Luke 14

Ye̤shǔ ma̤bǎ kòyòsha tapwa̤

1Bǎ Yṳ̌daphû̌ mṳni̤dǔ bǎ akha ti̤ni̤nu, Ye̤shǔ cû̌ Pharisè̌phû̌ hǐkǒdû̌ tapwa̤ ahǐ. Bǎ a glè ǎshǎ akhanu, kòyò bǎnu toǒ kè̌johǔ nû̌û. 2Dě Ye̤shǔ alo̤mo̤nu kòyò yǒbujushi ǒ tapwa̤. 3Dě Ye̤shǔ gwè pwa̤sû̌ǐ ta̤sû̌ta̤tòwò asara toǒ ta Pharisè̌phû̌ toǒ dě a hî̌ asî, “Dě pa lî̤cahtǐ ta̤sû̌ta̤tòwò akûnu, ma̤bǎ kòyò bǎ Yṳ̌daphû̌ a mṳni̤dǔ akha numî̌ anî̤ ya? Mî̌ anî̤ tò̤ ya?” 4Pwǎ̤ta asî hî̌shǔ nû̌û dǐcǎ꤮ tò̤. Ye̤shǔ dò̌htò̌ acǔde dě kòyò htǒotapwa̤ alo̤ dě a ma̤bǎkè bǎ nû̌û, dě a plûgekè nû̌û.

5Htodě Ye̤shǔ hî̌ asî, “Bǎ Yṳ̌daphû̌ a mṳni̤dǔ bǎ akhanu, sî phû̌khû tapwa̤pwa̤ dèmè̤tò̤dě sî pṳ̂ tadodo dè lò̤te̤ dě shiklokû hî̌nu, sî glè cû̌phî̌htò̌ yǎpě taplǎpa ya? Mî̌ tò̤ ya?” ^a 6Pwǎ̤tadě asî hî̌geshǔ nû̌û dǐcǎ꤮ tò̤.

Ta̤kaǎshǔ shǐtè̤mè̤ ta ta̤shò̌lò̤sò̌

7Bǎ Pharisè̌phû̌ hǐkǒdû̌ htǒotapwa̤ kaǎhèǎ shǐtè̤mè̤ toǒ dî akhanu, a hèwû̌lǎphî̌ lǒkho agûla̤ wǒgutṳ̌. Ye̤shǔ kè̌shǐ asî ma̤hǐnudě a hî̌khǒ bǎ asî ta yo̤sǎkhěkhǒ to̤to̤. 8“Bǎ kò mǎhèǎmǎhèo na dě kòyò tapwa̤pwa̤ a khòmò̤pwè akhanu, wû̌lǎ hǎnòò̌phî̌ ma̤ gûla̤ awǒgutṳ̌ ma̤, ǐshata pěmî̌ kòyò htě a htûdû̌khlo ta nanu, kò mǎhèǎojò hè̌. ^b 9Kò dè mǎhè dǒ yǎ hî̌dě hǐběcǎ glè hî̌ na ta, ‘Ǐhǎnòò̌ pûyǎ na gûla̤ htǒonu ta a nî̌,’ dě bǎnukha pě, na bǎ cû̌hǎnòò̌kè gûla̤ phǔlò̤gutṳ̌ tò̤glò pě dě na sòwò̤kè pě. 10Awǒgutṳ̌mî̌, kò dè mǎhè na hî̌dě cû̌hǎnòò̌ gûla̤ phǔlò̤gutṳ̌nu tò̤glò. Na dè ma̤hǐnu hî̌dě, hǐběcǎ glè hè hî̌ na, ‘Sû̌kho, htò̌hǎnòò̌ dě akhû̌nu tò̤glò,’ dě bǎnukhapě, na mi̤sǎǒ dě kò pṳ̂̌tapwa̤ alo̤mo̤ pě. 11Ma̤tè̤hî̌dě kòyò tapwa̤pwa̤ a bè̌htò̌yî̤ ana̤nu, Cǒmara bè̌phǔlò̤ yǎ pě, dě kòyò tapwa̤pwa̤ a bè̌phǔlò̤ ana̤nu, Cǒmara bè̌htò̌yî̤ yǎ pě. ^c”

12Htodě Ye̤shǔ hî̌lè̌ hǐběcǎ, “Bǎ na ma̤wǒnǎ lṳmṳbǎ shǎǎshǎo akha bǎbǎ, dèmè̤tò̤dě lṳmṳhǎ shǎǎshǎo akhanu bǎbǎ, na sû̌kho toǒ bǎbǎ, napṳnawè̤ toǒ bǎbǎ, nakhlinalè toǒ bǎbǎ, nahǐphòwò̤shî̌ htě a dû̌yò̤htò̌sa toǒnu bǎbǎ, kaǎ ma̤ asî ma̤. Na dè kaǎ ǎ asî hǐnu hî̌dě asî kaǎ ǎ geshǔlè̌ na pě dě sî ma̤dû̌ma̤kǎ ǐ pwǎ nû̌û. 13Pwǎ̤tadě bǎ na ma̤pwè akhanu, ma̤wǒnǎ shǎǎshǎo dě kaǎ kòyò htě a shèwèphû̌nu toǒ, kòyòtṳ̂rṳ̂nu toǒ, kòyò khò̌lopo̤děnu toǒ ta kòyò mi̤sǎkhǐnu toǒ nî̌꤮. 14Dě na dè kaǎ ǎ kòyò hǐnu toǒ hî̌nu, na nî̤bǎ ta̤howi̤ pě, ma̤tè̤hî̌dě asî kaǎ ǎ geshǔbò̌ na dǐcǎ꤮ tò̤. Bǎ kòyòcǒtè̤ toǒ htûpwa̤gesǒ ta ta̤si akha pěnu, Cǒmara ǐge na ta̤bwǐta̤sîrî pě.”

Ta̤dǒnè khěkhǒ ta ta̤ǎopwèdû̌

(Matěo 22:1-10)

15Kòyò hǎnòò̌ kû̌ ta Ye̤shǔ bǎ la̤ǎ dîjowa̤kòshî̌nu toǒ akla tapwa̤nu, a gana̤de ta̤hî̌bǎhtǒo dě a hî̌ Ye̤shǔ, “Kòyò htě a hǎnòò̌ ǎobǎ dě Cǒmara ashiaga pě toǒnu, a nî̤bǎ mè̤mè̤̌ ta̤howi̤ pě!”

16Dě Ye̤shǔ hî̌ yǎ, “Bǎtaplǎ, kòyò tapwa̤ ma̤dû̌pwè dě a bǔǎbǔo kò, dě a mǎhèǎhèo plṳ̂ kòyò. 17Dě ta̤ǎopwè akhîakha hèto̤hǒ akhanu, a nocû̌pwe̤ǐ ajûphû̌ tapwa̤ ta kòyò htě a mǎhèǎhèo nû̌ûnu toǒ, dě a jûphû̌ cû̌ hî̌, ‘Hèǎhèo lǒkho mò̌ bǎo, kò ma̤wǒnǎbò hǒ.’

18“Pò̤̌ta tapwa̤ tacǎcǎ꤮ a hî̌htohî̌lò̤bò ta aǒko tò̤. Awǐgutṳ̌ tapwa̤mî̌ a hî̌ ajûphû̌ htǒonu ta, ‘He pwî̤ hǔkla ta̤la̤ dě he tobǎ cû̌kè̌ǐ yǎ. Dě khòsò̌do ǐpû he nî̌꤮.’

19“Ahǔwa̤ tapwa̤ hî̌, ‘He pwî̤ pṳ̂ yè̤̌lo̤ dě he tobǎ cû̌ noǎkè̌bǎ yǎ khònò̤. Dě khòsò̌do ǐpû he nî̌꤮.’

20“Ahǔwa̤tapwa̤ dě a hî̌lè̌, ‘He khòmò̤htosa mǒ̤pepwǎ dě he hèbò̌ tò̤.’

21“Jûphû̌ htǒotapwa̤ gesǒ dě a gepwe̤ǐ aběcǎ ta ta̤wi̤ta̤kè̌ lǒ̤꤮ bò htǒotoǒ. Dě hǐběcǎ htǒotapwa̤ sò̌phlǒdû̌ dě a hî̌ ajûphû̌, ‘Hǎhtò̌cû̌ phwèphwè klè̌dû̌kûnu ta klè̌phû̌nu toǒ akû, dě kaǎge lǒkho kòyò shuphǔshèwèphû̌, kòyòtṳ̂rṳ̂, kòyò mi̤sǎkhǐ ta kòyò khò̌lopo̤děnu toǒ nî̌꤮.’

22“Ajûphû̌ geto̤sǒ dě a hî̌ aběcǎ, ‘Běcǎ he cû̌ma̤htobò pwǐ na hî̌lò̤ nayo̤nu toǒ hǒ, pwǎ̤ta gûla̤ ǒcû̌dǎpe toǒ.’

23“Hǐnu akhû̌akhî, ana̤běcǎ hî̌ jûphû̌, ‘Cû̌ lè̌ dophû̌shǒphû̌nu toǒ akû dě nohè ǒbebò yǎdě he hǐkûbǎo. 24He hî̌ sî, kòyò htě he mǎhè yǎ toǒnu, a hè ǎbǎ kû̌ he ta̤ǎopwèdû̌htǒo dǐpwǎ̤꤮ tò̤!’”

Htû akhophijaû̌ tapwa̤ akhû̌akǎ

(Matěo 10:37-38)

25Ti̤ni̤ akhanu, kòyò gûcû̌plṳ̂ kû̌ Ye̤shǔ dě a htû̌tiwǐ kè̌tîkhî asî dě a hî̌, 26“Kòyò htě a sò̌yṳ htû he khophijaû̌ tapwa̤pwa̤nu, amo̤apha bǎbǎ, aphû̌ama bǎbǎ, apṳawè̤ ta asana̤nu tû̌ bǎbǎ, a dè mo̤ǐkhlo nû̌ûta a mo̤ǐ he hî̌numî̌ a htûhtò̌jò he khophijaû̌ tò̤. ^d 27Ûpèpè̌ bǎbǎ aò̌ tûû̌ a nò̌dòhtǔ tò̤tò̤, agû hekò tò̤tò̤ dèhî̌mî̌ ahtûjò he khophijaû̌ tò̤. ^e

28“Hî̌kû̌nǎ, dě sîkla tapwa̤pwa̤nu, a dè gènè̤nǎ ta a glè bǒhtò̌ hǐhtò̌yî̤ tama dèhî̌dě, a hǎbò pwî̌꤮ tè pěnu a bǎ hǎnòò̌ dǒkè̌ wǐ. To̤htû̌ a ma̤htoma̤phlǔbò hǐ htǐnutama numî̌, awû shûpě ya mî̌ a shûtò̤ yanu a bǎ sî̌ya wǐ. 29A dè ma̤wǐ hǐnutò̤, dě a dè bǒhtò̌wǐ ahǐ kòkho, dě a dè ma̤htò̌htophlǔbò̌ ahǐ htǒonu tò̤ hî̌nu, kòyò lǒ̤꤮ bò htě a kè̌shǐ ta a ma̤jèrè̤̌jòrò̤kè ahǐ htǒotoǒnu, a luya̤bò nû̌û pě. 30Asî glè hî̌ lǒkho ta, ‘Kòyò htǒotapwa̤ ma̤htò̌ tû̌ ahǐ dě a ma̤htoma̤phlǔbò̌ nû̌û tò̤ lè.’

31“Dèmè̤tò̤dě, hî̌kû̌nǎ, Khwǐ tapwa̤ dè hǎhtò̌cû̌ kû̌ta akliphû̌ apwa̤ tòsò̌, dě a glè cû̌shěshǔ ta Khwǐ ahǔwa̤tapwa̤ htě a ǒ ta akliphû̌ apwa̤ ginǐ̤sò̌ tapwa̤nu, a dè shěshǔ ta Khwǐ htǒotapwa̤ numî̌, a pè̤pě ya, mî̌ apè̤tò̤ yanu, a bǎ hǎnòò̌ gènè̤ kè̌ kû̌nǎ. 32A dè wǒpè̤ tò̤ dèhî̌dě, bǎ a ǒyî̤pe nû̌û akhanu, a bǎ nocû̌ wǐ akòyò toǒ dě a bǎ cû̌ hî̌pè̤hî̌dû wǐ. 33Hǐnu akhû̌akhî, ta̤ lǒ̤꤮ bò htě sî ǒǐ toǒnu, sî dè bè̌kè yǎtò̤ dèhî̌dě, sî htûhtò̌jò he khophijaû̌ dǐpwǎ̤꤮ tò̤.

Îsǎ htě ashodopwî̤

(Matěo 5:13; Mǎ̤riko 9:50)

34“Îsǎ numî̌ awǒ pwǎ pò̤̌ta îsǎ dè shuhape tò̤ hî̌nu, kò cû̌ma̤ shuha gejòpe yǎ hî̌tè? 35Îsǎ htě ashuhape tò̤nu, hǎkhû̌ aya bǎbǎ, sǒmṳ la̤nî̤khû̌nî̤ǎ aya bǎbǎ, abwǐasîrî ǒpe dǐcǎ꤮ tò̤. Dě kò wîkè pwǎ yǎ.”

“Kòyò htě a ǒ ta anò̌ku toǒnu, nogana̤de lǒkho asî.”