Mar 2 | KxfSCKRC | STEP | Anǒ ginǐ̤suni̤nu Ye̤shǔ gesǒ Kaperanòwî̤kû dě kòyò toǒ gana̤de lǒkho ta a ǒ dě hǐ.

d Ta̤subusaba 24:9; Shamuělè awǐlǒ tabǎ 21:1-6

Mark 2

Ye̤shǔ ma̤bǎ bǎ kòyòna̤ sitokho

(Matěo 9:1-8; Lǔka 5:17-26)

1 Anǒ ginǐ̤suni̤nu Ye̤shǔ gesǒ Kaperanòwî̤kû dě kòyò toǒ gana̤de lǒkho ta a ǒ dě hǐ. 2 Hǐnudě kòyò hè tîdî̌tûshû̌ plṳ̂ tûlû̌shû̌nû̌û, bǎ takhakhlo pwǎnu agûla̤ ǒjòpe dǐglò̌꤮ tò̤. Ye̤shǔ dǒhtû̌ sû̌ǐtòwòǐlò̤ bǎ asî ta Cǒmara ale̤ayo̤ toǒ. 3 Bǎnuakha makhû sò̌li̤ ò̌hènṳ kòyòna̤ sitokhonu tapwa̤ dě Ye̤shǔ ǒ. 4 Pwǎ̤ta kòyò ǒwo̤ǒphǎ tûlû̌shû̌ akhû̌akhî, asî hènṳphǔjòpe Ye̤shǔ ǒ tò̤ dě ahtò̌ ma̤phlo gukhětadǎkhû̌ bǎ Ye̤shǔ ǒnû̌û akhû̌nu dě a jèlò̤te̤ kòyò sitokhonu tapwa̤ ta hǔjo. 5 Bǎ Ye̤shǔ kè̌shǐ asî ta̤yṳta̤nǎ ǒ hǐnu dě a hî̌ kòyò sha sitokhonu tapwa̤, “Hephû̌khû꤮ he bòlû̌kè na ta̤sǔ hǒ,” a hî̌ nû̌û.

6 Bǎnuakha pwa̤sû̌ǐ ta̤sû̌ta̤tòwò asara toǒ hǎnòò̌ lǒkho bǎnu dě asî gènè̤ lǒkho dě a sò̌phlǒkû, 7 “Kòyò htǒotapwa̤ a cû̌ hî̌tǒ̤ hǐnu ma̤tè? A hî̌bǎsǔ Cǒmara hǒ. Ûpè tapwa̤ glè bòlû̌jò ta̤sǔ pè? Pwa̤ bòlû̌jò ta̤sǔ mî̌ pwǎpǒ̤ Cǒmara tapwǎ̤ pa.”

8 Taplǎpa Ye̤shǔ sî̌ya asî ta̤gènè̤ sò̌phlǒkû dě a hî̌ asî, “Sî cû̌gènè̤ tǒ̤ lǒkho sî sò̌phlǒkû hǐnu ma̤tè? 9 He dè hî̌ kòyò sitokho htǒotapwa̤ ta, ‘He bòlû̌kè na ta̤sǔ hǒ’ Mè̤tò̤dě ‘Ihtǒ phî̌nṳ na la̤mi̤ dě cû̌mò̌’ hî̌mî̌ ayûkhlo bǎtè tacǎtè? 10 Pò̤̌ta kòyòphû̌khû mî̌ hehtǒo, ma̤pûhǐ sî sî̌ya lǒkho ta dě hǎkhû̌ bǎonu, he ǒ ta ta̤shû̌ta̤sho dě he bòlû̌bò̌ kò ta̤sǔta̤plě toǒnu, he glè dǔlṳ bǎ sî,” a hî̌hto hǐnudě, a hî̌ pwa̤sitokho htǒotapwa̤, 11 “He hî̌ na, ihtǒ tûlûnṳ na khlǒla̤mi̤ dě gedě na hǐ.” 12 Dě taplǎpa a ihtǒ tûlûnṳ a khlǒla̤mi̤ a hǎhtò̌cû̌ dě kòyò lǒ̤꤮ bò a lo̤mo̤. Kòyò pṳ̂̌꤮ pwa̤ sû̌pi̤sò̌pi̤ lǒ̤bò ta htû̌sò̌ǐ lǒkho Cǒmara dě a hî̌ lǒkho, “Ta̤ma̤ana̤ pwǐhè̌onu, pa kè̌shǐnǒ dǐkhò̌꤮ tò̤,” a hî̌ lǒkho hǐnu.

Ye̤shǔ kaǎ Lě̤wǐ

(Matěo 9:9-13; Lǔka 5:27-32)

13 Ye̤shǔ hǎhtò̌cû̌ gesǒ Galilî̌a shikoǒ kòshî̌ dě kòyò saprṳ̂saphǎ hè ǒte̤we̤bò nû̌û dě a bòhtò̌ sû̌ǐtòwòǐ bǎ gesǒ asî bǎnu. 14 Bǎ a cû̌ akhanu, a kè̌shǐ Alphěo aphû̌ Lě̤wǐ. A mî̌ pwa̤kwi ta̤kûta̤cî̌ tapwa̤. A kè̌shǐ Lě̤wǐ hǎnòò̌ bǎ la̤kwi ta̤kûta̤cî̌ hǐkû dě Běcǎ Ye̤shǔ hî̌ yǎ, “Gûkû̌ hekò,” dě Lě̤wǐ ihtǒ gûcû̌kû̌ nû̌ûkò.

15 Bǎ Ye̤shǔ ta akhophijaû̌ ǎdî lṳmṳhǎ ta̤ǎ dě Lě̤wǐ hǐ akha, pwa̤kwi ta̤kûta̤cî̌ toǒ ta ta̤ma̤sǔphû̌ toǒ ǎhtuoplǒ ta asî, ma̤tè̤hî̌dě kòyò htě a gû Ye̤shǔ akò toǒnu, a sǒsǒpwǎta asînu a ǒpaplṳ̂pe. 16 Bǎ Pharisè̌phû̌ htě asû̌ǐ ta̤sû̌ta̤tòwò asaranu toǒ kè̌shǐ Ye̤shǔ ǎhtuoplǒ ta ta̤ma̤sǔphû̌ toǒ ta pwa̤kwi ta̤kûta̤cî̌ toǒ akhanu, a gwè Ye̤shǔ akhophijaû̌ toǒ, “Ma̤titèdě a cû̌ ǎhtuohtu kû̌tǒ̤ ta kòyò kwi ta̤kûta̤cî̌nu toǒ ta ta̤ma̤sǔphû̌nu toǒ ma̤tè?” A gwè lǒkho hǐnu.

17 Bǎ Ye̤shǔ gana̤de asî gwè hǐnu akha, a hî̌geshǔsǒ asî, “Kòyò htě a ǒmo̤ǒbǎ toǒnu, a lo̤bǎ ta ta̤khû̌saradû̌ tò̤, kòyò htě ashǐasha toǒnu a lo̤bǎ ta ta̤khû̌saradû̌. He hè kaǎ kòyò htě acǒatè̤nu toǒ mè̤tò̤. He hè kaǎpwǎ kòyò htě a ta̤sǔta̤plě ǒnu toǒ pwǎ.”

Kò gwè Ye̤shǔ dǔǎshǎ awi̤akè̌

(Matěo 9:14-17; Lǔka 5:33-39)

18 Bǎnu akha Jowǎ̤ni̤ akhophijaû̌ ta Pharisè̌phû̌ toǒ a dǔǎdǔo lǒkho. Dě kòyò toǒǒ hè gwè Ye̤shǔ, “Jowǎ̤ni̤ akhophijaû̌ ta Pharisè̌phû̌ akhophijaû̌ toǒ dǔǎ shǎǎshǎo, pwǎ̤tadě nakhophijaû̌ toǒnu a dǔǎ kû̌kò shǎǎshǎo tò̤ ma̤tè?” A hè gwè nû̌û hǐnu.

19 Běcǎ Ye̤shǔ hî̌shǔ asî ta yo̤sǎkhěkhǒ tûmû dě a hî̌, “Bǎ khòmò̤makhû ǒhtukû̌pe ta akho shǐpwa̤shǐmè̤ akhanu, a khoshǐpwa̤shǐmè̤ htǒotoǒ cû̌ dǔǎdǔojò hî̌tè? Bǎ khòmò̤makhû cû̌kè hǒtò̤, a dè ǒhtukû̌pe ta asû̌akho toǒ hî̌nu, asî dǔǎjò shǎǎshǎo tò̤. 20 Htû̌꤮ kò kaǎcû̌ tephekè khòmò̤makhû pě akhanu, asî dǔǎdǔo lǒkho pě.

21 “Kò shò̌phabǐ hǔgòpwî̌li̤ ta hǔgòpwî̌sa dě a sutǔ hǒtò̤ toǒnu a ǒ dǐpwǎ̤꤮ tò̤. Dè shò̌phabǐ hî̌nu hǔgòpwî̌sahtǒo a cǐsutǔkè dě atǐ̤ htò̌lè̌lè̤po̤ hǔgòpwî̌li̤htǒo pě. 22 Kòyò yṳnṳ sobîshisî̌yo̤sa dě shiophěko li̤kûnu a ǒ dǐpwǎ̤꤮ tò̤. ^{▼▼Shiohtǒonu kò ma̤ nû̌û ta ta̤phû̌ta̤li̤ aphě.} Kò dè yṳnṳ hǐnu hî̌dě sobîshisî̌yo̤ htǒonu a saphò̌kè shiophěkoli̤ hǐnutama pě, dě sobîshisî̌yo̤ lò̤gukèbò pě. Sobîshisî̌yo̤ asa htǒonu kò tobǎ yṳnṳpwǎ yǎ dě shiosa akû pwǎ.”

Ye̤shǔ mî̌ mṳni̤dǔ a Běcǎ

(Matěo 12:1-8; Lǔka 6:1-5)

23 Bǎ mṳni̤dǔ ^{▼▼Yṳ̌daphû̌ mṳni̤dǔ mî̌ khònò̤ pwa̤yṳǎ Khrî̌stuphû̌ kaǎ yǎta mṳgòtò̤nu} ti̤ni̤ akhanu, Ye̤shǔ ta akhophijaû̌ toǒ cû̌nṳkǎbò̌ kò bǔkû̌lǎ hǔklakhû̌ toǒ, dě akhophijaû̌ toǒ phwěǎ cû̌ kò bǔkû̌lǎsǎ. ^c 24 Dě Pharisè̌phû̌ toǒ hî̌ Ye̤shǔ, “Kè̌mò̌, ta̤ma̤ htě asî tobǎ ma̤yǎ mṳni̤dǔ tò̤nu toǒ, asî cû̌ma̤ lǒkho aya hǐnu ma̤tè?”

25 A hî̌shǔ asî, “Dě awǐkha bǎ Dǎ̤wi̤ ta asû̌kho toǒ lòdǒǎlòdǒo dě a lo̤bǎ la̤ǎla̤o akhanu, a ma̤kwè̌꤮ titè numî̌ sî dǒnǒ kû̌kò tò̤ ya? 26 Asî cû̌nṳ lǒkho Cǒmara ahǐkû dě mû̌ htě kò lṳhtò̌ yǎta Cǒmara toǒ numî̌ a ǒ bǎnu, dě a ǎnṳ pwǎpǒ̤ pwa̤lṳhtò̌ta̤ toǒ pwǎ pò̤̌ta Dǎ̤wi̤ ta akhophijaû̌ toǒ cû̌nṳphî̌ǎ mè̤tò̤ya? Bǎnukha mî̌ Abiata htû ta pwa̤tòlûhtò̌ hǐkǒdû̌gutṳ̌.” ^d

27 Běcǎ Ye̤shǔ hî̌po̤ asî, “Kòyò numî̌ mṳni̤dǔ aya mè̤tò̤, mṳni̤dǔ numî̌ kòyò lǒ̤꤮ bò aya. 28 Kòyòphû̌khû mî̌ he htǒo a mî̌ mṳni̤dǔ a Běcǎ tapwa̤hǒ,” a hî̌shǔ asî hǐnu.