Heb 8 | KxfSCKRC | STEP | Khònò̤htǒo, ta̤ htě a lo̤bǎdû̌shǐ tacǎ dě he sò̌yṳ nosî̌yaphlo sî numî̌ pa pwa̤lṳhtò̌ hǐkǒdû̌gutṳ̌ htǒotapwa̤ hǒ. A mî̌ Ye̤shǔ hǒ. Khònò̤htǒo a hǎnòò̌ mǒkhû̌ dě a hǎnòò̌ bǎ Cǒmara alîarakha, apo̤aphǎ htǒotapwa̤ la̤hǎnòò̌ acǔdemûnu tokho hǒ.

Hebrews 8

Ye̤shǔ mî̌ pa pwa̤lṳhtò̌ hǐkǒdû̌gutṳ̌ tapwa̤

1 Khònò̤htǒo, ta̤ htě a lo̤bǎdû̌shǐ tacǎ dě he sò̌yṳ nosî̌yaphlo sî numî̌ pa pwa̤lṳhtò̌ hǐkǒdû̌gutṳ̌ htǒotapwa̤ hǒ. A mî̌ Ye̤shǔ hǒ. Khònò̤htǒo a hǎnòò̌ mǒkhû̌ dě a hǎnòò̌ bǎ Cǒmara alîarakha, apo̤aphǎ htǒotapwa̤ la̤hǎnòò̌ acǔdemûnu tokho hǒ. ^a 2 Khònò̤htǒo a ma̤ pwa̤lṳhtò̌ hǐkǒdû̌gutṳ̌htǒo ata̤ma̤, a ma̤ dě mǒkhû̌ htě ta̤gûla̤ cahtǐ tò̤glò akû hǒ. Hǐphû̌dû̌ cahtǐ mè̤mè̤̌ htǒonu kò ma̤ nû̌ûta kòyòhǎkhû̌phû̌ acǔde mè̤tò̤. Běcǎ ma̤htò̌ tû̌ nû̌ûta ana̤.

3 Pwa̤lṳhtò̌ta̤ hǐkǒdû̌gutṳ̌ pṳ̂̌꤮ tapwa̤nu, kò bè̌htò̌ yǎta a bǎ lṳhtò̌ta̤ htodě a bǎ lṳhtò̌ǐ nû̌ûta ta̤phû̌ta̤li̤ toǒ dě Cǒmara ǒ. Hǐnudě, pa pwa̤lṳhtò̌ta̤ htě adû̌gutṳ̌ htǒotapwa̤nu, a bǎ lṳhtò̌ǐdǒ ta̤ tacǎcǎ. 4 Pwǎ̤tadě Ye̤shǔ htě a htû pwa̤lṳhtò̌ta̤ hǐkǒdû̌gutṳ̌ htǒotapwa̤nu, bǎ a ǒpe bǎ hǎkhû̌bǎo akha, pwa̤lṳhtò̌ta̤ htě a bǎlṳbǎtòhtò̌ǐ pwǐ ta̤sû̌ta̤tòwò ǒnu, a ǒtû̌hǒ akhû̌akhî, a htûnṳ kû̌kò pwa̤lṳhtò̌ta̤ tò̤. 5 Hǐphû̌ cahtǐ htě pwa̤lṳhtò̌ta̤phû̌ toǒ nṳma̤ nû̌û dě hǎkhû̌ bǎotama numî̌, a kè̌mò̌mṳ mè̤mè̤̌ Cǒmara a ta̤lṳhtò̌ho dě mǒkhû̌nu tama pwǎ. Hǐphû̌dû̌ cahtǐ htǒotamanu a mè̤mè̤̌ mè̤tò̤, amè̤pwǎ dě mǒkhû̌nu tama a ta̤yo̤ta̤gî pwǎ. Ma̤tè̤hî̌dě, bǎ Cǒmara noma̤htò̌ Mǒ̤jè hǐphû̌dû̌ cahtǐ bǎ hǎkhû̌bǎo akhanu, a hî̌ nû̌û ta, “Gûma̤ kè̌mò̌mṳ te̤mǎwǒ sǒsǒbò pwǐ na kè̌shǐhto mǒkhû̌ ta̤lṳhtò̌ho ayo̤ dě kholokhû̌kha nunî̌,” ^b Cǒmara hî̌ nû̌û hǐnu. 6 Ye̤shǔ ma̤ta̤ pwǐ pwa̤lṳhtò̌ta̤ tapwa̤nu, awǒkhlope ta pwa̤lṳhtò̌ta̤phû̌ dě hǎkhû̌ bǎotoǒ ma̤nu. Hǐnuakho, Cǒmara a ta̤wṳ̂dò asa htě Ye̤shǔ phî̌hènṳ htǒonumî̌ awǒkhlope ta ta̤wṳ̂dò ali̤ htǒonu. Ta̤wṳ̂dò asa htǒonu, a gètè̤ nǎla̤htò̌ǐ ta̤wṳ̂dò htě awǒkhlo toǒ alo̤.

7 Ta̤wṳ̂dò wǐnu tûmûnu, a dè lǒbe hî̌dě pa lo̤bǎpe ta̤wṳ̂dò anǒ htǒotûmû glè hènṳ bû̌tèplè̌pe nû̌û gûla̤tò̤ hǒ. 8 Pwǎ̤tadě Cǒmara bè̌ ta̤sǔ akòyò toǒ alo̤ dě a hî̌,

“Akhîakha htě he glè ma̤ ta̤wṳ̂dò asa ta Israelphû̌ toǒ bǎbǎ, Yṳ̌daphû̌ toǒ bǎbǎ a hèto̤pě,” ^c a hî̌ hǐnu.

9 “Bǎ he cǐhǎhtò̌ asî ta he cǔde dě he kaǎhǎhtò̌ge asî phiphu bǎ Egyptga akhanu, he wṳ̂dòhto heyo̤ ta asînu a ǒ pwǎ̤tadě ta̤wṳ̂dò khònò̤htǒonu, a kî̌yatû̌ a ta. Asî cǒtè̤ta he ta̤wṳ̂dò htǒonu tò̤ akhû̌akhî, he htû̌tiwǐ cû̌khǒkè hemi̤sǎ ta asî hǒ, Běcǎ hî̌hǐnu.

10 Hǐnudě, Běcǎ hî̌ ta ta̤wṳ̂dò asa htě he glè wṳ̂dò yǎta Israelphû̌ sî toǒnu, he hî̌ asî pwǐhè̌o pě, he shû̌nṳ he ta̤sû̌ta̤tòwò toǒ dě asî sò̌phlǒ ta̤gènè̤ akû pě. He khwè̌mǎnǎ he ta̤sû̌ta̤tòwò toǒ dě asî sò̌phlǒkû pě. He htû asî Cǒmara pě dě asî htû hekòyò pě.

11 Bǎnuakha pěnu, asî akhlilèphû̌ sǒsǒnû̌û toǒ bǎbǎ, apṳawè̤kla toǒ bǎbǎ, a lo̤bǎpe kò sû̌ǐtòwòǐ asî ta, ‘Sî̌ya lǒkho Běcǎ nî̌꤮’ hǐnu petò̤hǒ. Ma̤tè̤hî̌dě sahtò̌ bǎ kò gènè̤pî̌tî̌ nû̌û tapwa̤ to̤htû̌ kò gènè̤dû̌gutṳ̌ nû̌û tapwa̤nu, a sî̌yabò he pě.

12 He gwèbǎǐ asî pě dě he bòlû̌kèbò asî ata̤phû̌mò̤shî̌hto toǒ pě dě he shope̤nǎkèbò asî ta̤sǔnu toǒ pě.” ^d

13 Cǒmara hî̌ ta htǒo mî̌ ta̤wṳ̂dò asa tacǎ akhû̌akhî, a nohtûhtò̌kè ta̤wṳ̂dò ali̤ htǒonu ta a lo̤bǎpe tò̤. Ali̤alṳ̂ hǒ, kò lo̤bǎpe yǎtò̤, dě yî̤hǒtò̤ pěmî̌, a glè hǎmǎkè hǒ.