Luke 9

Ye̤shǔ plûcû̌ pwa̤nophû̌ shǐsò̌gini̤

(Matěo 10:5-15; Mǎ̤riko 6:7-13)

1Ye̤shǔ kaǎhèplǒbò akhophijaû̌ shǐsò̌gini̤ dě ma̤pûhǐ pwa̤nophû̌ htǒotoǒ wṳ̂hǎhtò̌pè̤bò khînǎtoǒ dě a ma̤bǎpè̤bò ta̤shǐta̤sha toǒ ayanu, a ǐ asî ta̤po̤ta̤phǎ ta ta̤sîrîshû̌sho toǒ. 2Htodě a plûcû̌ asî dě a glè cû̌ dǒhtû̌ǐ bǎ kò ta Cǒmara ashiaga, dě a ma̤bǎ bǎ kòshǐkòsha toǒ. 3Ye̤shǔ hî̌ asî, “Sî cû̌klè̌ dě phî̌cû̌nṳ pûma̤ dǐcǎ꤮ ma̤ nî̌꤮, nò̌htǒ bǎbǎ, hû̌khi bǎbǎ, shǎǎ bǎbǎ, wûhta bǎbǎ phî̌nṳ pûma̤. Phî̌cû̌kwèkhlo pûma̤ hǐdo dǐpṳ̌꤮ ma̤. 4Ǒsělě hǐ htě a dǒshuǐ sînu tama akû to̤htû̌ sî hǎhtò̌cû̌kè bǎ wî̤kûnu pěnî̌꤮. 5Kò dè dǒshuǐ sî dǐglò̌꤮ tò̤ hî̌nu, tèdè̌lòte̤kè hǎgûmṳ̂ dě sî khǎlǎlo̤nu toǒ dě hǎhtò̌cû̌kè wî̤nu tî̤wî̤ akû nî̌꤮. Sî dè ma̤hǐnu hî̌mî̌ asǒsǒta sî dǔlṳkè ta̤ma̤dòǐ tacǎ htě Cǒmara glè cèrò asî pěnu hǒ.” ^a 6Pwa̤nophû̌ toǒ hǎhtò̌cû̌ dě a cû̌nṳ tado hto tado dě a cû̌ dǒhtû̌ǐ bǎ kò ta̤sò̌le̤sò̌lò̤ awi̤akè̌, dě a cû̌ ma̤bǎ bǎ kò ta̤shǐta̤sha gûla̤ pṳ̂̌꤮ tò̤glò.

Ye̤shǔ mî̌ ûpènu Khwǐherǒ gènè̤phlo tò̤

(Matěo 14:1-12; Mǎ̤riko 6:14-29)

7Bǎnuakha Galilî̌aga a Khwǐherǒ gana̤de ta Ye̤shǔ ma̤ta̤ htǒotoǒ, dě a shû̌shǎbò nû̌û sò̌phlǒ, ma̤tè̤hî̌dě, kòyò toǒǒ hî̌ ta pwa̤ploshi Jowǎ̤ni̤ sihtûpwa̤gesǒ hǒ. ^b 8Toǒǒdě a hî̌ ta Èlî̌a hèǒlṳhtò̌ gesǒ, toǒǒ dě a hî̌ lè̌ta pwa̤po̤ dě꤮ wǐnu akla tapwa̤pwa̤ htûpwa̤gesǒ hǒ. 9Dě Khwǐherǒ hî̌, “He nope̤tṳkè Jowǎ̤ni̤ ahǐkǒ hǒ dě kòyò htě he gana̤de awi̤akè̌ htǒotapwa̤ numî̌ ûpè?” Dě, “He glè kè̌shǐjò Ye̤shǔ hî̌tètè,” a gènè̤ hǐnu.

Ye̤shǔ bǔǎbǔo kòyò yè̤̌rî̌

(Matěo 14:13-21; Mǎ̤riko 6:30-44; Jowǎ̤ni̤ 6:1-14)

10Pwa̤nophû̌ toǒ gesǒ dě gepwe̤ǐbò Ye̤shǔ ta asî lǒ̤꤮ bò ma̤hto ta̤nu toǒ awi̤akè̌. Ye̤shǔ kaǎnṳ asî dě a hǎhtò̌cû̌ tû̌ lǒkho dě wî̤tî̤wî̤ htě kò kaǎ yǎta Betasè̌dawî̤. 11Bǎ kòyò saprṳ̂ gana̤de Běcǎ Ye̤shǔ ta akhophijaû̌ toǒ cû̌ wî̤nu tî̤wî̤ akha, asî gûcû̌kû̌ lǒkho bǎnu. Ye̤shǔ dǒshuǐ asî dě dǒhtû̌ǐ bǎ asî ta Cǒmara ashiaga awi̤akè̌ dě a ma̤bǎ bǎ kòyò toǒ a ta̤shǐta̤sha.

12Bǎ lṳmṳ glè̌lò̤ akhanu, akhophijaû̌ shǐsò̌gini̤htǒo hè aǒ dě a hèhî̌ nû̌û, “Ma̤pûhǐ asî cû̌ kè̌lǎǎ kè̌lǎo, cû̌kè̌lǎ lǒkho tû̌ asî la̤hǎmoǒ gûla̤gûbò̌ ayanudě, nogekè mò̌ asî dě dophû̌shǒphû̌ htě a ǒ te̤we̤lṳ̂ bǎo tò̤glònu, ma̤tè̤hî̌dě gûla̤ bǎotò̤glòmî̌ do ǒphǔ dǐdǒ꤮ tò̤.”

13Pwǎ̤ta Ye̤shǔ hî̌ asî, “Kè̌ ǐǎǐo asî tacǎcǎnu.”

Dě asî hî̌shǔ, “Pata ǒ pwǎpǒ̤ mû̌ yè̤̌ma ta tò̤phû̌ ginǐ̤plṳ̂ pwǎ. Mî̌ na sò̌yṳ nocû̌pwî̤ pa shǎǎshǎo ta kòyò saprṳ̂ htǒotoǒ aya ya?” 14Dǒcòcè̌pwǎ makhûwè̤pwa̤ htǒotoǒnu a phǔ꤮ ǒtû̌ yè̤̌rî̌.

Dě Ye̤shǔ hî̌lò̤ akhophijaû̌ toǒ, “Kòyò saprṳ̂ htǒotoǒnu, nohǎnòò̌ ǒplǒ asî tṳ̂prṳ̂ mî̌ pwa̤yè̤̌shi, tṳ̂prṳ̂ mî̌ pwa̤yè̤̌shinu.” 15Akhophijaû̌ toǒ nohǎnòò̌ kòyò saprṳ̂ pwǐ a hî̌lò̤ asînu. 16Dě Ye̤shǔ phî̌ mû̌nu yè̤̌ma ta tò̤phû̌nu ginǐ̤bo dě a kè̌htò̌ mǒla̤ dě a hî̌bwǐhî̌sîrîhtò̌ Cǒmara. Htodě a bî̌phò̌ mû̌ ta tò̤phû̌toǒ dě a ǐlò̤ nû̌ûta akhophijaû̌nu toǒ. Dě akhophijaû̌ toǒ yṳ̂ǎlò̤ nû̌ûta kòyò saprṳ̂ htǒotoǒ. 17Asî ǎ pǒǎpǒo ǎkǒobebò pṳ̂̌꤮ tapwa̤ dě akhophijaû̌ toǒ phî̌wǒge mû̌ ta tò̤phû̌ htě a bî̌phò̌ nû̌û dě a ǒkwèkhlo toǒnu, a ǒbepe ta phǒbě shǐginǐ̤phǒbě.

Petru hî̌htò̌ ta Ye̤shǔ mî̌ Khrî̌stu

(Matěo 16:13-19; Mǎ̤riko 8:27-29)

18Ti̤ni̤kha bǎ Ye̤shǔ kwisaba tû̌pwǎ tapwa̤ akhanu, akhophijaû̌ toǒ ǒphǔ nû̌û dě Běcǎ gwè asî, “Kòyò saprṳ̂ toǒ hî̌kwè̌ lǒkho he ta he mî̌ûpè?”

19Dě asî hî̌shǔ, “Toǒǒmî̌ a hî̌ na ta pwa̤ploshi Jowǎ̤ni̤, toǒǒmî̌ a hî̌ ta pwa̤po̤ Èlî̌a, toǒǒmî̌ a hî̌lè̌ ta pwa̤po̤ dě꤮ awǐnu toǒ akla tapwa̤pwa̤ htûpwa̤gesǒ pwǎ,” a hî̌ lǒkho hǐnu. ^c

20Dě Ye̤shǔ gwèshǔlè̌ asî, dě a hî̌ asî, “Sî lè̌꤮ lè, sî hî̌ he ta ûpè?” ^d

Dě Petru hî̌shǔ nû̌û, “Na mî̌ Khrî̌stu htě Cǒmara wû̌lǎ yǎta a glè ma̤lû̌htò̌ge kòyòhǎkhû̌phû̌ htǒotoǒnu tapwa̤ hǒ.”

21Dě Ye̤shǔ mǎnǎ lò̤ti̤kè ayo̤ dě a hî̌ asî ta sî bǎ cû̌ pwe̤ǐlṳ kò dǐpwǎ̤꤮ tò̤ nî̌꤮.

Ye̤shǔ pwe̤ǐlṳ a ta̤khòjîkhòjû awi̤akè̌ ta ata̤si awi̤akè̌

(Matěo 16:20-28; Mǎ̤riko 8:30-9:1)

22Htodě a hî̌po̤ asî, “Kòyòphû̌khû mî̌ hehtǒo, a bǎ khòbǎ plṳ̂ ta̤jîta̤jû pě, dě Yṳ̌daphû̌ aprṳ̂aho hǐkǒdû̌ toǒ ta pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ glè jûhetò̤, a sǒtephekè he pě. Kò ma̤sikè he pě dě suni̤ti̤ni̤ pěnu Cǒmara ma̤htûpwa̤gesǒ he pě.”

23Htodě Ye̤shǔ hî̌shǔ asî pṳ̂̌꤮ tapwa̤, “Kòyò tapwa̤pwa̤ dè sò̌yṳ gû hekò hî̌nu, a tobǎ ma̤ pwǐ he sò̌yṳnoma̤ yǎnu toǒ, jǔ꤮ ama̤ tû̌ asò̌phlǒ mî̌ anî̤ tò̤. A bǎ ò̌htò̌ tû̌ a nò̌dòhtǔ pṳ̂̌꤮ ti̤ni̤ dě a bǎ gû hekò. ^e 24Ma̤tè̤hî̌dě kòyò htě a sò̌yṳ ma̤lû̌htò̌ge tû̌ a ta̤htûpwa̤ tapwa̤pwa̤nu, a ta̤htûpwa̤ glè hǎmǎkè pě. Pwǎ̤ta hekhû̌hekhî, kòyò tapwa̤pwa̤ dè ǐlò̤kè a ta̤htûpwa̤ hî̌nu, a nî̤bǎ ta̤htûpwa̤ tûjûpwa̤ pě. ^f 25Kòyò tapwa̤pwa̤ dè nî̤bǎbò hǎkhû̌tebě a ta̤dû̌yò̤htò̌sa toǒ pwǎ̤ta a dè lò̤jûkè a ta̤htûpwa̤ tûjûpwa̤ htǒo hî̌nu abwǐǒ nû̌ûya hî̌tè? 26Kòyò tapwa̤pwa̤ dě a sòwò̤ he ta hele̤heyo̤ htǒotoǒ tapwa̤pwa̤nu, htû̌꤮ kòyòphû̌khû mî̌ hehtǒo hè ta a ta̤sîrîdû̌sîrîhtû ta apha a ta̤sîrîdû̌sîrîhtû ta mǒkhû̌tanaphû̌ cahtǐ toǒ a ta̤sîrîdû̌sîrîhtû pě akhanu, he sòwò̤ lè̌ ala̤ pě. 27He hî̌ mè̤mè̤̌ sî, kòyò htě a ihtǒ ǒbǎ sîklabǎo toǒǒnu, bǎ asî si hǒtò̤kha, asî kè̌shǐbǎ lǒkho Cǒmara hè pǒshipǒga pě.”

Ye̤shǔ na̤klû htû̌lè̌ khǒkè awi̤akè̌

(Matěo 17:1-8; Mǎ̤riko 9:2-8)

28Bǎ Ye̤shǔ hî̌bǎhto pwǐhtǒo a phǔbe ni̤lǐ̤sǒ akhanu, a kaǎnṳ Petru, Jowǎ̤ni̤ ta Jǎgomo̤ dě a cû̌htò̌ kholo tama alo̤ dě Běcǎ Ye̤shǔ glè cû̌kwisaba bǎnu. 29Bǎ a kwisaba akhanu, ami̤sǎ htû̌lè̌htò̌ khǒbò dě a hǐdopo̤to̤ toǒnu abûplò̌kîtrî̌htò̌bò. 30Kòyò hè ǒlṳhtò̌sumṳ bǎnu sò̌gini̤ dě a hî̌bǎ ta Ye̤shǔ. Asî mî̌ Mǒ̤jè ta pwa̤po̤ Èlî̌a. 31Dě a ǒlṳhtò̌ dǒ ta mǒkhû̌ a ta̤sîrîdû̌sîrîhtû toǒ dě a hî̌bǎ ta Ye̤shǔ. Asî hî̌bǎ kè̌khînû̌û ta yî̤hǒtò̤ pěnu Ye̤shǔ glè ma̤lǒma̤behtò̌ Cǒmara a ta̤yè̤lò̤nǎ htǒonu pě, dě a sikè bǎ Ye̤rǔshèlèwî̤kûnu pě awi̤akè̌. 32Petru ta a sû̌kho toǒ hǎmoǒshope̤ hǐnudě bǎ asî sî̌yahtò̌ akhanu, a kè̌shǐ Ye̤shǔ a ta̤sîrîdû̌sîrîhtû toǒ ta kòyò sò̌gini̤ ihtǒ ǒkû̌dǒ nû̌û. 33Bǎ Mǒ̤jè ta pwa̤po̤ Èlî̌a hǎhtò̌cû̌kè akhanu, Petru hî̌ Ye̤shǔ, “Běcǎ, gûla̤ bǎo tò̤glò mî̌ awî̤ amo̤wǒlè. Pa glè ma̤htò̌bǎ sî hǐphû̌ suma, tamamî̌ naya, tamamî̌ Mǒ̤jè aya, tamamî̌ pwa̤po̤ Èlî̌a aya.” (A hî̌ hǐnu pwǎ̤tadě a hî̌kwè̌꤮ titènu a sî̌ya tò̤.)

34Bǎ Petru hî̌bǎ pepwǎ akhanu, poǒlṳ tebě hè ǒlṳhtò̌ dě a lò̤jobǐkè asî. Bǎ poǒlṳ lò̤jobǐ asî akhanu, akhophijaû̌ toǒ ǐshabòkè. 35Dě yo̤pwe̤htò̌ dě poǒlṳkla dě a hî̌, “A mî̌ hephû̌khû htě he mo̤ǐyǎ dě a ma̤mo̤ he sò̌phlǒ tapwa̤.” ^g 36Bǎ yo̤sǎpo̤htò̌ ǒkǔ akhanu, akhophijaû̌ htǒosò̌su kè̌shǐ ta Ye̤shǔ ǒkè tû̌pwǎ tapwǎ̤ pa. Ta̤wi̤ta̤kè̌ lǒ̤bò htě asî kè̌shǐ a htûhtò̌ htǒotoǒnu a pwe̤ǐlṳ kò dǐpwǎ̤꤮ tò̤, bǎnukha pwǎpwǎ asî ǒbò pwǎ.

Ye̤shǔ ma̤hǎmǎ phijaû̌ makhûphû̌ htě khînǎkhîno ma̤bǎ nû̌û tapwa̤

(Matěo 17:14-18; Mǎ̤riko 9:14-27)

37Děanǒkòti̤ni̤, bǎ asî ǒ dě kholokhû̌ hǎte̤ akhanu, kòyò saprṳ̂ hèkè̌shuǐ asî tṳ̂prṳ̂taphǎ. 38Dě kòyò saprṳ̂saphǎ akla tapwa̤nu a yi̤kǒ ta, “Sara꤮ he kwigwèbǎǐ na, na kè̌mò̌ hephû̌makhû htǒonò̤. Hephû̌makhû ǒpwǎ tapwǎ̤꤮ pa. 39Khînǎkhîno ma̤bǎ yǎ pṳ̂̌plǎplǎ dě a kaǎhtò̌sumṳ. Htodě a ma̤htò̌ nû̌û dě agokû bǒbè̌hǎhtò̌. Khînǎkhîno htǒotadonu, ama̤jîma̤jû nû̌û dě ahǎhtò̌yûtò̤. 40He kwigwèbǎǐ nakhophijaû̌ toǒ dě a glè wṳ̂hǎhtò̌kè bǎ nû̌û khînǎkhînohtǒo pwǎ̤ta asî wṳ̂hǎhtò̌pè̤ nû̌ûtò̤.”

41Běcǎ Ye̤shǔ hî̌ asî, “Sî ta̤yṳta̤nǎ ǒtò̤, sî nò̌kudu shû̌le! He bǎ ǒyî̤kû̌pe ta sî pwî̌tè pě? He tobǎ khòsò̌do ǒyî̤kû̌pe sî pwî̌tè?” A hî̌hto hǐnudě a hî̌lè̌ kòmakhûnu tapwa̤, “Kaǎhè na phû̌khû bǎo.”

42Bǎ phijaû̌phû̌ htǒotapwa̤ hè akhanu, Khînǎkhîno ma̤lòkhǔpo̤ nû̌û hǎkhû̌ dě a ma̤htò̌ nû̌û. Dě Ye̤shǔ sǎhtǎ khînǎkhîno htǒo, dě a ma̤bǎkè bǎ nû̌û, dě a ǐgesǒ nû̌ûta apha. 43Kòyò ǒ bǎnu pṳ̂̌꤮ tapwa̤ sû̌pi̤sò̌pi̤ lǒ̤bò Cǒmara a ta̤po̤ta̤phǎ shû̌sho htǒonu.

Ye̤shǔ hî̌bǎpo̤ ata̤si awi̤akè̌

(Matěo 17:22-23; Mǎ̤riko 9:30-32)

Bǎ kò pṳ̂̌꤮ tapwa̤ sû̌pi̤sò̌pi̤bò Ye̤shǔ ma̤ ta̤cǒklî̌kî̌ya htǒotoǒ akhanu, Ye̤shǔ pwe̤ǐlṳ bǎ akhophijaû̌ toǒ, 44“Gana̤de te̤mǎ lǒkho yo̤sǎ htě he pwe̤ǐlṳ bǎ sî khònò̤ htǒotoǒ nî̌꤮. Kòyòphû̌khû mî̌ hehtǒo, kò shaǎlò̤kè yǎ dě kòyòhǎkhû̌phû̌ a cǔdekû pě.” 45Pwǎ̤tadě a khophijaû̌ toǒ sî̌yaphlo nû̌û ta̤hî̌bǎ htǒotûmû amûasǎ tò̤. Ma̤pûhǐ asî bǎ sî̌ya tò̤nu, kò bè̌hǔkè pwǎ amûasǎ. Asî gwèbǔ Běcǎ Ye̤shǔ dǐpwǎ̤꤮ tò̤.

Ûpè htûdû̌gutṳ̌ pěya?

(Matěo 18:1-5; Mǎ̤riko 9:33-37)

46Běcǎ akhophijaû̌ toǒ htè̌kè̌khînû̌û ta dě asî aklanu, ûpè htûdû̌gutṳ̌pě ya, hǐnu. ^h 47Ye̤shǔ sî̌ya asî ata̤gènè̤ dě a sò̌phlǒkû toǒ akhû̌akhî, a kaǎhè phijaû̌ tapwa̤ dě a nohè ihtǒ ǒ nû̌û bǎ akòshî̌, 48Dě a hî̌ asî, “Kòyò htě a kè̌ hemi̤sǎ dě a dè kaǎshǔ phijaû̌phû̌ htǒotapwa̤ tapwa̤pwa̤nu asǒsǒta akaǎshǔ he hǒ. Dě kòyò tapwa̤pwa̤ a kaǎshǔ he numî̌ a kaǎshǔ pwa̤htě a nohèlò̤ he htǒotapwa̤nu hǒ. Ma̤tè̤hî̌dě, kòyò htě a gènè̤pî̌tî̌ tûû̌ ana̤ dě sîkla tapwa̤pwa̤ numî̌ kòyò htě a htûdû̌gutṳ̌nu hǒ.” ⁱ

Kòyò htě a htè̌shǔ sî tò̤ numî̌, kòyò htě a ǒpa kû̌ sînu tokho hǒ.

(Mǎ̤riko 9:38-40)

49Jowǎ̤ni̤ hî̌htò̌, “Běcǎ pa kè̌shǐ kòyò tapwa̤ dě a cû̌ wṳ̂hǎhtò̌pè̤kè khînǎkhîno toǒ ta nami̤. A ǒplǒkû̌ pa aprṳ̂kû mè̤tò̤ dě pa hî̌ dǐdòkè yǎ.”

50Pwǎ̤tadě Ye̤shǔ hî̌shǔ Jowǎ̤ni̤, “Cû̌ ma̤dǐdò ma̤ yǎ ma̤. Ma̤tè̤hî̌dě kòyò htě a htè̌shǔ sî tò̤ toǒ numî̌ kòyò htě a ǒpa kû̌ sînu tokho hǒ.”

Shamarî̌ta dotado dě a kaǎshǔ Ye̤shǔ tò̤

51Bǎ mṳni̤mṳsa phǔhè ta kò glè kaǎhtò̌ Ye̤shǔ dě mǒkhû̌ akhanu, a bè̌lò̤ asò̌phlǒ ta a glè cû̌ dě Ye̤rǔshèlèwî̤. 52Ye̤shǔ nocû̌ǒnǎ wǐ pwa̤sû ta̤wi̤ta̤kè̌ toǒ dě alo̤mo̤, ma̤pûhǐ asî ma̤wǒnǎbò bǎ Běcǎ aya nudě, asî hǎhtò̌cû̌ nṳ ǒkǔkû̌nǎ dě Shamarî̌ta dotado akû. 53Pwǎ̤tadě dophû̌shǒphû̌ toǒ kaǎshǔ Ye̤shǔ tò̤, ma̤tè̤hî̌dě asî sî̌ya te̤mǎ ta a glè cû̌ dě Ye̤rǔshèlèwî̤ hǒ. 54Bǎ akhophijaû̌ Jǎgomo̤ ta Jowǎ̤ni̤ kè̌shǐ asî ma̤htǒo dě, asî hî̌ Běcǎ, “Běcǎ, pa kaǎlò̤ mî̌ mǒkhû̌ dě nohèlò̤ gèkèbò asî pě numî̌ na sò̌phlǒ ǒ tò̤ ya?” ^j 55Ye̤shǔ htû̌tiwǐ gesǒ dě a sǎhtǎ asî. 56Dě asî hǎhtò̌cû̌ sělě khǒkè ahǔwa̤ tado.

(Matěo 8:19-22)

57Bǎ asî cû̌ dě klè̌lo̤ akhanu, kòyò tapwa̤ hî̌ Ye̤shǔ, “Na cû̌ bǎtè꤮ tò̤glò bǎbǎ, he cû̌kû̌ ta na dě he htûkû̌ nakhophijaû̌.”

58Ye̤shǔ hî̌shǔ yǎ, “Chyǐmi̤ toǒ ǒ ta akû, htû̌phû̌ wi̤ dě mǒla̤ toǒ ǒ ta api̤, pwǎ̤ta kòyòphû̌khû mî̌ hehtǒo, bǎ hehǐkǒ la̤dò̌lò̤ gûla̤ pwǎnu a ǒ dǐglò̌꤮ tò̤.”

59A hî̌lè̌ kòyò ahǔwa̤tapwa̤, “Gûkû̌ hekò dě htûkû̌ he khophijaû̌.”

Pwǎ̤tadě htǒotapwa̤ hî̌shǔ nû̌û, “Běcǎ, ǐpûmò̌ he ashuakhwè dě he ge lǔwǐ kû̌nǎ hepha nî̌꤮.”

60Ye̤shǔ hî̌shǔ yǎ, “Kòyòsi htǒotoǒnu, nocû̌lǔtû̌ yǎta kòyòsi htǒo ta asînu. Pwǎ̤ta na mî̌, cû̌ dǒhtû̌ǐwǐpû kò ta Cǒmara shiga awi̤akè̌.”

61Dě ahǔwa̤ tapwa̤ dě a hî̌lè̌, “Běcǎ he htûkû̌ nakhophijaû̌, pwǎ̤ta plûge hî̌mo̤hî̌wǒ kû̌wǐ he ta he hǐphû̌phòphû̌ toǒ.” ^k

62Ye̤shǔ hî̌shǔ yǎ, “Kòyò tapwa̤pwa̤ dě a pṳ̂ htělǎ dě a htû̌tiwǐ gesǒnu, abwǐasîrî ǒ ta Cǒmara ashiaga aya dǐcǎ꤮ tò̤.”