John 6

Běcǎ Ye̤shǔ bǔǎ kòyò yè̤̌rî̌

(Matěo 14:13-21; Mǎ̤riko 6:30-44; Lǔka 9:10-17)

1Hǐnuhtodě, Ye̤shǔ hǎhtò̌cû̌kè dě Galilî̌a shikoǒdû̌ bò̌kho tokho. (Kò kaǎ yǎta shikoǒdû̌ Tǐberǐ mî̌ amè̤mè̤.) 2Kòyò saprṳ̂ kè̌shǐhto ta̤cǒklî̌kî̌ya htě Běcǎ cû̌ ma̤bǎ bǎ kòyòshǐ kòyòsha toǒ akhû̌akhî, asî gû cû̌plṳ̂cû̌phǎ kû̌bò nû̌ûkò. 3Dě Běcǎ Ye̤shǔ htò̌khololo̤ dě a ta akhophijaû̌ toǒ htò̌hǎnòò̌ lǒkho bǎnu. 4Bǎnuakha Yṳ̌daphû̌ ta̤cû̌tûlû̌pwè htǒo a bǎ phǔ hǒ.

5Bǎ Běcǎ Ye̤shǔ kè̌cû̌ dě a kè̌shǐ kòyò saprṳ̂dû̌ hè aǒ akha, a hî̌ Phǐlǐpo, “Pa bǎ cû̌ pwî̤ bǎ kòyò htǒotoǒ la̤ǎ bǎtè?” 6A gwè kè̌bǎpwǎ Phǐlǐpo pwǎ. A glè̌ma̤ bǎ asî hî̌tè pěnu, a gènè̤nǎhto dě a sò̌phlǒkû hǒ.

7Phǐlǐpo hî̌shǔ, “Pa pwî̤bò bǎ asî ta wûyî̌ Dina̤ri tokǒ ▼

▼Wûyî̌ Dina̤ri tabǎ mî̌ a gunò̤ ta ti̤ni̤ ata̤ma̤ khû̌kǎ.

gûla̤ mî̌, asî ǎ pwǎ tapwa̤ tûmûnǔ꤮ apǒǎtò̤.”

8Akhophijaû̌ ahǔwa̤ tapwa̤ mî̌ ami̤ ta Adrěa, a mî̌ Shîmǒ̤nè̤ Petru apṳ htǒotapwa̤ hî̌ Běcǎ, 9“Phijaû̌ makhûphû̌ ǒ bǎo tapwa̤. Amû̌ htě kò ma̤ nû̌ûta bǔbali̤nu a ǒ yè̤̌ma ta tò̤phû̌ ginǐ̤plṳ̂. Pò̤̌ta a glè pǒǎ pû kòyò bepwa̤tè?”

10Běcǎ Ye̤shǔ hî̌, “No hǎnòò̌ kòyònu toǒ,” a hî̌ hǐnu. Gûla̤ bǎnu tò̤glò mî̌ mi̤duwî̤. Dě còcè̌bòpwǎ makhûwè̤pwa̤ htě a hǎnòò̌lò̤ bǎnu toǒnu, a phǔ꤮ ǒtû̌ yè̤̌rî̌. 11Běcǎ Ye̤shǔ phî̌ mû̌ htǒotoǒ dě a hî̌bwǐhî̌sîrîhtò̌ Cǒmara. Htodě a ǐlò̤ nû̌ûta akhophijaû̌ toǒ dě asî yṳ̂ǎlò̤ nû̌ûta kòyò hǎnòò̌ bǎnu toǒ. A phî̌lè̌ tò̤phû̌ htǒoginǐ̤plṳ̂ dě a ma̤ sǒsǒnû̌û pwǐ mû̌nu. Dě kòyò htǒotoǒ a sǎǎ pwî̌tènu a phî̌ǎ lǒkho.

12Bǎ asî ǎkǒobebòhto pṳ̂̌꤮ tapwa̤ akhanu, Běcǎ Ye̤shǔ hî̌ akhophijaû̌ toǒ, “Phî̌wǒbòge shǎǎǒkènu toǒ, noǒkè nòdû̌ pû yǎma̤,” a hî̌ asî hǐnu. 13Hǐnudě akhophijaû̌ toǒ phî̌htu mû̌bali̤ yè̤̌glo htě kò ǎhto yǎdě a ǒkwèkhlo toǒnu a ǒbepe ta phǒběnu shǐginǐ̤ma.

14Bǎ kòyò htǒotoǒ kè̌shǐhto Běcǎ Ye̤shǔ ma̤ ta̤cǒklî̌kî̌ya htǒotoǒ akhanu, asî hî̌ lǒkho, “Pwa̤po̤ htě a glè̌ hèlò̤ dě hǎkhû̌bǎo pě kò hî̌ numî̌ a mè̤ hǒ,” a hî̌ lǒkho hǐnu. 15Běcǎ Ye̤shǔ sî̌ya ta asî glè̌ hè nohtûhtò̌shû̌ nû̌û ta Khwǐ akhû̌akhî, a cû̌htò̌ khǒkè tû̌ dě kholokhû̌ tapwǎ̤ pa.

Běcǎ Ye̤shǔ cû̌ dě shikhû̌

(Matěo 14:22-27; Mǎ̤riko 6:45-52)

16Bǎ lṳmṳhǎlò̤ akhanu, akhophijaû̌ toǒ hǎte̤gilò̤ cû̌ lǒkho dě shikoǒdû̌htu. 17Asî hǎte̤ dò̌nṳ sǒkhli bǎnu dě a hǎhtò̌cû̌ lǒkho Kaperanòwî̤. Wî̤htǒonu a ǒ dě shikoǒbò̌kho tokho. Lṳmṳkhǐkèhǒ hǐnudě Běcǎ Ye̤shǔ geto̤ kû̌ asî hǒtò̤. 18Gili̤sǎ hè dě shipěpǒ hèshû̌. 19Bǎ asî khlòcû̌to̤ sumè̤, lǐ̤mè̤ akhanu, asî kè̌shǐ Běcǎ Ye̤shǔ cû̌ shikhû̌ dě ahèphǔto ta asî sǒkhli. ▼

▼Mè̤ mî̌ a gunò̤ ta akhlî 880

dě asî ǐsha sò̌gònò̤bò nû̌ûla̤. 20Dě Běcǎ Ye̤shǔ hî̌ asî, “Hepwǎ! Ǐsha lǒkho pûma̤.” 21Htǒotaplǎdě asî sò̌le̤sò̌lò̤ kaǎshǔ lǒkho Ye̤shǔ dě sǒkhlikû. Dě taplǎpa, sǒkhlihtǒo cû̌to̤tǒ̤kè dě shihtu bǎ asî la̤cû̌htǒo tò̤glò.

Kòyò saprṳ̂ kè̌lǎ Běcǎ Ye̤shǔ

22Nǒkò to̤wo̤nu, kòyò saprṳ̂ htě a ǒkè dě shikoǒdû̌ bò̌kho bǎhǎno̤ toǒnu a sî̌ya ta sǒkhli ǒkèpwǎ tabǎ pa. Dě Běcǎ akhophijaû̌ toǒ dò̌nṳ lǒkho sǒkhlinu tabǎ dě a hǎhtò̌cû̌ tû̌ lǒkho pwǎ. Kòyò saprṳ̂ toǒ sî̌ya ta Běcǎ Ye̤shǔ dò̌cû̌ kû̌dǒ ta akhophijaû̌nu toǒ tò̤, asî hǎhtò̌cû̌ tû̌ lǒkho pwǎ. 23Htodě sǒkhli ǒ Tǐberǐwî̤ dě a hè toǒnu, a hè ǒkǔphǔ lǒkho bǎ Běcǎ la̤hî̌bwǐhî̌sîrîhtò̌ Cǒmara dě a bǔǎ kòyò saprṳ̂ toǒ ta mû̌ agûla̤nu tò̤glò. 24Bǎ kòyò saprṳ̂ toǒ kè̌shǐpe Běcǎ Ye̤shǔ ta akhophijaû̌ toǒ bǎnutò̤ akha, ma̤pûhǐ asî cû̌ kè̌lǎ Běcǎ Ye̤shǔ ayanu, asî nṳ lǒkho sǒkhli toǒ akû dě hǎhtò̌cû̌ lǒkho Kaperanòwî̤.

Běcǎ Ye̤shǔ mî̌ shǎǎ htě a ǐ kò ta̤htûpwa̤

25Bǎ asî cû̌ kè̌shǐ Ye̤shǔ dě shikoǒdû̌ bò̌kho akhanu, a gwè nû̌û, “Rabǐ, na hèto̤ bǎo bò̌khòtè?”

26Běcǎ Ye̤shǔ hî̌shǔ asî, “He hî̌ mè̤mè̤̌ sî, sî kè̌shǐ he ma̤ ta̤cǒklî̌kî̌ya dě sî kè̌lǎ he mè̤tò̤. Sî ǎkǒ mû̌ dě sî kè̌lǎ pwǎ he. 27Jipwi̤ wè̤pû shǎǎ la̤ǎla̤o htě a nṳso a sojònu toǒ aya ma̤. Jipwi̤ wè̤pû shǎǎshǎo htě a glè ǐ sî yolahtûpwa̤ tûjûpwa̤ htǒotoǒ ayanu. Kòyòphû̌khûhtǒo, a ǐ kò shǎǎ hǐnu toǒ pě, ma̤tè̤hî̌dě pha Cǒmara dǔlṳ ta a sò̌phlǒǒ nû̌û hǒ.”

28Dě asî gwè nû̌û, “A dè hî̌hǐnu dě, ma̤pûhǐ pa ma̤to Cǒmara asò̌phlǒnu pa bǎma̤ kwè̌꤮ mî̌titè?”

29Dě Běcǎ Ye̤shǔ hî̌shǔ asî, “Yṳǎ lǒkho he, htě Cǒmara nohè yǎ htǒonu.”

30Hǐnudě asî gwè nû̌û, “Ma̤pûhǐ pa kè̌shǐ ta̤cǒklî̌kî̌ya dě pa bǎ yṳǎ ayanu, na dǔlṳ bǎ pa ta̤cǒklî̌ titè pě? Na ma̤ bǎ pa mî̌titèpě htǒo? 31Pwǐ lî̤cahtǐkû hî̌, ‘A ǐǎ asî ta shǎǎ ǒ dě mǒkhû̌ hèlò̤ toǒ,’ ^c lî̤cahtǐkû hî̌hǐnu dě, paphipaphu dě wǐnu toǒ ǎ lǒkho mû̌ htě kò kaǎ yǎta Manǎ dě lo̤měshǒklanu.”

32Běcǎ Ye̤shǔ hî̌shǔ asî, “He hî̌ mè̤mè̤̌ sî, shǎǎ ǒdě mǒkhû̌ hèlò̤ numî̌, Mǒ̤jè ǐǎ asî mè̤tò̤. Hepha ǐǎ pwǎ asî. Khònò̤dě a ǐǎ mè̤mè̤̌ sî shǎǎ htě a ǒ dě mǒkhû̌ hèlò̤ htǒonu hǒ. 33Ma̤tè̤hî̌dě Cǒmara ashǎǎ na̤cè̌ mî̌ a ǒ dě mǒkhû̌ hèlò̤ dě a ǐ kòyòhǎkhû̌phû̌ ta̤htûpwa̤nu tapwa̤ hǒ,” a hî̌ asî hǐnu.

34Dě asî hî̌, “Běcǎ, pṳ̂̌꤮ ni̤ni̤ ǐpû pa shǎǎ htǒonu.”

35Dě Běcǎ Ye̤shǔ hî̌shǔ asî, “He mî̌ shǎǎ dě a ǐ kò ta̤htûpwa̤ hǒ. Kòyò htě a hè dě heǒnu, a hǒwi̤sǎǎpe dǐ꤮ khò̌ tò̤. Kòyò htě a yṳǎ henu, a sò̌ope dǐ꤮ khò̌ tò̤. 36Pwǎ̤tadě, pwǐ he hî̌hto sînu, sî kè̌shǐ he hǐnudě sî yṳǎ he tò̤. 37Bò kòyò htě hepha ǐ he toǒnu, a hè dě heǒ pě. Ûpèpè̌ bǎbǎ, a dè hè dě heǒnu, he wṳ̂hǎhtò̌kè nǒ a dî̌kî̌꤮ tò̤. 38Ma̤tè̤hî̌dě he ǒdě mǒkhû̌ hèlò̤ dě jǔ he hèma̤ tû̌ he sò̌phlǒ hǐnu mè̤tò̤. He hèma̤ pwǎ pwǐ pwa̤htě a nohè he htǒotapwa̤ a ta̤sò̌yṳnu pwǎ. 39Ta̤ htě ato pwa̤nohè he htǒotapwa̤ asò̌phlǒ mî̌ mî̌titè hǐnumî̌, bò kòyò htě a ǐ henu toǒ, he bǎplû hǎmǎkè asî tò̤. Htû̌꤮ mṳni̤ gutṳ̌lò̤ ti̤ni̤ pěnu, he bǎma̤ htûpwa̤gesǒ asî pě. 40Ma̤tè̤hî̌dě, hepha a ta̤sò̌yṳ mî̌ bò kòyò htě a kè̌shǐ aphû̌khû htǒo dě a yṳǎ toǒnu, a bǎ nî̤bǎ yolahtûpwa̤ tûjûpwa̤, dě he ma̤ htûpwa̤gesǒ asî htû̌꤮ mṳni̤ gutṳ̌lò̤nu ti̤ni̤ pě.”

41“He mî̌ shǎǎ ǒdě mǒkhû̌ hèlò̤,” Běcǎ Ye̤shǔ hî̌ hǐnu akhû̌akhî, Yṳ̌daphû̌ toǒ tṳ̂mṳ̂ta̤ma̤bò nû̌û. 42Asî hî̌ lǒkho, “A mî̌ Jǒjè aphû̌khû Ye̤shǔ hǐnu tapwa̤ pwǎ amè̤tò̤ya? Amo̤apha mî̌ pa sî̌ya pwǎ yayî̌? Mî̌ma̤tè̤dě a cû̌ hî̌tǒ̤ tû̌ ana̤ ta, ‘He ǒ dě mǒkhû̌ hèlò̤’ hî̌tè?”

43Běcǎ Ye̤shǔ hî̌shǔ asî, “Tṳ̂mṳ̂ta̤ma̤ lǒkhope pûma̤ nû̌û ma̤. 44Dè mè̤ ta hepha htě a nohè hehtǒo tapwa̤ glè nohè kò dě heǒ tò̤ hî̌nu, kò hèbò̌ dě he ǒ dǐpwǎ̤꤮ tò̤. Kòyò htě a hè dě heǒ toǒnu, he ma̤ htûpwa̤gesǒ asî htû̌꤮ mṳni̤ gutṳ̌lò̤ ti̤ni̤ pě. 45Pwa̤po̤ toǒ khwè̌nǎ ta, ‘Cǒmara sû̌ǐtòwòǐbò asî pě.’ ^d Bò kòyò htě a gana̤de pha a ta̤sû̌ǐtòwòǐ dě a hè sû̌ǐtòwòǐ ta̤dě aǒ toǒnu, a hè heǒ pě. 46Kòyò kè̌shǐbǎ pha Cǒmara tapwa̤pwa̤, he sò̌yṳ hî̌ hǐnu mè̤tò̤. Kò kè̌shǐ pha dǐpwǎ̤꤮ tò̤, kè̌shǐ pha mî̌ tǒ̤pwǎ a ǒ Cǒmara a ǒ dě a hèlò̤nu tapwǎ̤pa. 47He hî̌ mè̤mè̤̌ sî, kòyò htě a yṳǎna̤ǎ he tapwa̤pwa̤nu, a glè nî̤bǎ yolahtûpwa̤ tûjûpwa̤ hǒ. 48He mî̌ shǎǎ htě a ǐ kò ta̤htûpwa̤. 49Sî phiphu dě wǐnu toǒ ǎ mû̌manǎ hǐnudě a sipe pwǎ lǒkho. 50Pwǎ̤ta, shǎǎ ǒ dě mǒkhû̌ hèlò̤ he hî̌ sî numî̌, a ǒ bǎo. Ûpèpè̌ bǎbǎ a dè ǎ shǎǎhtǒo hî̌numî̌, a sipe tò̤. 51He mî̌ shǎǎ htě a ǐkò ta̤htûpwa̤ dě a ǒ mǒkhû̌ hèlò̤. Ûpèpè̌ bǎbǎ, a dè ǎ shǎǎ htǒonu, a htûpwa̤ tûjûpwa̤ pě. Shǎǎ htǒonumî̌ heyî̌ htǒonu hǒ. Ma̤pûhǐ kòyòhǎkhû̌phû̌ htûpwa̤ ayanu, he ǐlò̤kè he na̤saklû htǒo ta asîya hǒ.”

52Yṳ̌daphû̌ toǒ gègo nû̌û ta, “A cû̌ ǐǎjò pa ta ayî̌ hî̌tè?”

53Dě Běcǎ Ye̤shǔ hî̌shǔ asî, “He hî̌ mè̤mè̤̌ sî, sî dè ǎ kòyòphû̌khû htǒo ayî̌ tò̤, sî dè o yǎsǐ tò̤ hî̌nu, ta̤htûpwa̤ ǒ dě sîkû tò̤. 54Pwǎ̤tadě kòyò htě a ǎ heyî̌ o hesǐ toǒnu, a nî̤bǎ yolahtûpwa̤ tûjûpwa̤, dě htû̌꤮ mṳni̤gutṳ gutṳ̌lò̤ ti̤ni̤ pěnu, he ma̤htûpwa̤ gesǒ yǎ pě. 55Ma̤tè̤hî̌dě heyî̌ mî̌ la̤ǎ mè̤mè̤̌, hesǐ mî̌ la̤o mè̤mè̤̌ hǒ. 56Kòyò htě a ǎ heyî̌ o hesǐ tapwa̤pwa̤nu, a ǒhtûpwa̤ dě hekû, ta he ǒhtûpwa̤ dě akû pě. 57Pha htě a nohè he htǒo tapwa̤ a htûpwa̤ akhû̌akhî, he htûpwa̤ kû̌dǒ. Hǐnudě kòyò htě a ǎ heyî̌ tapwa̤pwa̤nu, hekhû̌hekhî, a htûpwa̤ kû̌ pě. 58Htǒomî̌ shǎǎ ǒdě mǒkhû̌ hè hǒ. Sîphisîphu bǎnukha toǒ ǎ mû̌manǎ hǐnudě a si lǒkho pwǎ. Pwǎ̤tadě kòyò htě a ǎ shǎǎ htě he hî̌ bǎ sî khònò̤ htǒotoǒnu a htûpwa̤ tûjûpwa̤ pě.” 59Bǎ a sû̌ǐlò̤ kò dě Kaperanòwî̤ ta̤sabahǐkû akhanu, a hî̌ kò hǐnu.

Akhophijaû̌ saprṳ̂ wîkè nû̌û

60Asî gana̤de Běcǎ Ye̤shǔ hî̌hǐnu dě, akhophijaû̌ saprṳ̂ hî̌ lǒkho, “A ta̤sû̌ǐ htǒo apò̤ mè̤mè̤̌. Ûpè tapwa̤ glè̌ yṳǎ phî̌le̤phî̌yo̤bò̌kû̌ yǎ ta̤sû̌ǐhtǒo pè?”

61Akhophijaû̌ toǒ tṳ̂mṳ̂ta̤ma̤ lǒkho pwǐhè̌onu a sî̌ya akhû̌akhî, a hî̌ asî, “He hî̌ pwǐhè̌o dě sî sò̌phlǒpî̌bò lǒkho ta he ta̤sû̌ǐ htǒotoǒ ya? 62Dè ma̤hǐnu hî̌dě, sî kè̌shǐ kòyòphû̌khûhtǒo gekihtò̌sǒ dě agûla̤ la̤ǒ pě hî̌dě, sî gènè̤ lǒkho hî̌tè pě? 63Běcǎ sǎcahtǐnu a ǐ ta̤htûpwa̤ tûjûpwa̤. Kòyòhǎkhû̌phû̌nu, a ǐjò ta̤htûpwa̤ tûjûpwa̤ tò̤. Yo̤sǎ htě he hî̌bǎ sî htǒotoǒ numî̌, Běcǎ sǎcahtǐ a ta̤hî̌bǎ toǒ dě a ǐbò̌ kò ta̤htûpwa̤ tûjûpwa̤. 64Pwǎ̤ta dě sîklanu, kòyò htě a yṳǎ kû̌kò tò̤nu a ǒ toǒ.” Ma̤tè̤hî̌dě Běcǎ Ye̤shǔ sî̌yape dě akòshî̌ pe, dě asîklanu a yṳǎ nû̌û tò̤, dě a shaǎlò̤kè nû̌û pěnu a ǒtapwa̤, a sî̌ya dě a hî̌pwǎ asî hǐnu. 65A hî̌ sělěpo̤, “Dě sîklanu kòyò yṳǎ he tò̤ ǒtoǒ, mî̌ta he hî̌ sî, pha dè nohè kò dě heǒ tò̤ hî̌nu kò hèbò̌ dě heǒ dǐpwǎ̤꤮ tò̤, hǐnu hǒ.”

66Tèhtò̌ bǎnu dě akhophijaû̌ toǒ geplṳ̂kè dě gûkû̌pe nû̌ûkò tò̤.

67Dě a gwè akhophijaû̌ shǐsò̌gini̤ htǒotoǒ, “Sîlè, sî sò̌yṳ hǎhtò̌ge dǒ hela̤ hǐnu amè̤tò̤ya?” A hî̌ asî hǐnu.

68Shîmǒ̤nè̤ Petru hî̌ geshǔ nû̌û, “Běcǎ, pa glè̌ cû̌shǔ ûpè? Ta̤sû̌ǐtòwòǐ htě a ǐ pa yolahtûpwa̤ tûjûpwa̤nu a ǒ pwǎpǒ̤ dě naǒ pwǎ. ^e 69Pa yṳǎ dě pa sî̌ya ta na mî̌ Cǒmara a pwa̤cahtǐphû̌ tapwa̤, dě a nohèlò̤ na hǒ.”

70Htodě Běcǎ Ye̤shǔ hî̌shǔ asî, “He wû̌lǎhto sî shǐsò̌gini̤, mè̤tò̤ ya? Pò̤̌ta, dě sîklanu, khînǎmo̤pha hǐkǒdû̌ ǒtado,” a hî̌ asî hǐnu. 71(A hî̌ pwǐhè̌omî̌ a sò̌yṳ hî̌ Shîmǒ̤nè̤ Isakarǐo aphû̌khû Yṳ̌da. A mî̌ a ǒkû̌dǒ ta shǐsò̌gini̤ akla hǐnudě nǒkònu a shaǎlò̤kè Běcǎ Ye̤shǔ.)