Luke 11

Ye̤shǔ sû̌ǐ ta̤kwisaba awi̤akè̌

(Matěo 6:9-13, 9:9-11)

1Ti̤ni̤kha Ye̤shǔ kwisaba gûla̤ tò̤glò. Bǎ a kwisabahto akha, akhophijaû̌ toǒ akla tapwa̤nu a hî̌ nû̌û, “Běcǎ, sû̌ǐ bǎ pa ta̤kwisaba pwǐ Jowǎ̤ni̤ sû̌ǐ bǎ akhophijaû̌ toǒnu.”

2Ye̤shǔ hî̌ asî yǎ, “Bǎ sî kwisaba akhanu, kwi lǒkho pwǐhè̌o nî̌꤮.

‘Kǒ꤮ pha꤮ kò bè̌dû̌bè̌yǒ bè̌dubè̌na̤ tû̌ta nami̤ cahtǐ htǒo nî̌꤮. Na hè ma̤ tû̌ta nashinaga hǎkhû̌bǎo nî̌꤮.

3Ǐlò̤pû pa la̤ǎla̤o htě pa lo̤bǎ yǎ khò̌ti̤ni̤ aya toǒ nî̌꤮.

4Bòlû̌pû pa ta̤sǔ toǒ nî̌꤮. Ma̤tè̤hî̌dě pa bòlû̌hto kò ta̤ma̤sǔ htě kò ma̤sǔ panu toǒ hǒ. Nocû̌nṳ ma̤ pa dě ta̤htû̌sǒbǎ aphû̌mò̤ aklanu ma̤ nî̌꤮.’”

5Htodě Ye̤shǔ hî̌ akhophijaû̌ toǒ, “Hî̌kû̌nǎ dě sîkla tapwa̤pwa̤nu a dè cû̌ dě a sû̌kho tapwa̤ ahǐ bǎ lṳmṳna̤kha dě a dè cû̌hî̌ nû̌û ta, ‘Sû̌kho ǐlo̤kû̌nǎ he ta namû̌ suma. 6He sû̌kho tapwa̤ a cû̌klè̌ dě a hèto̤kû̌ he dě he la̤ǐǎshǔ yǎ shǎǎshǎo ǒpe dǐcǎ꤮ tò̤ hǒ.’

7“Dě a sû̌kho ǒ dě hǐdǒkû htǒotapwa̤ dè hî̌shǔ yǎta, ‘Ma̤shû̌shǎpe pûma̤ he ma̤. He ma̤měkè hetakha hǒ, he ta hephû̌ toǒ pa hǎmoǒbò hǒ. He ihtǒ ǐjòpe na tò̤.’ 8Hǐnudě he hî̌ sî, nǒkò dě akho htǒotapwa̤ ihtǒ ǐpa̤ nû̌û mû̌, pwǎ̤tadě asî mo̤ǐ mè̤mè̤̌ nû̌û akhû̌akhî mè̤tò̤. A kwisělě nû̌û akhû̌akhî, a ǐpa̤ nû̌û ta̤ lǒ̤bò htě a lo̤bǎnu toǒ pwǎ.

9“Hǐnu akhû̌akhî he hî̌ sî, kwi lǒkho pû, sî nî̤bǎ pě! Kè̌lǎ lǒkho pû, sî kè̌shǐ pě. To̤glo lǒkho pû takhanu, Cǒmara bòmo bǎ sî pě. 10Ma̤tè̤hî̌dě kòyò lǒ̤꤮ bò htě a kwita̤ toǒnu, a nî̤bǎ pě, dě kòyò lǒ̤꤮ bò htě a kè̌lǎ ta̤ toǒnu, a kè̌shǐ pě, dě kòyò lǒ̤꤮ bò htě a to̤glo takha toǒnu, Cǒmara bòmo bǎ nû̌û pě.

11“Sî htě a htû pha toǒnu, sîphû̌ dè kwiǎ sî tò̤phû̌ dě, sî ǐǎ yǎ wṳ̂ numî̌ a ǒnǒ tapwa̤pwa̤ ya? 12Mè̤tò̤mî̌ sîphû̌ dè kwiǎ sî shîdǐ dě sî ǐǎ yǎ donè̤ ya? 13Sî mî̌ kòyò htě aphû̌mò̤ toǒ hǐnudě sî sî̌ya ǐǎ sîphû̌sîli̤ toǒ ta ta̤htě awǒ toǒ dèhî̌dě, gènè̤kè̌mò̌ lǒkho sîpha dě mǒkhû̌ htǒotapwa̤nu, a ǐ te̤mǎ mè̤mè̤̌ kòyò htě a kwihtò̌ nû̌û Běcǎ sǎcahtǐ htǒonu pě.”

Ye̤shǔ ta Belǎsebulǎ

(Matěo 12:22-30; Mǎ̤riko 3:20-27)

14Ye̤shǔ wṳ̂hǎhtò̌kè khînǎ htě a ma̤pè̌ kònu tado. Bǎ khînǎ hǎhtò̌cû̌htokè akhanu, kòyòmakhû pè̌nu tapwa̤ hî̌bǎjò gesǒ dě kòyò saprṳ̂ toǒ sû̌pi̤sò̌pi̤ mè̤mè̤̌. 15Pwǎ̤tadě kòyò toǒǒ dě a hî̌, “A wṳ̂hǎhtò̌jòkè khînǎkhîno toǒ pwǐhè̌o numî̌ mî̌pwǎ khînǎ hǐkǒdû̌ Belǎsebulǎ ǐ pwǎnû̌û ta̤sîrîshû̌sho.” ^a 16Kòyò ahǔwa̤ toǒ hèkwikhǒkwiwa̤ Ye̤shǔ ta a glè dǔlṳbǎ asî ta̤cǒklî̌kî̌ya htě a ǒ dě mǒkhû̌ hè tacǎ. ^b

17Pwǎ̤tadě Běcǎ Ye̤shǔ sî̌ya asî ta̤gènè̤ toǒ dě a hî̌ asî, “Gataga akûnu akòyò toǒ dèshědèpe̤ kè̌khînû̌û tapwa̤ ta tapwa̤ dèhî̌dě a nûpò̌nûshîkè pě. Hǐphû̌phòphû̌ tṳgumṳ dě akla kè̌khînû̌û tò̤ dě a dèto̤klî̌ kè̌khînû̌û hî̌nu, a nûpò̌nûshîbò nû̌û pě. 18Hǐnu akhû̌akhî, khînǎmo̤pha hǐkǒdû̌ dè shěpe̤sǒtû̌mò̌ ana̤ dě ashiaga toǒnu, a ǒměǒglojò tò̤. Ma̤tè̤ he hî̌ pwǐhè̌o hî̌numî̌, sî hî̌ ta he wṳ̂hǎhtò̌kè khînǎ toǒ numî̌ mî̌pwǎ Belǎsebulǎ ǐ he ta̤shû̌ta̤sho akhû̌akhî pwǎ, sî hî̌ lǒkho hǐnu. 19He dè wṳ̂hǎhtò̌kè khînǎkhîno ta Belǎsebulǎ a ta̤shû̌ta̤sho hî̌dě, sî khophijaû̌ toǒ wṳ̂hǎhtò̌kè khînǎtoǒ ta ûpè a ta̤po̤ta̤phǎ pè? Sî hî̌bǎ htǒo asǔ pwǎnu, sî khophijaû̌ toǒ cèrò sî pě. 20Pò̤̌ta, he dè wṳ̂hǎhtò̌kè khînǎkhîno htǒotoǒ ta Cǒmara a ta̤po̤ta̤phǎ dèhî̌dě htǒonumî̌ a yṳ̂lṳ ta Cǒmara glè hè pǒshipǒga htǒonu a hèto̤ dě sî ǒ hǒ.

21“Bǎ kòyò khû̌ǎshû̌sho tapwa̤ ǒpṳ̂̌ ta a ta̤wè̌ta̤htò dě a ǒpo̤ǐ ahǐ akhanu, a ta̤kî̌ta̤kû̌ toǒ hǎmǎjò tò̤. 22Pwǎ̤ta, bǎ kòyò khû̌ǎshû̌shokhlo ta a tapwa̤ hèshěpè̤kè nû̌û akhanu, a glè phî̌sigwikèbò nû̌û ta̤wè̌ta̤htò htě a nǎla̤ǐ htǒotoǒ dě a ta̤kî̌ta̤kû̌ htǒotoǒnu, a ǐpa̤bò nû̌ûta akho toǒ pě.

23“Kòyò tapwa̤pwa̤ htě a ǒpo̤ǐ he tò̤ numî̌, mî̌pwǎ kòyò htě a htè̌shǔ he hǒ. Kòyò tapwa̤pwa̤ dě a htǔplǒ kû̌ he tò̤ numî̌ mî̌pwǎ kòyò htě a ma̤ nûpò̌nûshî ta̤ hǒ. ^c

Khînǎkhîno geginṳ ma̤bǎsǒ kòyò

(Matěo 12:43-45)

24“Bǎ Khînǎkhîno tado hǎhtò̌cû̌htokè dě kòyò tapwa̤ akû akhanu, a hǎhtò̌cû̌ bǎ gûla̤khwe tò̤glò dě a cû̌ kè̌lǎ agûla̤ la̤ǒkǔ pwǎ̤ta a dè kè̌shǐ agûla̤ dǐglò̌꤮ tò̤ hî̌dě, a hî̌lò̤ ana̤, ‘He glè gesǒ hehǐ htě he la̤hǎhtò̌cû̌kè agûla̤nu tama hî̌nî,’ a hî̌ hǐnu. 25Dě bǎ a geto̤sǒ kòyònu tapwa̤ ǒ akhanu, a ge kè̌shǐ ta agûla̤li̤ htǒonu, aplîamṳ̂wǒ a ǒ tònòsho wî̤wǒbò pṳ̂̌꤮ tacǎ. 26Dě a hǎhtò̌cû̌ kaǎnṳpo̤ akho htě a jîkhlo ta anu susǒtado dě asî geginṳ ǒ lǒkho bǎnu. Dě kòyònu tapwa̤ jîkhlo ta a gûla̤li̤nu pě.”

Ta̤howi̤ mè̤na̤cè̌

27Bǎ Ye̤shǔ hî̌bǎhto yo̤sǎ hǐnu akhanu, mamǔ tapwa̤ ǒ kòyò ǒplṳ̂ǒphǎ akla dě a kaǎgucû̌ Ye̤shǔ, “Mamǔ htě a phû̌ǒ ǐ na dě a ǐonû̌ nanu tapwa̤ numî̌ mî̌pwǎ mamǔ htě a nî̤bǎ ta̤howi̤nu hǒ.”

28Pwǎ̤tadě Ye̤shǔ hî̌shǔ yǎ, “Kòyò htě a nî̤bǎ na̤cè̌ ta̤howi̤ numî̌ mî̌pwǎ kòyò htě a gana̤de Cǒmara ale̤ayo̤ dě a jûle̤phî̌yo̤nu toǒ pwǎ.”

Kò kwikè̌ ta̤cǒklî̌ tacǎ

(Matěo 12:38-42; Mǎ̤riko 8:12)

29Bǎ kòyò saprṳ̂ sǔ꤮ sǔ ahèplṳ̂ dě Ye̤shǔ ǒ akhanu, Ye̤shǔ hî̌ asî, “Kòyò wǒtò̤ htǒotuhtu toǒnu. Asî cû̌kwikè̌ tǒ̤ he ta̤ma̤ cǒklî̌kî̌ya tacǎ pwǎ̤ta he glè dǔlṳbǎ pwǎpǒ̤ asî ta̤cǒklî̌ tacǎ htě asǒsǒta pwa̤po̤ Yò̤̌nǎnu pwǎ. ^d 30Pwǐ Yò̤̌nǎ htûhtò̌ ta̤ma̤dòǐ tacǎ ta Ninewi̤wî̤phû̌ toǒ ayanu, kòyòphû̌khû mî̌ hehtǒo a glè ma̤tû̌ ta̤ma̤dòǐ tacǎ ta kòyò khònò̤ tuhtu toǒ aya pě. ^e 31Ta̤cèrò amṳni̤ pě ti̤ni̤nu, ga dě cǔmû tokho akhwǐmo̤shebǎ ihtǒ dǒkû̌ ta kòyò htě a htûpwa̤ khònò̤htǒo tuhtu toǒ pě dě a bè̌ta̤sǔ dě asî htǒotoǒ alo̤ pě, ma̤tè̤hî̌dě ma̤pûhǐ a gana̤debǎ kû̌ Khwǐshòlomo a ta̤sû̌ǐtòwòǐ htě a lǒbe ta ta̤sî̌ta̤jò htǒotoǒ ayanudě, a ǒ gayî̤ ahǔwa̤ taga dě a hè. Dě he hî̌ sî, kòyò htě adû̌khlo ta Khwǐshòlomonu a ǒ bǎo tapwa̤. ^f 32Htû̌꤮ ta̤cèrò amṳni̤ pě ti̤ni̤nu, Ninewi̤wî̤phû̌ toǒ glè ihtǒ bè̌ta̤sǔ dě kòyò khònò̤ htǒotuhtu toǒ alo̤ pě, ma̤tè̤hî̌dě bǎ asî gana̤debǎ Yò̤̌nǎ dǒhtû̌ǐ bǎ asî akhanu, asî yò̤lò̤gesǒ lǒkho asò̌. Dě he hî̌ sî, kòyò htě adû̌khlo ta Yò̤̌nǎnu, a ǒ bǎo tapwa̤. ^g

Na̤klû ata̤lî

(Matěo 5:15, 6:22-23)

33“Kò dǎlîhtò̌ mî̌ dě kò to̤globǐ nû̌û dǐkhò̌꤮ tò̤, dèmè̤tò̤dě kò bè̌ nû̌û dě dòjola̤ dǐkhò̌꤮ tò̤. Ma̤pûhǐ a lî bǎ kòyò htě a hènṳ toǒ aya dě, kò dǎhtò̌ yǎ mî̌kowa̤khû̌. ^h 34Sî mi̤sǎphlǒ toǒ numî̌ asǒsǒta mî̌ko tama ta sî na̤saklû ayanu hǒ. Sî mi̤sǎphlǒ dè lîshěwǒ hî̌dě, sî na̤saklû sapwa̤bò lṳlîtîklî̌ wǒbò pě, pwǎ̤tadě sî mi̤sǎ dè khǐ hî̌dě, sî na̤saklû sapwa̤bò khǐbò pě. 35Ma̤hǐnudě ta̤lî ǒ dě sîkû htǒonu, ma̤pûhǐ a htûpû ta̤khǐta̤lo̤ tò̤nu, ǒsè̌rè̌ lǒkho sîna̤ nî̌꤮. 36Hǐnudě sî na̤klû sapwa̤bò dè lǒbe ta ta̤lî, dě a dè ǒ dě ta̤khǐta̤lo̤ akû tò̤ hî̌nu, a lîrakhabò sîna̤ sapwa̤ sǒsǒta mî̌ko tama lî rakhahtò̌ ta sîyanu pě.”

Ye̤shǔ bè̌ta̤sǔ dě Pharisè̌phû̌ ta pwa̤sû̌ǐ ta̤sû̌ta̤tòwò asara toǒ alo̤

(Matěo 23:1-36; Mǎ̤riko 12:38-40; Lǔka 20:45-47)

37Bǎ Ye̤shǔ hî̌bǎhto akhanu, Pharisè̌phû̌ tapwa̤ kaǎ ǎ nû̌û dî dě a gûcû̌kû̌ nû̌ûhǐ. Asî glè ǎ lǒkho dî dě a cû̌ hǎnòò̌lò̤ lǒkho bǎ dîjowa̤ kòshî̌. 38Ye̤shǔ glè̌ ǎshǎ akhanu, a shǔbò kû̌kò cǔde tò̤ dě Pharisè̌phû̌ htě a kè̌jo nû̌û htǒotapwa̤nu, a sû̌pi̤sò̌pi̤ jò꤮ jî̌ tò̤, ma̤tè̤hî̌dě Yṳ̌daphû̌ ala̤klo ǒ ta bǎ kò ǎ shǎ hǒtò̤nu kò tobǎ shǔbòwǐ cǔde.

39Hǐnu akhû̌akhî Běcǎ Ye̤shǔ hî̌shǔ nû̌û, “Pharisè̌phû̌ sî, sî shǔbòwǒ mè̤mè̤̌ balo̤ ta dîba dě akhlonu tokho hǒ. Pwǎ̤ta sî sò̌phlǒkûnu, a lǒbekè ta ta̤sò̌yṳnî̤dû̌khlo tû̌aya ta ta̤phû̌mò̤shî̌hto sîtoǒ hǒ. 40Kòyò ǒlû̌ǒkhlo sî꤮, Cǒmara bǒlò̤ ta̤ dě akhlonu, akû numî̌ a bǒlò̤lò̤, mè̤tò̤ ya? 41Ta̤htě a ǒ dě sî balo̤kû ta sî dîbakûnu toǒnu, ǐkè yǎta kòyò shuphǔshèwèphû̌nu hî̌mò̌mî̌ ta̤lǒ̤꤮ bò glè mṳ̂plîbò sîya pwǎ.

42“Pharisè̌phû̌ sî꤮, ta̤cèrò bǎ na̤cè̌ sî pě, ma̤tè̤hî̌dě sî phî̌ Hedusûmo htě alò̤ta jòrò̤lǎ, Pegana̤lǎ htě alò̤ta phokhǎ ta ta̤sǎta̤pho lǒ̤bò htǒotoǒnudě sî lṳhtò̌ yǎta Cǒmara pû̌shî̌tûpû̌. Pwǎ̤tadě sî kè̌bò̌khû̌kè ta̤cǒta̤tè̤ ta ta̤mo̤ǐ Cǒmara toǒ hǒ. Sî ǐ pû̌shî̌tûpû̌ numî̌ amè̤ hǒ. Tǒ̤hǐnu htohotò̤, sî tobǎ bè̌kè ta̤cǒta̤tè̤ ta ta̤mo̤ǐ Cǒmara htǒotoǒ tò̤. ⁱ

43“Pharisè̌phû̌ sî꤮, ta̤cèrò bǎ na̤cè̌ sî pě, ma̤tè̤hî̌dě sî sò̌yṳ hǎnòò̌lò̤ lǒkho gûla̤htò̌yî̤ htě kò bè̌dubè̌na̤ yǎ dě ta̤sabahǐkûnu toǒ, htohǒtò̤ dě klè̌kû nubǎbǎ sî sò̌yṳ nohî̌bǎ bè̌duna̤ kò ta sîna̤.

44“Ta̤cèrò bǎ na̤cè̌ sî pě, ma̤tè̤hî̌dě sî sǒsǒta lṳkû htě kò ma̤dòǐ nû̌û tò̤ toǒ, dě kòyò toǒ cû̌ nû̌ûkhû̌ pwǎ̤ta kò sî̌ya nû̌ûta lṳkû tò̤.”

45Pwa̤sû̌ǐ ta̤sû̌ta̤tòwò asara tapwa̤ hî̌ Běcǎ, “Sara꤮, na hî̌ yo̤sǎ htǒotûmû numî̌ na hî̌ phû̌mò̤shî̌hto takǎkǎ pwǎ pa lè.”

46Dě Ye̤shǔ hî̌shǔ yǎ, “Pwa̤sû̌ǐ ta̤sû̌ta̤tòwò asara sî꤮, ta̤cèrò bǎ mè̤mè̤̌ sî pě, ma̤tè̤hî̌dě sî bè̌htò̌ ta̤mǎlò̤ dě kòlo̤ htě alò̤ta ta̤ò̌ dě kòò̌bò̌ yǎtò̤ toǒ, pò̤̌ta sî dě, sî jojè kû̌kò ta̤ò̌ htǒo toǒ ayanu, sî glè johtò̌jèkû̌ pwǎ ta sî cǔmṳ tama pwǎnu, sî hè tè̌bǎ tò̤.

47“Sî bǎbǎ, Cǒmara cèrò mè̤mè̤̌ sî pě, ma̤tè̤hî̌dě sî bǒ bǎ pwa̤po̤ htě sîphisîphu ma̤si asî dě꤮ wǐkhanu toǒ a lṳkû ta lo̤nu. 48Hǐnudě sî dǔlṳ lîtîklî̌ sîna̤ ta sî sò̌phlǒ tǒhtu dǒnû̌û, sî sò̌phlǒ sǒsǒta sîphisîphu dě꤮ wǐnu toǒ ma̤ta̤sǔnu toǒ hǒ. Ma̤tèhî̌nu sîphisîphu toǒ dě a ma̤si pwa̤po̤nu toǒ, sî dě sî bǒ bǎ pwa̤po̤nu toǒ alṳkû a ma̤hǐnu. 49Ta̤wi̤ta̤kè̌ htǒotacǎ akhû̌akhî, Cǒmara ǒ ta a ta̤sî̌ta̤jò dě a hî̌, ‘He nohè bǎ asî pwa̤po̤ toǒ, ta pwa̤nophû̌ toǒ pě, dě asî ma̤sikè nû̌ûpě toǒǒ, toǒǒdě asî ma̤jîma̤jû nû̌û pě.’ 50Hǐnu akhû̌akhî, tèhtò̌ bǎ mǒhtûlû̌hǎhtûsa akha, kòyò lǒ̤꤮ bò ata̤sǔ htě a ma̤si pwa̤po̤ toǒnu, Cǒmara cèrò kòyò htǒotuhtu toǒ pě. 51He hî̌ sî꤮, sahtò̌ bǎ Ada aphû̌ ma̤si apṳ Abělè ^j nu to̤hè dě kò ma̤si Sakharǐa bǎ ta̤lṳhtò̌ agûla̤ ta gûla̤cahtǐ aplǎkûnu, Cǒmara cèrò na̤cè̌ sî htǒotuhtu toǒ pě. ^k

52“Pwa̤sû̌ǐ ta̤sû̌ta̤tòwò asara sî꤮, ta̤cèrò bǎ mè̤mè̤̌ sî pě, ma̤tè̤hî̌dě sò̌shî̌ htě kò la̤è̌mo ta̤sî̌ta̤jò ahǐ atakha htǒonu, sî phî̌cû̌kè. Sî nṳtû̌ ta sîna̤ tò̤tò̤, kòyò htě a sò̌yṳ cû̌nṳ toǒ dě sî ma̤dǐdò asî sî.”

53Bǎ Ye̤shǔ hǎhtò̌cû̌htokè asî gûla̤ akhanu, pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒnu, a ma̤tukutakǎ nû̌û dě gwèhtogwèlò̤ plṳ̂ nû̌û yo̤sǎ toǒ. 54Ma̤pûhǐ asî pṳ̂nṳ nû̌û ta̤hî̌bǎsǔ toǒnudě, asî ǒpo̤ gana̤de nû̌û ta̤hî̌bǎ toǒ.