Luke 3
Pwa̤ploshi Jowǎ̤ni̤ a ta̤dǒhtû̌ǐ
(Matěo 3:1-12; Mǎ̤riko 1:1-8; Jowǎ̤ni̤ 1:19-28)
1Bǎ Khwǐdû̌ Tǐberǐ pǒbehtò̌ta̤ shǐyè̤̌ně akhanu, Pilǎto htûhtò̌ Khwǐdû̌ dě Yṳ̌daga. Dě pwa̤pǒ Galilî̌aga mî̌ Khwǐherǒ dě Khwǐherǒ apṳ Phǐlǐpo mî̌ pwa̤pǒ Iturǐaga ta Trakonǐtiga. Khwǐlisanǐa dě a pǒǐlè̌ Abilè̌ aga. 2Pwa̤tòlûhtò̌ a dû̌khlokò mî̌ Annas ta Kaǐpha. Bǎnuakha Sakharǐa aphû̌khû Jowǎ̤ni̤ ǒ lo̤měshǒkla dě Cǒmara pwe̤ǐlṳ lò̤bǎ ale̤ayo̤ dě Jowǎ̤ni̤ ǒ. 3Hǐnu akhû̌akhî, do ǒphǔ te̤we̤lṳ̂bò bǎ Jòda shilo̤ kòshî̌ toǒnu, Jowǎ̤ni̤ cû̌shido dǒhtû̌ǐ bǎ kò ta yò̤lò̤ge lǒkho sîsò̌ dě plo lǒkho sîna̤ ta shi htodě Cǒmara bòlû̌kè sî ta̤sǔ toǒ pě. 4Pwǐ Cǒmara ale̤ayo̤ khwè̌nǎhto dě pwa̤po̤ Isaǐa a lî̤kûnu, dě a hî̌, a “Kòyò tapwa̤ yi̤kǒhtò̌ lo̤měshǒkla dě a hî̌, ‘Ma̤wǒnǎ lǒkho klè̌ ta Běcǎ aya. Ma̤cǒma̤nò̤ lǒkho Běcǎ la̤hèklè̌ aya tabo nî̌꤮. 5Lo̤to̤kû lǒ̤꤮ bò toǒnu, bǎ sǒbǐbò. Khomǔkholo ta khoplǔkhû̌ lǒ̤꤮ bò toǒ, bǎ ma̤gunò̤ bò. Ma̤nò̤bò klè̌ htě a te̤gwenu toǒ. Bǎ ma̤sî̌bò klè̌ htě a tinitǒnǒ toǒnu. 6Kòyò pṳ̂̌꤮ tapwa̤ kè̌shǐbò Cǒmara wû̌lǎ pwa̤htè̌ge kòyòphû̌khû htǒonu tapwa̤ pě.’” b 7Kòyò toǒ glè hè plo lǒkho ana̤ ta shi dě a hèplṳ̂hèphǎ dě Jowǎ̤ni̤ ǒ. Dě Jowǎ̤ni̤ hî̌ asî, “Wṳ̂sa sî꤮! Mî̌ûpè tapwa̤ ǐsè̌rè̌ sî ta sî lû̌htò̌bò̌ ta Cǒmara a ta̤cèrò htě a hèpě htǒonu pè? c 8Sî dè yò̤lò̤ge mè̤mè̤̌ sî sò̌phlǒ dèhî̌dě dǔlṳ lǒkho sî ta̤ǒhtûpwa̤ toǒ ta sî ǐlò̤ sî sò̌phlǒsǔshi toǒ. Hî̌htohî̌lò̤ pûma̤ sîna̤ ta, ‘Pa mî̌ Abraham akhlialè’ numa̤. He hî̌ sî, Cǒmara ma̤htûhtò̌ lo̤ htǒotoǒ ta Abraham aphû̌ mî̌ a ma̤jò pwǎ. d 9Kû ǒ dě sǒkhòshî̌ tabǎ dě kò gûga sǒmṳ toǒ pě, dě kò cǒtṳto̤ akhò̌wi̤ pě. Sǒmṳ tṳmṳmṳ htě asǎapho wîǎ tò̤nu, kò gûgakè yǎpě dě kò wînṳkè yǎ dě mî̌kla pě.” e 10Dě kòyò saprṳ̂ gwè Jowǎ̤ni̤, “Dè hî̌mò̌ hǐnu pa tobǎ ma̤hî̌tè?” 11Dě a hî̌shǔ asî, “Kòyò htě a hǐdo ǒ ginǐ̤pṳnu bǎ ǐpa̤ yǎta kòyò htě ahǐdo ǒ kû̌kò dǐ꤮ pṳ̌ tò̤nu toǒ. Htodě kòyò htě a la̤ǎla̤o ǒ toǒnu, ǐǎǐopa̤ yǎta kòyò.” 12Pwa̤kwi ta̤kûta̤cî̌ toǒ glè plodǒ lǒkho ana̤ ta shi dě a hè Jowǎ̤ni̤ ǒ dě a hè gwè nû̌û, “Sara, pa tobǎ ma̤hî̌tè?” f 13Dě a hî̌shǔ asî, “Kwi lǒkho ta̤kûta̤cî̌ pwǐ kò nokwi sînu, kwilǒkwikhlo pû ta kò nokwi sînu ma̤.” 14Kliphû̌ toǒ gwèpo̤ nû̌û, “Palè? Pa tobǎ ma̤hî̌tè?” Dě a hî̌shǔ asî, “Bǎ ǎbǐma̤nò kòwûkòhta tò̤. Kè̌bǐkè̌ǒ ma̤ kò dǐ꤮ pwǎ̤ ma̤. Sò̌phlǒto lǒkho ta khû̌kǎ htě sî nî̤bǎ toǒnu.” 15Kòyò saprṳ̂ kè̌shu nǎla̤ǐ dě gènè̤ lǒkho Jowǎ̤ni̤ ta, “Mî̌ Khrî̌stu htě Cǒmara wû̌lǎ yǎ dě a glè hè htè̌ge kòyòhǎkhû̌phû̌ hî̌numî̌ a pwǎkò̌.” 16Hǐnu akhû̌akhî, Jowǎ̤ni̤ hî̌ asî pṳ̂̌꤮ tapwa̤, “He plo sî ta shi, pwǎ̤ta kò htě a sîrîpo̤phǎ shû̌shokhlo ta he tapwa̤nu a hè pě. He bòphlǔ pwǎbǎ yǎ khò̌phěpli̤nu he gwata a tò̤. A hèplo sî ta Běcǎ sǎcahtǐ ta mî̌ pě. ▼▼“Mî̌” amûasǎ mî̌, ta̤cèrò mî̌ amè̤mè̤ ta̤mṳ̂ta̤plî mî̌ amè̤mè̤.
17A htǒonu asǒsǒta kòyò tapwa̤ htě a khǎbò bǔsû̌ ta bǔshò̌nu. Abǔshò̌ toǒnu a geglohtu nû̌dě a phòkû pě, pwǎ̤tadě bǔsû̌ toǒnu a shû̌kè nû̌ûta mî̌ htě a pi̤jòpe dǐkhò̌꤮ tò̤ htǒotûkû akûnu pě.” 18Jowǎ̤ni̤ dǒhtû̌ǐ bǎ kò ta̤sò̌le̤sò̌lò̤ awi̤akè̌ ta aklè̌aklò tacǎtacǎ dě a ǐkhû̌ǐǎ kòyò saprṳ̂nu toǒ. 19Pwǎ̤ta Khwǐherǒ cû̌phî̌ gesǒtû̌ akhi Mo̤herǒdè akhû̌akhî, Jowǎ̤ni̤ hî̌ nû̌û ta a ma̤ta̤ htǒonumî̌ a sǔ. Htohǒtò̤ dě awǐkhanu mî̌ Khwǐherǒ ma̤ ta̤phû̌mò̤shî̌hto toǒ akhû̌akhî, a bè̌po̤ nû̌û ta̤sǔ htǒonu. h 20Tǒ̤htǒonu htohǒtò̤, Khwǐherǒ ma̤ dû̌khlopo̤ ta̤phû̌mò̤shî̌hto tacǎ mî̌ mî̌pwǎ a dǒlò̤te̤ Jowǎ̤ni̤ dě apo̤kû htǒonu hǒ. Jowǎ̤ni̤ plo bǎ Ye̤shǔ shi
(Matěo 3:13-17; Mǎ̤riko 1:9-11)
21Bǎ kòyò saprṳ̂ plohtobò ana̤ ta shi akhanu, Běcǎ Ye̤shǔ plo kû̌ kò shi anǒkò. Bǎ a kwisaba akhanu, mǒkhû̌ bòmo htò̌. 22Htodě Běcǎ sǎcahtǐ sûlû ana̤ pwǐ htû̌li̤cò̌ dě a hèlò̤ǒ nû̌ûlo̤. Bǎnuakha yo̤po̤htò̌ mǒkhû̌ dě a hî̌, “Na mî̌ hephû̌khû htě he mo̤ǐyǎ dě a ma̤mo̤ he sò̌phlǒ tapwa̤.” iYe̤shǔ akhlialè kòshî̌kòtṳ toǒ
(Matěo 1:1-17)
23Bǎ Ye̤shǔ bòhtò̌ sû̌ǐ kò akhanu, a ně phǔbe sushi hǒ. Kò gènè̤tò̤ nû̌û ta Jǒjè aphû̌ pwǎ. Jǒjè mî̌ Helǐ aphû̌, 24Helǐ aphamî̌ Matǎ, Matǎ aphamî̌ Lě̤wǐ, Lě̤wǐ aphamî̌ Malakhǐa, Malakhǐa aphamî̌ Yanè̤, Yanè̤ aphamî̌ Jǒjè. 25Jǒjè aphamî̌ Matatǐa, Matatǐa aphamî̌ Amò̌, Amò̌ aphamî̌ Na̤ho, Na̤ho aphamî̌ Esalǐ, Esalǐ apha mî̌ Na̤gè̌, 26Na̤gè̌ aphamî̌ Maǎta, Maǎta aphamî̌ Matatǐa, Matatǐa aphamî̌ Sheme̤, Sheme̤ aphamî̌ Joshè̌, Joshè̌ aphamî̌ Jodǎ, 27Jodǎ aphamî̌ Joana̤, Joana̤ aphamî̌ Resa, Resa aphamî̌ Serǔbabělè, Serǔbabè̌la aphamî̌ Shelatiělè, Shelatiělè aphamî̌ Ne̤rǐ, 28Ne̤rǐ aphamî̌ Malakhǐa, Malakhǐa aphamî̌ Ǎdi, Ǎdi aphamî̌ Kosama, Kosama aphamî̌ Èlamada, Èlamada aphamî̌ Èra, 29Èra aphamî̌ Jò̌shua, Jò̌shua aphamî̌ Eliěsa, Eliěsa aphamî̌ Jòrima, Jòrima aphamî̌ Matǎ, Matǎ aphamî̌ Lě̤wǐ, 30Lě̤wǐ aphamî̌ Simeo, Simeo aphamî̌ Yṳ̌da, Yṳ̌da aphamî̌ Jǒjè, Jǒjè aphamî̌ Yò̤̌nama, Yò̤̌nama aphamî̌ Elǐakǐma, 31Èlî̌akǐma aphamî̌ Melǐa, Melǐa aphamî̌ Mè̌na, Mè̌na aphamî̌ Mǎtǎta, Mǎtǎta phamî̌ Na̤ta, Na̤ta aphamî̌ Dǎ̤wi̤, 32Dǎ̤wi̤ aphamî̌ Yeshè̌, Yeshè̌ aphamî̌ Ò̌bè̌, Ò̌bè̌ aphamî̌ Bò̌sǎ, Bò̌sǎ aphamî̌ Salomo, Salomo aphamî̌ Na̤shû, 33Na̤shû aphamî̌ Amǐnadǎ, Amǐnadǎ aphamî̌ Adami, Adami aphamî̌ Arani, Arani aphamî̌ Hesaro, Hesaro aphamî̌ Perè̌, Perè̌ aphamî̌ Yṳ̌da. 34Yṳ̌da aphamî̌ Yǎ̤kò, Yǎ̤kò aphamî̌ Isǎko, Isǎko apha mî̌ Abraham, Abraham aphamî̌ Terǎ, Terǎ apha mî̌ Na̤khò, 35Na̤khò aphamî̌ Sherû̌, Sherû̌ aphamî̌ Rakò, Rakò aphamî̌ Pelè̌, Pelè̌ aphamî̌ Èbè̌ra, Èbè̌ra aphamî̌ Shelǎ, 36Shelǎ aphamî̌ Kaî̌no, Kaî̌no aphamî̌ Araphasǎ, Araphasǎ aphamî̌ Shemǎ, Shemǎ aphamî̌ Nǒa, Nǒa aphamî̌ Lamè̌, 37Lamè̌ aphamî̌ Me̤tǔshelǎ, Me̤tǔshelǎ aphamî̌ Ěnò̌, Ěnò̌ aphamî̌ Yarè̌, Yarè̌ aphamî̌ Mahalalě̤lè, Mahalalě̤lè aphamî̌ Kena, 38Kena aphamî̌ Ěnǒ, Ěnǒ aphamî̌ Shetǎ, Shetǎ aphamî̌ Ada mî̌tû̌ Cǒmara aphû̌khûnu tapwa̤ hǒ.
Copyright information for
KxfSCKRC