Jam 4 | KxfSCKRC | STEP | Ta̤shěta̤pe̤ nû̌û toǒ ta ta̤to̤klî̌ nû̌û toǒnu, a cû̌ hènṳ to̤dě sîkla hî̌tè? A hènṳ hî̌tè hî̌numî̌, a hènṳ sî sò̌phlǒ a ta̤sò̌yṳ phû̌mò̤ toǒ htě a shěta̤ dě sîkû htǒonu toǒ a ǒ hǒ.

James 4

Khrî̌stuphû̌ jûle̤phî̌yo̤ Cǒmara pṳ̂̌꤮ plǎ

1 Ta̤shěta̤pe̤ nû̌û toǒ ta ta̤to̤klî̌ nû̌û toǒnu, a cû̌ hènṳ to̤dě sîkla hî̌tè? A hènṳ hî̌tè hî̌numî̌, a hènṳ sî sò̌phlǒ a ta̤sò̌yṳ phû̌mò̤ toǒ htě a shěta̤ dě sîkû htǒonu toǒ a ǒ hǒ. 2 Sî sò̌yṳ ta̤ dě sî nî̤bǎtò̤ akhû̌akhî, sî ma̤si kòyò. Sî sò̌yṳ ta̤ dě sî nî̤bǎjò ta̤dǐcǎ꤮ tò̤ akhû̌akhî, sîgèsîgo kè̌khînû̌û. Sî kwi kû̌kò Cǒmara tò̤ akhû̌akhî, sî sò̌yṳ ta̤ toǒ dě sî nî̤bǎjò kû̌kò tò̤. 3 Dě bǎ sî kwi ta̤ akha, sî nî̤bǎ kû̌kò dǐcǎ꤮ tò̤, ma̤tè̤hî̌dě sî sò̌phlǒ a ta̤yè̤lò̤ sò̌yṳkwinǎ toǒnu, a khlè̌sǔ lǒkho pwǎ. Sî kwi lǒkho pwǎ ta sî sò̌yṳ noǎ a ta sî la̤ma̤mo̤lò̤ tû̌ sîna̤ aya pwǎnu.

4 Kòyò htě a sò̌phlǒ cǒtè̤ ta Cǒmara tò̤ sî꤮, sî bǒsû̌ ta hǎkhû̌ a ta̤phû̌mò̤shî̌hto toǒ numî̌ sî htûhtò̌ pwa̤ htě a sò̌khě Cǒmara toǒnu sî sî̌ya tò̤ ya? Kòyò htě a sò̌yṳ htûhtò̌ hǎkhû̌ a ta̤phû̌mò̤shî̌hto htǒotoǒ a khobǒsû̌ tapwa̤pwa̤nu a ma̤ sò̌khě ana̤ ta Cǒmara hǒ. 5 Cǒmara hî̌ ta̤ dě lî̤cahtǐkû toǒnu, amûasǎ ǒtò̤ bǎ gènè̤ hǐnu dǐpwǎ̤tò̤. Lî̤cahtǐkû hî̌, “Cǒmara bè̌ǒ ta̤htûpwa̤ dě pakû htǒonu, a sò̌yṳ nohtû nû̌ûta ata dě a khû̌khwè mè̤mè̤̌.” ^{▼▼Lî̤cahtǐ ahǔwa̤ toǒ hî̌, “Pa dè bè̌dû̌ pa ta̤mo̤ǐ dě Cǒmara akhû̌ tò̤ hî̌dě, Běcǎ sǎcahtǐ htě Cǒmara bè̌yǎ pakû htǒotapwa̤nu, a khû̌khwè mè̤mè̤̌.”} 6 Pwǎ̤tadě ta̤bwǐta̤sîrî htě Cǒmara ǐlò̤ pa htǒonu, akhû̌aǎsho khlope. Hǐnu akhû̌akhî, lî̤cahtǐkû hî̌,

“Cǒmara ma̤dǐdò shǔkè kòyò htě a bè̌htò̌yî̤ asò̌phlǒnu toǒ, pwǎ̤tadě abwǐasîrî htǒonu a ǐlò̤ dû̌khlo kòyò htě a shò̌lò̤ asò̌phlǒnu toǒ alo̤.” ^b

7 Hǐnudě shò̌lò̤ lǒkho sî sò̌phlǒ dě Cǒmara ala̤, dě shěshǔ khînǎmo̤pha hǐkǒdû̌nu dě khînǎmo̤pha hǐkǒdû̌ khlè̌cû̌ tephekè sîla̤ pě. 8 Sǒsǔ hèphǔ lǒkho sîna̤ ta Cǒmara pěmî̌ a sǒsǔ hèphǔdǒ ana̤ ta sî pě. Ta̤ma̤sǔphû̌ sî꤮, shǔbòkè lǒkho sî cǔdenu. Kòyò sò̌phlǒ ǒplṳ̂ sî꤮, ma̤mṳ̂ma̤plîkè lǒkho sî sò̌phlǒnu. 9 Sǎpla̤ lǒkhomò̌, hǎwo lǒkhomò̌. Sî ta̤sǎya̤ htǒonu htû̌lè̌kè yǎta sî ta̤hǎta̤wo htǒonu, sî ta̤sò̌le̤sò̌lò̤ htǒonu htû̌lè̌kèmò̌ yǎta sî ta̤sǎpla̤ htǒonu. 10 Shò̌lò̤ lǒkho sî sò̌phlǒ bǎ Běcǎ a lo̤mo̤ dě a bè̌htò̌yî̤tû̌ sî pě.

Hî̌phû̌mò̤ ta bè̌ pûma̤ pwa̤yṳǎphû̌ toǒ ta̤sǔ ma̤

11 He pṳwè̤ sî꤮, hî̌phû̌mò̤ pûma̤ nû̌û tapwa̤ ta tapwa̤ ma̤ nî̌꤮. Ûpèpè̌꤮ bǎbǎ a hî̌phû̌mò̤ kòyò htě a yṳǎ Khrî̌stu tapwa̤pwa̤ mè̤tò̤mî̌ a bè̌ kòyò ta̤sǔ htě a yṳǎ Khrî̌stu tapwa̤pwa̤ numî̌ mî̌pwǎ a hî̌bǎ phû̌mò̤shî̌hto ta̤sû̌ta̤tòwò dě a bè̌ ta̤sû̌ta̤tòwò ta̤sǔ htǒonu hǒ. Sî dè bè̌ ta̤sû̌ta̤tòwò ta̤sǔ htǒonu hî̌dě, sî mî̌ kòyò htě a jûle̤phî̌yo̤ ta̤sû̌ta̤tòwònu mè̤tò̤. Mî̌pwǎ kòyò htě a bè̌ ta̤sû̌ta̤tòwò ta̤sǔ pwǎ. 12 Pwa̤ htě a ǐlò̤ ta̤sû̌ta̤tòwò dě a bǎ cèrò kò numî̌ pwǎpǒ̤ Cǒmara tapwǎ̤ pa. Pwa̤ htě a ma̤lû̌htò̌jò ta̤ dě a ma̤pî̌jò ta̤ numî̌ pwǎpǒ̤ Cǒmara tapwǎ̤ pa. Pwǎ̤ta sî dě, sî cû̌bè̌ tǒ̤ kò ta̤sǔ dě mî̌ sî gènè̤ sîna̤ ta kòyò hî̌tè tapwa̤tè?

Bè̌htò̌yî̤ pûma̤ sî sò̌phlǒ ma̤

13 Khònò̤htǒo gana̤de lǒkho, dě sîkla toǒǒnu a hî̌ lǒkho, “Khò̌ti̤ni̤ tò̤mî̌ htû̌pe̤wo̤ pěnu, pa cû̌ wî̤tî̤wî̤ pě dě pa cû̌ǒ bǎnu pě taně. Dě pa cû̌ ma̤guma̤khè̌ dě ma̤gu phû̌htò̌dû̌khlopo̤ ta amo̤ htǒonu pě.” ^c 14 Pe̤wo̤pě sî ta̤ǒhtûpwa̤ glè ma̤hî̌tè pěnu, sî sî̌ya tò̤. Sî ta̤ǒhtûpwa̤ htǒonumî̌ alò̤ta mî̌titè? Alò̤ta ta̤khǔhtò̌ htě a ǒlṳ teděsǎ dě a hǎmǎgekènu pwǎ. 15 Sî tobǎ hî̌ lǒkho hî̌tè hî̌dě, “Běcǎ dè sò̌phlǒǒ ta pa ǒhtûpwa̤pě hî̌dě pa ma̤ pwǐhè̌o pě,” hî̌ lǒkho hǐnu 16 Pwǎ̤tadě khònò̤htǒo sî bè̌htò̌yî̤ lǒkho sî sò̌phlǒ dě sî hî̌bǎ htò̌yî̤ lǒkho sîna̤. Bò ta̤bè̌htò̌yî̤ sò̌phlǒ hǐnu toǒmî̌ ta̤phû̌mò̤shî̌hto pwǎ. 17 Hǐnudě kòyò htě a sî̌ya ta a tobǎ ma̤ ta̤wǒ htǒo pwǎ̤tadě a dè ma̤tò̤ toǒnu, a ma̤ ta̤sǔhǒ.