Mark 7
Ye̤shǔ sû̌ǐ kò ta ta̤mṳ̂plî awi̤akè̌ ta ta̤mṳ̂plî tò̤ awi̤akè̌
(Matěo 15:1-9)
1Bǎnuakha pwa̤sû̌ǐ ta̤sû̌ta̤tòwò asara ta Pharisè̌phû̌ htě a ǒ lǒkho Ye̤rǔshèlèwî̤kû hè toǒnu, a hè ǒhtuǒplǒ te̤we̤bò bǎ Ye̤shǔ kòshî̌. 2Asî kè̌shǐ Běcǎ akhophijaû̌ toǒ ǎshǎ dě a shǔbò kû̌kò acǔde tò̤. Amûasǎ mî̌ asî sò̌yṳ hî̌ ta pwǐ ta̤subusaba ala̤klo ǒta bǎ ǎshǎ hǒtò̤ akha tobǎ shǔbòwǐ cǔde hǐnudě akhophijaû̌ toǒ ma̤kû̌ hǐnu tò̤. 3(Ma̤tèhî̌nudě Pharisè̌phû̌ toǒ ta lǒ̤꤮ bò Yṳ̌daphû̌ toǒnu a bǎ shǔbò lǒkho acǔde dě asî phî̌ǎnǒpwǎ shǎǎshǎo, asî pṳ̂měǐ lǒkho asî phiphu la̤klo toǒ. 4Asî dè ǒ dě klǎge hî̌dě a dè shǔbò acǔde tò̤ hî̌nu, asî ǎo dǐcǎ꤮ tò̤. Htohǒtò̤ asî pṳ̂měǐpe la̤klo ahǔwa̤ toǒnu a ǒplṳ̂pe. Kwè̌꤮ mî̌titè hî̌dě, asî shǔbòwǒ shiba toǒ, gopo̤ toǒ, balěbalo̤ toǒ, ta batîlî sîtoǒ.) 5Htodě Pharisè̌phû̌ toǒ ta pwa̤sû̌ǐ ta̤sû̌ta̤tòwò asara toǒ gwè Ye̤shǔ, “Na khophijaû̌ toǒ dě a gûma̤kû̌ pwǐ phiphu la̤klo sû̌ǐ kònu tò̤ ya? Bǎ asî ǎshǎoshi akhanu, a shǔbò kû̌ lǒkho acǔde tò̤ ma̤tè?” 6Ye̤shǔ hî̌shǔ asî, “Pwa̤po̤ Isaǐa pwe̤ǐnǎ sîwi̤sîkè̌ numî̌ a totǐ hǒ. Sî mî̌ pwa̤ jîcǒjîtè̤ ana̤ toǒ. Pwa̤po̤ Isaǐa khwè̌ bǎnukha dě a hî̌, Cǒmara hî̌ ta, a ‘Kòyò htǒotoǒ bè̌dubè̌na̤ lǒkho he ta akhû̌phě pwǎ̤ta a sò̌phlǒ numî̌ a ǒtepheyî̤pwǎ ta he. 7Asî sabahtò̌ he htǒonu amûasǎ ǒ dǐcǎ꤮ tò̤. Asî sû̌ǐtòwòǐ pwǎ kò ta kòyòhǎkhû̌phû̌ ala̤klo toǒ pwǎ̤tadě a hî̌ lǒkho ta a sû̌ǐtòwòǐ kò ta Cǒmara a ta̤mǎlò̤ toǒ.’ b 8Sî bè̌tephe khǒkè Cǒmara a ta̤mǎlò̤ toǒ dě sî pṳ̂gleměǐ lǒkho kòyòhǎkhû̌phû̌ a la̤bò̌la̤klo toǒ.” 9Htodě a hî̌ asî, “Ma̤pûhǐ sî pṳ̂měǐ sî la̤klo ta̤sû̌ta̤tòwò toǒ ayanudě, Cǒmara ta̤mǎlò̤ toǒnu, sî lîmò htè̌shǔjò mè̤mè̤̌. 10Mǒ̤jè hî̌, ‘Bè̌dubè̌na̤ namo̤napha nî̌,’ c dě ‘Kòyò htě a ǐsho amo̤apha tapwa̤pwa̤nu bǎ ma̤sikè yǎ.’ d 11Pwǎ̤ta sî nohî̌ kòmo̤kòpha, ‘Kǒ mo̤, kǒ pha, wûhta htě he tobǎ kè̌ǐkhwè̌ǐ ma̤jè yǎta sînu aǒ lè, pò̤̌ta he glè bè̌ǐ yǎta Cǒmara a ta̤ma̤lṳ,’ ▼▼(Kòba mî̌ ahè ta Ebrephû̌ ayo̤ amûasǎ mî̌ ta̤ma̤lṳ htě paǐ yǎta Cǒmara.)
sî nohî̌ kò ta kòmo̤kòpha hǐnu, 12Htodě sî noma̤jè kè̌ǐkhwè̌ǐpe asî ta amo̤apha tò̤. 13Hǐnu akhû̌akhî, sî ma̤phèkèbò Cǒmara ale̤ayo̤ hî̌nǎ htǒotoǒ hǒ, ma̤tè̤hî̌dě sî pṳ̂gleměǐ sî la̤klo dě sî ǐlò̤ tṳtṳ kòyò. Sî ma̤sǒsǒ hǐnu dě ahǔwa̤ toǒnu a ǒplṳ̂pe.” (Matěo 15:10-20)
14Dě Běcǎ Ye̤shǔ kaǎhèphǔ kòyò saprṳ̂ akòshî̌ dě a hî̌ asî, “Pṳ̂̌꤮ tapwa̤ gana̤de lǒkho he hî̌ sîhtǒo dě jipwi̤ kè̌lǎsî̌ya te̤mǎ lǒkho. 15Ta̤htě a ǒ akhlo dě a hènṳ kòyò tapwa̤pwa̤ akû toǒnu ama̤ phû̌mò̤jò nû̌û tò̤, pwǎ̤ta ta̤htě a ǒ kòyò sò̌phlǒkû dě a hǎhtò̌ toǒ numî̌ ama̤ phû̌mò̤pwǎ nû̌û.” 16(“Sî lǒ̤꤮ bò htǒotoǒ, sî dè sò̌yṳ sî̌ya hî̌dě, gana̤de lǒkho pû.”) ▼▼Kò khwè̌ lî̤ ta̤phě dě awǐkha toǒǒnu, a khwè̌nṳpadǒ lî̤htǒotama tò̤
17Ye̤shǔ hǎhtò̌cû̌ tephekè kòyò ǒwo̤kla dě bǎ a cû̌nṳ hǐdǒkû akhanu, akhophijaû̌ toǒ gwè nû̌û yo̤sǎkhěkhǒ amûasǎ toǒ. 18Dě a hî̌ asî, “Sî sî̌ya kû̌nò kò hǒtò̤ ya? Sî tobǎ sî̌ya ta, shǎǎ hî̌tètè̌꤮ bǎbǎ, a ǒ akhlo dě a hènṳ kòyòkû toǒ numî̌, ama̤ phû̌mò̤jò nû̌û tò̤. 19Ma̤tè̤hî̌dě shǎǎ htǒonu, a nṳ nû̌û sò̌phlǒkû mè̤tò̤, a nṳ nû̌û phuto̤gokû dě a bǎ hǎhtò̌cû̌kèpwǎ dokhlo.” (A hî̌ hǐnumî̌, a sò̌yṳ hî̌ ta, shǎǎ hî̌tètè̌꤮ bǎbǎ, ǎ mî̌ a nî̤bò pwǎ.) 20Htodě a hî̌, “Ta̤htě a ǒ kòyò sò̌phlǒkû dě a hǎhtò̌ toǒ numî̌ ama̤ phû̌mò̤pwǎ nû̌û. 21Ta̤htě a ǒ dě kòyò sò̌phlǒkû hǎhtò̌ toǒ numî̌ mî̌pwǎ ta̤gènè̤ phû̌mò̤shî̌hto toǒ, cû̌sǔnṳ mamǔmakhû ǒpelesesǎ, ǎhǔǎkě, ma̤si kòyò, cû̌sǔnṳ kòphû̌kòwṳ̂, 22Ta̤sò̌yṳsò̌bǎtûlû̌ta̤, ta̤sò̌khěkhû̌khwè kò, lòhǎlòhoǎ kòyò, ma̤putupatǎ pî̌lû̌pî̌lè ana̤, sò̌khěkòta̤, pi̤jishǐcǒ kòyò, phî̌dû̌na̤, ma̤ta̤ dě gènè̤ te̤mǎ tò̤. 23Ta̤ lǒ̤꤮ bò htě awǒtò̤ htǒotoǒnu a ǒ dě kòyò sò̌phlǒkû hǎhtò̌ dě ama̤ phû̌mò̤pwǎ kòyò.” Yṳ̌daphû̌ mè̤tò̤ tapwa̤ yṳǎ ta Ye̤shǔ glè ma̤jè nû̌û
(Matěo 15:21-28)
24Ye̤shǔ hǎhtò̌cû̌kè ta gûla̤ bǎnutò̤glò dě a hǎhtò̌cû̌to̤ gûla̤ tò̤glò, aphǔ ta Turǔwî̤ ta Sidowî̤nu. Htodě a cû̌nṳ hǐtama akû dě a sò̌yṳ ǐsî̌ya ana̤ ta kòyò saprṳ̂ htǒotoǒ tò̤ pwǎ̤tadě a ǒhǔjò tò̤. 25Mamǔ tapwa̤ gana̤de Ye̤shǔ awi̤akè̌ dě taplǎpa a hè gene̤lò̤saba dě Ye̤shǔ khò̌lopo̤kòshî̌. Dě Mamǔ htǒotapwa̤nu a phû̌mamǔ pî̌tî̌phû̌ ǒ tapwa̤ dě khînǎkhîno ma̤bǎ nû̌û ta. 26Mamǔ htǒotapwa̤ mî̌ Yṳ̌daphû̌ mè̤tò̤, a ǒ dě Shurǐgamo̤ ala̤, Phoniciagakû, dě aǒ ta a phû̌mamǔ tapwa̤. Dě a hè kwigwèbǎǐ gutṳgla Ye̤shǔ ta a glè wṳ̂hǎhtò̌kèbǎ nû̌û khînǎkhîno dě a phû̌mamǔ htǒonu akû. 27Htodě Ye̤shǔ hî̌ yǎ, “Phû̌ toǒnu a tobǎ ǎkǒobe wǐ, pa phî̌phû̌ htǒotoǒ ashǎǎ dě bǔǎkè yǎta Chyǐ toǒ numî̌ a gwatò̤.” (Ye̤shǔ hî̌ ta phijaû̌phû̌htǒo amûasǎ mî̌ Yṳ̌daphû̌ htě Chyǐ a hî̌ numî̌ Yṳ̌daphû̌ mè̤tò̤ toǒ.) 28Pò̤̌ta a hî̌shǔ Ye̤shǔ, “A mè̤na̤cè̌ Běcǎ, Chyǐ ǒ dîjowa̤ ala̤ toǒnu a bǎ ǎnòpwǎ phû̌ toǒ ashǎǎ lò̤gulò̤wṳ̂nu toǒ pwǎ.” 29Ye̤shǔ hî̌ yǎ, “Na hî̌shǔ gesǒ ta̤htǒo awǒ mè̤mè̤̌ akhû̌akhî, na ge dě hǐ mî̌ anî̤ hǒ. Khînǎkhîno ǒ dě na phû̌mamǔ akûnu tado hǎhtò̌cû̌kè hǒ.” 30A ge ahǐ dě a kè̌shǐ ta a phû̌mamǔ hǎmoǒlò̤ la̤mi̤khû̌ dě a sî̌ya ta khînǎkhîno hǎhtò̌cû̌kè nû̌ûkû hǒ.Ye̤shǔ ma̤hǎmǎ bǎ kòyò nò̌kukoo htě a pè̌ tapwa̤
31Htodě Ye̤shǔ ǒphǔ te̤we̤bǎ Turǔwî̤nu dě a nṳ cû̌tûlû̌ Sidowî̤, htodě a gesǒ dě Galilî̌a shidû̌shite̤we̤kû. Shidû̌shite̤we̤ htǒonu a ǒphǔ ta wî̤shǐ htě kò kaǎ yǎta Dekapolǐ htǒonu taga akû. 32Kòyò toǒ kaǎhènṳ kòyòmakhû nò̌kukoo htě a pè̌ ǒò̌ hî̌bǎhǎhtò̌ kèdè̌kòdò tapwa̤ Ye̤shǔ ǒ dě asî kwigwèbǎǐ gutṳgla Ye̤shǔ ta a glè dò̌htò̌ acǔde dě alo̤. 33Dě Ye̤shǔ kaǎhǎhtò̌ tephecû̌khǒkè tû̌ kòyòmakhû htǒotapwa̤ bǎ kòyò ǒwo̤kla dě ashunṳ acǔmṳ dě kòyòmakhûnu tapwa̤ a nò̌kukû dě a htû̌phlěcǒ aplěshi ta acǔmṳtama a tè̌ nû̌ûta kòyòmakhûnu tapwa̤ aplî̤. 34Htodě a kè̌htò̌ mǒkhû̌ dě a sǎbò̌htò̌, dě a hî̌ nû̌û, “Ephata!” amûasǎ mî̌ “Lîhtò̌mò̌!” nupwǎ. 35Dě kòyòmakhûnu tapwa̤ nò̌ku phlogesǒ ta aplî̤jage dě a hî̌bǎjò wǒ gesǒ. 36Ye̤shǔ hî̌ asî ta pwe̤ǐpû kò dǐpwǎ̤꤮ ma̤ nî̌꤮, a hî̌ asî hǐnu pwǎ̤tadě Ye̤shǔ nopwe̤ǐlṳnû̌û tò̤ taoo, asî pwe̤ǐlṳ shû̌ taoo. 37Dě kòyò lǒ̤꤮ bò htě a gana̤de toǒnu, a sû̌pi̤sò̌pi̤ jòjî̌꤮ lǒkho tò̤. Dě asî hî̌ lǒkho, “Lǒ̤꤮ bò a ma̤ta̤ toǒ numî̌ awǒ mè̤mè̤̌! Kòyò nò̌kukoo mî̌ a ma̤phloge, kòyò pè̌ mî̌ a ma̤hî̌bǎjò wǒ gesǒ bǎ kò nî̌,” a hî̌ lǒkho hǐnu.
Copyright information for
KxfSCKRC