèplè̌dǒ ta̤sû̌ta̤tòwò toǒ. 13Běcǎ Ye̤shǔkhrî̌stu htě pa hî̌ yǎ awi̤akè̌ htǒotapwa̤ numî̌, a hènṳkè pwa̤lṳhtò̌ta̤ dě awǐkhanu toǒ agûla̤ hǒ. A mî̌ Lě̤wǐ akhlialè mè̤tò̤. Akhlialè hǎte̤ khǒtû̌ ahǔwa̤ tṳmṳ htě kò kaǎ yǎta Yṳ̌da akhlialè pwǐ pwa̤lṳhtò̌ta̤phû̌ tapwa̤ ma̤ta̤ dě ta̤lṳhtò̌wa̤ akòshî̌nu, akhlialè htǒonu, a ma̤nǒ kû̌kò pwa̤lṳhtò̌ ta̤ma̤ dǐpwǎ̤꤮ tò̤. 14Kò sî̌ya te̤mǎ ta pa Běcǎ Ye̤shǔkhrî̌stu htǒonu, akhlialè gilò̤ ta Yṳ̌da tṳmṳtacǎ a ǒ. Dě wǐkha mî̌, Yṳ̌da akhlialè htûhtò̌ pwa̤lṳhtò̌ta̤phû̌ toǒ pěnu, Mǒ̤jè hî̌nǒ dǐkhò̌꤮ tò̤.

Běcǎ Ye̤shǔ mî̌ alò̤ta Malakhǐsèdè̌

15Bǎ pwa̤lṳhtò̌ ahǔwa̤ tapwa̤ htě alò̤ta Malakhǐsèdè̌ dě nukha tapwa̤ hèto̤ akhanu, kò sî̌yaphlo hèto̤khlo ta̤ htě pa hî̌ htǒonu toǒ hǒ. 16Ta̤sû̌ta̤tòwò hî̌ ta kòyò htě a htûhtò̌ pwa̤lṳhtò̌ta̤nu, a bǎ khlilè hǎte̤gilò̤ ta tṳgumṳ akû a hî̌ hǐnu, pwǎ̤tadě Ye̤shǔ hè htû pwa̤lṳhtò̌ta̤ htǒonu, ato pwǐ ta̤sû̌ta̤tòwò hî̌nu mè̤tò̤. Mî̌tanu, a htûhtò̌ pwa̤lṳhtò̌ta̤ htǒonu ta a ta̤ǒhtûpwa̤ apo̤aphǎ shû̌sho dě a htûpwa̤ tûjûpwa̤ talakhǎ htǒonuhǒ. 17Ma̤tè̤hî̌dě lî̤cahtǐkû hî̌,

“Na htû pwa̤lṳhtò̌ta̤ tûjûpwa̤ htě alò̤ta Malakhǐsèdè̌nu pě” ^d a hî̌ hǐnu.

18Hǐnu akhû̌akhî, ta̤mǎlò̤ ali̤ htǒonu, kò bè̌tephekè yǎ ma̤tè̤hî̌dě a khû̌jaǎja dě a ma̤jèbò̌ pa tò̤. 19Mǒ̤jè a ta̤sû̌ta̤tòwònu a ma̤cǒma̤tè̤jò kò dǐpwǎ̤꤮ tò̤. Pwǎ̤ta khònò̤htǒo pa ta̤kè̌shuǐ klè̌ asa tabo htě awǒkhlope ta ta̤sû̌ta̤tòwò htǒonu a ǒ hǒ. Dě pa hènṳphǔ Cǒmara a ǒ ta klè̌ asa htǒotabo mî̌ anî̤ hǒ.

20Cǒmara bèlò̤hto ayo̤ ta Ye̤shǔ htû pwa̤lṳhtò̌ta̤ tûjûpwa̤ pě. Pwǎ̤ta bǎ Lě̤wǐ khlilèphû̌ toǒ htû pwa̤lṳhtò̌ta̤ akhanu, a bèlò̤kû̌ ayo̤ ta asî hǐnu dǐmû̌꤮ tò̤. 21Pò̤̌ta, Cǒmara hî̌ Ye̤shǔ,

“Běcǎ bèlò̤hto ayo̤ dě a hî̌kî̌yape tò̤, dě a hî̌, ‘Na htû pwa̤lṳhtò̌ta̤phû̌ tûjûpwa̤ pě,’” ^e

Bǎ Ye̤shǔ htò̌htû pwa̤lṳhtò̌ta̤ akha, Cǒmara hî̌ nû̌û hǐnu. 22Ta̤wṳ̂dòyo̤ asa htě Cǒmara ma̤htûhtò̌ bǎ pa dě pa glè nî̤bǎ ta̤pelesesǎ aya htǒotûmûnu, awǒkhlope ta ta̤wṳ̂dòyo̤ ali̤nu tûmû. Ma̤tè̤hî̌dě, Cǒmara bèlò̤hto ayo̤ hǐnu akhû̌akhî, Ye̤shǔ mî̌ pwa̤ htě a ma̤lǒbe te̤mǎ bǎ pa ta̤wṳ̂dò asahtǒo tûmû tapwa̤ hǒ.

23Ta̤ htě a kî̌yape nû̌û ahǔwa̤ tacǎ mî̌ pwa̤lṳhtò̌ta̤ dě nukha toǒnu, a si lǒkho akhû̌akhî, kò pwa̤htò̌ tṳtṳ asî gûla̤nu a ǒplṳ̂. 24Pwǎ̤ta Ye̤shǔ htǒonu, a ǒhtûpwa̤ tûjûpwa̤ akhû̌akhî, a ǐlò̤ tṳtṳpe pwa̤lṳhtò̌ta̤ ata̤ma̤ htǒonu dě kò cǔdekû dǐpwǎ̤꤮ tò̤. 25Hǐnudě kòyò htě a hè Cǒmara a ǒ dě a hènṳ tṳtṳ Ye̤shǔ a ǒ toǒnu, Ye̤shǔ ma̤lû̌htò̌gebò̌ asî khònò̤htǒo tǒ̤hè ta tûjûpwa̤ talakhǎ pě, ma̤tè̤hî̌dě ma̤pûhǐ a nṳ kwigwèbǎǐbò̌ bǎ kòyò hǐnu toǒ aya dě Cǒmara a ǒnu, a bǎ htûpwa̤ tûjûpwa̤.

26Hǐnudě, Ye̤shǔ mî̌ pwa̤lṳhtò̌ta̤ hǐkǒdû̌gutṳ̌ tapwa̤ htě a ma̤lǒbebò bǎ pa ta̤lo̤bǎ toǒ. A mî̌ acahtǐ, ata̤sǔ ǒtò̤, asò̌phlǒ mṳ̂plî. Cǒmara bè̌ǒkhǒtephe nû̌ûta ta̤ma̤sǔphû̌ toǒ, dě a ǐǒ nû̌û gûla̤ htò̌yî̤gutṳ̌ tò̤glò hǒ. 27A mî̌ alò̤ta pwa̤lṳhtò̌ta̤ hǐkǒdû̌gutṳ̌ ahǔwa̤nu toǒ mè̤tò̤. pṳ̂̌ti̤ni̤꤮ a lo̤bǎ lṳhtò̌wǐgutṳ̌ tû̌ ata̤sǔ toǒ htodě a lṳhtò̌nǒ bǎ kòyò ahǔwa̤ toǒ ata̤sǔ toǒ hǐnu mè̤tò̤. Bǎ a lṳhtò̌ ana̤ dě nò̌dòhtǔlo̤ akhanu, a lṳhtò̌ pwǎ taplǎpa dě a htophlǔ tûjûpwa̤ hǒ. ^f 28Pwa̤tòlûhtò̌ta̤ toǒnu, a ta̤sǔta̤plě ǒpwǎ lǒkho pwǎ̤tadě ta̤sû̌ta̤tòwò ǒ akhû̌akhî, kò bǎ bè̌htò̌pwǎ asî. Pò̤̌ta bǎ Cǒmara ǐlò̤hto ta̤sû̌ta̤tòwò htǒo anǒyî̤ hǒnu, a olò̤ kî̌yagepo̤ tûmû dě a bènṳdǒ ayo̤ bǎnu. A bèlò̤ ayo̤ ta a bè̌htò̌ a phû̌makhû dě ata̤sǔ ǒtò̤, a lǒbe htǒotapwa̤ ta a glè htûhtò̌ pwa̤lṳhtò̌ hǐkǒdû̌gutṳ̌ tûjûpwa̤ hǒ.