Mark 9
1Ye̤shǔ hî̌ akhophijaû̌ ta kòyò toǒ, “He hî̌ mè̤mè̤̌ sî, kòyò htě a ihtǒ ǒbǎ sîkla htǒotoǒnu, bǎ asî si hǒtò̤kha, asî kè̌shǐbǎ lǒkho Cǒmara hè pǒshipǒga ta a ta̤po̤ta̤phǎ pě.”Ye̤shǔ na̤klû htû̌lè̌khǒkè
(Matěo 17:1-13; Lǔka 9:28-36)
2Mṳni̤ susǒ behtonu Běcǎ Ye̤shǔ kaǎnṳ Petru, Jǎgomo̤ ta apṳ Jowǎ̤ni̤ dě a cû̌htò̌ kholohtò̌yî̤ tama alo̤. Bǎ a ǒkû̌ ta asî akhanu, Běcǎ Ye̤shǔ ana̤ htû̌lè̌tèplè̌ khǒbò dě asî lo̤mo̤. a 3A hǐdopo̤to̤ toǒnu abûshěrakhahtò̌bò dě a bûsǔlǔkhlope ta kò shǔjabò hǐdopo̤to̤ bǎ hǎkhû̌nu. 4Hǐnuhtodě akhophijaû̌ sò̌su kè̌shǐ pwa̤po̤ Èlî̌a dě꤮ awǐkhanu tapwa̤ ta Mǒ̤jè ǒlṳhtò̌ dě asî hî̌bǎ lǒkho ta Běcǎ Ye̤shǔ. 5Petru hî̌ Ye̤shǔ, “Sara꤮, gûla̤ bǎo tò̤glò mî̌ awî̤ amo̤wǒ lè. Pa glè ma̤htò̌bǎ sî hǐphû̌ suma, tamamî̌ naya, tamamî̌ Mǒ̤jè aya, tamamî̌ pwa̤po̤ Èlî̌a aya.” 6Asî ǐsha tûlû̌shû̌ dě Petru tobǎ hî̌ hî̌tènu a sî̌yape tò̤ akhû̌akhî, a hî̌htò̌ pwǎ hǐnu. 7Dě poǒlṳ tebě lò̤jobǐkè asî dě yo̤pwe̤htò̌ poǒlṳklanu dě a hî̌, “Htǒotapwa̤ mî̌ hephû̌khû htě he mo̤ǐyǎ tapwa̤, dě gana̤de lǒkho ayo̤ nî̌꤮.” b 8Ǒ teděsǎphû̌ dě asî kè̌te̤we̤ ta kè̌shǐ pwǎpǒ̤ Ye̤shǔ tapwǎ̤꤮ pa, dě ahǔwa̤ sò̌gini̤nu kè̌shǐpe nû̌ûtò̤. 9Bǎ asî ǒ kholokhû̌ hǎte̤ akhanu, Ye̤shǔ mǎnǎ asî yo̤sǎ, “Lǒ̤꤮ bò sî kè̌shǐ htǒotoǒnu pwe̤ǐlṳ pûma̤ kò dǐpwǎ̤꤮ ma̤ nî̌꤮, kòyòphû̌khû mî̌ he htǒo htûpwa̤gesǒ ta ta̤si pě hǐnudě pwe̤ǐlṳnǒ kò nî̌꤮,” a mǎnǎ asî hǐnu. 10Dě asî ma̤pwǐ Ye̤shǔ mǎnǎ asînu pwǎ̤tadě asî pwe̤ǐ kè̌khînû̌û tapwa̤ ta tapwa̤ dě a hî̌ lǒkho, “Ta̤si htûpwa̤gesǒ amûasǎ mî̌ titè ya.?” A gwèbò nû̌û hǐnu. 11Asî gwè Ye̤shǔ, “Pwa̤sû̌ǐ ta̤sû̌ta̤tòwò asara toǒ hî̌ ta pwa̤po̤ Èlî̌a bǎhèwǐkhlo ta Mè̤shǐa htě a ma̤lû̌htò̌ge kò htǒonu tapwa̤ pě, a cû̌hî̌tǒ̤ hǐnu ma̤tè?” c 12Dě a hî̌shǔ asî, “Pwa̤po̤ Èlî̌a bǎ hèwǐpě dě a bǎ hè tîwî̌tòwò ma̤wǒgesǒ ta̤lǒ̤꤮ bò numî̌ a mè̤mè̤̌ lè. Pwǎ̤ta lî̤cahtǐ hî̌ ta kòyòphû̌khû htǒo a tobǎ khòbǎ plṳ̂ ta̤jîta̤jû pě dě kò sǒcû̌tephekè yǎ pě a cû̌hî̌tǒ̤ hǐnuma̤titè? 13Pwǎ̤ta he hî̌ sî, pwa̤po̤ Èlî̌a ▼▼Ye̤shǔ hî̌ “Èlî̌a,” amûasǎ mî̌ pwa̤ploshi Jowǎ̤ni̤
hèhtohǒ dě kòyò toǒ ma̤ nû̌û jǔ꤮ asî sò̌phlǒ sò̌yṳ ma̤ nû̌ûnu pwǎ. Htǒomî̌ a htûhtò̌ pwǐ lî̤cahtǐ khwè̌nǎ awi̤akè̌nu hǒ.” Ye̤shǔ ma̤hǎmǎ phijaû̌makhûphû̌ htě khînǎkhîno ma̤bǎ yǎ tapwa̤
(Matěo 17:14-20; Lǔka 9:37-43)
14Bǎ Ye̤shǔ ta akhophijaû̌ sò̌su cû̌to̤ dě akhophijaû̌ ahǔwa̤ toǒ a ǒ akhanu, a kè̌shǐ kòyò saprṳ̂saphǎ hèǒhtuǒplǒ te̤we̤bò asî dě pwa̤sû̌ǐ ta̤sû̌ta̤tòwò asara toǒ hèhtè̌còwò lǒkho ta asî. 15Bǎ kòyò saprṳ̂ kè̌shǐ Ye̤shǔ akha, taplǎpa asî sû̌pi̤sò̌pi̤ lǒkho dě asî khlè̌cû̌ hî̌bǎ gòyò̤mò̤mṳ lǒkho Ye̤shǔ. 16Dě Ye̤shǔ gwè akhophijaû̌ toǒ, “Mî̌ sî htè̌còwò lǒkho asî ta ta̤wi̤ta̤kè̌ titè?” 17Dě kòyò saprṳ̂ aklanu kòmakhû ǒ tapwa̤ dě a hî̌shǔ Ye̤shǔ, “Sara꤮ he kaǎhènṳ he phû̌makhû htě khînǎkhîno ma̤bǎ yǎ dě a hî̌bǎjò tò̤ tapwa̤ dě naǒ. 18Khînǎkhîno ma̤bǎ yǎ bò̌khòtè꤮ nu bǎbǎ a bè̌ lòkhǔpo̤ ana̤ hǎkhû̌ dě agokû bǒbè̌hǎhtò̌bò. Htodě a gwî akhû̌khi dě ana̤ shotuklǔbò. He kwigwèbǎǐ nakhophijaû̌ toǒ dě a glè wṳ̂hǎhtò̌kè bǎ nû̌û khînǎkhînohtǒo pwǎ̤ta asî wṳ̂hǎhtò̌pè̤ nû̌ûtò̤.” 19Dě Běcǎ Ye̤shǔ hî̌ asî, “Kòyò shodota̤yṳ sî꤮, mî̌ he bǎ ǒyî̤kû̌pe ta sî pwî̌tè pě? He tobǎ khòsò̌do ǒyî̤kû̌pe sî pwî̌tè? Kaǎhè yǎ dě he ǒ bǎo.” 20Dě asî kaǎhè phijaû̌makhûphû̌nu tapwa̤ dě Ye̤shǔ ǒ. Bǎ khînǎkhîno kè̌shǐ Ye̤shǔ akha taplǎpa a ma̤ tṳplṳhtò̌shû̌ phijaû̌makhûphû̌ htǒotapwa̤ dě lòkhǔpo̤ hǎkhû̌ a htû̌toklotèplè̌ ana̤ bǎnu dě agokû bǒbè̌hǎhtò̌bò. 21Dě Ye̤shǔ gwè phijaû̌phû̌nu tapwa̤ apha, “A ma̤ hǐnu numî̌ ayî̤ hǒ ya?” Dě a hî̌shǔ nû̌û, “A ma̤pe dě a phijaû̌kha nupe. 22Khînǎkhîno sò̌yṳ ma̤si nû̌û dě a ma̤ lòkhǔpo̤nṳ sala̤ nû̌û dě mî̌kla, a ma̤ lò̤te̤nṳ sala̤ nû̌û dě shikla. Na dè ma̤jònu gwèbǎǐ ta ma̤jè mò̌ pa ta꤮.” 23Dě Ye̤shǔ hî̌ yǎ, “Ma̤tè̤dě na cû̌ hî̌tǒ̤ ta, ‘Na dè ma̤jò,’ hǐnu ma̤tè? Kòyò tapwa̤pwa̤ htě a yṳǎ Cǒmara numî̌ a ma̤jòbò pwǎ pṳ̂̌꤮ tacǎ.” 24Taplǎpa phijaû̌ apha yi̤kǒ hî̌, “He yṳǎ, pwǎ̤tadě he ta̤yṳ ǒpî̌tî̌ akhû̌akhî, ma̤pûhǐ he ta̤yṳ shû̌sho ayanu, ma̤jèpû he!” A yi̤kǒ hǐnu. 25Bǎ Ye̤shǔ kè̌shǐ ta kòyò saprṳ̂ khlè̌hèphǔ plṳ̂ nû̌û akhanu, a sǎhtǎ khînǎkhîno phû̌mò̤ htǒonu ta, “Kǒ khînǎkhîno phû̌mò̤ htě a ma̤koo kòyò nò̌ku ta a ma̤pè̌ kòyò htǒotapwa̤, he nohǎhtò̌cû̌ tephekè na dě phijaû̌makhûphû̌ htǒotapwa̤ akû hǒ, na bǎ gesǒ pě dǐkhò̌꤮ tò̤ nî̌,” a hî̌hto hǐnu dě, 26Khînǎkhînohtǒo yi̤kǒhtò̌ dě a ma̤ tṳplṳshû̌tṳplṳshohto phijaû̌makhûphû̌nu tapwa̤ dě a hǎhtò̌cû̌kè nû̌û kû. Dě phijaû̌makhûphû̌ htǒotapwa̤nu, a sǒsǒkè ta a si. Dě kòyò toǒ hî̌ lǒkho, “A sikèhǒ” a hî̌ lǒkho hǐnu. 27Pwǎ̤ta Ye̤shǔ cǐihtǒ nû̌û dě a ihtǒbò̌ gesǒ. 28Ye̤shǔ ma̤hto hǐnudě, bǎ a ta akhophijaû̌ toǒ getîkhîsǒ hǐ htě kò ǒ dǐpwǎ̤꤮ tò̤ nutama akû akhanu, akhophijaû̌ toǒ gwè nû̌û, “Pa wṳ̂hǎhtò̌pè̤kè khînǎ tò̤ ma̤tè?” 29Dě Ye̤shǔ hî̌ asî, “Khînǎkhîno hǐnu toǒ numî̌ sî wṳ̂hǎhtò̌bò̌ pwǎpǒ̤ yǎ ta ta̤kwisaba tacǎ pa.”Ye̤shǔ hî̌ gesǒ ta ata̤si awi̤akè̌
(Matěo 17:22-23; Lǔka 9:43-45)
30Ye̤shǔ ta akhophijaû̌ toǒ hǎhtò̌cû̌htokè ta gûla̤ bǎnu dě asî cû̌bò̌tûlû̌ Galilî̌agakûnu. Ye̤shǔ sò̌yṳ nosî̌ya kò dǐpwǎ̤꤮ tò̤, 31Ma̤tè̤hî̌dě a sû̌ǐtòwòǐ akhophijaû̌ toǒ dě a hî̌ asî, “Kòyòphû̌khû mî̌ hehtǒo, kò shaǎlò̤kè yǎ dě kòyòhǎkhû̌phû̌ a cǔdekû pě dě asî ma̤si he pě. He sihto suni̤ pěnu, he htûpwa̤gesǒ pě.” 32A khophijaû̌ sî̌yaphlowǒ a ta̤sû̌ǐtòwòǐ htǒo amûasǎ tò̤ pwǎ̤tadě asî gwèbǔ nû̌û dǐpwǎ̤꤮ tò̤.Kòyò htě a glè dû̌htûgutṳ̌ mî̌ ûpè?
(Matěo 18:1-5; Lǔka 9:46-48)
33Ye̤shǔ ta akhophijaû̌ cû̌to̤ Kaperanòwî̤ dě bǎ asî cû̌nṳǒ hǐkû akhanu, a gwè akhophijaû̌ toǒ, “Bǎ sî cû̌ klè̌lo̤ akhanu, sî hî̌bǎ cû̌ kwè̌꤮ nû̌û titè?” 34Bǎ asî cû̌ klè̌lo̤ akhanu, asî htè̌cû̌ kè̌khînû̌û ta dě pakla htǒonu, ûpè htûdû̌gutṳ̌pě awi̤akè̌ akhû̌akhî, asî ǒsî̌tukǔ lǒkho pwǎ, a hî̌ geshǔ nû̌û dǐcǎ꤮ tò̤. e 35Ye̤shǔ hǎnòò̌ dě a kaǎhè asî akòshî̌ dě a hî̌ asî, “Kòyò htě a sò̌yṳ htûdû̌gutṳ̌ tapwa̤ numî̌ a tobǎ ǒ kò la̤ dě a bǎ htûbò bǎ kò pṳ̂̌꤮ tapwa̤ a pwa̤ma̤ta̤.” f 36Htodě a kaǎhè phijaû̌ tapwa̤ dě a nohè ihtǒ ǒ nû̌û asîkla dě a phǒhtò̌ nû̌û dě a hî̌ asî, 37“Kòyò htě a kè̌ hemi̤sǎ dě a dè gòyò̤mò̤mṳ phijaû̌phû̌ lò̤ta htǒotapwa̤ tapwa̤pwa̤nu agòyò̤mò̤mṳ he hǒ. Htodě kòyò htě a gòyò̤mò̤mṳ he tapwa̤pwa̤nu asǒsǒta agòyò̤mò̤mṳ pwa̤htě a nohè he bǎonu tapwa̤ hǒ.” gKòyò htě a ma̤takǎ pa tò̤ numî̌ a ǒplǒkû̌ ta pa tṳ̂prṳ̂pa
(Lǔka 9:49,50)
38Jowǎ̤ni̤ pwe̤ǐlṳ Ye̤shǔ, “Sara꤮ pa kè̌shǐ kòyò tapwa̤ dě a cû̌ wṳ̂hǎhtò̌pè̤kè khînǎkhîno toǒ ta nami̤. A ǒplǒkû̌ pa aprṳ̂kû mè̤tò̤ dě pa hî̌ dǐdòkè yǎ.” 39Pwǎ̤tadě Ye̤shǔ hî̌shǔ asî, “Hî̌ dǐdò ma̤ yǎ ma̤, kòyò tapwa̤pwa̤ htě a ma̤ htûhtò̌ ta̤cǒklî̌kî̌ya tukǔkǔ ta he mi̤nu anǒkòpěnu a pi̤jishǐcǒ yûkǎkrîpe he tò̤. 40Kòyò htě a sò̌khě pa tò̤ toǒ numî̌ a ǒplǒkû̌pwǎ ta pa tokho. h 41He hî̌ mè̤mè̤̌ sî, sî gû hekò akhû̌akhî, kòyò tapwa̤pwa̤ dè ǐoshǔ sî shi taba hî̌numî̌ a nî̤bǎ mè̤mè̤̌ ta̤ma̤khû̌kǎ pě. iKòyò htě a ma̤sǔ phijaû̌phû̌
(Matěo 18:6-9; Lǔka 17:1-2)
42“Kòyò tapwa̤pwa̤ dè noma̤sǔ phijaû̌pî̌tî̌gutṳ̌ htě a yṳǎ he htǒotoǒ akla tapwa̤pwa̤ hî̌nu, co shǔtò̤la̤wi̤lo̤dû̌ a gobolo̤nu dě wîlò̤te̤kè yǎ shidû̌shite̤we̤kû numî̌ awǒkhlope nû̌ûya. 43Na cǔde dè noma̤ na ta̤sǔ hî̌dě pe̤tṳkè yǎnu. Na cǔdetṳ tokho dě na geginṳbò̌ mǒkhû̌nu, awǒkhlope ta na cǔde ǒpṳ̂̌bò ginǐ̤kho. Na geginṳ dě mǒkhû̌ ta na cǔdetṳ htǒotokho pwǎnu, awǒkhlope ta na cǔde ǒpṳ̂̌bò ginǐ̤kho dě na lò̤te̤ ngariǒkû htě mî̌ pi̤jòpe dǐkhò̌꤮ tò̤ htǒonu akû. j 44(Bǎnu tò̤glò pěnu lǒgwa glè ǎ asî yî̌ dě lǒgwa htǒotoǒnu a sipè̤tò̤ dě mî̌ htě a gè asî htǒonu, a pi̤pè̤pe dǐkhò̌꤮ tò̤.) ▼▼Kò khwè̌ lî̤phě dě꤮ nukha toǒǒnu, lî̤cahtǐ aglòpî̌tî̌ htǒotòkrònu a ǒpa tò̤
45Na khò̌lopo̤ dè noma̤sǔ na hî̌dě pe̤tṳkè yǎnu. Na nṳ dě mǒkhû̌ ta na khò̌lopo̤tṳ htǒotokho pwǎnu, awǒkhlope ta na khò̌lopo̤ ǒpṳ̂̌bò ginǐ̤kho dě kò wîlò̤te̤kè na ngariǒkû akû htǒonu. 46(Bǎnu tò̤glò pěnu, lǒgwa glè ǎ asî yî̌ pě dě lǒgwa htǒotoǒnu a sipè̤ dǐkhò̌꤮ tò̤ dě mî̌ htě a gè asî htǒonu, a pi̤pè̤pe dǐkhò̌꤮ tò̤.) ▼▼Kò khwè̌ lî̤phě dě nukha toǒǒnu, kò kè̌shǐ lî̤cahtǐ htǒonu ǒpa tò̤
47Nami̤sǎ dè noma̤ na ta̤sǔ hî̌dě cîwîhtò̌kè yǎ dě wîkè yǎnu. Nami̤sǎ ǒpwǎ tokho pa dě na geginṳbò̌ mǒkhû̌nu awǒkhlope ta nami̤sǎ ǒpṳ̂̌bò ginǐ̤kho dě kò bǎ wîlò̤te̤kè na ngariǒkû pěnu. m 48Bǎnu tò̤glò pěnu, ‘Lǒgwa glè ǎ asî yî̌ pě dě lǒgwa htǒotoǒnu, a sipè̤ dǐkhò̌꤮ tò̤. Mî̌ htě a gè asî htǒonu, a pi̤pè̤pe dǐkhò̌꤮ tò̤.’ n 49Kòyò pṳ̂̌꤮ pwa̤ bǎ ma̤mṳ̂plîgesǒ yǎta mî̌, pwǐ kòyò lṳtòhtò̌ ta̤phû̌ta̤li̤ dě ama̤mûplî nû̌ûta îsǎnu pě. ▼▼Kòyò toǒǒnu a hî̌ ta lî̤cahtǐ htǒotama amûasǎ mî̌ a sò̌yṳ hî̌ ta khòbǎ ta̤ma̤jîma̤jûnu alò̤ta mî̌ ma̤mṳ̂plîkè kò lṳhtò̌ ta̤phû̌ta̤li̤nu. Pò̤̌ta toǒǒnu a hî̌ ta kòyò htě a yò̤lò̤ge ata̤sǔ tò̤ toǒnu, kò cèròkè yǎ dě ngariǒkûnu ta mî̌ pě.
50“Îsǎ numî̌ awǒ pwǎ pwǎ̤ta a dè shuhape tò̤ hî̌nu ma̤shuha gesǒ yǎnu anî̤pe tò̤. Sî bǎ ǒǐ lǒkho îsǎ, îsǎ mî̌ ta̤bǒsû̌khǎkho nû̌û tapwa̤ ta tapwa̤, htohǒtò̤ ǒhtuǒplǒ mo̤klaǐ pû nû̌û tapwa̤ ta tapwa̤ htǒonu nî̌꤮.” p
Copyright information for
KxfSCKRC