James 2

1He pṳwè̤ sî꤮, sî mî̌ kòyò htě a yṳǎna̤ǎ Běcǎ Ye̤shǔkhrî̌stu dě a ǒ ta ta̤sîrîdû̌sîrîhtû tapwa̤ toǒ. Hǐnu akhû̌akhî, sî tobǎ kè̌dû̌kè̌pî̌tî̌ kò dǐpwǎ̤꤮ tò̤. 2Hî̌kû̌nǎ bǎ sî hè subusabaplǒ nû̌û akha, kòyò sò̌gini̤ dè hènṳ sîkla, dě tapwa̤ mî̌ a kûsǒ hǐdohǐyò̤ htě ale̤dû̌pwî̤htû, a tûplû̌wû tûplû̌hta toǒ, ahǔwa̤ tapwa̤ lè̌dě a hǒwi̤shèwè dě a kûsǒ pwǎ hǐdohǐyò̤htò̌yè̌ pwǎ. 3Kòyò dû̌yò̤ tapwa̤ dě sî bè̌dubè̌na̤ kaǎshǔ yǎ, htohǒtò̤ sîkla tapwa̤nu a hî̌ nû̌û, “Hǎnòò̌ bǎ gògohtò̌yî̤wǒ akhû̌bǎo” dě a hî̌lè̌ kòyò hǒwi̤shèwènu tapwa̤ ta, “Ihtǒ ǒbǎnu,” mètò̤mî̌ “Hǎnòò̌ bǎ jûkhû̌ bǎ he khò̌lopo̤ kòshî̌bǎo,” a hî̌ hǐnu. 4Sî ma̤kwè̌꤮ titè numî̌ sî sî̌ya tò̤ ya? Kòyò dě sîkla htǒotoǒnu, sî kè̌shǐkhǒ asî dě sî htûhtò̌ pwa̤cèrò kòyò htě a ǒ ta ta̤gènè̤ phû̌mò̤shî̌hto sîtoǒ hǒ.

5Pṳwè̤mo̤pha sî꤮, gana̤de lǒkho. Kòyò htě a hǒwi̤shèwè dě hǎkhû̌ bǎotoǒ numî̌, ma̤pûhǐ asî ta̤yṳta̤nǎ shû̌shohtò̌ dě asî glè ma̤nṳ shiga htě Cǒmara olò̤nǎ bǎ kòyò ta a mo̤ǐ nû̌ûnu toǒ ayanudě, Cǒmara wû̌lǎ asî numî̌ sî sî̌ya te̤mǎtû̌ hǒ. 6Pwǎ̤tadě kòyò shuphǔshèwèphû̌ toǒnu sî bè̌dubè̌na̤ asî tò̤. Kòyò htě a pè̤ǎpè̤o ma̤jîma̤jû sî numî̌ kòyò dû̌yò̤htò̌saphû̌ toǒnu pwǎ. Pwa̤ htě a cǐhè sî dě pwa̤cèròta̤phû̌ toǒ a lo̤mo̤ numî̌ asînu toǒ hǒ. 7Kòyò htě a pi̤jishǐcǒ pî̌bò Khrî̌stu mi̤wî̤mi̤wǒ toǒnu mî̌ asî hǐnu toǒ hǒ.

8Lî̤cahtǐkû hî̌, “Mo̤ǐ kòhǔwa̤ pwǐ na mo̤ǐlò̤ nana̤nu,” ^a a hî̌ hǐnu. Sî dè jûle̤phî̌yo̤ mè̤mè̤̌ Cǒmara ashiga ata̤sû̌ta̤tòwò htǒo hî̌numî̌ sî ma̤to ta̤ hǒ. 9Pwǎ̤ta sî dè kè̌dû̌kè̌pî̌tî̌ kò hî̌mò̌nu, sî ma̤ ta̤sǔ dě ta̤sû̌ta̤tòwò cèrò sî pwǐ kòyò ma̤sǔ ta̤sû̌ta̤tòwò tapwa̤nu hǒ. 10Ûpè꤮ tapwa̤ bǎbǎ a dè ma̤sǔ ta̤sû̌ta̤tòwò tûmû hî̌nu, a ma̤sǔbò ta̤sû̌ta̤tòwò lǒ̤꤮ bò hǒ. 11Cǒmara hî̌, “Cû̌sǔnṳ ma̤ mamǔmakhû ma̤” a hî̌ hǐnu. Htodě a hî̌po̤, “Ma̤si ma̤ kòyò ma̤” a hî̌po̤ hǐnu. ^b Hǐnudě sî dè cû̌sǔnṳ kòphû̌kòma tò̤ pwǎ̤tadě sî dè ma̤si kòyò hî̌mò̌nu, sî htûhtò̌ kòyò htě a ma̤sǔ ta̤sû̌ta̤tòwò tapwa̤ hǒ. ^c

12Sè̌rè̌ǐ lǒkho sî ta̤hî̌bǎ ta sî ta̤ma̤ toǒnu, ma̤tè̤hî̌dě ta̤sû̌ta̤tòwò htě a ǐ kòyò ta̤pelesesǎ htǒo cèrò sî pě. 13Ma̤tè̤hî̌dě kòyò tapwa̤pwa̤ a gwèbǎǐ kò tò̤nu, htû̌꤮ Cǒmara cèrò kòyònu tapwa̤ akhapěnu, a gwèbǎǐ nû̌û pě tò̤. Ta̤gwèbǎǐ kònu a ma̤pè̤ ta̤cèrò.

Ta̤yṳta̤nǎ ta ta̤ma̤

14He pṳwè̤ sî꤮, kòyò tapwa̤pwa̤ dè hî̌ ta he ta̤yṳta̤nǎ ǒ a hî̌ pwǎ̤ta a dǔlṳ a ta̤yṳhtǒo ta a ma̤ ta̤wǒ toǒ tò̤ hî̌mò̌nu, abwǐasîrî ǒ dǐcǎ꤮ tò̤. A ta̤yṳta̤nǎ htǒonu a ma̤lû̌htò̌jò nû̌û tò̤. 15Hî̌kû̌nǎ sî pṳwè̤ makhû mètò̤mî̌ sî pṳwè̤ mamǔ tapwa̤pwa̤nu a la̤kûla̤sǒ, a la̤ǎla̤o ti̤ni̤ ta ti̤ni̤ aya dè ǒlǒǒbe tò̤ hî̌phǒphǒmò̌nu, 16Dě sîkla tapwa̤pwa̤nu a dè hî̌ nû̌û ta, “Gemo̤ gewǒ nî̌꤮, Cǒmara ǒkû̌ tû̌ta na pě, ma̤la̤wǒ nana̤ nî̌, dě ǎkǒobe tû̌ lǒkho nî̌꤮,” a hî̌ hǐnu pwǎ̤tadě sî dè ǐ asî la̤kûla̤sǒ, la̤ǎla̤o dǐcǎ꤮ tò̤ hî̌nu, abwǐasîrî ǒ dǐcǎ꤮ tò̤. 17Ta̤yṳta̤nǎ numî̌ alò̤ta hǐnuhǒ. A dè ǒpwǎpǒ̤ ta̤yṳ tacǎpa, ta̤ma̤ dè ǒlṳ tò̤ hî̌numî̌ mî̌pwǎ ta̤yṳ htě a si pwǎ.

18Hî̌kû̌nǎ kòyò tapwa̤ dè hî̌ ta, “Kòyò toǒǒnu a ǒ ta ta̤yṳ, toǒǒ mî̌ a ǒ ta ta̤ma̤wǒ ta̤.” Dè hî̌ dě he glè hî̌shǔ yǎta, dǔlṳ bǎ he ta na ta̤yṳ htě a shodo ta ta̤ma̤ htǒonu, dě he dǔlṳ bǎlè̌ na ta he ta̤yṳ htě a ǒ ta ta̤ma̤htǒo pě he glè hî̌shǔ yǎ hǐnu. 19Na yṳǎ ta Běcǎ Cǒmara ǒtû̌ tapwǎ̤꤮ pa. Awǒhǒ. Khînǎkhîno toǒnu a yṳǎ sǒsǒta hǐnunu, htohǒtò̤ asî yṳǎ dě a ǐsha gònò̤gèglè.

20Kòyò ǒlû̌ǒkhlo, ta̤yṳta̤nǎ htě a ǒ ta ta̤ma̤ tò̤ toǒ numî̌ a ǒlû̌ǒkhlo pwǎ numî̌, na sò̌yṳ kè̌shǐ ya? 21Papha Abraham dě꤮ wǐnu tapwa̤nu Cǒmara bè̌cǒbè̌tè̤ yǎ hî̌tè? A gana̤de Cǒmara ayo̤ dě bǎ a lṳhtò̌ aphû̌khû Isǎko ta̤lṳhtò̌wa̤khû̌ akhanu, Cǒmara bè̌cǒbè̌tè̤ nû̌û ta a ta̤ma̤htǒo akhû̌akhî pwǎ. ^d 22Na kè̌shǐ ata̤yṳ ta a ta̤ma̤htǒo ma̤plǒnû̌û ta̤hǒ. A ta̤ma̤htǒo a ma̤lǒbe bǎ nû̌û ta̤yṳ hǒ. 23Dě lî̤cahtǐ hî̌nǎ htǒonu a lǒbehè dě a hî̌, “Abraham yṳǎ Cǒmara ta ata̤yṳ akhû̌akhî, Cǒmara bè̌yǎ pwǐ kòcǒkòtè̤ tapwa̤nu hǒ,” ^e a hî̌ hǐnu. Hǐnudě Abrahamnu kò kaǎ nû̌û ta Cǒmara a khobǒsû̌. ^f 24Hǐnudě, sî kè̌shǐ ta Cǒmara bè̌cǒbè̌tè̤ kòyò tapwa̤pwa̤nu, a bè̌cǒbè̌tè̤ tû̌pwǎ nû̌û ta a ta̤yṳta̤nǎ htǒotacǎ pwǎnu mè̤tò̤. A bè̌cǒbè̌tè̤ nû̌û ta ata̤ma̤ htě a dǔlṳ ta a ǒ ta a ta̤yṳta̤nǎ htǒonu pwǎ.

25Mamǔpò̤lò̤ Rakhǎ numî̌ a lò̤tahǐnu hǒ. Ma̤pûhǐ Israelphû̌ htě a nṳkè̌sû̌ǐhǔ ta̤nu toǒ hǎhtò̌cû̌ lû̌htò̌bò̌kè ta klè̌ ahǔwa̤ tabo ayanu, a dǒshuǐ asî dě a ma̤jè asî akhû̌akhî, Cǒmara bè̌cǒbè̌tè̤ nû̌û ta a ta̤phî̌ta̤ma̤ htǒo akhû̌akhî hǒ. ^g 26Hǐnuakho, ta̤yṳ htě a ǒ ta ta̤ma̤ tò̤nu, alò̤ta na̤klû htě ta̤htûpwa̤ ǒ nû̌ûlo̤ tò̤ dě a sikènu hǒ.