James 1

1He mî̌ Jǎgomo̤, he htû Cǒmara ta Běcǎ Ye̤shǔkhrî̌stu ajûphû̌ tapwa̤. He hî̌mo̤hî̌wǒ cû̌ bǎ Cǒmara akòyò khlilè shǐginǐ̤mṳ htě a cû̌ǒpîshîpò̤wò̤ lǒkho gûla̤ pṳ̂̌꤮ tò̤glò toǒ aǒ. ^a

Ta̤yṳta̤nǎ ta ta̤sî̌ta̤jò

2He pṳwè̤ sî꤮, bǎ sî kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ pṳ̂̌꤮ tacǎ hèbǎ sî akhanu, bè̌ yǎ pwǐ ta̤sò̌le̤sò̌lò̤ adû̌ tacǎ ta sîyanu nî̌꤮. 3Ma̤tè̤hî̌dě, bǎ sî kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ sèlèkè̌ sî ta̤yṳta̤nǎ htǒoakhanu, a ǐǒhtò̌ dû̌khlopo̤ sî ta̤khòsò̌do toǒ pwǎnu sî sî̌yatû̌ hǒ. 4Ma̤pûhǐ sî ta̤ǒhtûpwa̤hǎnòò̌ htǒotoǒ yû̌gilò̤to̤ pû dî̌kî̌꤮ tò̤, ma̤pûhǐ a tobǎ ta Cǒmara asò̌phlǒ, htohǒtò̤ sî dû̌htò̌ lǒbekû̌ tû̌ta ta̤pṳ̂̌꤮ tacǎ ayanu, sî tobǎ jipwi̤ khòsò̌do to̤ lǒkho dě a gutṳ nî̌꤮. 5Pwǎ̤tadě sîklanu, kòyò tapwa̤pwa̤ dè lo̤bǎ ta̤sî̌khû̌sî̌ya dèhî̌dě, a tobǎ kwihtò̌ Cǒmara ǒ dě Cǒmara ǐlò̤tû̌ yǎ pě. Ma̤tè̤hî̌dě, Cǒmara sǎhtǎshǔ kòyò htě a kwihtò̌ nû̌ûnu a ǒdǐpwǎ̤꤮ tò̤. A gwèbǎǐ kò pṳ̂̌꤮ tapwa̤, dě a sò̌yṳ ǐ kò pṳ̂̌꤮ tapwa̤. 6Pò̤̌ta, bǎ sî kwisaba akhanu, sî bǎ ǒ ta ta̤yṳ, sî tobǎ sò̌phlǒwò̌wè̌ dî̌kî̌꤮ tò̤. Kòyò htě a sò̌phlǒwò̌wè̌ toǒnu, alò̤ta gili̤sǎ hèpěpǒshi dě shidû̌shite̤we̤ akûnu toǒ pwǎ. 7– 8Kòyò htě alò̤ta shipěpǒ htǒotoǒnu, a nî̤bǎ ta̤ tacǎcǎ dě Běcǎ a ǒ pěnu, a to gènè̤ tò̤, ma̤tè̤hî̌dě a ma̤ta̤ titètè̌꤮ nu, asò̌phlǒ ǒplṳ̂ dě asò̌phlǒ nûhtonûlò̤ akhû̌akhî, a nî̤bǎ ta̤ dǐcǎ꤮ tò̤.

Kòyò hǒwi̤shèwè ta kòyò dû̌yò̤htò̌sa

9Khrî̌stuphû̌ htě a hǒwi̤shèwè tapwa̤nu, Cǒmara bè̌htò̌yî̤ yǎ pě, hǐnudě a bǎ sò̌le̤sò̌lò̤. 10Kòyò dû̌yò̤htò̌sa htě Cǒmara bè̌phǔlò̤ yǎ tapwa̤nu, a tobǎ sò̌le̤sò̌lò̤ pwǎ, ma̤tè̤hî̌dě kòyò dû̌yò̤htò̌sa toǒnu a nolòte̤sikè sǒsǒta mi̤sǎwû̌phonu toǒ pě. ^b 11Lṳmṳhtò̌ dě agûnokhwekè mi̤ toǒ akhû̌akhî, apho toǒ lòte̤sikèbò, dě a ta̤wî̤ta̤tè̤ toǒ hǎmǎkèbò pwǎ. Hǐnuakho bǎ kòyò dû̌yò̤htò̌sa toǒ cû̌ ma̤guma̤khè̌ ta̤ akhapěnu, a sikè dǒ hǐnu pě.

Ta̤sèlèkè̌ ta ta̤lǒǎplò̤ǎ

12Kòyò htě a khòsò̌do toǒnu, htû̌꤮ a kè̌shǐ shěto̤bǎ ta ta̤pò̤ta̤sha ta̤lǒǎplò̤ǎ akhapěnu, a nî̤bǎ ta̤howi̤ pě. Ma̤tè̤hî̌dě bǎ asî ma̤pî̌htokè ta̤pò̤ta̤sha ta̤lǒǎplò̤ǎ pwǐhè̌o akhanu, Cǒmara ǐ asî ta̤htûpwa̤ tûjûpwa̤ asû htě a olò̤ ta a ǐ kòyò htě a mo̤ǐ nû̌ûnu toǒ pě.

13Kòyò htě a kè̌shǐ shěto̤bǎ ta̤lǒǎplò̤ǎ pwǐhè̌o toǒnu, a tobǎ hî̌ ta, “Ta̤htǒomî̌ a ǒ dě Cǒmara a ǒ hè pwǎ,” a bǎ hî̌ hǐnu tò̤. Ta̤lǒǎplò̤ǎ phû̌mò̤shî̌htonu a lǒhtěcǐbò̌ ta Cǒmara tò̤. Htohǒtò̤ Cǒmara sana̤ tû̌nu, a htû̌sǒbǎ phû̌mò̤ nǒ kò dǐpwǎ̤꤮ tò̤. 14Pwǎ̤tadě bǎ kòyò pṳ̂̌꤮ tapwa̤ kè̌shǐ shěto̤bǎ ta ta̤lǒǎplò̤ǎ akhanu, ana̤klû a ta̤sò̌yṳ phû̌mò̤ tû̌nu toǒ cǐnṳhtěnṳ dǒpwǎ nû̌û. 15Nǒkòdě bǎ kòyò htǒotapwa̤ ma̤ a ta̤sò̌yṳ phû̌mò̤ htǒoakhanu, a dǔlṳhtò̌ nû̌û ta̤sǔ, htotaplǎdě ta̤sǔ htǒo pǒǐbò nû̌ûsò̌phlǒ dě aphû̌ǒlò̤ tû̌ ta̤si tûjûpwa̤ hǒ.

16He pṳwè̤ he mo̤ǐ sî꤮, ta̤ htě a totò̤ toǒnu, cû̌yṳǎ lǒkho pûyǎ ma̤ nî̌꤮. 17Sû htě awǒ dě a lǒbebò numî̌ Cǒmara htě a bǒlò̤ lṳmṳ, la ta shǎ htǒotoǒ tapwa̤ ǐlò̤ pwǎ. Cǒmara ala̤klo htû̌lè̌ tèplè̌khǒkè pwǐ ta̤lî yo̤ǔ htû̌lè̌khǒkènu tò̤. 18Dě pa gana̤de ta̤sò̌le̤sò̌lò̤ awi̤akè̌ ta̤te̤ta̤mǎ akhû̌akhî, Cǒmara ǐhtûhtò̌ pa ta aphû̌ jǔ꤮ tû̌ pwǐ asò̌phlǒnu hǒ. Ma̤pûhǐ pa htûhtò̌ sǒsǎ htě asǎwǐgutṳ̌ toǒ dě ta̤bǒlò̤ lǒ̤꤮ bò htǒotoǒ aklanu, a ǐhtûhtò̌pwǎ pa ta aphû̌.

Ta̤gana̤de ta ta̤jûle̤phî̌yo̤

19He pṳwè̤ he mo̤ǐ sî꤮, to̤ǐ lǒkho yo̤sǎ htǒotûmû nî̌꤮. Kòyò pṳ̂̌꤮ tapwa̤ tobǎ gana̤de te̤mǎ, a tobǎ gènè̤hî̌bǎ lǒkho dě a tobǎ sò̌phlǒdû̌htò̌phwè tò̤. 20Ma̤tè̤hî̌dě, kòyò htě sò̌phlǒdû̌ toǒnu, a dǔlṳhtò̌jò ta̤ǒhtûpwa̤ acǒatè̤ htě Cǒmara sò̌yṳ noǒhtûpwa̤ htǒonu dǐkhò̌꤮ tò̤. 21Hǐnudě wîkèbò ta̤wi̤japhǎkò htě sî ma̤ sala̤ yǎnu toǒ ta sî la̤klo lǒ̤꤮ bò htě a phû̌mò̤shî̌htonu toǒ. Dě shò̌lò̤ lǒkho sî sò̌phlǒ dě gana̤de yṳǎ lǒkho Cǒmara ale̤ayo̤ htě a shǒlò̤ nû̌ûdě sî sò̌phlǒkû htǒonu toǒ. Ale̤ayo̤ htǒonumî̌ a ma̤lû̌htò̌ge bò̌jò sî.

22Sî gana̤de pwǎpǒ̤ Cǒmara ale̤ayo̤ dě sî dè jûle̤phî̌yo̤ gûma̤kû̌ pwǐ a hî̌nu tò̤ hî̌numî̌ sî lòho lò̤tû̌ sîna̤ hǒ. Sî tobǎ gana̤de gûma̤kû̌ pwǐ Cǒmara ale̤ayo̤ hî̌nu. 23Kòyò htě a gana̤de cè̌cè̌pwǎ Cǒmara ayo̤ dě a gûma̤ kû̌kò tò̤ toǒ numî̌ alò̤ta kòyò htě a kè̌ ami̤sǎ ta me̤dǔ toǒnu pwǎ. 24A kè̌hto ana̤ ta me̤dǔ dě a hǎhtò̌cû̌ tephekè akha, a kè̌shǐ lǒ̤꤮ bò dě me̤dǔkûnu toǒ, a shope̤nǎkèpwǎ taplǎ pa. 25Ta̤sò̌le̤sò̌lò̤ awi̤akè̌ mî̌ Cǒmara a ta̤sû̌ta̤tòwò htě alǒabe ta a ma̤lû̌htò̌ge kòyò dě ta̤sǔta̤plě akû. Kòyò tapwa̤pwa̤ a sî̌ya te̤mǎwǒ ta̤sû̌ta̤tòwò htǒo dě a shope̤nǎkè ta̤sû̌ta̤tòwò htǒo tò̤ toǒ, htohǒtò̤ a gana̤de gûma̤ ta̤sû̌ta̤tòwò htǒotapwa̤nu, Cǒmara howi̤ ata̤ma̤ htǒonu pě.

26Kòyò tapwa̤pwa̤ dě a gènè̤lò̤ ana̤ ta a mî̌ kòyò subusabawǒ mè̤mè̤̌ ta̤ tapwa̤ pwǎ̤tadě a dè sè̌rè̌ǐ a ta̤hî̌bǎ tò̤ hî̌nu, a subusabawǒ ta̤ htǒonu, ale̤dû̌pwî̤htûpe dǐcǎ꤮ tò̤, dě a htûpwǎ kòyò htě a lòhǎlòho lò̤tû̌ ana̤ tapwa̤ pwǎ. 27Ta̤subusaba htě pha Cǒmara bè̌ yǎta ta̤ htě a mṳ̂plî lǒbe toǒ numî̌ mî̌pwǎ ta̤kè̌ǐkhwè̌ǐ phû̌ǒkwè̌ toǒ ta mamǔǒkhwè̌ htě a to̤bǎ ta ta̤pò̤ta̤sha toǒ, htohǒtò̤ kòyò htě a khòǐpè̤ ana̤ dě a ǒtepheyî̤bò̌ ta hǎkhû̌ a ta̤phû̌mò̤shî̌hto sînu toǒ hǒ.