John 13

Běcǎ Ye̤shǔ shǔbò bǎ akhophijaû̌ toǒ akhò̌lopo̤

1Bǎ ta̤cû̌tûlû̌pwè bǎ hǒtò̤ akhanu, Běcǎ Ye̤shǔ sî̌ya ta akhîakha htě a glè bǎ wîkè hǎkhû̌ dě a bǎ ge aphaǒnu a hèto̤hǒ. Dě a mo̤ǐ akhophijaû̌ htě a ǒ dě hǎkhû̌ bǎotoǒ pṳ̂̌꤮ taplǎ. A mo̤ǐ to̤ asî dě a gutṳ.

2Bǎnukha Běcǎ Ye̤shǔ ta akhophijaû̌ toǒ ǎ lǒkhope dî lṳmṳhǎ. Dě Shîmǒ̤nè̤ Isakarǐo aphû̌khû Yṳ̌da Isakarǐo htǒotapwa̤nu, ma̤pûhǐ a shaǎlò̤kè Běcǎ Ye̤shǔ ayanu, khînǎmo̤pha hǐkǒdû̌ Sehto hî̌bǎnṳhto ayo̤ dě a sò̌phlǒkû hǒ. 3Běcǎ Ye̤shǔ sî̌yatû̌ ta apha ǐlò̤htobò nû̌û ta̤po̤ta̤phǎ shû̌sho ta ta̤lǒ̤꤮ bò akhû̌ hǒ. A sî̌ya ta a ǒ Cǒmara ǒhè dě a getîkhîsǒ dě Cǒmara a ǒ pě. 4Hǐnudě a ihtǒ asî la̤ǎ dîjowa̤ kòshî̌ dě a plû̌kè a hǐdokhlohtû htodě a comě ashè̌kò ta sè̌wò̤co la̤htǔsû tṳpṳ. 5A ma̤hto hǐnudě, a yṳnṳ shi dě balo̤ jowo̤dû̌ tabǎ akû dě a tèhtò̌ shǔbò bǎ akhophijaû̌ toǒ akhò̌lopo̤. Dě a htǔsûkè bǎ asî ta sè̌wò̤co htě a cowa̤ nû̌û dě a shè̌kòlo̤nu tṳpṳ.

6A cû̌ Shîmǒ̤nè̤ Petru a ǒ dě a hî̌shǔ nû̌û, “Běcǎ na glè shǔbò he khò̌lopo̤ ya?”

7Dě Běcǎ Ye̤shǔ hî̌geshǔ yǎ, “He cû̌ma̤ tǒ̤ pwǐhè̌oo ma̤tè̤hî̌dě khònò̤htǒo na sî̌ya hǒtò̤ hǐnudě ti̤ni̤ni̤ pěnu, na sî̌yaphlotû̌ pě.”

8“Tò̤, na bǎ shǔbònṳ he khò̌lopo̤ dî̌kî̌꤮ tò̤,” Petru hî̌shǔ nû̌û dě Běcǎ Ye̤shǔ hî̌ yǎ, “He dè shǔbònṳ na tò̤ hî̌dě, na htû he khophijaû̌ mè̤tò̤.”

9Dě Shîmǒ̤nè̤ Petru hî̌ ge, “Dè ma̤hǐnudě, Běcǎ, shǔbò pwǎ pû he khò̌lopo̤ ma̤. Shǔbò to̤bò bǎdǒ he cǔde ta he hǐkǒ htǒonu.”

10Dě Běcǎ Ye̤shǔ hî̌shǔ gesǒ yǎ, “Kòyò htě a ishò̌hto shi tapwa̤nu, ana̤ plîbò tapwa̤ hǒ, a lo̤bǎ shǔbò pwǎpǒ̤ akhò̌lopo̤ pwǎ. Sî sò̌phlǒ mṳ̂plîbòhǒ lè, pwǎ̤tadě amṳ̂plîbò pṳ̂̌꤮ tapwa̤ tò̤.” 11Ma̤tè̤hî̌dě a sî̌ya ta kò glè̌ shaǎlò̤kè nû̌ûpě tapwa̤, mî̌ta a hî̌ ta sî mṳ̂plîbò pṳ̂̌꤮ tapwa̤ tò̤, a hî̌pwǎ hǐnu.

12Bǎ a shǔbòhto asî khò̌lopo̤ akhanu, a sǒhtò̌ gesǒ ahǐdokhlo dě a ge hǎnòò̌sǒ bǎ agûla̤. Dě a gwè asî, “He ma̤ bǎ sî htǒo numî̌ sî sî̌yaphlo lǒkho ya?” A hî̌ hǐnu. ^a 13“‘Sara,’ tò̤mî̌ta, ‘Běcǎ,’ sî kaǎ lǒkho he hǐnumî̌ ato pwǎ, ma̤tè̤hî̌dě he htû mè̤mè̤̌ pwǐ sî kaǎ he nǔ꤮. 14Hǐnudě khònò̤htǒo he htû sî Běcǎ sî sara dě he dè shǔbò bǎ sî khò̌lopo̤ dèhî̌dě sî to shǔbò bǎdǒ nû̌û khò̌lopo̤ tapwa̤ ta tapwa̤ nî̌. 15He mǎnǎ bǎ sî la̤klo ma̤ htǒotacǎ hǒ. Sî to gûma̤kû̌ lǒkho pwǐ he ma̤bǎ sî htǒonu. 16He hî̌ mè̤mè̤̌ sî, jûphû̌ dû̌khlo ta aběcǎnu a ǒ dǐpwǎ̤꤮ tò̤. Kòyò htě kò no yǎ htǒotapwa̤nu adû̌khlo ta a no nû̌ûnu tapwa̤nu a ǒ dǐpwǎ̤꤮ tò̤. ^b 17Khònò̤dě sî sî̌ya lǒkho ta̤htǒotoǒ hǒ. Sî dè ǒhtûpwa̤ gûma̤ ta̤htǒotoǒ hî̌nu, sî nî̤bǎ ta̤howi̤.

Běcǎ Ye̤shǔ hî̌po̤phǎnǎ wǐ ta kò shaǎlò̤kè nû̌û pě

(Matěo 26:20-25; Mǎ̤riko 14:17-21; Lǔka 22:21-23)

18“He sò̌le̤ hî̌bò sî pṳ̂̌꤮ tapwa̤ hǐnu mè̤tò̤. Bò sî htě he wû̌lǎ htǒotoǒ numî̌ he sî̌yaǐbò sî pṳ̂̌꤮ tapwa̤. Pwǎ̤tadě ma̤pûhǐ lî̤cahtǐkû hî̌nǎ ta lǒbehtò̌ ayanu, ‘Kòyò htě a ǎhtuohtu kû̌ta he htǒotapwa̤ sò̌khě he dě a glè shaǎlò̤kè he hǒ.’ ^c

19“Htû̌꤮ a htûhtò̌ pěnu, ma̤pûhǐ sî yṳǎ ta he mî̌ Mè̤shǐanu tapwa̤ nudě, he pwe̤ǐlṳkè bǎ sî khònò̤ hǒ. 20He hî̌ mè̤mè̤̌ sî, kòyò tapwa̤pwa̤ a kaǎshǔ kòyò htě he nohè yǎ htǒotapwa̤ numî̌, a kaǎshǔ he hǒ. Kòyò tapwa̤pwa̤ a kaǎshǔ he numî̌ a kaǎshǔ pwa̤htě a nohè hehtǒonu tapwa̤ hǒ.” ^d

21A hî̌hto hǐnudě, a shèwè mè̤mè̤̌ nû̌ûsò̌phlǒ dě a hî̌htò̌ lṳlîkè bǎ asî, “He hî̌ mè̤mè̤̌ sî, dě sîkla htǒonu kòyò htě a shaǎlò̤kè he pěnu a ǒ tapwa̤,” a hî̌lîkè asî hǐnu.

22Akhophijaû̌ toǒ kè̌ kè̌khîbò nû̌û tapwa̤ ta tapwa̤ dě a sò̌yṳ hî̌ bǎtè tapwa̤nu, a gènè̤phlo lǒkho tò̤, a htò̌te̤pe̤bòkè asî. 23Dě akhophijaû̌ akla htě a mo̤ǐ mè̤mè̤̌ nû̌û htǒotapwa̤nu, a hǎnòò̌phǔ bǎ Běcǎ Ye̤shǔ kòshî̌ tokho. 24Shîmǒ̤nè̤ Petru nǒcû̌ ahǐkǒ htě a hǎnòò̌phǔ nû̌û kòshî̌nu tapwa̤ dě a hî̌ nû̌û, “Gwè yǎnu, a sò̌yṳ hî̌ mî̌ûpè?” A hî̌hǔ cû̌ nû̌û hǐnu.

25A gètè̤wa̤ Běcǎ Ye̤shǔ dě a hî̌ nû̌û, “Běcǎ, na hî̌nu tapwa̤ mî̌ ûpè?” A gwè nû̌û hǐnu.

26Běcǎ Ye̤shǔ hî̌ yǎ, “He bè̌nṳ mû̌ tokǒkî dě hǎsǐbakû dě he ǐwa̤ yǎta anu tapwa̤ mî̌ ahǒ.” A hî̌hto hǐnu dě a phî̌ mû̌ tokǒkî a bè̌nṳ nû̌û hǎsǐbakû dě a ǐcû̌ nû̌ûta Shîmǒ̤nè̤ aphû̌khû Yṳ̌da Isakarǐo. 27Yṳ̌da phî̌hto mû̌ ta, khînǎmo̤pha hǐkǒdû̌ hènṳ akû.

“Na glè ma̤ hî̌tènu, cû̌ ma̤phwèmò̌,” Běcǎ Ye̤shǔ hî̌ nû̌û hǐnu. 28Ma̤tè̤hî̌dě Běcǎ Ye̤shǔ cû̌ hî̌tǒ̤ nû̌û htǒo ma̤tè̤nu, asî ǒ bǎ dîjowa̤ kòshî̌nu toǒ sî̌ya dǐpwǎ̤꤮ tò̤. 29Yṳ̌da pṳ̂ bǎ asîwû akhû̌akhî, asî toǒǒnu, a gènè̤ lǒkho pwǎ ta Běcǎ Ye̤shǔ nocû̌ pwî̤ nû̌û ta ta̤htě a lo̤bǎ ta pwèdû̌htǒo aya, tò̤mî̌ a nocû̌ ǐ nû̌û ta kòyò shuphǔshèwèphû̌ toǒ ta̤tacǎcǎ pwǎ, a gènè̤ lǒkho hǐnu. 30Yṳ̌da phî̌hto mû̌ ta, a hǎhtò̌cû̌. Bǎnukha mî̌ lṳmṳkhǐkè hǒ.

Běcǎ Ye̤shǔ hî̌po̤phǎnǎ wǐ Petru ta a la̤lò̤kè nû̌û pě

(Matěo 26:31-35; Mǎ̤riko 14:27-31; Lǔka 22:31-34)

31Yṳ̌da hǎhtò̌cû̌hto akhanu, Běcǎ Ye̤shǔ hî̌ asî, “Khònò̤htǒo akhîakha hèto̤ ta kòyòphû̌khû mî̌ hehtǒo nî̤bǎ ta̤sîrîdû̌sîrîhtû hǒ. Cǒmara glè nî̤bǎ tṳtṳ ta̤sîrîdû̌sîrîhtû dě kòyòphû̌khûhtǒo a ǒ hǒ. 32Cǒmara dè nî̤bǎ tṳtṳ a ta̤sîrîdû̌sîrîhtû dě a phû̌ ǒ dèhî̌dě Cǒmara ǐ aphû̌khûhtǒo asîrîdû̌sîrîhtû ta ana̤nu pě. A glè ǐ nû̌û ta̤sîrîdû̌sîrîhtû khònò̤.

33“Hephû̌heli̤ sî, he ǒkû̌ yî̤pe ta sî tò̤hǒ. Sî kè̌lǎsǔ he pě. Pwǐ he hî̌hto Yṳ̌daphû̌ hǐkǒdû̌ toǒnu, he hî̌po̤ sî khònò̤htǒo ta gûla̤ htě he glè cû̌ htǒonu, sî cû̌jòtò̤. ^e

34“Hǐnudě khònò̤htǒo he mǎnǎ sî ta̤hî̌bǎ asa tûmû. Mo̤ǐ lǒkho nû̌û tapwa̤ ta tapwa̤ nî̌꤮. Pwǐ he mo̤ǐ sînu, sî bǎ mo̤ǐ nû̌û tapwa̤ ta tapwa̤. ^f 35Sî dè mo̤ǐ nû̌û tapwa̤ ta tapwa̤ hî̌nu, kò pṳ̂̌꤮ tapwa̤ sî̌ya ta sî htû he khophijaû̌ pě.”

36“Běcǎ, na glè cû̌ bǎtè tò̤glòtè pě?” Shîmǒ̤nè̤ Petru gwè nû̌û hǐnu.

Dě Běcǎ Ye̤shǔ hî̌shǔ yǎ, “Gûla̤ htě he glè cû̌ htǒotò̤glònu, khònò̤dě na gûcû̌jò kû̌ he hǒtò̤. Pwǎ̤tadě na gûcû̌ kû̌nǒ he nǒkò pě.”

37“Běcǎ, he gûcû̌kû̌ na khònò̤dě a cû̌ jòto̤tò̤mî̌ ma̤tè? He ǒ wǒnǎ hena̤ ta he glè si ta naya htǒo.” A hî̌ nû̌û hǐnu.

38Htǒotaplǎdě Běcǎ Ye̤shǔ hî̌shǔ yǎ, “Na ǒ wǒnǎ nana̤ ta na glè si heya mè̤mè̤̌ hǒ ya? He hî̌ mè̤mè̤̌ na, bǎ shîphaû̌ hǒtò̤nu, he sî̌yanǒ yǎ tò̤ ▼

▼Toǒǒnu a hî̌ ta htè̌bǐ mè̤tò̤mî̌ sumṳǐ

na la̤lò̤kè he pě suplǎ,” a hî̌ nû̌û hǐnu.