Mark 10:17-31
Kòyò dû̌yò̤htò̌sa tapwa̤ hî̌bǎ ta Ye̤shǔ
(Matěo 19:16-30; Lǔka 18:18-30)
17Bǎ Ye̤shǔ sahtò̌ hǎhtò̌cû̌kè akhanu, kòyò tapwa̤ khlè̌hè nû̌ûǒ dě a hè gene̤lò̤ nû̌û lo̤mo̤ dě a gwè Ye̤shǔ, “Kǒ sarawǒ꤮ ma̤pûhǐ he nî̤bǎ kû̌kò yolahtûpwa̤ tûjûpwa̤ talakhǎnu dě, he tobǎ ma̤kwè̌꤮ mî̌titè?” 18Ye̤shǔ gwè yǎ, “Na cû̌kaǎ tǒ̤ he ta sarawǒ ma̤tè? Kòyòwǒ ǒ dǐpwǎ̤꤮ tò̤, a ǒ pwǎpǒ̤ Cǒmara tapwǎ̤pa. 19Na sî̌ya Cǒmara ta̤mǎlò̤ toǒ hî̌ ta, ‘Ma̤si ma̤ kòyò ma̤, a cû̌sǔnṳ ma̤ kòphû̌kòma ma̤, b ǎhǔǎkě ma̤ kòta ma̤, c lòhǎlòho ma̤ ta̤ ma̤, d cû̌ǎtṳma̤tṳ ma̤ kòkhû̌ ma̤, e bè̌dubè̌na̤ namo̤napha.’” f 20Dě a hî̌shǔ Ye̤shǔ, “Sara꤮ htǒotoǒnu he to̤ǐ htobòhǒ dě he ma̤htobò dě he phijaû̌khanupe.” 21Dě Ye̤shǔ kè̌ jèwè̤꤮ nû̌û dě a gwèbǎǐ nû̌û dě a hî̌, “Ta̤htě na lo̤bǎma̤nu a ǒpe tacǎ, ge shaǎkèbò na ta̤kî̌ta̤kû̌nu toǒ dě ǐkè yǎta kòyò shuphǔshèwèphû̌nu. Na dè ma̤hǐnu hî̌dě na nî̤bǎ ta̤dû̌yò̤htò̌sa dě mǒkhû̌ pě. Gema̤hto hǐnu dě hè gûkû̌ hekò.” 22A dû̌yò̤htò̌sa tûlû̌shû̌lě akhû̌akhî, bǎ a gana̤dehto Běcǎ Ye̤shǔ hî̌ nû̌û pwǐhè̌o akhanu, a sû̌pi̤sò̌pi̤ htodě a mi̤sǎpi̤ dě a hǎhtò̌gekè. 23Ye̤shǔ kè̌te̤we̤lṳ̂ dě a hî̌ akhophijaû̌ toǒ, “Kòyò dû̌yò̤htò̌sa toǒ glè nṳ dě Cǒmara ashiaganu, apò̤ jî̌꤮ le asîya!” 24Akhophijaû̌ toǒ gana̤de nû̌û hî̌bǎ hǐnu dě a giti̤bòkè nû̌û. ▼▼Yṳ̌daphû̌ toǒ gènè̤ ta Cǒmara howi̤ pwa̤dû̌yò̤htò̌sa dě a cû̌ mǒkhû̌ pě
Htodě a hî̌ gepo̤ asî, “Hephû̌ sî꤮, kò glè nṳ dě Cǒmara ashiaganu apò̤mè̤mè̤̌꤮. 25Tîsî̌budû̌ tado glè plî̌nṳ dě htò̌nè̌kûnu ayûkhlope ta kòyò dû̌yò̤htò̌sa tapwa̤ glè nṳ dě mǒkhû̌ shila̤gakûnu.” 26Akhophijaû̌ toǒ sû̌pi̤sò̌pi̤bò dě asî hî̌ kè̌khînû̌û, “Dè ma̤hǐnudě ûpè tapwa̤ glè nî̤bǎjòpe ta̤ma̤lû̌htò̌ge pè?” 27Ye̤shǔ kè̌ asî dě a hî̌ asî, “Kòyòhǎkhû̌phû̌ ma̤lû̌htò̌gejò tû̌ ana̤tò̤ pwǎ̤ta Cǒmara ma̤jòta̤ pṳ̂̌꤮ tacǎ akhû̌akhî, a ma̤lû̌htò̌gejò pwǎ.” 28Petru hî̌ nû̌û, “Kè̌mò̌, pa bè̌kèbò ta̤pṳ̂̌꤮ tacǎ dě pa gûkû̌ nakò hǒ.” 29Ye̤shǔ hî̌ yǎ, “He hî̌ mè̤mè̤̌ sî, heya ta he ta̤sò̌le̤sò̌lò̤ awi̤akè̌ aya dě kòyò tapwa̤pwa̤ dè bè̌kè ahǐaphò ta apṳmakhû, apṳmamǔ, amo̤apha, aphû̌ali̤, ta ahǔkla sîtoǒ hî̌nu, 30A ǒhtûpwa̤ htǒo tuhtunu, a nî̤bǎ dû̌htò̌ khlopo̤ ahǐ, apṳma̤khû, apṳmamǔ, amo̤apha, aphû̌ali̤, ahǔkla sîtoǒ aplǎ ta̤ya̤ pě. Pwǎ̤tadě kò ma̤jîma̤jû yǎ pě. Nǒkò tuhtu dě a nî̤bǎ yolahtûpwa̤ tûjûpwa̤ talakhǎ pě. 31Pwǎ̤ta kòyò ǒ dě alo̤mo̤ toǒnu, a ǒkè dě nǒkò pě, dě kòyò ǒ anǒkò toǒnu a ǒkè dě alo̤mo̤ pě, ▼▼Kòyò ǒ dě anǒkò amûasǎ mî̌ kòyò htě kò gènè̤pî̌tî̌ nû̌û. Kò lo̤bǎdû̌ nû̌ûtò̤ toǒnu. Cǒmara bè̌dû̌ nû̌û, ma̤hǐnudě kòyò htě aǒ dě alo̤mo̤ mî̌ kòyòhǎkhû̌phû̌ bè̌dû̌lǒ nû̌û hǐnudě Cǒmara bè̌pî̌tî̌ nû̌û pě
” Ye̤shǔ hî̌ bǎ asî hǐnu. i
Copyright information for
KxfSCKRC