John 18

Kò shaǎlò̤kè Běcǎ Ye̤shǔ dě kò pṳ̂ nû̌û

(Matěo 26:47-56; Mǎ̤riko 14:43-50; Lǔka 22:47-53)

1A kwisaba htodě a ta akhophijaû̌ toǒ hǎhtò̌kǎbò̌ Kedro lo̤yo̤khwe nutabo. Dě lo̤bò̌khonu, Olivephǎ we̤kû ǒ te̤we̤. Dě A ta akhophijaû̌ toǒ cû̌nṳ lǒkho bǎnu.

2Běcǎ Ye̤shǔ ta akhophijaû̌ toǒ cû̌ kè̌shǐ glashǔ sala̤ nû̌û bǎ gûla̤nu tò̤glò akhû̌akhî, Yṳ̌da htě a shaǎlò̤kè Běcǎ Ye̤shǔ htǒotapwa̤nu, gûla̤nu tò̤glò mî̌ a sî̌ya pwǎ. 3Hǐnudě, Yṳ̌da cû̌ we̤kûnu te̤we̤. Dě pwa̤tòlûhtò̌ hǐkǒdû̌ toǒ ta Pharisè̌phû̌ toǒ nohè kû̌dǒ Rò̌mǎ kliphû̌ toǒ ta kliphû̌ htě a ǒpo̤ ta̤lṳhtò̌honu toǒ ta Yṳ̌da. Asî phî̌hènṳ mî̌ko sîtoǒ, mî̌bo ▼

▼Picture of torches

toǒ ta ta̤wè̌ta̤htò toǒ.

4Ta̤ glè̌ htûhtò̌ ana̤ ta Ye̤shǔ hî̌tènu, a sî̌yabò akhû̌akhî, a hèto asî ǒ dě a gwè asî, “Sî kè̌lǎ ûpè?”

5Asî hî̌shǔ nû̌û, “Pa kè̌lǎ Ye̤shǔ Nǎ̤sèrèwî̤phû̌,”

A hî̌ dě Ye̤shǔ hî̌shǔ asî, “He mî̌ ahǒ.” Dě Yṳ̌da htě a shaǎlò̤kè nû̌ûnu tapwa̤ ihtǒ ǒkû̌ta asî bǎnu. 6Bǎ Běcǎ Ye̤shǔ hî̌ asî, “He mî̌ ahǒ,” akhanu, asî cètîkhî akò dě a lòkhǔpo̤bò dě hǎkhû̌.

7Htǒotaplǎdě Běcǎ Ye̤shǔ gwè gesǒ asî, “Sî kè̌lǎ ûpè?”

Dě asî hî̌geshǔ, “Pa kè̌lǎ Ye̤shǔ Nǎ̤sèrèwî̤phû̌” a hî̌shǔ lǒkho hǐnu.

8“He hî̌hto sî ta he mî̌ ahǒ. Sî dè kè̌lǎ he hî̌dě plûgekè kòyò ahǔwa̤nu toǒ,” a hî̌shǔ asî hǐnu. 9Ta̤hî̌bǎ htǒotûmûnu, a ma̤ behtò̌belò̤ yo̤sǎ dě a hî̌hto ta, “Kòyò htě na ǐ he toǒnu, a hǎmǎkènǒ dǐpwǎ̤꤮ tò̤,” htǒonuhǒ.

10Htǒotaplǎdě Shîmǒ̤nè̤ Petru htě a phî̌hènṳ nò̌she tabǎ htǒotapwa̤ běhtò̌ anò̌she dě a pe̤tṳkè pwa̤tòlûhtò̌ hǐkǒdû̌gutṳ̌ ajûphû̌ tapwa̤ anò̌ku cǔdemû tokho. Kòyò htǒotapwa̤nu ami̤ mî̌ Malakhǔ.

11Dě Běcǎ Ye̤shǔ hî̌ Petru, “Wo̤nṳwǒkè nanò̌she dě aklǒkûnu. Ta̤jîta̤jû aba htě hepha noo hehtǒo numî̌, he bǎ o yǎtò̤ ya?” ^b

Kò kaǎhè Běcǎ Ye̤shǔ dě Annas alo̤mo̤

(Matěo 26:57-58; Mǎ̤riko 14:53-54; Lǔka 22:54)

12Htodě Rò̌mǎ kliphû̌ ta asî klihǐkǒdû̌ tapwa̤ ta Yṳ̌da kliphû̌ htě a ǒpo̤ ta̤lṳhtò̌ho toǒ pṳ̂ cokloměbò Ye̤shǔ. 13Dě a kaǎ cû̌ wǐgutṳ̌ nû̌û dě Annas ahǐ. A mî̌ Kaǐpha ami̤pwa̤. Kaǐpha mî̌ bǎnu taněkû a htû pwa̤tòlûhtò̌ hǐkǒdû̌gutṳ̌ hǒ. 14Kaǐpha mî̌ kòyò tapwa̤ htě a ǐ sî̌yajè bǎ Yṳ̌daphû̌ hǐkǒdû̌ toǒ ta, “Kòyò htǒotapwa̤ sikè ta Yṳ̌daphû̌ htǒotoǒ ayanu awǒkhlope?” a hî̌ hǐnu. ^c

Petru la̤lò̤kè ta he sî̌yanǒ Ye̤shǔ tò̤.

(Matěo 26:69-70; Mǎ̤riko 14:66-68; Lǔka 22:55-57)

15Shîmǒ̤nè̤ Petru ta Ye̤shǔ akhophijaû̌ ahǔwa̤ tapwa̤nu, a gûcû̌kû̌ Běcǎ akò. Akhophijaû̌ ahǔwa̤ htǒotapwa̤nu, pwa̤tòlûhtò̌ hǐkǒdû̌gutṳ̌ htǒotapwa̤ sî̌ya te̤mǎ nû̌û akhû̌akhî, a cû̌nṳkû̌ ta Běcǎ Ye̤shǔ dě pwa̤lṳhtò̌ hǐkǒdû̌gutṳ̌ htǒotapwa̤ ahǐ we̤kû. 16Pwǎ̤tadě Petru ihtǒ ǒkè pwǎ dě we̤takhakhlo. Akhophijaû̌ ahǔwa̤ htě pwa̤tòlûhtò̌ hǐkǒdû̌gutṳ̌ sî̌ya nû̌û htǒotapwa̤nu, a hǎhtò̌sǒ dě a hǎhtò̌hî̌ pwa̤ǒpo̤ we̤takha mamǔphû̌ htǒotapwa̤ dě a kaǎnṳ Petru htǒo hǐwe̤kû.

17Mamǔphû̌ ǒpo̤ takha htǒotapwa̤ hî̌ Petru, “Na mî̌ na ǒkû̌dǒ ta Ye̤shǔ hî̌nu tapwa̤ akhophijaû̌nu toǒ akla tapwa̤, amè̤tò̤ya?” Dě a hî̌shǔ nû̌û, “He mè̤tò̤.”

18Gawo̤ dě pwa̤ma̤ta̤ toǒ ta kliphû̌ htě a ǒpo̤ ta̤lṳhtò̌ho toǒ ihtǒushǔ te̤we̤bò mî̌. Dě Petru ihtǒushǔ kû̌dǒ asî mî̌.

Pwa̤tòlûhtò̌ hǐkǒdû̌gutṳ̌ tapwa̤ sèlègwè Ye̤shǔ

(Matěo 26:59-66; Mǎ̤riko 14:55-64; Lǔka 22:66-71)

19Pwa̤tòlûhtò̌ hǐkǒdû̌gutṳ̌nu tapwa̤ gwèkè̌ Ye̤shǔ ta akhophijaû̌ toǒ awi̤akè̌ ta a ta̤sû̌ǐtòwòǐ toǒ awi̤akè̌.

20Běcǎ Ye̤shǔ hî̌shǔ nû̌û, “He sû̌ǐhǔ sû̌ǐsè̌nǒ kò tò̤, he sû̌ǐphlosû̌ǐlî pwǎ kò dě kòyò pṳ̂̌꤮ tapwa̤ alo̤mo̤. Yṳ̌daphû̌ lǒ̤꤮ bò toǒ la̤hè kè̌shǐ glashǔ nû̌û agûla̤ dě ta̤sabahǐkûnu bǎbǎ, dě ta̤lṳhtò̌hokûnu bǎbǎ he sû̌ǐ kò pṳ̂̌꤮ taplǎ. 21Hǐnudě na cû̌ gwètǒ̤ he ma̤tè? Gwè kòyò htě a gana̤de he ta̤dǒhtû̌ǐnu toǒ kò̌. He dǒhtû̌ǐ kwè̌ bǎ asî mî̌titènu, a sî̌yabò pwǎ,” Běcǎ Ye̤shǔ hî̌geshǔ asî hǐnu.

22Bǎ Běcǎ Ye̤shǔ hî̌ htǒo akhanu, kliphû̌ ǒpo̤ ta̤lṳhtò̌ho htě a ǒphǔ bǎ akòshî̌nu tapwa̤ pla̤ nû̌û nò̌shî̌ dě a hî̌ nû̌û, “Na cû̌ hî̌shǔtǒ̤ pwa̤tòlûhtò̌ hǐkǒdû̌gutṳ̌ htǒotapwa̤ hǐnu ma̤tè?” A hî̌ nû̌û hǐnu.

23Běcǎ Ye̤shǔ hî̌shǔ nû̌û, “He dè hî̌sǔ hî̌dě a sǔkwè̌꤮ hî̌tènu, yṳ̂lṳ bǎmò̌ he, a dè to hî̌dě mî̌ma̤tè̤dě na cû̌ pla̤tǒ̤ he nò̌shî̌ ma̤tè?” A hî̌shǔ nû̌û hǐnu. 24Htodě Annas coklomě pepwǎ nû̌û dě a nosûcû̌ kò ta Ye̤shǔ dě pwa̤tòlûhtò̌ hǐkǒdû̌gutṳ̌ Kaǐpha htǒotapwa̤ a ǒ.

Petru la̤lò̤gesǒ Ye̤shǔ

(Matěo 26:71-75; Mǎ̤riko 14:69-72; Lǔka 22:58-62)

25Shîmǒ̤nè̤ Petru ushǔla̤ sadape mî̌ bǎnu. Dě kòyò ahǔwa̤ tapwa̤ hî̌ nû̌û, “Na mî̌ akhophijaû̌ amè̤tò̤ya?” A gwè nû̌û dě,

A hî̌ geshǔsǒ, “Tò̤, he mè̤ nǒtò̤.”

26Pwa̤tòlûhtò̌ hǐkǒdû̌gutṳ̌ ajûphû̌ htě Petru pe̤tṳ nû̌û nò̌kulǎnu tapwa̤ apṳwè̤ gwè nû̌û, “He kè̌shǐ na dě Olivephǎ we̤kûnu na ǒkû̌dǒ ta Ye̤shǔ amè̤tò̤ya?” A gwè nû̌û hǐnu. 27Petru la̤lò̤gesǒ “He mè̤tò̤” a hî̌htohto ta shîpha û̌htò̌.

Kò kaǎcû̌ Běcǎ Ye̤shǔ dě Khwǐpilǎto lo̤mo̤

(Matěo 27:1-2, 11-14; Mǎ̤riko 15:1-5; Lǔka 23:1-5)

28Htǒotaplǎdě Yṳ̌daphû̌ toǒ ǒ Kaǐpha hǐ dě a kaǎcû̌ lǒkho Běcǎ Ye̤shǔ bǎ Rò̌mǎ Khwǐpilǎto hokû. Asî kaǎcû̌ nû̌û bǎ lṳmṳlî wosò akhanu. Yṳ̌daphû̌ toǒ sò̌yṳ ǒ mṳ̂plî lǒkho ana̤ pwǐ asî ta̤saba la̤bò̌la̤klo ǒnu. Hǐnudě asî nṳ lǒkho bǎ Khwǐpilǎto hokû tò̤, ma̤tè̤hî̌dě asî dè nṳ hî̌nu, kò ǐǎ asî ta̤cû̌tûlû̌pwè ashǎǎ lṳmṳhǎ htǒonu tò̤. 29Hǐnu akhû̌akhî, Khwǐpilǎto hǎhtò̌ hokhlo dě a kè̌shǐ hî̌bǎshǔ ta asî dě a gwè asî, “Sî cû̌ bè̌ yǎ ta̤sǔ ta titè akhû̌akhî tè?”

30Asî hî̌shǔ, “A dè ma̤sǔ ta̤ tò̤ dě pa kaǎhè yǎ dě naǒ dǐkhò̌꤮ tò̤,” a hî̌shǔ nû̌û hǐnu.

31Khwǐpilǎto hî̌shǔ asî, “Kaǎ cû̌ tû̌ lǒkho yǎdě cèrò tû̌ lǒkho pwǐ sî ta̤sû̌ta̤tòwò ǒnu.”

Pwǎ̤tadě Yṳ̌daphû̌ toǒ hî̌shǔ nû̌û, “Pa ta̤sîrîshû̌sho htě pa bǎ cèrò sikè kòyònu, aǒtò̤,” a hî̌geshǔsǒ hǐnu. 32A hî̌ lǒkho htǒo mî̌ ma̤pûhǐ a behtò̌belò̤ pwǐ Běcǎ Ye̤shǔ hî̌nǎ khǒkè ta a glè̌ si hî̌tè tacǎ pěnu. ^d

33Hǐnudě Khwǐpilǎto nṳ ahokû dě a nokaǎnṳ kò ta Běcǎ Ye̤shǔ dě a gwè nû̌û, “Na mî̌ Yṳ̌daphû̌ akhwǐ tapwa̤ mè̤mè̤̌ ya?”

34Běcǎ Ye̤shǔ hî̌shǔ nû̌û, “Htǒomî̌ na ta̤gènè̤ hî̌htò̌ tû̌ ya? Mè̤tò̤mî̌ kòyò tapwa̤pwa̤ hèhî̌bǎ na ta hewi̤hekè̌ ya?” A gwè getîkhîshǔ nû̌û hǐnu.

35Dě Khwǐpilǎto hî̌ nû̌û, “Na gènè̤ he ta Yṳ̌daphû̌ hò̌? Pwa̤ htě a sûhè na dě heǒ toǒ numî̌ na khlilèphû̌ tû̌ ta na pwa̤tòlûhtò̌ hǐkǒdû̌ tû̌pwǎnu toǒ. Na cû̌ma̤sǔ kwè̌ titè?” Khwǐpilǎto gwè nû̌û hǐnu.

36Běcǎ Ye̤shǔ hî̌shǔ yǎ, “Heshihega mî̌ hǎkhû̌bǎo mè̤tò̤. A dè mè̤ hǎkhû̌bǎo hî̌nu, ma̤pûhǐ he to̤pûdě Yṳ̌daphû̌ a hǐkǒdû̌ htǒotoǒ a cǔdekû ma̤nu, hekho htě a gûkû̌ he toǒ glè shěshǔhto asî hǒkò̌. Hǐnudě heshihega mî̌ hǎkhû̌bǎonu mè̤tò̤.” A hî̌ hǐnu.

37Khwǐpilǎto hî̌ nû̌û, “Dè hî̌hǐnu hî̌dě na htû Khwǐ tapwa̤ ya?” A gwè nû̌û hǐnu.

Běcǎ Ye̤shǔ hî̌shǔ yǎ, “He mî̌ Khwǐ tapwa̤ mè̤mè̤̌ pwǐ na hî̌nu. Ma̤pûhǐ he pwe̤ǐbǎ kò ta ta̤te̤ta̤mǎ nudě, he hè ǒphû̌jalò̤ hǎkhû̌bǎo hǒ. Kòyò lǒ̤꤮ bò ǒkû̌ ta ta̤te̤ta̤mǎ tokho toǒnu a gana̤de heyo̤ pě.” A hî̌ hǐnu.

(Matěo 27:15-31; Mǎ̤riko 15:6-20; Lǔka 23:13-25)

38Khwǐpilǎto gwè nû̌û, “Ta̤te̤ta̤mǎ mî̌titè?” Dě Khwǐpilǎto hǎhtò̌gesǒ dě Yṳ̌daphû̌ htǒotoǒ a ǒ dě a hî̌ asî, “He glè̌ cèrò yǎ ayanu he kè̌shǐ ata̤sǔ dǐcǎ꤮ tò̤.” A hî̌ asî hǐnu. 39“Pwǎ̤tadě pwǐ sî ta̤saba ala̤klo ǒ ta bǎ sî ma̤ ta̤cû̌tûlû̌pwè akhanu, he plûhǎhtò̌ bǎ sî kòyò lòte̤ dě apo̤kû tapwa̤ pṳ̂̌꤮ taplǎ. Hǐnudě mî̌ sî sò̌yṳ plûhǎhtò̌kè ‘Yṳ̌daphû̌ akhwǐdû̌ htǒotapwa̤’ ya?” a gwè asî hǐnu.

40Dě asî yi̤kǒhtò̌ lǒkho, “Plûhǎhtò̌ tò̤. Plûhǎhtò̌ Barǎbanu,” a hî̌ lǒkho hǐnu. Barǎba mî̌ pwa̤phî̌sigwi we̤saphǎǎ kòta̤ tapwa̤.