Kò khwè̌ Yṳ̌dalî̤ htǒotabǎ ma̤tè̤hî̌dě kò sò̌yṳ ǐsè̌rè̌ sara sûlûlòho ana̤ dě a hî̌lò̤ lǒkho ana̤ ta pwa̤yṳǎphû̌ toǒ. Ta̤wi̤ta̤kè̌ htě kò khwè̌ lî̤ htǒotabǎ akû toǒnu, alò̤ta kò khwè̌nǎ dě Petru alî̤ ginǐ̤bǎ tabǎ akûnu pwǎ. Ma̤pûhǐ Cǒmara akòyò toǒ shětònò shǔwǒ ta ta̤yṳta̤nǎ htě Cǒmara ǐ asî htǒo ayanu, pwa̤khwè̌lî̤ htǒotapwa̤ khwè̌pwǎ lî̤htǒotabǎ.

Ta̤hî̌bǎ to̤to̤ ta to̤to̤

Ta̤hî̌bǎ wǐ dě alo̤mo̤ 1-2

Sara sûlûlòho ana̤ toǒ

Ta̤ǒhtûpwa̤ ta a ta̤sû̌ǐ toǒ 3-16

Pṳ̂měǐ lǒkho sî ta̤yṳ 17-23

Howi̤homò̤kè kòyò 24-25

Jude

1He mî̌ Jǎgomo̤ apṳ Yṳ̌da, htohǒtò̤ he mî̌ Ye̤shǔkhrî̌stu ajû tapwa̤.

He sò̌yṳ khwè̌cû̌bǎ kòyò htě pha Cǒmara kaǎ asî dě a mo̤ǐ asî, htohǒtò̤ Ye̤shǔkhrî̌stu ǒpo̤ ma̤kwaǐ asînu toǒ a ǒ. ^a

2Cǒmara a ta̤sò̌yṳgwèbǎǐ, a ta̤gûjûkabǎ ta ata̤mo̤ǐ ǒlǒǒbe kû̌ tû̌ta sî nî̌꤮.

Sara plǎplò̤ toǒ

3He khobǒsû̌bǒmo̤ sî꤮, ta̤ma̤lû̌htò̌ge htě pa lǒ̤꤮ bò nî̤bǎplǒ nû̌û htǒo awi̤akè̌nu, he sò̌yṳ khwè̌cû̌ bǎ mè̤mè̤̌ sî pwǎ̤tadě khònò̤htǒo he kè̌shǐ ta he bǎ khwè̌cû̌khǒ tèplè̌ bǎlè̌ sî ta ahǔwa̤ tacǎ. Dě he sò̌yṳ ǐkhû̌ǐǎ sî ta ta̤sò̌le̤sò̌lò̤ awi̤akè̌ dě taplǎpa Cǒmara ǐlò̤phlǔbò akòyò lǒ̤bò htě a yṳǎ htǒotoǒnu, sî shětònò shǔwǒ pû yǎ nî̌꤮. 4Ma̤tè̤hî̌dě, kòyò htě a bè̌dubè̌na̤ Cǒmara tò̤ toǒnu, a hènṳhǔ dě sîkla hǒ. Ma̤pûhǐ asî hî̌bǎ lû̌htò̌nṳ ana̤ ta a ta̤ǒhtûpwa̤ aphû̌mò̤ toǒ ayanudě, a htû̌lè̌ tèplè̌ pî̌kè pa Běcǎ Cǒmara abwǐasîrî toǒ awi̤akè̌. Htohǒtò̤ asî htǒotoǒnu a yṳǎ kû̌ pa hǐkǒdû̌ Běcǎ Ye̤shǔkhrî̌stu htǒonu tò̤. Pwǐ lî̤cahtǐ hî̌nǎ ta̤cèrò toǒnu asî nî̤bǎbò pě.

5Sî sî̌yahtobò ta̤ lǒ̤bò htǒo pwǎ̤tadě he sò̌yṳ ǐ sî̌yahtò̌ gepo̤sǒ sî ta taplǎkha Běcǎ ma̤lû̌htò̌gehto Israelphû̌ dě Egyptga ^b pwǎ̤tadě nǒkònu a ma̤sibò gesǒ kòyò htě a yṳǎ nû̌û tò̤nu toǒ. ^c 6Gènè̤htò̌bǎnṳ gesǒ lǒkho tû̌ tanaphû̌ htě a wîkè Cǒmara ǐ asî ata̤pǒǐ htǒonu, dě a hǎhtò̌cû̌ khǒkè ta a la̤ǒ htǒonu toǒ. Cǒmara cokloměbò asî ta sǒpli̤te̤htò̌ dě a dǒnṳ asî dě ta̤khǐ akla hǒ. Dě a bè̌ǒ to̤ asî bǎ ta̤cèrò a mṳni̤nu ti̤ni̤ pě. 7Hǐnuhǒ, gènè̤htò̌nṳ sǒtû̌ lǒkho Sò̌dowî̤ ta Gòmò̤̌rawî̤ ta wî̤ ǒ bǎ a wò̤shî̌nu toǒ. Wî̤kûphû̌ bǎnu toǒ mî̌ a ma̤sǔ sǒsǒta hǐnu hǒ. Asî gûma̤kû̌ lǒkho sǐshi la̤klo sò̌yṳ phû̌mò̤ toǒ dě ma̤mo̤ǐ lǒkho ana̤ ta mamǔmakhû la̤klo phû̌mò̤shî̌hto toǒ. Asî khòbǎ ta̤shuphǔshèwè dě mî̌kla tûjûpwa̤ htǒonumî̌ a htûhtò̌ kòyò la̤kè̌mò̌mṳ ta kòyò lǒ̤꤮ bò aya hǒ. ^d

8Kòyò htě a hènṳhǔ dě sîkla toǒ numî̌ alò̤ta hǐnunu. Dě asî kè̌shǐtobonǎ ta̤ toǒ akhû̌akhî, asî ma̤phû̌mò̤lò̤ gesǒ tû̌ ana̤saklû toǒ pwǎ. Asî htè̌shǔ ta̤sîrîshû̌sho htǒo dě a pi̤jishǐcǒ mǒkhû̌tanaphû̌ htě a ǒ ta a ta̤sîrîdû̌sîrîhtûnu toǒ. 9Mi̤kělè mî̌ mǒkhû̌tanaphû̌ htě adû̌khlobò kò, pwǎ̤tadě bǎ a ta khînǎmo̤pha hǐkǒdû̌ ma̤nî̤ nû̌û ^e ta Mǒ̤jè alṳto̤ ^f akhanu, Mi̤kělè sǎhtǎ bè̌bǔ khînǎmo̤pha hǐkǒdû̌ ta̤sǔ tò̤. A hî̌pwǎ nû̌û ta, “Cǒmara sǎhtǎtû̌ na pě,” ^g hǐnu pwǎ. 10Pwǎ̤ta kòyò htǒotoǒnu a pi̤jishǐcǒ ta̤ htě a sî̌ya phlǔtò̤nu toǒ. Asî sò̌phlǒ sǒsǒ lǒkho ta ta̤phû̌ta̤li̤ akhû̌akhî, a gûma̤kû̌ lǒkho pwǐ asò̌phlǒ noma̤ nû̌ûnu pwǎ. Dě asî ma̤hǐnu akhû̌akhî, a ma̤pî̌ma̤lṳ̂kè lǒkho ana̤ hǒ.

11Cǒmara cèrò mè̤mè̤̌ asî pě, ma̤tè̤hî̌dě asî gûma̤kû̌ pwǐ Kaî̌no ma̤nu akho. ^h Dě asî sò̌le̤kè̌dû̌ wûhta akhû̌akhî, a sò̌phlǒsho gûma̤kû̌ pwǐ Bela ma̤sǔhtonu hǒ. ⁱ Asî shěshǔ kò htû hǐkǒdû̌ toǒ sǒsǒta Kò̌rǎ ma̤htonu hǒ. Kò ma̤pî̌kè asî pwǐ kò ma̤pî̌kè Kò̌rǎnu pě. ^j

12Bǎ sî bǒsû̌khǎkho ǎplǒoplǒnû̌û shǎǎ akhanu, kòyò htǒotoǒ hènṳma̤ cǒprǒwi̤ja kû̌ ta sî. Asî htǒotoǒ numî̌ alò̤pwǎ ta pwa̤gèǐsophû̌ toǒ, dě a sò̌le̤kè̌dû̌ pwǎpǒ̤ a la̤ǎbǎobǎ ayapwǎ dě a ta̤la̤sòwò̤nu a ǒ kû̌ lǒkho kò dǐcǎ꤮ tò̤. Asî numî̌ alò̤ta poǒlṳ toǒ dě a cû̌kè dě a julò̤ bǎ kò tò̤nu toǒ pwǎ. Asî htǒotoǒnu alò̤ta sǒmṳ htě asǎapho hǎhtò̌ kû̌kò ta akhîakha tò̤ toǒ, dě kò htěhtò̌ yò̌htò̌sada khò̌wi̤kè asî dě a sikèbò pwǎ. 13Asî toǒnu, alò̤ta shipěpǒshû̌ dě shidû̌shite̤we̤ akûnu toǒ pwǎ. Htohǒtò̤ asî ta̤ma̤ htě a htûhtò̌ ta̤sòwò̤ toǒnu a ǒlṳhtò̌ sǒsǒta shibǒbè̌nu pě. A sî mî̌ kòyò htě asûto kò klè̌ tò̤ alò̤ta shǎ htě acû̌htocû̌lò̤ aǒto agûla̤ tò̤nu toǒ. Cǒmara ma̤wǒnǎ bǎ asî gûla̤ dě ta̤khǐsuwukhlo kòyò tò̤glò dě a dǒnṳ asî bǎnu tûjûpwa̤ talakhǎ pě.

14Ěnò̌ htě akhlialè gilò̤ ta Ada ahtu susǒtuhtunu tapwa̤ pwe̤ǐnǎ yî̤ mè̤mè̤̌ ta asî htǒotoǒ awi̤akè̌ dě a hî̌, “Běcǎ hèkû̌ ta amǒkhû̌tanaphû̌ cahtǐ toǒnu kò dǒbǎpè̤pe tò̤. ^k 15Ma̤tè̤hî̌dě a hè cèròbò kòyò pě pṳ̂̌꤮ tapwa̤. A cèròbò kòyò htě a bè̌dubè̌na̤ kû̌kò Cǒmara tò̤nu toǒ pě. A cèrò asî ta̤sǔta̤plě htě asî ma̤to ta Cǒmara aklè̌aklò tò̤nu toǒ pě. Asî htè̌còwòshǔ Cǒmara akhû̌akhî, a cèrò asî pě.” 16Kòyò htǒotoǒ numî̌ kòyò htě a tṳ̂mṳ̂ta̤ma̤shû̌ ta a bè̌ tû̌ ta̤sǔ dě kòhǔwa̤ alo̤ pṳ̂̌꤮ taplǎ. Asî gûma̤ kû̌ta ana̤klû a ta̤sò̌yṳsò̌bǎ phû̌mò̤shî̌htonu toǒ akò pwǎ. Asî hî̌bǎ htû̌sò̌kò̌koǐ lǒkho ana̤, htohǒtò̤ ma̤pûhǐ asî nî̤bǎ ta̤ htě a sò̌yṳnu toǒ dě, a hî̌bǎ htû̌sò̌ǐ lǒkho kòyò.

Ta̤ǐsè̌rè̌sè̌so ta ta̤sû̌ǐtòwòǐ toǒ

17Pwǎ̤ta he khobǒsû̌ sî꤮, gènè̤htò̌ to̤bǎ gesǒ lǒkho pa Běcǎ Ye̤shǔkhrî̌stu a pwa̤nophû̌ toǒ dǒhtû̌ǐnǎ htobǎ sînu toǒ nî̌꤮. 18Asî hî̌ bǎ sî ta, “Htû̌꤮ mṳni̤mṳsa gutṳ̌lò̤ pě toǒnu kòyò htě a pi̤jishǐcǒ luya̤ sî toǒ ǒhtò̌ pě. Asî toǒnu mî̌ a gûma̤ còcè̌pwǎ pwǐ a ta̤sò̌yṳsò̌bǎ phû̌mò̤ htě a to ta Cǒmara asò̌phlǒ tò̤ toǒnu.” ^l 19Kòyò htǒotoǒ numî̌ kòyò htě a ma̤ htò̌pò̌htò̌shîbò kòyò, kò htě a gûma̤kû̌ pwǐ ana̤klû phěyî̌ a ta̤sò̌yṳsò̌bǎ ǒnu toǒ, htohǒtò̤ asî htǒotoǒ numî̌ a nî̤bǎ kû̌kò Běcǎ sǎcahtǐ tò̤.

20Pwǎ̤ta he khobǒsû̌ sî꤮, sî bǎ ma̤dû̌htò̌htûhtò̌ sělěpo̤ lǒkho sî ta̤ǒhtûpwa̤ htǒonu dě sî ta̤yṳta̤nǎ cahtǐ htě ashoatònòwǒ htǒonu alo̤ dě, bǎ sî kwisaba akhanu, nǎla̤htò̌ǐ lǒkho Běcǎ sǎcahtǐ yṳ̂klè̌nè̌klò sînu toǒ nî̌. 21Bǎ sî ǒpo̤kè̌shuǐ Běcǎ Ye̤shǔkhrî̌stu a ta̤gwèbǎǐ htě a ǐ pa yolahtûpwa̤ tûjûpwa̤ htǒotapwa̤ hè akhapěnu, ǒhtûpwa̤ sělě lǒkho ta Cǒmara ata̤mo̤ǐ akû nî̌꤮.

22Gwèbǎǐ dǒ kòyò htě a yṳǎ Khrî̌stu pwǎ̤tadě asò̌phlǒ wò̌wè̌pe tû̌nu toǒ nî̌꤮. 23Jipwi̤ ma̤jè dǒ kòyò htě a lo̤bǎ ta̤ma̤lû̌htò̌ge pwǐ na ma̤lû̌htò̌ge kòyò dě mî̌klanu toǒ nî̌. Htodě gwèbǎǐpo̤ kòyò ahǔwa̤nu toǒ nî̌. Pwǎ̤ta gènè̤ te̤mǎ tîkî̌ nî̌, ma̤tè̤hî̌dě na to wi̤jakè ahǐdohǐyò̤ htě a wî̌ ta asî ta̤sǔta̤plě toǒnu nî̌꤮.

Ta̤htû̌sò̌ǐ a ta̤kwisaba

24Pa htû̌sò̌ǐ plǒnû̌û Cǒmara hò̌! Ma̤pûhǐ sî lòkhǔpo̤ pû tò̤nu, Cǒmara kè̌ǐkwè̌ǐ ma̤jè tû̌ta sî nî̌. Htohǒtò̤ a kaǎgebò̌tû̌ sî dě a lo̤mo̤ pě dě sî ta̤sǔ ǒpe tò̤, dě sî sò̌le̤sò̌lò̤ mè̤mè̤̌ tû̌ta pě. 25Cǒmara mî̌ asîrîdû̌sîrîhtû. Cǒmara mî̌ a ǒpwǎ a tapwǎ̤ pa. Pwa̤ htě a ma̤lû̌htò̌ge pa mî̌ a tapwǎ̤pa. Ye̤shǔkhrî̌stu akhû̌akhî, ta̤sîrîdû̌sîrîhtû, ta̤dû̌ta̤yǒ awî̤awǒ, ta̤po̤ta̤phǎ ta ta̤sîrîshû̌sho htǒotoǒnu, a ǒplǒ ta Cǒmara tèhtò̌ ta̤tacǎ htûhtò̌ hǒtò̤ akha, tǒ̤lò̤khònò̤, tǒ̤hè tûjûpwa̤ nî̌, Amè̤.