Jam 3 | KxfSCKRC | STEP | He pṳwè̤ sî꤮, sî to htûplṳ̂ sara tò̤, ma̤tè̤hî̌dě pwǐ sî sî̌ya htotû̌nu hǒ, pa htû sara toǒnu, Cǒmara cèrò shû̌khlo pa ta kòyò hǔwa̤nu toǒ pě.

James 3

Plî̤ awi̤akè̌

1 He pṳwè̤ sî꤮, sî to htûplṳ̂ sara tò̤, ma̤tè̤hî̌dě pwǐ sî sî̌ya htotû̌nu hǒ, pa htû sara toǒnu, Cǒmara cèrò shû̌khlo pa ta kòyò hǔwa̤nu toǒ pě. 2 Pa ma̤sǔ gegele̤le̤bò ta̤ pṳ̂̌꤮ tapwa̤ hǒ. Pwǎ̤ta kòyò htě a hî̌bǎsǔnǒ kû̌kò dǐkhò̌꤮ tò̤ tapwa̤nu, a mî̌ kòyò htě alǒabe tapwa̤ dě atèkwè̌ǐbò̌bò a na̤sapwa̤ hǒ.

3 Ma̤pûhǐ tîsî̌ jûle̤phî̌yo̤ payo̤nu dě, pa noěmě tîsî̌ ta te̤htò̌pli̤, dě pa htû̌tiwǐcû̌bò̌ sadobò tîsî̌. 4 Dèmè̤tò̤dě gènè̤kè̌ lǒkho sǒkhlidû̌ tabǎ awi̤akè̌nu. Sǒkhlidû̌ htǒo adû̌ mè̤mè̤̌ dě gili̤ htû̌nûcû̌ nû̌û pwǎ̤tadě ta̤ htě a htû̌tiwǐcû̌bò̌ nû̌û numî̌ sǒkhlila̤khlò pî̌tî̌phû̌ tabǎ pwǎ. Dě pwa̤wa̤ sǒkhlidû̌ dě anǒkò htǒotapwa̤ sò̌yṳ cû̌bǎtè tò̤glònu, sǒkhlila̤khlòphû̌ htǒotabǎ sûcû̌pwǎ nû̌û. 5 Kòyòplî̤ numî̌ alò̤ta hǐnuhǒ. A pî̌tî̌phû̌ pwǎ pwǎ̤tadě a hî̌bǎhtû̌sò̌ dû̌le̤kěko ǐ ata̤ma̤ awi̤akè̌ toǒ. Gènè̤kè̌mò̌, gono̤gapwa̤ dû̌ pwî̌tè꤮ bǎbǎ, mî̌shěpla̤ ta̤pla̤ pwǎnu a gèbòpè̤ pwǎ. 6 Kòyò plî̤nu alò̤ta mî̌nu hǒ. Dě na̤klû aphwǐaphrû̌ aklanu, plî̤ mî̌ alò̤ta hǎkhû̌ htě a lǒbe ta ta̤phû̌mò̤shî̌hto htǒoteběnu hǒ. A ma̤sobò kòyò ana̤klû sapwa̤ hǒ. Plî̤htǒo a shû̌gè mṳ̂tî̤glîbò pa ta̤ǒhtûpwa̤ ta mî̌htǒo dě mî̌ htǒonu a ǒ ngariǒ akû hè hǒ.

7 Kòyòhǎkhû̌phû̌ ma̤bî̌jòbò ta̤phû̌ta̤li̤ pṳ̂̌tacǎ, a ma̤bî̌jòbò ta̤mi̤ta̤mò̤ toǒ, htû̌tî̤pî̤ toǒ, wṳ̂ toǒ ta tò̤phû̌ toǒ lǒ̤꤮ bò. 8 Pò̤̌ta kòyò htě a ma̤bî̌bò̌jò kòyòplî̤ htǒonu a ǒ dǐpwǎ̤tò̤. Kòyòplî̤ htǒonu a lǒbe ta ta̤phû̌mò̤shî̌hto toǒ dě kò pǒǐpè̤jò nû̌û tò̤, a ǒ lǒbe ta ata̤khû̌awè̤ htě a ma̤sima̤hǎmǎ kò toǒ.

9 Sî sî̌ya ta pa noǎ paplî̤ htǒonu ta la̤htû̌sò̌ǐ papha Běcǎ Cǒmara, htohǒtò̤ pa noǎ kû̌po̤ yǎta pa la̤ǐsho kòyò htě Cǒmara bǒlò̤ yǎ pwǐ ana̤klû htǒonu toǒ. ^a 10 Dě gokû tûkûkû pwǎ htǒoakûnu ta̤htû̌sò̌ǐ mî̌ a hǎhtò̌htò̌, ta̤ǐsho toǒ mî̌ a hǎhtò̌htò̌. He pṳwè̤ sî꤮, a tobǎ hǎhtò̌ hǐnu tò̤. 11 Shipo̤htǎ tûkûkû pwǎ akûnu, shikabǎ mî̌ a po̤htǎhtò̌htò̌, shikhǎ mî̌ a po̤htǎhtò̌htò̌, a po̤htǎ plǒnû̌û hǐnumî̌ anî̤nǒ ya? 12 He pṳwè̤ sî꤮, dǐshimṳ sǎhtò̌jò Olivesǎ tò̤. Sobîmṳ sǎhtò̌jò dǐshisǎ tò̤, hǐnuakho shihtǎpo̤ htě akhǎ tûkûnu, a htǎpo̤jò shikabǎ tò̤.

Ta̤sî̌khû̌sî̌ya ǒ dě mǒkhû̌ hè

13 Kòyò sîkla tapwa̤pwa̤ dě a ǒ ta a ta̤sî̌khû̌sî̌ya dě a sî̌yaphlobò numî̌ ûpè? A tobǎ dǔlṳ ata̤sî̌khû̌sî̌ya htǒotoǒnu ta a ta̤ǒhtûpwa̤ awǒ, htohǒtò̤ a tobǎ dǔlṳ a ma̤ta̤ htǒonu ta ta̤shò̌lò̤ sò̌phlǒ. Ta̤shò̌lò̤ htǒonumî̌ a hè tṳtṳ dě ta̤sî̌khû̌sî̌ya htǒonu a ǒ pwǎ. 14 Pwǎ̤tadě sî sò̌phlǒkûnu, sî dè sò̌khěkhû̌khwè mè̤mè̤̌ nû̌û, sî mo̤ǐlò̤ tû̌ sîna̤ dě sî kè̌dû̌lò̤ tû̌ sîna̤ htǒotoǒ dè ǒ hî̌mò̌nu, hî̌bǎhtû̌sò̌ǐ pûma̤ sîna̤ ta sî ǒta ta̤sî̌khû̌sî̌ya hǐnu ma̤, dě ma̤takǎshǔ pûma̤ ta̤te̤ta̤mǎ htǒonu ma̤. 15 Ta̤sî̌khû̌sî̌ya hǐnu toǒ mî̌ a ǒ dě mǒkhû̌ hè mè̤tò̤, hǎkhû̌akhû̌ a ta̤sî̌khû̌sî̌yanu toǒpwǎ. Ta̤sî̌khû̌sî̌ya hǐnu toǒ mî̌ a ǒ dě Běcǎ sǎcahtǐ a ǒ hè mè̤tò̤, a ǒ dě khînǎkhîno a ǒ hè pwǎ. 16 Ma̤tè̤hî̌dě bǎ ta̤sò̌khěkhû̌khwè nû̌û ta ta̤mo̤ǐlò̤ tû̌ na̤ toǒ ǒ akhanu, a ǐǒhtûhtò̌ ta̤ma̤shû̌shishû̌shǎ ta ta̤phû̌mò̤shî̌hto pṳ̂̌꤮ tacǎ bǎnu pě.

17 Pwǎ̤tadě ta̤sî̌khû̌sî̌ya htě a ǒ dě mǒkhû̌ hè hî̌numî̌ a mṳ̂plî wǐkhlo pě, htopědě a ǐ ǒhtò̌tû̌ ta̤mo̤ta̤pè̤, ta̤gènè̤jò kòya, sò̌yṳ gana̤de kò ta̤hî̌bǎ, lǒbe ta ta̤gwèbǎǐ ta ma̤ta̤wǒ toǒ, kè̌dû̌kè̌pî̌tî̌ kò tò̤, htodě ta̤jîma̤khěma̤khǒ ana̤ toǒ ǒ tò̤. 18 Kòyò htě a ǐǒhtò̌ ta̤pè̤ta̤dûnu, a shǒǐ ta̤mo̤ta̤pè̤ akhlialè dě htû̌꤮ kò kǎgewǒ a akhapěnu, a nî̤bǎ ta̤cǒta̤tè̤ asǎ pě.