Mark 5

Ye̤shǔ ma̤hǎmǎ bǎ khînǎ ma̤bǎ kòyòmakhû tapwa̤

(Matěo 8:28-34; Lǔka 8:26-39)

1Ye̤shǔ ta akhophijaû̌ toǒ cû̌to̤ dě shikoǒdû̌ bò̌kho Garasǎphû̌ toǒ a shigakûnu. 2Bǎ a ǒ sǒkhlikû hǎhtò̌ akhanu, kòyò htě khînǎkhîno ma̤sha nû̌û htǒotapwa̤nu a ǒ lṳkhû̌ hǎhtò̌ dě a hǎhtò̌cû̌ kè̌shǐshǔ ta Ye̤shǔ. 3Kòyòmakhû htǒotapwa̤nu a cû̌ǒpwǎ bǎ khokû kò la̤lǔǐlṳ agûla̤ htǒonu pwǎ. Dě kòyò cokloměpè̤ nû̌û dǐpwǎ̤꤮ tò̤, kòyò comě nû̌û ta sǒpli̤tè̤glè kǎlè a pè̤tò̤. 4Kò coklomě sala̤sala̤ nû̌cǔgo ta sǒpli̤tè̤glè pwǎ̤ta a cǐhtò̌tṳkè nû̌û. Akhò̌lopo̤ dě kò coklomě nû̌ûta sǒpli̤tè̤glè, pwǎ̤ta a cǐtṳkè pwǎpwǎ. Dě kòyò htě a ma̤pè̤ nû̌ûnu, a ǒ dǐpwǎ̤꤮ tò̤. 5Bǎ a ǒ dě khokû lṳgûla̤ akhanu, ta bǎ a ǒ dě shǒkû akhanu, a yi̤kǒyi̤hta dě a ma̤shama̤htò sala̤sala̤bò ana̤ ta lo̤ pṳ̂̌꤮ taplǎ.

6Bǎ a kè̌shǐcû̌tûcûpe ta Ye̤shǔ akhanu, a khlè̌hè nû̌û ǒ dě a hè gene̤lò̤ nû̌ûlo̤mo̤. 7A yi̤kǒhtò̌ dě a hî̌, “Ahtò̌yî̤ gutṳ̌ Cǒmara aphû̌khû Ye̤shǔ꤮ na glè hèma̤ kwè̌꤮ he titè? Olò̤ he dě Cǒmara ami̤akû ta, ma̤jîma̤jû pûma̤ he ma̤ nî̌꤮.” 8Ma̤tè̤hî̌dě Ye̤shǔ hî̌hto yǎta, “Khînǎkhîno, hǎhtò̌cû̌ tephekè dě makhûnu tapwa̤ alo̤,” a hî̌hto nû̌û hǐnu hǒ.

9Ye̤shǔ gwè yǎ, “Nami̤ mî̌ ûpè?”

Dě a hî̌shǔ, “Hemi̤ mî̌ Legion, ▼

▼Legion amûasǎ mî̌ ǒwo̤ǒphǎ

ma̤tè̤hî̌dě pa ǒwo̤ǒphǎ mè̤mè̤̌,” a hî̌shǔ hǐnu. 10Ma̤pûhǐ Ye̤shǔ wṳ̂hǎhtò̌kè pû asî ma̤nu, dě nohǎhtò̌cû̌ǒkè pû asî gakhlo tò̤nu, asî kwigwèbǎǐ gutṳgla Ye̤shǔ.

11Bǎnukha, htǒ tṳ̂prṳ̂ kè̌lǎkûnû̌ǎ te̤we̤phǔ ashǎ bǎ khopa̤lo̤nu. 12Khînǎkhînonu toǒ kwigwèbǎǐ Ye̤shǔ ta, “Nocû̌nṳǒ pû pa htǒnu toǒ akû dě plûnṳ pû pa dě htǒnu toǒ akû nî̌,” a kwigwèbǎǐ nû̌û hǐnu. 13Htodě Ye̤shǔ nohǎhtò̌cû̌kè asî, dě asî hǎhtò̌cû̌kè kòmakhûnu tapwa̤ ana̤lo̤ dě a cû̌nṳkè htǒnu tṳ̂prṳ̂ akû. Htǒnu tṳ̂prṳ̂ mî̌ a ǒ adoginǐ̤rî̌ dě a pe̤lò̤te̤bò gòpò̤lo̤ dě a lòcǔsikèbò shidû̌shite̤we̤kû.

14Pwa̤gèǐhtǒ toǒ khlè̌ge pwe̤ǐlṳ cû̌pîshîbò kò dě wî̤kû ta dophû̌shǒphû̌ toǒ akû ta ta̤wi̤ta̤kè̌ htǒotoǒ. Dě a ma̤kwè̌ana̤ hî̌tènu kò hèkè̌ lǒkho bǎnu. 15Dě asî hè Ye̤shǔ ǒ dě a kè̌shǐ kòmakhû htě khînǎkhîno hǎhtò̌cû̌kè nû̌ûkûnu tapwa̤ hǎnòò̌ bǎnu dě a kûsǒ wǒge ahǐdo dě asò̌phlǒ wǒgesǒ. Kòyò toǒ kè̌shǐ nû̌û dě a ǐshabòkè nû̌ûla̤. 16Kòyò htě a kè̌shǐ khînǎkhîno hǎhtò̌cû̌kè kòmakhûnu tapwa̤ akû ta htǒnu toǒ ma̤kwè̌ ana̤ hî̌tènu, asî cû̌ pwe̤ǐbò bǎ kò ta ahǔwa̤. 17Kòyò toǒ sahtò̌ kwigwèbǎǐ Ye̤shǔ ta a glè hǎhtò̌cû̌ tephekè ta asî gakû bǎnu.

18Bǎ Ye̤shǔ nṳ dě sǒkhlikû akhanu, kòmakhû htě khînǎkhîno hǎhtò̌cû̌kè nû̌ûkû tapwa̤ kwigwèbǎǐ nû̌û ta, “Khòsò̌do kaǎcû̌ dǒ pû he.” 19Pwǎ̤ta Ye̤shǔ kaǎnṳ nû̌û tò̤, a hî̌ nû̌û ta, “Tò̤, ge na hǐ dě ge pwe̤ǐlṳ kû̌nǎ na pṳwè̤mo̤pha ta Běcǎ ma̤wǒ bǎ na pwî̌꤮ tènu ta a ta̤gwèbǎǐ na hî̌tènu nî̌꤮,” a hî̌hto nû̌û hǐnudě, 20Kòyò htě khînǎ hǎhtò̌cû̌kè nû̌ûkû tapwa̤ hǎhtò̌cû̌ dě a sahtò̌ cû̌ pwe̤ǐ bǎ kò pṳ̂̌tado htě gataga kò kaǎ yǎta “Dekapolǐ” akû dě Ye̤shǔ ma̤ bǎ kwè̌꤮ a hî̌tènu ta kòyò lǒ̤꤮ bò te̤pe̤ sû̌pi̤sò̌pi̤bò kwè̌ hî̌tènu a cû̌ pwe̤ǐlṳbò bǎ kò bǎnu.

Mamǔ htě a ta̤shaǒ tapwa̤ ta phijaû̌ mamǔphû̌ tapwa̤ si awi̤akè̌

(Matěo 9:18-26; Lǔka 8:40-56)

21Bǎ Ye̤shǔ getîkhîsǒ shikoǒdû̌ bò̌kho tokho ta sǒkhli ǒ akhanu, kòyò saprṳ̂saphǎ hè ǒhtuǒplǒ plṳ̂ nû̌û dě shikoǒdû̌ htunu. 22Dě ta̤sabahǐ hǐkǒdû̌ tapwa̤, ami̤ mî̌ Ya̤irǔ hèkè̌shǐ Ye̤shǔ dě a gene̤lò̤ nû̌û khò̌lopo̤ kòshî̌. 23Dě a kwigwèbǎǐ nû̌û, “He phû̌mamǔ tapwa̤ glè̌ sikè dě ma̤pûhǐ ata̤sha hǎmǎkè dě a htûpwa̤nu, cû̌ dò̌htò̌pû bǎ he ta na cǔde dě alo̤.” 24Dě Ye̤shǔ gûgekû̌ nû̌û.

Kòyò tṳ̂prṳ̂taphǎ tîdî̌tûshû̌ cû̌ kû̌bò Ye̤shǔ. 25Bǎnu akla mamǔ htě a khòbǎyî̤ ta̤shasǐlò̤ shǐginǐ̤něnu a ǒ tapwa̤. 26Ta̤khû̌sara toǒ kè̌ǐkhwè̌ǐ nû̌û pwǎ̤tadě a yǎkhè̌ tò̤. A ma̤bǎ ǐtû̌ ana̤ dě awûhta hǎbòkè pwǎ̤tadě a yǎkhè̌hènû̌û tò̤. Ata̤sha htǒonu tǐ̤ ta sǔ a ma̤dû̌hè pwǎ. 27A gana̤de Ye̤shǔ awi̤akè̌ dě a tîdî̌hènṳ kòyò ǒwo̤akla a hèto̤ Ye̤shǔ nǒkò dě a hètè̌bǎ nû̌û hǐdopo̤to̤. 28A hî̌ ana̤, “He dè tè̌bǎ mò̌yǎ hǐdopo̤to̤nu mî̌ he ta̤shasǐlò̤ htǒo a hǎmǎ lòtṳ̌ pě,” a hî̌ dě, 29Taplǎpa asǐlò̤ ǒkǔ dě a sî̌yalò̤ ana̤ ta ata̤sha htǒonu a hǎmǎkèhǒ.

30Htǒotaplǎdě Ye̤shǔ sî̌yalò̤ ana̤ ta a ta̤po̤ta̤phǎ hǎhtò̌cû̌kè ana̤lo̤. A htû̌tiwǐlò̤ ana̤ kòyò ǒwo̤akla dě, a gwè kò, “Ûpè tè̌bǎ he hǐdopo̤to̤ ya?”

31Dě akhophijaû̌ hî̌shǔ nû̌û, “Na kè̌shǐtû̌ ta kòyò ǒ te̤we̤plṳ̂te̤we̤phǎ tîdî̌tûshû̌bò na dě mî̌ma̤tè̤dě na cû̌gwè tǒ̤ ta, ‘Ûpè tè̌bǎ he hǐdopo̤to̤ ya hî̌tè?’”

32Ma̤pûhǐ a kè̌shǐ kòyò htě a hè tè̌bǎ nû̌ûnu tapwa̤ dě a kè̌le̤kè̌ge pe. 33Dě mamǔ htǒotapwa̤nu bǎ a tè̌bǎ nû̌û hǐdopo̤to̤ akha, ta̤htûhtò̌ana̤ ta a hî̌tènu a sî̌yalò̤ tû̌ ana̤ akhû̌akhî, a ǐsha gònò̤gèglè dě a hègene̤û̌lò̤ Ye̤shǔ lo̤mo̤ dě a pwe̤ǐlṳ cǒtè̤bò Ye̤shǔ. 34Dě Ye̤shǔ hî̌ yǎ, “Phû̌mǔ꤮, na ta̤yṳ htǒonu, a ma̤bǎkè na ta̤shahǒ, gemo̤ gewǒtû̌ nî̌꤮, na ta̤sha htǒo a hǎmǎ kètû̌hǒ.”

35Bǎ Ye̤shǔ hî̌bǎpepwǎ akhanu, kòyò toǒ ǒ dě Ya̤irǔ htě a htû ta̤sabahǐ hǐkǒdû̌ htǒotapwa̤ ahǐ hè, dě a hèpwe̤ǐ Ya̤irǔ, “Naphû̌mǔ sihǒ. Dě sî cû̌ma̤dǐdò cǎ sara ma̤tè?”

36Pwǎ̤ta Ye̤shǔ gana̤de asî ata̤hî̌bǎ tò̤. A hî̌ ta̤sabahǐ hǐkǒdû̌nu tapwa̤, “Bǎgu pûma̤, tûrû̌ yṳǎ henu nî̌꤮.”

37Htodě a kaǎnṳ pwǎpǒ̤ Petru, Jǎgomo̤ ta apṳ Jowǎ̤ni̤ pwǎ. A kaǎnṳ kòyò ahǔwa̤ dǐpwǎ̤꤮ tò̤. 38Asî cû̌to̤ dě ta̤sabahǐ hǐkǒdû̌nu tapwa̤ ahǐ dě a kè̌shǐ kò ma̤pwi̤la̤sò̌go pi̤ti̤pṳ̂tṳ̂ toǒ, kòhǎkòwo toǒ. 39Bǎ a nṳ dě hǐdǒkû akha, a hî̌ asî, “Sîhǎsîwo ma̤pwi̤la̤sò̌go pi̤ti̤pṳ̂tṳ̂ ma̤tè? Phijaû̌mamǔphû̌ htǒotapwa̤mî̌ a si mè̤tò̤. A hǎmoǒ shope̤ pwǎ.” 40Dě asî sǎya̤ǐbò Ye̤shǔ.

Htodě Ye̤shǔ wṳ̂hǎhtò̌kè kòyò lǒ̤꤮ bònu toǒ dě akhlo dě a kaǎnṳ phijaû̌mamǔphû̌ htǒotapwa̤ amo̤apha ta akhophijaû̌ sò̌su dě a ginṳ phijaû̌phû̌nu tapwa̤ ǒ. 41Dě a pṳ̂ phijaû̌phû̌nu tapwa̤ acǔde dě a hî̌ nû̌û, “Talǐ takǔmi” (amûasǎ mî̌, “Kǒ phijaû̌mamǔphû̌꤮ he hî̌ na꤮ ihtǒmò̌.”) 42Dě taplǎpa phijaû̌mamǔphû̌ shǐginǐ̤ně htǒotapwa̤ ihtǒcû̌ dě asî sû̌pi̤sò̌pi̤ jî̌lekè lǒkho. 43Dě Ye̤shǔ mǎnǎ te̤mǎ asî yo̤ ta, tobǎ pwe̤ǐlṳ kò dǐpwǎ̤꤮ tò̤, htodě a hî̌ asî, “Ǐǎpa̤ phijaû̌mamǔphû̌nu tapwa̤ la̤ǎla̤o tacǎcǎ nî̌꤮.”