Luke 19

Ye̤shǔ ta Sakhè̌ǔ

1Bǎ Ye̤shǔ nṳcû̌tûlû̌ Yerikhò̌wî̤kû akhanu, 2Kòyò htû pwa̤kû ta̤kûta̤cî̌ hǐkǒdû̌ htě ami̤ ta Sakhè̌ǔ ǒ tapwa̤, dě a dû̌yò̤htò̌sa mè̤mè̤̌. 3Ye̤shǔ mî̌ ûpènu a sò̌yṳ kè̌shǐ dǒ pwǎ̤tadě aphǔtǔ tû̌aya, htodě kòyò ǒplṳ̂ǒphǎshû̌ akhû̌akhî, a kè̌shǐhtû̌ kû̌kò Ye̤shǔ tò̤. 4Hǐnu akhû̌akhî, ma̤pûhǐ a kè̌shǐhtû̌ kû̌kò Ye̤shǔnu, a khlè̌cû̌ wǐ dě kòyò saprṳ̂ alo̤mo̤ bǎ Ye̤shǔ la̤cû̌ sělěhè klè̌ htǒonu tabo dě a cû̌htò̌ dǐshimṳ tṳmṳ alo̤.

5Bǎ Ye̤shǔ hèto̤ nû̌ûkòshî̌ akhanu, a kè̌htò̌ nû̌û dě a hî̌ nû̌û, “Sakhè̌ǔ, hǎte̤phwè mò̌, ma̤tè̤hî̌dě khò̌ti̤ni̤ pěnu, he bǎ cû̌ǒlè kû̌ nahǐ pě.” 6Sakhè̌ǔ hǎte̤phwè dě a sò̌le̤sò̌lò̤ kaǎshǔ Ye̤shǔ.

7Kòyò lǒ̤꤮ bò htě a kè̌shǐ Ye̤shǔ cû̌ dě Sakhè̌ǔ ahǐ toǒnu, a tṳ̂mṳ̂ta̤ma̤bò lǒkho dě ahî̌, “Kòyò htǒotapwa̤ cû̌ǒlè tǒ̤kû̌ ta ta̤ma̤sǔphû̌ ahǐ.”

8Sakhè̌ǔ ihtǒ dě a hî̌ Běcǎ, “Běcǎ, kè̌mò̌, khònò̤htǒo he û̌cata̤bî̌ htě a ǒ ta he takamanu, he glè ǐlò̤kè yǎta kòyò shuphǔshèwè toǒ. Htohǒtò̤ he dè ǎtṳobò̌ kòkhû̌ dèhî̌dě, he ǐgesǒ yǎ pě lǐ̤lè̌.”

9Dě Ye̤shǔ hî̌ yǎ, “Khò̌ti̤ni̤, ta̤htè̌ge hèto̤ dě hǐhtǒo tama akûhǒ ma̤tè̤hî̌dě kòyò htǒotapwa̤ mî̌ Abraham akhlialè hǒ. 10Ma̤tè̤hî̌dě kòyòphû̌khû mî̌ hehtǒo, he hè kè̌lǎ ma̤lû̌htò̌ge kòyò htě a hǎmǎ toǒ.” ^a

Dǒnè khěkhǒ wûyî̌ mǐnǎ toǒ awi̤akè̌

(Matěo 25:14-30)

11Bǎ kòyò saprṳ̂ gana̤de Ye̤shǔ ta̤hî̌bǎ htǒo akhanu, a hî̌po̤ asî ta yo̤sǎkhěkhǒ tûmû, ma̤tè̤hî̌dě Ye̤shǔ hèto̤phǔ ta Ye̤rǔshèlèwî̤ akhû̌akhî, taplǎpa Cǒmara glè tèhtò̌ pǒǐ shiga, asî gènè̤sǔbò lǒkho hǐnu. 12Hǐnu akhû̌akhî a pwe̤ǐ asî, “Bǎtaplǎ Khwǐ akhlialè ǒ tapwa̤. Ma̤pûhǐ kò bè̌htò̌ nû̌ûta Khwǐ htě aglè htû bǎ kò ta ashiagakû ayanu dě, a tîwî̌tòwò hǎhtò̌cû̌ klè̌ bǎ shiga yî̤ taga. Kò bè̌htò̌hto nû̌û dě a getîkhîsǒ dě aga. 13Bǎ a hǎhtò̌cû̌ hǒtò̤ akhanu, a kaǎplǒ ajûphû̌ pwa̤shǐ, dě a ǐ asî wûyî̌ mǐnǎ ▼

▼Mǐnǎ mî̌ Greek wûyî̌. Mǐnǎ tebě mî̌ agunò̤ ta ni̤ta̤ya̤ ta̤ma̤khû̌kǎ

tapwa̤ tebě, dě a hî̌ asî, ‘Bǎ he ǒtò̤ htǒoakhanu, cû̌ ma̤guma̤khè̌ lǒkho, ma̤phû̌htò̌ lǒkho to̤htû̌ he gesǒ pěnu nî̌,’ a hî̌ asî hǐnu.

14“Pwǎ̤tadě, a shiphû̌gaphû̌ sò̌khěkhû̌khwè nû̌û dě asî nocû̌ pwa̤sû ta̤wi̤ta̤kè̌ tapwa̤ dě Khwǐ ǒ, dě a nohî̌ nû̌û, ‘Kòyò htǒotapwa̤nu, pa sò̌yṳ nohtû yǎ ta pakhwǐ tò̤.’

15“Pwǎ̤tadě Khwǐkhlilè htǒotapwa̤nu, kò nohtû yǎta Khwǐ dě a geto̤ gesǒ. Ma̤pûhǐ asî hè dǔlṳhtò̌ lǒkho ta asî ma̤phû̌htò̌dû̌ to̤ pwî̌꤮ tè ayanudě, a geto̤ dě a kaǎhè ajûphû̌ dě a ǐkè asî wûyî̌ mǐnǎ htǒotoǒ a ǒ.

16“Awǐgutṳ̌ tapwa̤ hè a lo̤mo̤ dě a hî̌ nû̌û, ‘Běcǎ, he noǎ wûyî̌ mǐnǎ htě na ǐkè he htǒotebě akhû̌akhî, he nî̤bǎ dû̌htò̌po̤ aběshǐ hǒ.’

17“Dě a hî̌ nû̌û, ‘Awǒ mè̤mè̤̌! na mî̌ jûphû̌ htě awǒ tapwa̤! Na cǒtè̤ ta he ǐ na ta̤pî̌tî̌phû̌ htǒotoǒ akhû̌akhî, he bǎ nopǒǐ na ta wî̤ awî̤shǐ pě.’

18“Jûphû̌ ginǐ̤pwa̤ tapwa̤ hè a lo̤mo̤ dě a hî̌ nû̌û, ‘Běcǎ, he noǎ wûyî̌ mǐnǎ htě na ǐ he htǒotebě akhû̌akhî, he ma̤phû̌htò̌po̤ wûyî̌ mǐnǎ yè̤̌bě hǒ.’

19“Dě a hî̌ ajûphû̌ htǒotapwa̤, ‘He bǎ nopǒǐ na wî̤ yè̤̌wî̤ pě.’

20“Dě jûphû̌ supwa̤ tapwa̤ hè a lo̤mo̤ dě a hèhî̌ nû̌û, ‘Běcǎ, htǒo lè꤮ na wûyî̌ mǐnǎ htě na ǐ henu. He bǒbǐwǒ yǎ dě hǔgòpwî̌kû. 21He ǐsha nala̤, ma̤tè̤hî̌dě na mî̌ kòyò htě apò̤ mè̤mè̤̌ tapwa̤. Nata mè̤tò̤ toǒnu, na cû̌ phî̌ tû̌yǎ. Htohǒtò̤ na shǒǎnǒ kû̌kò tò̤ dě na cû̌ kǎgeplǒ tû̌ nayanu.’

22“Dě a hî̌ nû̌û, ‘Jûphû̌jîjûphû̌, he cèrò na pwǐ na hî̌bǎhtò̌ ǐ nayo̤ htǒonu toǒ pě. Na sî̌ya ta he mî̌ kòyò htě apò̤ mè̤mè̤̌ tapwa̤, dě heta mè̤tò̤ toǒnu he cû̌phî̌ tû̌yǎ. He shǒǐnǒ kû̌kò tò̤ dě he cû̌kǎge tû̌yǎ yahî̌! 23Hǐnudě mî̌ma̤tè̤dě na cû̌shû̌nṳ he wûyî̌ mǐnǎ htǒo dě kò la̤bè̌plǒ kò la̤bǒ wû hǐdû̌kûnu tò̤ ma̤tè? Na dè ma̤hǐnu hî̌dě, htû̌꤮ he geto̤sǒ pěnu, he nî̤bǎ gesǒ aphû̌phû̌ amo̤mo̤ pěkò̌.’

24“Htodě a hî̌ kòyò ihtǒ ǒ bǎnu toǒ, ‘Phî̌ gesǒ wûyî̌ mǐnǎnu dě ǐkè yǎta kòyò htě awûyî̌ mǐnǎ ǒ aběshǐ htǒonu tapwa̤.’

25“Pwǎ̤tadě asî hî̌shǔ nû̌û, ‘Běcǎ, wûyî̌ mǐnǎ ǒnǎhto tû̌ aběshǐ hǒ.’

26“Dě Khwǐ hî̌shǔ asî, ‘He hî̌ sî, kòyò lǒ̤꤮ bò htě ataǒnǎbònu toǒ bǎbǎ, kò tǐ̤ ǐ dû̌htò̌po̤ yǎ pě, pwǎ̤ta kòyò htě ata ǒtò̤ tapwa̤nu, ata ǒpwǎ tîkî̌phû̌pwǎ bǎbǎ, kò phî̌kèbòpo̤ nû̌ûta pě. ^c 27Htodě, kòyò htě a sò̌khě he dě a sò̌yṳ nohtû he Khwǐ tò̤ toǒnu, kaǎhèbò yǎ bǎo dě ma̤sikèbò asî he lo̤mo̤ bǎonu.’” ^d

Ye̤shǔ hènṳ dě Ye̤rǔshèlèwî̤kû

(Matěo 21:1-11; Mǎ̤riko 11:1-11; Jowǎ̤ni̤ 12:12-19)

28Ye̤shǔ hî̌hto hǐnudě, a htò̌ Ye̤rǔshèlèwî̤ dě a hǎhtò̌cû̌ wǐ akhophijaû̌ lo̤mo̤. 29Bǎ a hèphǔ ta Betaphagedo ta Betanǐdo htě a ǒphǔ ta Olivekholo htǒotado akhanu, Ye̤shǔ nohèwǐ akhophijaû̌ sò̌gini̤. 30Dě a mǎcû̌nṳ asî ta̤hî̌bǎ, “Hènṳwǐ lǒkho do dě lo̤mo̤nu tado, sî hè nṳnṳ ta sî kè̌shǐ tîsî̌phaphû̌ tado htě kò dò̌bǎnǒ yǎ dǐplǎ꤮ hǒtò̤ tado pě. Dě sî kè̌shǐ kò coklomě yǎ pě, dě bòphlǔ a dě cǐge yǎ bǎo nî̌꤮. 31Kòyò tapwa̤pwa̤ dè gwè sî ta, ‘Sî cû̌ bòphlǔkètǒ̤ tîsî̌phaphû̌ pli̤ ma̤tè?’ A dè hî̌dě, ‘Běcǎ lo̤bǎ yǎ,’ hî̌shǔ yǎ hǐnu nî̌꤮.”

32Asî cû̌ dě a kè̌shǐbò pwǐ a hî̌nǎ bǎ asînu toǒ. 33Bǎ asî bòphlǔ tîsî̌phaphû̌ pli̤ akhanu, ana̤běcǎ toǒ hî̌ asî, “Sî cû̌bòphlǔ tǒ̤ tîsî̌phaphû̌pli̤ ma̤tè?”

34Dě asî hî̌shǔ, “Běcǎ lo̤bǎ yǎ.”

35Dě asî cǐgenṳ tîsî̌phaphû̌ htǒonu dě Ye̤shǔ ǒ. Htodě asî dahtò̌ lǒkho hǐdokhlo toǒ dě tîsî̌ wa̤te̤khû̌ dě a nohtò̌dò̌ Ye̤shǔ. 36Bǎ Ye̤shǔ htò̌dò̌ tîsî̌phaphû̌ akhanu, kòyò toǒ dalò̤wǐ lǒkho ahǐdokhlo toǒ dě klè̌dakû.

37Bǎ a hèphǔ ta Ye̤rǔshèlèwî̤, bǎ klè̌ ǒ dě Olivekholokhû̌ htě a gilò̤nṳ dě wî̤kû htǒo akhanu, akhophijaû̌ lǒ̤꤮ bò htě a gûbò nû̌ûnu tṳ̂prṳ̂ sahtò̌ yi̤kǒhtû̌sò̌kò̌koǐbò Cǒmara, ma̤tè̤hî̌dě asî kè̌shǐbò ta̤cǒklî̌kî̌ya toǒ akhû̌akhî, a yi̤kǒ lǒkho hǐnu. 38Asî htû̌sò̌ǐ ta,

“Cǒmara howi̤tû̌ Khwǐ htě a hè ta Běcǎ ami̤akû htǒotapwa̤ nî̌. ^e

Ta̤pè̤ta̤dû ǒkû̌ tû̌ta mǒkhû̌, ta̤sîrîdû̌sîrîhtû ǒkû̌ tû̌ta Cǒmara dě mǒkhû̌ agûla̤htò̌yî̤gutṳ̌ htǒotapwa̤ nî̌꤮!”

39Htodě Pharisè̌phû̌ ǒ dě kòyò saprṳ̂ aklanu toǒ hî̌ Ye̤shǔ, “Sara, pwǎpwǎ noǒkè nakhophijaû̌ htǒotoǒnu, noyi̤kǒpe lǒkho ma̤ asî ma̤.”

40Dě Ye̤shǔ hî̌shǔ asî, “He hî̌ sî, asî dè ǒsî̌tukǔkè hî̌numî̌, lo̤ toǒ yi̤kǒ lè̌ pě.”

Ye̤rǔshèlèwî̤ akhû̌akhî, Ye̤shǔ mi̤sǎshilò̤

41Bǎ a hèphǔ ta Ye̤rǔshèlèwî̤ dě a kè̌shǐ wî̤htǒo akhanu, a mi̤sǎshilò̤. 42Dě a hî̌, “Khò̌ti̤ni̤, na dè sî̌ya nǒca ta kò phî̌hè bǎ na ta̤pè̤ta̤dû hî̌numî̌ awǒ mè̤mè̤̌, pwǎ̤tadě khònò̤htǒo na kè̌shǐjò kû̌kò tò̤. 43Ti̤ni̤ni̤ pěnu, khîkha hèto̤ dě pwa̤sò̌khě na toǒ hè bǒhtò̌ te̤we̤bǐbò na ta wî̤we̤ htò̌yî̤ pě, dě asî hèshě te̤we̤bǐbò naklè̌ pṳ̂̌꤮ tabo pě. 44Htopědě asî ma̤pî̌kèbò na ta kòyò lǒ̤꤮ bò ǒ dě na wî̤kûnu toǒ pě. Lo̤tama pwǎnu a tǒhtuměpe nû̌û pě tò̤, ma̤tè̤hî̌dě Cǒmara hè htè̌ge na ayanu, na bè̌sû̌bè̌sǎ yǎ akhîakha tò̤ akhû̌akhî, a ma̤htûhtò̌ hǐnu pě.”

Ye̤shǔ cû̌nṳ dě ta̤lṳhtò̌hokû

(Matěo 21:12-17; Mǎ̤riko 11:15-19; Jowǎ̤ni̤ 2:13-22)

45Htodě Ye̤shǔ cû̌nṳ ta̤lṳhtò̌hokû dě a cû̌nṳ wṳ̂hǎhtò̌kè kòyò shaǎpwî̤ǎta̤kî̌ta̤kû̌ bǎnu toǒ. 46Dě a hî̌ asî, “Cǒmara ale̤ayo̤ hî̌, ‘Hehǐ mî̌ kò bǎ kaǎ yǎta ta̤saba ahǐ,’ ^f pwǎ̤tadě sî cû̌ nohtûhtò̌bò yǎta ‘Pwa̤ǎhǔǎkě la̤ǒhǔ agûla̤ hǒ ^g.’”

47Ye̤shǔ sû̌ǐtòwòǐlò̤ kò dě ta̤lṳhtò̌hokû pṳ̂̌꤮ ti̤ni̤. Pwa̤tòlûhtò̌ hǐkǒdû̌ toǒ, pwa̤sû̌ǐ ta̤sû̌ta̤tòwò asara toǒ, ta pwa̤htû kòyò saprṳ̂ a hǐkǒdû̌ toǒ sò̌yṳ kè̌lǎma̤si nû̌û. ^h 48Pwǎ̤tadě asî tobǎ ma̤ nû̌û hî̌tènu, a sî̌ya lǒkho aklè̌aklò tò̤, ma̤tè̤hî̌dě kòyò saprṳ̂ toǒnu a gana̤desi gana̤deǒ nû̌û ta̤hî̌bǎ, dě a plûpe nû̌û tò̤.