Luke 15

Sophû̌ htě a hǎmǎ tado

(Matěo 18:12-14)

1Bǎtaplǎ pwa̤kwi ta̤kûta̤cî̌ toǒ ta ta̤ma̤sǔphû̌ toǒ hè ǒplǒ te̤we̤ gana̤de lǒkho Ye̤shǔ a ta̤dǒhtû̌ǐ toǒ. ^a 2Pharisè̌phû̌ toǒ ta pwa̤sû̌ǐ ta̤sû̌ta̤tòwò asara toǒ tṳ̂mṳ̂ta̤ma̤ ǐbò Ye̤shǔ yo̤ ta, “Kòyò htǒotapwa̤ kaǎshǔ ta̤ma̤sǔphû̌ toǒ, dě a cû̌ ǎhtudǒkû̌ ta asî lè.”

3Hǐnu akhû̌akhî, Ye̤shǔ hî̌ bǎ asî ta yo̤sǎkhěkhǒ to̤to̤ dě a hî̌, 4“Hî̌kû̌nǎ kòyò tapwa̤pwa̤ dě sîklanu, asophû̌ ǒ ado ta̤ya̤ dě a dè hǎmǎkè bǎ nû̌û tado hî̌nu, a glè ma̤hî̌tè? A glè bè̌kè sophû̌ lǐ̤sǒtishi ta lǐ̤sǒ tado htǒonu ashǎǎkhû̌ dě a cû̌kè̌lǎ nû̌û hǎmǎ htǒotado htû̌ a kè̌shǐgesǒ nû̌ûpě mè̤tò̤ ya? 5Bǎ a kè̌shǐgesǒ nû̌û akhanu, a glè sò̌le̤sò̌lò̤ dě a bǎ dò̌htò̌ nû̌û dě aplekhû̌ pě, 6Dě a ò̌ge tû̌ nû̌û hǐ pě. Dě a glè mǎhè plǒhtu a sû̌kho ta ahǐphòkòshî̌ toǒ dě a glè hî̌ asî, ‘He kè̌shǐ gesǒ he sophû̌ htě a hǎmǎ htǒonu tado hǒ, dě he sò̌le̤sò̌lò̤ na̤cè̌, hè sò̌le̤sò̌lò̤plǒkû̌ lǒkho ta he.’ 7A sǒsǒ ta hǐnuhǒ, he hî̌ sî, kòjò lǐ̤sǒtishi ta lǐ̤sǒtapwa̤ htě alo̤bǎ yò̤lò̤ge kû̌kò sò̌ tò̤ htǒotoǒnu, Cǒmara ta mǒkhû̌tanaphû̌ ǒ dě mǒkhû̌ htǒonu a sò̌le̤sò̌lò̤khlo ta kòyò ta̤ma̤sǔphû̌ yò̤lò̤gesǒ asò̌nu tapwa̤.

Wûyî̌ htě a hǎmǎ tabǎ

8“Tò̤mî̌ta, hî̌kû̌nǎ mamǔ tapwa̤ htě awûyî̌ ǒ abǎshǐ dě a dè hǎmǎkè bǎ nû̌û tabǎ hî̌numî̌ a glè ma̤hî̌tè? A glè dǎlî mî̌, htodě a dûbòplî ahǐ, dě a kè̌lǎ to̤htû̌ a kè̌shǐnu amè̤tò̤ya. 9Bǎ a kè̌shǐ gesǒ akhanu, a glè mǎhèplǒ a sû̌kho ta ahǐphòkòshî̌ toǒ dě a glè pwe̤ǐlṳ asî, ‘He kè̌shǐ gesǒ hewûyî̌ htě a hǎmǎkè htǒotabǎ akhû̌akhî, he sò̌le̤sò̌lò̤ na̤cè̌ dě hè sò̌le̤sò̌lò̤ plǒkû̌ lǒkho ta he.’ 10Hǐnudě, he hî̌ sî꤮, ta̤ma̤sǔphû̌ tapwa̤ yò̤lò̤gesǒ asò̌ akhû̌akhî, Cǒmara a mǒkhû̌tanaphû̌ toǒ sò̌le̤sò̌lò̤ mè̤mè̤̌.”

Phû̌khû htě a hǎmǎ tapwa̤

11Ye̤shǔ hî̌po̤, bǎtaplǎ kòyò ǒtapwa̤, a phû̌makhû ǒ sò̌gini̤. 12Apṳ tapwa̤ ge hî̌ apha, pha꤮, û̌cata̤bî̌ htě he tobǎ nî̤bǎ yǎ toǒnu, ǐmò̌ he khònò̤. Hǐnu akhû̌akhî, apha mèpa̤kè bǎ aphû̌ htǒosò̌gini̤ û̌cata̤bî̌ htǒotoǒ.

13Ǒyî̤hǒtò̤ dě apṳ htǒotapwa̤nu, a phî̌nṳbò a û̌cata̤bî̌ lǒ̤꤮ bò htě apha ǐ nû̌û htǒotoǒ dě a hǎhtò̌cû̌kè gayî̤ taga. Dě a cû̌ ma̤bònòdû̌kè awû ta a ta̤ǎmṳopǒ, ata̤lṳ̂ mamǔsèmè̤ toǒ. 14Bǎ a ma̤bòkè awûhta htě a ǒǐ toǒ akhanu, ta̤hǒwi̤shèwè ǒhtò̌ dě ga bǎnutaga akû, dě a taǒpe dǐcǎ꤮ tò̤. 15Hǐnu akhû̌akhî, a cû̌kwi ma̤kû̌ ta̤ma̤ bǎ shiphû̌gaphû̌ bǎnu tapwa̤ a ǒ dě a nocû̌kè̌ǐ nû̌û htǒ dě a shǎǎkhû̌ tò̤glò. 16Htǒotaplǎdě a lòdǒ sǎǎsò̌o dě a sò̌yṳ ǎkû̌ jî̌꤮ le sîbîsǎ htě htǒ ǎ htǒotoǒnu pwǎ̤ta kò ǐǎpa̤ nû̌û la̤ǎ dǐpwǎ̤꤮ tò̤.

17Děnǒkònu, a sî̌yalò̤ tû̌ ana̤ dě a hî̌, lǒ̤꤮ bò pwa̤ma̤ta̤ dě hepha ahǐkûnu toǒmî̌, a ǎkǒobebò lǒkho, htohǒtò̤ a ǒlǒǒkè plṳ̂phǎ nò kǎlè, he dě he glè cû̌ǒti̤wi̤ sikè bǎo hǒ. 18He to ihtǒ gesǒ dě hepha ǒ dě he tobǎ ge hî̌ hepha ta, “Pha꤮, he ma̤sǔkè Cǒmara ta na hǒ. 19Kò glè kaǎ he ta na phû̌makhû tapwa̤nu a gwape tò̤ hǒ. Bè̌ he pwǐ na pwa̤ma̤ta̤ htě a hèdòkǎǎ akla htǒonu tapwa̤ pwǎ.” 20Hǐnudě a ihtǒ gesǒ dě apha ǒ.

Bǎ apha kè̌shǐcû̌tûcû a phû̌makhû ǒ dě ayî̤ge akhanu, a gwèbǎǐ mè̤mè̤̌ nû̌û dě a khlè̌cû̌ phǒměgomo̤ tû̌ aphû̌.

21Aphû̌makhû hî̌shǔ nû̌û, pha꤮, he ma̤sǔkè Cǒmara ta na hǒ, kò glè kaǎ he ta naphû̌khû tapwa̤nu꤮ a gwape tò̤ hǒ.

22Pwǎ̤ta apha hî̌ ajûphû̌ toǒ, ma̤phwèphwè, phî̌hè hǐdopo̤to̤ htě awî̤gutṳ̌nu tṳpṳ, dě sǒhtò̌ bǎ lǒkho yǎ htǒo, tûplû̌nṳ bǎyǎ cǔtûplû̌ tama dě a cǔplo̤kûnu, dě ǐdò̌ yǎ khò̌phěnu. 23Htodě cû̌cǐhè pṳ̂phû̌ htě a bû̌gutṳ̌nu tado dě ma̤si yǎnu. Pa ma̤pwèma̤lû, dě lò̤we̤ǎlò̤we̤o plǒbò nû̌û hò̌꤮. 24Ma̤tè̤hî̌dě a mî̌ asǒsǒta hephû̌khû htě a sihto tapwa̤, dě a htûpwa̤gesǒ khò̌ti̤ni̤ tapwa̤nu hǒ. A mî̌ asǒsǒta hephû̌khû htě a hǎmǎ dě kè̌shǐgesǒ yǎ khò̌ti̤ni̤ tapwa̤nu hǒ. Hǐnudě asî sahtò̌ ma̤lûma̤pwè ǎo plǒbò nû̌û.

25Bǎnukha a phû̌makhû htě adû̌nu tapwa̤ ǒ dě hǔklakhû̌. Dě bǎ a gephǔ ta hǐ akhanu, a gana̤de kòyò dǒhtodǒmo̤ dě pe̤kalî̌ pi̤ti̤pṳ̂tṳ̂ dě hǐ. 26Hǐnudě a kaǎhè jûphû̌ akla tapwa̤ a ǒ dě a gwè nû̌û, mî̌ma̤tè̤dě kò cû̌ma̤ pi̤ti̤pṳ̂tṳ̂bò hǐnu ma̤tè? 27Dě ajû hî̌shǔ nû̌û, na pṳmakhû geto̤mo̤ geto̤wǒsǒ dě hǐ akhû̌akhî, napha ma̤si bǎ yǎ pṳ̂phû̌ htě pa bǔǐbû̌gutṳ̌ yǎnu tado nǔ꤮.

28Htǒotaplǎdě a wè̤makhûdû̌ htǒotapwa̤ sò̌phlǒdû̌ dě a geginṳpe dě hǐkû tò̤. Dě apha hǎhtò̌ lèginṳ nû̌û dě hǐdǒkû. 29Pwǎ̤ta a hî̌shǔ apha, pha꤮ na kè̌mò̌, heǎhewè̤ bǎ na pwǐ jû tapwa̤nu ta aněně alalakû hǒ, hehtè̌hecòwòshǔnǒ nayo̤ dǐmû̌꤮ tò̤. Na ǐbǎnǒ he mî̌titè? Ma̤pûhǐ he ma̤pwè, he ǎplǒoplǒ kû̌ta he sû̌kho toǒ ayanu, pè̤phû̌ tado꤮ pwǎnu na ǐnǒ he dǐkhò̌꤮ tò̤. 30Pwǎ̤ta bǎ naphû̌khû htǒotapwa̤ cû̌ ma̤bò nòdû̌ na û̌cata̤bî̌, cû̌lṳ̂ mamǔsèmè̤ geto̤sǒ dě, na ma̤si bǎ yǎ pṳ̂phû̌ htě pa bǔǐbû̌gutṳ̌ yǎnu tado.

31“Dě apha hî̌shǔ nû̌û, ‘Phû̌khû, na ǒ he khò̌lopo̤kòshî̌ pṳ̂̌꤮ plǎ dě he ta lǒ̤꤮ bò toǒ numî̌ natabò hǒ. 32Pwǎ̤ta na pṳmakhû htǒonu asǒsǒta a sihto dě khònò̤ a htûpwa̤gesǒnu hǒ, asǒsǒta a hǎmǎ dě kè̌shǐ gesǒ yǎ htǒonu akhû̌akhî, pa tobǎ ma̤pwèma̤lû ǐyǎ, dě pa to sò̌le̤sò̌lò̤ ǎplǒoplǒ yǎ kò̌.’”