Mar 10:35-45 | KxfSCKRC | STEP | Sebedè̌o aphû̌khû Jǎgomo̤ ta Jowǎ̤ni̤ hèphǔ Ye̤shǔ ǒ dě a hî̌ nû̌û, “Sara꤮ pa kwi na titè bǎbǎ, pa sò̌yṳ noma̤ na.”

Mark 10:35-45

Jǎgomo̤ ta Jowǎ̤ni̤ a ta̤kwi

(Matěo 20:20-28)

35 Sebedè̌o aphû̌khû Jǎgomo̤ ta Jowǎ̤ni̤ hèphǔ Ye̤shǔ ǒ dě a hî̌ nû̌û, “Sara꤮ pa kwi na titè bǎbǎ, pa sò̌yṳ noma̤ na.”

36 Ye̤shǔ hî̌shǔ asî, “Sî sò̌yṳ noma̤ he titèya?”

37 Dě asî hî̌shǔ nû̌û, “Bǎ na htò̌ hǎnòò̌ nashinaga dě na ǒ ta ta̤sîrîdû̌sîrîhtû akû pěnu, ǐhǎnòò̌ dǒkû̌ pa dě na cǔdemû tokho tapwa̤, ta dě na cǔcocî̌ tokho tapwa̤ pě nî̌꤮.”

38 Dě Ye̤shǔ hî̌shǔ asî, “Sî kwi ta̤htǒonu sî sî̌ya lǒkho awi̤akè̌ tò̤. Ta̤jîta̤jû ashiba htě he glè̌ o htǒonu sî obò̌kû̌ pû pěya? Htodě ta̤khòjîkhòjû htě he glè̌ khòbǎ htǒo pě numî̌ sî khòbò̌ kû̌pû pěya?” ^a

39 Dě asî hî̌shǔ nû̌û, “Pa khòbò̌kû̌ pwǎ.”

Dě Ye̤shǔ hî̌shǔ asî, “Shiba htě he glè̌ o htǒonu sî obǎ nǒ pě, htodě ta̤jîta̤jû htě he glè̌ khòbǎ htǒonu sî khòbǎ nǒ pě. 40 Pwǎ̤tadě la̤hǎnòò̌ agûla̤ dě cǔcocî̌ tokhonu bǎbǎ, dě cǔdemû tokhonu bǎbǎ, a ǒ dě he cǔdekû mè̤tò̤, Cǒmara ǐhǎnòò̌ gûla̤ htǒonu ta kòyò htě a tîwî̌tòwònǎ nû̌ûnu toǒ aya pě.”

41 Bǎ akhophijaû̌ htě a ǒkè pwa̤shǐ htǒotoǒ gana̤de a gwè pwǐhè̌o akhanu, asî sò̌phlǒdû̌ Jǎgomo̤ ta Jowǎ̤ni̤. 42 Hǐnudě Ye̤shǔ kaǎhè plǒbò asî dě a ǒ a hî̌ asî, “Sî sî̌yatû̌ ta Yṳ̌daphû̌ mè̤tò̤ toǒnu a ǒ ta a hǐkǒdû̌ dě a pǒǐ asî toǒ. Htodě shigaphû̌ hǐkǒdû̌ htǒotoǒnu a noǎ ǐtû̌ lǒkho a sîrîshû̌sho htǒonu dě shiphû̌gaphû̌ toǒ akhû̌. ^b 43 Pwǎ̤ta sî lǒ̤꤮ bò htǒotoǒnu sî tobǎ ma̤hǐnu tò̤. Dě sîklanu, kòyò tapwa̤pwa̤ dè sò̌yṳ htûdû̌htûpwa̤ hî̌dě a tobǎ htû sî pwa̤ma̤ta̤. ^c 44 Dě sîklanu, kòyò tapwa̤pwa̤ dè sò̌yṳ htû kòyò htě kò lo̤bǎdû̌gutṳ̌ nû̌û dèhî̌dě a tobǎ htû kòyò lǒ̤꤮ bò ajû. 45 Ma̤tè̤hî̌dě kòyòphû̌khû mî̌ hehtǒo, he hè ta kò glè ma̤bǎ heyanu mè̤tò̤. He glè hèma̤ pwǎbǎ kòyòya. Dě ma̤pûhǐ he htè̌ge asî yanudě, he ǐlò̤kè he ta̤htûpwa̤ ta kòyò saprṳ̂ aya.”