Mar 13 | KxfSCKRC | STEP | Bǎ Ye̤shǔ hǎhtò̌cû̌kè ta̤lṳhtò̌ho we̤kû akhanu, akhophijaû̌ tapwa̤ hî̌ nû̌û, “Sara꤮ na kè̌mò̌ lo̤dû̌ ta hǐdû̌hǐhtû děnu toǒ, awî̤ lè!”

Mark 13

Ta̤ma̤lò̤te̤jakè ta̤lṳhtò̌ho awi̤akè̌

(Matěo 24:1-2; Lǔka 21:5-6)

1 Bǎ Ye̤shǔ hǎhtò̌cû̌kè ta̤lṳhtò̌ho we̤kû akhanu, akhophijaû̌ tapwa̤ hî̌ nû̌û, “Sara꤮ na kè̌mò̌ lo̤dû̌ ta hǐdû̌hǐhtû děnu toǒ, awî̤ lè!”

2 Dě Ye̤shǔ hî̌shǔ nû̌û, “Hǐdû̌hǐhtûwî̤ děnu toǒnu, sî kè̌shǐ pwǎ yahî̌? Lǒ̤꤮ bò lo̤dû̌ toǒnu kò hè delò̤te̤jakèbò yǎ pě. Lo̤ htǒotoǒnu a tǒhtupe nû̌û pě dǐma꤮ tò̤.”

Ta̤pò̤ta̤sha ta ta̤ma̤jîma̤jû

3 Bǎ Ye̤shǔ hǎnòò̌lò̤ Olivekholokhû̌ dě a kè̌cû̌ totǐ bǎ ta̤lṳhtò̌ho ǒ akhanu, Petru, Jǎgomo̤, Jowǎ̤ni̤, Adrěa, cû̌ gwèhǔ nû̌û, 4 “Na hî̌ htǒotoǒnu a htûhtò̌ bò̌khòtè pě? Bǎ ta̤ lǒ̤꤮ bò htǒotoǒ glèbǎ htûhtò̌ htophlǔbò pěnu ta̤cǒklî̌kî̌ya ta̤ma̤dòǐ tacǎcǎ ǒlṳhtò̌wǐ pě ya?”

5 Ye̤shǔ hî̌ asî, “Ǒsè̌rè̌ lǒkho sîna̤ ta kòyò htě a hè lǒǎplò̤ǎ sî pěnu toǒ nî̌꤮. 6 Kòyò saprṳ̂ glè sûlûhè ana̤ sǒsǒta henu pě dě a dǒkwèǐ lòhǎlòholò̤ lǒkho ana̤ ta, ‘He mî̌ Khrî̌stu htě a ma̤lû̌htò̌ge kònu tapwa̤’ htodě a lǒǎplò̤ǎ plṳ̂ kò pě. 7 Bǎ sî gana̤de kò shě pi̤ti̤pṳ̂tṳ̂ nû̌û dě aphǔ bǎbǎ, sî gana̤de kò pwe̤ǐ bǎ sî ta̤shěta̤pe̤ awi̤akè̌ dě ayî̤ toǒnu bǎbǎ, ǐsha lǒkho pûma̤ nî̌꤮. Ma̤tè̤hî̌dě pwǐhè̌onu toǒ mî̌ a bǎ htûhtò̌ nò pě, pwǎ̤ta htǒonumî̌ hǎkhû̌ glè̌ gutṳ mè̤hǒtò̤. 8 Ma̤tè̤hî̌dě kòyò tacǎ ta tacǎ, shiga taga ta taga gushěgupe̤ nû̌û pě. Tṳtṳhtû̌dî̌ toǒ ǒhtò̌ dǎlo̤dǎkhobò hǎkhû̌ tò̤glò hto tò̤glò pě. Gawi̤gako ǒhtò̌ pě. Ta̤htûhtò̌ htǒotoǒ numî̌ mî̌pwǎ ta̤jîta̤jû a kòshî̌kòtṳ htě asǒsǒta mamǔ glè̌ phû̌ǒ dě aphusha hèto̤ mǒ̤penu pwǎ.

9 “Sî bǎ sè̌rè̌ǐ lǒkho sîna̤. Hekhû̌hekhî kò pṳ̂ sî pě, dě kò sûhtò̌ sî dě pwa̤cèrò hǐkǒdû̌ toǒ a lo̤mo̤ pě. Kò phlěpo̤ sî dě ta̤sabahǐkû pě. Sî bǎ ihtǒ ǒ dě pwa̤pǒta̤ toǒ ta Khwǐcophǎ toǒ alo̤mo̤ pě dě a cèrò sî pě sî dǒhtû̌ǐ nṳbǎ asî ta ta̤sò̌le̤sò̌lò̤ awi̤akè̌ pě. ^a 10 Pò̤̌ta bǎ hǎkhû̌ gutṳ hǒtò̤ akhanu, sî tobǎ cû̌ pwe̤ǐlṳbǎ kòyò pṳ̂̌꤮ tacǎ ta ta̤sò̌le̤sò̌lò̤ awi̤akè̌. 11 Kò pṳ̂sûhtò̌ sî dě Khwǐpwa̤cèròta̤hǐ bò̌khòtè꤮ bǎbǎ, sî tobǎ hî̌bǎ hî̌tènu bǎgubǎgènǎwǐ lǒkho pûma̤ nî̌꤮. Ma̤tè̤hî̌dě khîkha hèto̤ pě dě sî glè hî̌bǎ tû̌ mè̤tò̤, Běcǎ sǎcahtǐ pwe̤ǐ ma̤jè tû̌ sî pě.

12 – 13 “Bǎnuakha pěnu, pṳ noma̤si tû̌ awè̤ ta kòhǔwa̤ pě, dě wè̤ noma̤si tû̌ apṳ ta kòhǔwa̤ pě, pha noma̤si tû̌ aphû̌ ta kòhǔwa̤ pě, phû̌ toǒ shě geshǔ tû̌ amo̤apha toǒ pě, dě a noma̤si tû̌ kò ta amo̤apha pě. Dě sîgûkû̌ hekò akhû̌akhî, kòyò pṳ̂̌꤮ tapwa̤ sò̌khěbò sî pě. Pò̤̌ta kòyò htě a ihtǒtònò ǒměǒgle ta a ta̤yṳta̤nǎ akû to̤htû̌ agutṳ toǒnu Cǒmara ma̤lû̌htò̌ge asî pě.” ^b

Ta̤sò̌gònò̤ ǐsha ma̤phû̌mò̤shî̌hto Cǒmara a ta̤lṳhtò̌ho pě

(Matěo 24:15-21; Lǔka 21:20-24)

14 Ye̤shǔ hî̌sělěpo̤, “Sî kè̌shǐ ta ta̤wi̤japhǎkò to ihtǒ ǒ dě ta̤lṳhtò̌hokû tò̤ pwǎ̤ta a ihtǒ ǒ bǎnu pě. Dě htǒo akhû̌akhî, kò bè̌ǒkhwè̌kè ta̤sabahǐ pě (Kòyò htě a dǒlî̤ htǒotoǒ tobǎ sî̌yaphlo lǒkho.) Bǎ sî kè̌shǐ yǎ htûhtò̌ hǐnu akha pěnu, kòyò ǒ dě Yṳ̌dagakû toǒ bǎ khlè̌ lû̌htò̌ lǒkho ana̤ dě kholokhû̌. ^c 15 Kòyò htě a ǒ dě gukhětadǎkhû̌ toǒnu, bǎ a khlè̌hǎte̤ akha a tobǎ nṳphî̌cû̌nṳ a ta̤kî̌ta̤kû̌ dě hǐkû dǐcǎ꤮ tò̤. ^d 16 Kòyò ma̤ta̤ dě hǔklakhû̌ toǒnu a bǎ khlè̌ge phî̌nṳ ahǐdo dě hǐ tò̤. 17 Bǎnu ti̤ni̤ pěmî̌ mamǔ htě amo̤do ta mo̤ htě a ǒ ta aphû̌ dě a onû̌pe nû̌ûnu toǒ ayamî̌ khîkha jîjû na̤cè̌ asîya pě. 18 Ma̤pûhǐ ta̤jîta̤jû htǒo lò̤te̤to pûma̤ ta gawo̤kha ma̤nu, sî to kwisaba lǒkho Cǒmara pṳ̂̌꤮ tapwa̤. 19 Asî tobǎ kwisaba lǒkho ma̤tè̤hî̌dě, ta̤jîta̤jû amṳni̤ htǒotoǒnu, tèhtò̌ dě Cǒmara bǒlò̤wǐta̤ tǒ̤khònò̤ htǒonu a ma̤nǒ hǐnu dǐkhò̌꤮ tò̤. Bǎnukhapě ta̤jîta̤jû htǒotoǒnu a jîkhlo pě dě anǒkòpěnu a htûhtò̌penǒ hǐnu dǐkhò̌꤮ tò̤. ^e 20 Běcǎ dè ma̤phǔtǔ ta̤jîta̤jû ani̤asa tò̤ hî̌numî̌ kò lû̌htò̌bò̌nu a ǒ dǐpwǎ̤꤮ tò̤. Pwǎ̤ta kòyò htě Cǒmara wû̌lǎnǎhto nû̌û toǒ ayanu Běcǎ ma̤phǔtǔbǎ asî ani̤asa pě. 21 A htûhtò̌ hǐnu htopědě kòyò tapwa̤pwa̤ dè hî̌ sî ta, ‘Kè̌mò̌ lǒkho, htǒo mî̌ Khrî̌stu htě a ma̤lû̌htò̌ge kònu tapwa̤ hǒ,’ mè̤tò̤mî̌ a glè hî̌ sî ta, ‘Cû̌ kè̌ lǒkhomò̌, Khrî̌stu htě a ma̤lû̌htò̌ge kònu tapwa̤ a ǒ děnu,’ a hî̌ sî hǐnu pě pwǎ̤ta yṳǎ pû lǒkho ma̤ nî̌꤮. 22 Ma̤tè̤hî̌dě kòyò htě asûlû lòho ana̤ pwǐ Khrî̌stu htě a ma̤lû̌htò̌ge kò htǒotapwa̤ toǒnu ta kòyò htě asûlû lòho ana̤ pwǐ pwa̤po̤ sî toǒnu, a ǒlṳhtò̌ pě. Ma̤pûhǐ asî lǒǎplò̤ǎ dǒ kòyò htě Cǒmara wû̌lǎhto nû̌û htǒotoǒnu, asî dè ma̤jò hî̌dě, a ma̤lṳhtò̌ ata̤ma̤ cǒklî̌kî̌ya toǒ ta ata̤ma̤ sû̌pi̤sò̌pi̤ kònu toǒ pě. 23 Ǒsè̌rè̌ lǒkho sîna̤ nî̌꤮. Bǎ ta̤htǒotoǒ htûhtò̌ hǒtò̤nu, he pwe̤ǐnǎwǐhtobò bǎ sî pṳ̂̌꤮ tacǎ hǒ,” Ye̤shǔ hî̌ hǐnu.

Kòyòphû̌khû glè hè pě

(Matěo 24:29-31; Lǔka 21:25-28)

24 Dě Ye̤shǔ hî̌sělěpo̤, “Bǎ ta̤jîta̤jû ani̤asa toǒ cû̌tûlû̌hto pěnu,

‘Cǒmara ma̤khǐkè lṳmṳ pě, ^f la glè lîpe tò̤. ^g 25 Shǎ dě mǒla̤ toǒ lò̤te̤jakèbò pě. ^h Cǒmara ma̤guyṳbò mǒla̤ a ta̤po̤ta̤phǎnu toǒ pě.’ ⁱ

26 “Htodě asî glè kè̌shǐ lǒkho kòyòphû̌khû mî̌ hehtǒo hèlò̤ dě poǒlṳkla pě, dě a ǒlǒbe ta a ta̤po̤ta̤phǎ ta a ta̤sîrîdû̌sîrîhtû htě ashû̌asho htǒotoǒ pě. ^j 27 Htodě kòyòphû̌khû mî̌ hehtǒo, he nohèlò̤ tanaphû̌ toǒ pě, he nocû̌ asî pě dě a cû̌ kaǎplǒ kòyò htě Cǒmara wû̌lǎhto asî toǒnu bǎ gûla̤ pṳ̂̌tûkû pě. Asî tèhtò̌ cû̌ bǎ mǒkòshî̌ to̤htû̌ hǎkhû̌ gutṳ pě.

(Matěo 24:32-35; Lǔka 21:29-33)

28 “Phî̌nṳ lǒkho ta̤sû̌ǐ dě dǐshimṳ ǒnu. Bǎ aphò toǒ dǒjahtò̌ dě alǎ toǒ hǎhtò̌ akhanu, sî sî̌ya lǒkho ta gagûkha phǔhèto̤ hǒ. 29 Hǐnudě bǎ sî kè̌shǐ ta̤htǒo toǒ htûhtò̌ akhapěnu, sî̌ya lǒkho ta kòyòphû̌khû mî̌ hehtǒo a ^{▼▼Pwa̤sî̌ya lî̤cahtǐ ahǔwa̤ toǒ gènè̤ lǒkho ta ta̤hî̌bǎhtǒo amûasǎ mî̌ hǎkhû̌ gutṳ phǔhtò̌ hǒ.} hèto̤phǔ ta takhakòshî̌ hǒ nî̌꤮. 30 He hî̌ mè̤mè̤̌꤮ sî, kòyò lǒ̤꤮ bò htě a ǒhtûpwa̤ khònò̤htǒotuhtu toǒ sibò hǒtò̤nu, ta̤htǒotoǒ htûhtò̌bò pě. 31 Mǒkhû̌ ta hǎkhû̌ hǎmǎkè pě pwǎ̤ta hele̤heyo̤ htǒotoǒnu a hǎmǎkè pě dǐkhò̌꤮ tò̤.

(Matěo 24:36-44)

32 “Pwǎ̤ta ta̤htǒotoǒ htûhtò̌ mṳni̤mṳsa, mè̤tò̤mî̌ akhîakha bò̌khòtè pěnu kò sî̌ya dǐpwǎ̤꤮ tò̤. Tanaphû̌ ǒ dě꤮ mǒkhû̌nu toǒ bǎbǎ, a sî̌ya tò̤. Aphû̌khû ta ana̤ htǒotapwa̤ bǎbǎ, a sî̌ya tò̤tò̤. A sî̌ya pwǎpǒ̤ hepha tapwǎ̤꤮ pa. ^l 33 Ǒsè̌rè̌ lǒkho sîna̤, sòklò saba ǒpo̤ lǒkho sîna̤ nî̌꤮, ma̤tè̤hî̌dě a htûhtò̌ pě bò̌khòtènu sî sî̌ya tò̤. 34 Htǒomî̌ asǒsǒta kòyò tapwa̤ htě a glè̌ hǎhtò̌cû̌ klè̌ shiga ahǔwa̤ taga dě a nokè̌po̤ǐ ahǐ ta ajûphû̌ toǒ dě a hǎhtò̌cû̌. A ǐlò̤ khǒkè asî tapwa̤ ta tapwa̤ ata̤ma̤ dě a hî̌kè pwa̤ǒpo̤ takhanu tapwa̤ ta a glè sòklòǒpo̤shǔ hǐnu. ^m

35 “Hǐběcǎ glè gesǒ bò̌khòtè pěnu sî sî̌ya tò̤. Mî̌ a gesǒ htû̌꤮ lṳmṳhǎ pě ya, mè̤tò̤mî̌ a gesǒ htû̌꤮ lṳmṳna̤kha pě ya, mè̤tò̤mî̌ a gesǒ htû̌꤮ shîû̌ pě ya, mè̤tò̤mî̌ htû̌꤮ lṳmṳlî pě yanu, sî sî̌ya tò̤ akhû̌akhî, sòklòshǔ lǒkho nî̌꤮. 36 Ma̤tè̤hî̌dě hǐběcǎ dè geto̤sumṳhtò̌ pě dě, nokè̌shǐ pû yǎ ta sî hǎmoǒshope̤ ma̤ nî̌꤮. 37 Ta̤htě he hî̌ bǎ sîhtǒo toǒ numî̌, he pwe̤ǐbò bǎ hekhophijaû̌ pṳ̂̌tapwa̤, hǐnudě ‘Sòklòǒpo̤shǔ lǒkho nî̌꤮.’”