Mark 14

Kò sò̌yṳ ma̤sihǔ Ye̤shǔ

(Matěo 26:1-5; Lǔka 22:1-2; Jowǎ̤ni̤ 11:45-53)

1Bǎ ta̤cû̌tûlû̌pwè ta pwèǎmû̌ shodo ta̤bû bǎ hǒtò̤ ginǐ̤ni̤ akhanu, pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ kè̌lǎ klè̌klò dě a glè pṳ̂ ma̤sihǔkè Ye̤shǔ. ^a 2Ma̤tè̤hî̌dě asî hî̌, “Bǎ pa ma̤pwè akhahtǒonu pa to pṳ̂ yǎ tò̤, pěmî̌ kòyò saprṳ̂ toǒ sò̌phlǒdû̌ dě a ma̤kèsè̌kosǒbò hè̌.”

Mamǔ tapwa̤ plṳ Ye̤shǔ hǐkǒ ta shinṳmû̌

(Matěo 26:6-13; Jowǎ̤ni̤ 12:1-8)

3Bǎ Běcǎ Ye̤shǔ ǒ Betanǐdo dě Shîmǒ̤nè̤ htě ta̤shakroǎ nû̌û phělo̤nu tapwa̤ ahǐ dě a hǎnòò̌ ǎshǎ dîjowa̤ kòshî̌ akhanu, mamǔ tapwa̤ phî̌hènṳ pò̤ htě kò ma̤ yǎ ta lo̤bû dě a ǒbeta na̤du shinṳmû̌ le̤dû̌pwî̤htû acè̌ htǒotò̤pò̤. A hèdemo pò̤ akhû̌lǎ htǒodě a lò̌lò̤ nû̌û Běcǎ Ye̤shǔ hǐkǒlo̤. ^b

4Dě asîkla toǒǒnu a sò̌phlǒdû̌ dě a hî̌ kè̌khînû̌û, “A cû̌ ma̤kèma̤wṳ̂bò shinṳmû̌ hǐnumî̌ ma̤titè? 5Shinṳmû̌ htǒotò̤pò̤nu apwî̤ ǒ wûyî̌ Dina̤ri sujè ▼

▼Wûyî̌ Dina̤ri tabǎ mî̌ a gunò̤ ta ti̤ni̤ ata̤ma̤ khû̌kǎ.

shaǎkè yǎ dě cû̌ǐ yǎta kòyò hǒwi̤shèwèphû̌ numî̌ awǒkhlo,” asî hî̌hto hǐnu dě asî bè̌ lǒkho mamǔnu tapwa̤ a ta̤sǔ.

6Dě Ye̤shǔ hî̌ asî, “Ma̤dǐdò ma̤ yǎ ma̤. Sî cû̌ ma̤dǐdò yǎ ma̤tè? A ma̤tû̌ kǎlè. A ma̤wî̤ma̤wǒ ta̤ ta heya hǒ. 7Kòyò shuphǔshèwèphû̌ toǒ ǒkû̌dǒ ta sî pṳ̂̌꤮ taplǎ pě. Sî dè sò̌yṳ ma̤jè asî bò̌khòtè꤮ numî̌ anî̤ pwǎ, pwǎ̤ta he ǒlo̤lo̤ kû̌nǒ sî tò̤. ^d 8Mamǔ htǒotapwa̤nu pwî̌꤮ a ma̤bò̌nu dě a ma̤ htobǎ he hǒ. A hè plṳ hena̤ ta shinṳmû̌ htǒonumî̌ bǎ kò lǔlò̤ he hǒtò̤ htǒonu a tîwî̌tòwònǎwǐ ta̤ ta heya hǒ. 9He hî̌ mè̤mè̤̌꤮ sî, htû̌꤮ kò cû̌shido dǒhtû̌ǐ ta̤sò̌le̤sò̌lò̤ awi̤akè̌ htǒo bǎ hǎkhû̌ bǎotebě bǎtè꤮ tò̤glò pě bǎbǎ, kò gènè̤htò̌to̤bǎ yǎ pě dě kò pwe̤ǐlṳ ta̤htě a ma̤hto htǒonu pě.”

Yṳ̌da sò̌phlǒto ta a glè shaǎkè Ye̤shǔ

(Matěo 26:14-16; Lǔka 22:3-6)

10Dě Běcǎ Ye̤shǔ akhophijaû̌ shǐsò̌gini̤ akla ami̤ mî̌ Yṳ̌da Isakarǐo htǒotapwa̤nu, ma̤pûhǐ a shaǎlò̤kè Ye̤shǔnu a hǎhtò̌cû̌ dě pwa̤tòlûhtò̌ hǐkǒdû̌ toǒ a ǒ. 11Bǎ pwa̤tòlûhtò̌ hǐkǒdû̌ toǒ gana̤de ta̤wi̤ta̤kè̌ htǒo akhanu, asî sò̌le̤sò̌lò̤ olò̤mèlò̤shǔ Yṳ̌da ta asî ǐ nû̌û wû pě. Htǒotaplǎdě Yṳ̌da kè̌lǎ klè̌klò dě a glè shaǎlò̤kè Ye̤shǔ.

Ye̤shǔ ta akhophijaû̌ toǒ ǎ lǒkho ta̤cû̌tûlû̌pwè ashǎǎ

(Matěo 26:17-25; Lǔka 22:7-14; Jowǎ̤ni̤ 13:21-30)

12Bǎ pwè ǎmû̌ shodo ta̤bû awǐlǒ ti̤ni̤nu kò ma̤si sophû̌ dě kò ma̤lṳhtò̌ akha, Ye̤shǔ akhophijaû̌ toǒ gwè nû̌û, “Ta̤cû̌tûlû̌pwè lṳmṳhǎ shǎǎcahtǐ htǒonu, na sò̌yṳ nocû̌ma̤wǒ pa bǎtè tò̤glòtè?”

13Hǐnudě Ye̤shǔ no akhophijaû̌ sò̌gini̤ dě a hî̌ asî, “Cû̌nṳ wî̤kûnu sî kè̌shǐshǔ ta kòmakhû hèdò̌ jogeshi ta po̤hǎ pě tapwa̤. Dě gûgekû̌ akònu nî̌꤮. 14Dě gûge ginṳkû̌ yǎ dě a ge ginṳ hǐnu tama akû dě gwè hǐběcǎnu ta, ‘Sara hî̌, shǐtè̤mè̤ hǐdǒkû htě he ta he khophijaû̌ toǒ glè ǎo ta̤cû̌tûlû̌pwè la̤ǎ ayanu a ǒ bǎtè?’ gwè yǎ hǐnu. 15Htopědě a nè̌lṳ sî hǐdǒkû gûla̤lè̤ akhû̌nuto̤to̤ htě a ǒlǒǒbe ta ta̤kî̌ta̤kû̌ dě pa lo̤bǎnu toǒ pě. Dě ǒkè lǒkho bǎnu dě ma̤wǒ bǎ lǒkho pa shǎǎshǎo bǎnu nî̌꤮.”

16Akhophijaû̌ htǒosò̌gini̤ hǎhtò̌cû̌, a cû̌nṳ wî̤kû dě asî cû̌ kè̌shǐ mè̤mè̤̌ pwǐ Ye̤shǔ hî̌nǎ asînu. Dě asî cû̌ ma̤wǒnǎ lǒkho ta̤cû̌tûlû̌pwè shǎǎcahtǐ lṳmṳhǎ aya bǎnu.

17Bǎ lṳmṳkhǐpo̤lo̤ akhanu, Běcǎ ta akhophijaû̌ shǐsò̌gini̤ hèto̤dǒ bǎnu. 18Bǎ asî hǎnòò̌ ǎshǎ akhanu, Ye̤shǔ hî̌, “He hî̌ mè̤mè̤̌ sî, dě sîkla htǒonu, kòyò htě a ǎhtuohtu ta he dě a shaǎlò̤kè he pěnu a ǒ tapwa̤.” ^e

19Sahtò̌ bǎnu dě asî sò̌phlǒmo̤pe tò̤, asî gwè Ye̤shǔ tapwa̤ hto tapwa̤, “Na hî̌nu tapwa̤mî̌ he mè̤tò̤ yahî̌?” hǐnu.

20Ye̤shǔ hî̌shǔ asî, “Kòyò htǒotapwa̤ numî̌ bǎ sî shǐsò̌gini̤ htǒoaklanu pwǎ. A mî̌ kòyò htě a bǒnṳǎ kû̌dǒ ta he dě balo̤kûnu tapwa̤ hǒ. 21Pwǐ lî̤cahtǐkû hî̌nǎ ta kòyòphû̌khû mî̌ hehtǒo a bǎ si pě pwǎ̤ta kòyò htě a glè shaǎlò̤kè kòyòphû̌khû htǒotapwa̤nu, Cǒmara cèrò yǎ pě. A dè ǒphijaû̌lò̤ tò̤ hî̌numî̌ awǒkhlope nû̌ûya.”

Běcǎ ta̤ǎ lṳmṳhǎ shǎǎcahtǐ

(Matěo 26:26-30; Lǔka 22:14-23; Kòrî̌tiaphû̌ awǐlǒ tabǎ 11:23-25)

22Bǎ asî ǎshǎ akhanu, Ye̤shǔ phî̌ mû̌ dě hî̌bwǐhî̌sîrîhtò̌ Cǒmara htodě a bî̌phò̌ mû̌ a yṳ̂lò̤pa̤ akhophijaû̌ toǒ dě a hî̌, “Phî̌ yǎdě ǎ lǒkho, htǒomî̌ he na̤klû.”

23Htodě a phî̌ sobîshiba dě a hî̌bwǐhî̌sîrî Cǒmara htodě a yṳ̂lò̤pa̤ asî dě asî o lǒkho sobîshi pṳ̂̌꤮ tapwa̤.

24Dě Ye̤shǔ hî̌ asî, “Htǒomî̌ he sǐ htě a bǎ lò̌lò̤ bǎ kòyò saprṳ̂ aya pě. Htǒomî̌ ta̤ma̤dòǐ tacǎ dě a ma̤měma̤gle bǎ ta̤wṳ̂dò asa aya hǒ. ^f 25He hî̌ mè̤mè̤̌ sî, sahtò̌ khònò̤nu tǒ̤hè he openǒ sobîshi htǒo tò̤hǒ. He geoplǒsǒ sobîshi asa dě Cǒmara ashiaga pě.”

26Htodě asî sò̌po̤ htû̌sò̌ǐ Cǒmara alî̤sò̌po̤ to̤to̤ dě a hǎhtò̌cû̌kè Olivekholokhû̌.

Ye̤shǔ pwe̤ǐlṳnǎwǐ Petru glè la̤lò̤kè nû̌û

(Matěo 26:31-35; Lǔka 22:31-34; Jowǎ̤ni̤ 13:36-38)

27Ye̤shǔ hî̌ asî, “Cǒmara hî̌nǎ dě꤮ wǐnukha ta,

‘He po̤si pwa̤gèǐsophû̌ pě, dě sophû̌ toǒ khlè̌pò̌khlè̌shîbò pě,’ ^g lî̤cahtǐkû hî̌ hǐnu.

Sî lǒ̤꤮ bò htǒotoǒ numî̌ asǒsǒta sophû̌ htǒotoǒnu hǒ. Sî hǎhtò̌khlè̌ cû̌khǒkèbò hela̤ pě. 28Pwǎ̤tadě htû̌꤮ he si htûpwa̤gehtosǒ pěnu, he cû̌nǎwǐ sî dě Galilî̌a gakûnu pě.” ^h

29Petru hî̌shǔ yǎ, “Kòhǔwa̤ toǒ glè꤮ hǎhtò̌khlè̌ cû̌khǒkèbò ta na pwǎ̤ta he hǎhtò̌khlè̌ cû̌khǒ lòtṳ̌nǒ ta na tò̤.”

30Dě Ye̤shǔ hî̌shǔ yǎ, “He hî̌ mè̤mè̤̌ na, khò̌tasa bǎ shîphaû̌ ginǐ̤plǎ hǒtò̤nu, he sî̌yanǒ yǎ tò̤ na la̤lò̤kè he pě suplǎ.”

31Petru hî̌shǔge Ye̤shǔ, “He tobǎ si kû̌dǒ ta na bǎbǎ he sî̌yanǒ yǎ tò̤nu he hî̌nǒ dî̌kî̌꤮ tò̤,” a hî̌shǔ shû̌tuklǔ ayo̤ ta Ye̤shǔ, dě akhophijaû̌ ahǔwa̤ toǒnu, a gûhî̌ sǒsǒbò hǐnu pṳ̂̌꤮ tapwa̤.

Ye̤shǔ cû̌ kwisaba dě Jèshè̌mani

(Matěo 26:36-46; Lǔka 22:39-46)

32Asî cû̌ gûla̤ tò̤glò htě kò kaǎ yǎta Jèshè̌mani dě a hî̌ akhophijaû̌ toǒ, “Bǎ he cû̌kwisaba akhanu, hǎnòò̌ǒkè lǒkho bǎo nî̌꤮.” 33Dě a kaǎnṳ Petru, Jǎgomo̤ ta Jowǎ̤ni̤ dě a gûcû̌kû̌ nû̌ûkò. Dě Ye̤shǔ sahtò̌ sǎpla̤ bǎgubǎgè jî̌꤮ kè. 34Dě a hî̌ akhophijaû̌nu sò̌su, “A jî mè̤mè̤̌꤮ he sò̌phlǒ hǒ a to̤kè ta he glè̌ sitè̤tè̤nu hǒ, ǒkè lǒkho bǎo dě ǒsòklò lǒkho nî̌꤮.”

35– 36A cû̌ hèpo̤ alo̤mo̤ tîkî̌phû̌ dě a hǎmoǒ û̌tṳglulò̤ hǎkhû̌ a kwisaba dě a hî̌, “Ta̤jîta̤jû htě he bǎ khòbǎ khònò̤ htǒonu, na dè plûtûlû̌ cû̌bò̌kè bǎ he dě adènî̤ hî̌mî̌ plûtûlû̌ cû̌kè bǎ he,” a hî̌ hǐnu. Dě a kwisaba, “Abǎ, pha꤮, na ma̤jò ta̤lǒ̤꤮ bò, phî̌ tephekè bǎ he ta̤jîta̤jû aba htǒotabǎ. Pwǎ̤tadě jǔ꤮ he sò̌yṳ ma̤ tû̌ he sò̌phlǒ tò̤, jǔ꤮ tû̌pwǎ na sò̌phlǒ nî̌꤮.”

37A saba htodě a gesǒ dě a gekè̌shǐ ta akhophijaû̌nu sò̌su hǎmoǒ shope̤bò dě a gwè Petru, “Shîmǒ̤nè̤ mî̌ na hǎmoǒ shope̤ hǒ ya, na sòklò pwǎ ta̤na̤rî gûla̤ pwǎnu mî̌ a pè̤pe tò̤ ya.” 38A hî̌ lǒkho asî, “Ma̤pûhǐ sî cû̌nṳ kû̌dǒ pû dě ta̤htû̌sǒbǎ aphû̌mò̤ akû tò̤nu, sòklò dě kwisaba lǒkho nî̌꤮. Sî sò̌phlǒshû̌sho mè̤mè̤̌ ta̤htě ato, pwǎ̤tadě sî na̤klû htǒonu a khû̌ǎyû̌lò̤ jî̌kè.”

39Ye̤shǔ cû̌gesǒ taplǎ dě a kwisaba gesǒ Cǒmara sǒsǒta a saba wǐnu pwǎ. 40Htodě a gesǒ akhophijaû̌nu sò̌su ǒ dě a gekè̌shǐ asî hǎmoǒshope̤bò. Asî sǎhǎmoǒ jîtûlû̌shû̌ dě a kè̌htò̌bò̌pe tò̤. A to hî̌bǎshǔ lǒkho Ye̤shǔ hî̌tènu a sî̌yape lǒkho tò̤.

41Bǎ a gekè̌ asî behtò̌ suplǎtaplǎ akhanu, a hî̌ asî, “Sî hǎmoǒ sadape lǒkho, sî ǒkǔ sadape lǒkho hî̌tè? Pwî̌numî̌ apǒ hǒ. Gana̤de kè̌mò̌ lǒkho, khîkha htě kò glè shaǎlò̤kè kòyòphû̌khû htǒo dě ta̤ma̤sǔphû̌ toǒ a cǔdekûnu, a hèto̤hǒ. 42Ihtǒ mò̌! Pa bǎ cû̌hǒ! Kè̌mò̌děnu, kòyò htě a shaǎkè henu tapwa̤ hèto̤hǒ.”

Kò pṳ̂ Ye̤shǔ

(Matěo 26:47-56; Lǔka 22:47-53; Jowǎ̤ni̤ 18:3-12)

43Bǎ Běcǎ Ye̤shǔ hî̌bǎ pepwǎ akhanu, Yṳ̌da htě a ǒkû̌ ta akhophijaû̌ shǐsò̌gini̤ akla htǒotapwa̤nu a hèto̤ bǎnu. Dě kòyò gû hèplṳ̂ kû̌ nû̌û kò. Kòyò htǒotoǒnu a phî̌hènṳ lǒkho nò̌she toǒ, nò̌po̤ toǒ. Asî htǒotoǒ numî̌ mî̌pwǎ pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asaranu toǒ ta Yṳ̌daphû̌ hǐkǒdû̌nu toǒ nohè nû̌ûnu toǒ pwǎ.

44Pwa̤shaǎlò̤kè Běcǎ htǒotapwa̤nu a ǐsî̌yanǎwǐhto asî ta, “Kòyò htě he gomo̤ yǎ tapwa̤ numî̌ Ye̤shǔ htě pa sò̌yṳpṳ̂ yǎnu tapwa̤ hǒ dě hèpṳ̂ lǒkho yǎ dě pṳ̂měǐwǒ tû̌pû yǎ nî̌꤮.” 45Yṳ̌da hèto̤to̤ ta a cû̌to Ye̤shǔ ǒ dě a hî̌ nû̌û, “Sara꤮” htodě a gomo̤ nû̌û. 46A ma̤hǐnu htodě kòyò toǒ hèpṳ̂ cokloměkè Ye̤shǔ. 47Bǎnuakha kòyò ihtǒ ǒ bǎnu tapwa̤ běhtò̌ anò̌she dě a pe̤tṳkè pwa̤tòlûhtò̌ hǐkǒdû̌gutṳ̌ ajûphû̌ tapwa̤ anò̌ku tokho.

48Ye̤shǔ hî̌ asî, “Sî cû̌ hèpṳ̂ he dě sî phî̌hènṳbò nò̌she, nò̌po̤ a sǒsǒta sî cû̌ hèpṳ̂ pwa̤ǎhǔǎkěnu ya? He mî̌ kòyòkhu kòyòhî dě a cû̌pṳ̂sigwiǎ kòta̤ tapwa̤nu ya? 49Pṳ̂̌ni̤ni̤꤮ he ǒplǒ sîkla dě he sû̌ǐtòwòǐ sî ta̤lṳhtò̌hokû dě sî pṳ̂ he tò̤tò̤. Pò̤̌ta sî cû̌hèpṳ̂ tǒ̤ he hǐnu ma̤tèhî̌numî̌ a bǎ htûhtò̌ pwǐ lî̤cahtǐkû hî̌nǎnu.” ⁱ 50Bǎnukha akhophijaû̌ toǒ hǎhtò̌khlè̌ cû̌khǒkèbò nû̌ûla̤.

51Makhû phû̌sǎhtò̌sa htě agû Ye̤shǔ akònu aǒ tapwa̤, a pabǐ pwǎpǒ̤ ana̤ ta hǔgòpwî̌bû dě akûsǒnṳ ta̤dǐcǎtò̤. Dě kòyò ǒ bǎnu toǒ pṳ̂ yǎ. 52Pwǎ̤tadě a plû̌lò̤te̤kè a hǔgòpwî̌bû htǒo dě a hǎhtò̌khlè̌ koyoklî̌kè.

Kògwè Ye̤shǔ

(Matěo 26:57-68; Lǔka 22:54-55, 22:63-71; Jowǎ̤ni̤ 18:13-14, 18:19-24)

53Asî kaǎcû̌ Ye̤shǔ dě pwa̤tòlûhtò̌ hǐkǒdû̌gutṳ̌ tapwa̤ a ǒ. Dě pwa̤tòlûhtò̌ hǐkǒdû̌ toǒ, Yṳ̌daphû̌ a hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ hèǒhtuǒplǒ lǒ̤꤮ bò nû̌û bǎnu. 54Petru gûcû̌ tûcûkû̌ Ye̤shǔ nǒkò dě a cû̌nṳ to̤bǎ pwa̤tòlûhtò̌ hǐkǒdû̌gutṳ̌ htǒotapwa̤ ahǐ we̤kû dě a cû̌ hǎnòò̌ ushǔ dǒkû̌ mî̌ ta kòyò ǒpo̤ǐta̤ bǎnu toǒ.

55Pwa̤tòlûhtò̌ hǐkǒdû̌ toǒ ta kòyò lǒ̤꤮ bò htě a htûdû̌htûpwa̤ toǒ, ma̤pûhǐ asî cèrò ma̤sikè Ye̤shǔ ayanudě, asî kè̌lǎ lǒkho la̤nè̌lòhǎlòho Ye̤shǔ ata̤sǔ toǒ. Pwǎ̤tadě asî kè̌shǐ nû̌ûta̤sǔ dǐcǎ꤮ tò̤. 56Asî kòyò saprṳ̂saphǎ hèbè̌ phǒphǒ lǒkho Ye̤shǔ ta̤sǔ pwǎ̤ta kòyò htě a hè kè̌lǎbè̌ lǒkho Ye̤shǔ ata̤sǔ htǒotoǒ a ta̤hî̌bǎ toǒnu a sǒsǒnû̌û dǐpwǎ̤꤮ tò̤.

57Kòyò toǒǒ ihtǒ dě nè̌phǒphǒbò nû̌ûta̤sǔ dě a hî̌ lǒkho, 58“Pa gana̤de a hî̌, ‘He ma̤ lò̤te̤jûkè ta̤lṳhtò̌ho htě kòyòhǎkhû̌phû̌ ma̤htò̌ htǒotamamî̌ suni̤ akûnu he ma̤htò̌ khǒkè ahǔwa̤ tama, htě kòyòhǎkhû̌phû̌ ma̤htò̌ nû̌ûta acǔde tò̤nu tama pě,’ a hî̌ hǐnu.” ^j 59Pwǎ̤tadě asî bè̌ nû̌ûta̤sǔ htǒotoǒnu a sǒsǒnû̌û dǐmû̌꤮ tò̤.

60Pwa̤tòlûhtò̌ hǐkǒdû̌gutṳ̌ tapwa̤ ihtǒ kò lǒ̤꤮ bò a lo̤mo̤ dě a gwè Ye̤shǔ, “Na hî̌ geshǔ kò hèbè̌ na ta̤sǔ htǒotoǒ dǐmû̌꤮ tò̤ ma̤tè? Kò hènè̌le̤nè̌ge na ta̤sǔ htǒonumî̌ na gana̤de tò̤ ya?” 61Pwǎ̤tadě Ye̤shǔ dò̌tûklû̌ pwǎbǎ nû̌û, a hî̌bǎ geshǔ nû̌û dǐmû̌꤮ tò̤.

Dě pwa̤tòlûhtò̌ hǐkǒdû̌gutṳ̌nu tapwa̤ gwèpo̤sǒ nû̌û, “Na mî̌ Cǒmara htě kò htû̌sò̌ǐ nû̌û htǒotapwa̤ aphû̌khû Khrî̌stu htě a ma̤lû̌htò̌ge kònu tapwa̤ ya?”

62Dě Ye̤shǔ hî̌shǔ nû̌û, “O, he hǒ. Dě sî glè kè̌shǐ kòyòphû̌khû mî̌ hehtǒo hǎnòò̌ dě Cǒmara htě a ǒ ta a ta̤po̤ta̤phǎ htǒotapwa̤ acǔdemûnu tokho pě, dě sî kè̌shǐ he dò̌hènṳ mǒkhû̌ a poǒlṳ pě.” ^k

63Pwa̤tòlûhtò̌ hǐkǒdû̌gutṳ̌nu tapwa̤ cǐhtò̌yè̌kè ahǐdo ▼

▼Pwa̤tòlûhtò̌ hǐkǒdû̌gutṳ̌ tapwa̤ cǐhtò̌yè̌kè ahǐdo pwǐhè̌onumî̌, Ye̤shǔ hî̌sǔma̤sǔ Cǒmara hǒ a gènè̤ dě a dǔlṳ bǎ kò hǐnu.

dě a hî̌, “Pa lo̤bǎ kòyò htě a glè yṳ̂lṳ nû̌ûta̤sǔnu dǐpwǎ̤꤮ tò̤. 64A hî̌bǎ gunò̤ ana̤ pwǐ Cǒmara tapwa̤ numî̌ sî gana̤debò tû̌hǒ dě mî̌ sî gènè̤ lǒkho hî̌tè?”

A hî̌hto hǐnu dě asî pṳ̂̌tapwa̤ hî̌shǔ nû̌û ta ata̤sǔ ǒ dě tobǎ ma̤sikè pwǎ yǎ. ^m 65Kòyò ahǔwa̤ toǒ sahtò̌ htû̌phlě nû̌û, htodě cobǐ nû̌mi̤sǎ htu nû̌û. Asî hî̌ lǒkho Ye̤shǔ, “Hî̌kè̌kè̌, ûpè htu na pè?” Htodě kliphû̌ htě a ǒpo̤ǐta̤ toǒ pṳ̂cû̌ nû̌û dě pla̤, po̤ nû̌û.

Petru la̤lò̤kè Ye̤shǔ

(Matěo 26:69-75; Lǔka 22:56-62; Jowǎ̤ni̤ 18:15-18, 18:25-27)

66Bǎ Petru ǒpepwǎ dě hǐnǒkò we̤kû akhanu, pwa̤tòlûhtò̌ hǐkǒdû̌gutṳ̌nu tapwa̤ pwa̤ma̤ta̤ mamǔphû̌nu tapwa̤ ǒ bǎnu, dě a hè nû̌ûǒ. 67Bǎ a kè̌shǐ Petru ushǔmî̌ akhanu, a kè̌te̤mǎ nû̌û dě a hî̌ nû̌û, “Na mî̌ Nǎ̤sèrèwî̤phû̌ Ye̤shǔnu tṳ̂prṳ̂ akla tapwa̤ ya hî̌.”

68Dě Petru la̤lò̤kè dě a hî̌, “Na hî̌ titènu he sî̌yatò̤tò̤ he sî̌yaphlo nata tò̤tò̤,” a hî̌htodě a hǎhtò̌cû̌ ǒtephekè we̤takha kòshî̌ dě bǎnuakha shîpha tabǎ û̌.

69Pwa̤ma̤ta̤ mamǔphû̌ bǒpo̤no̤nu tapwa̤ kè̌shǐ gesǒ Petru cû̌ǒ bǎnu dě a cû̌pwe̤ǐ gesǒ kòyò ihtǒ ǒ te̤we̤phǔ bǎnu toǒ, “Kòyòmakhû htǒotapwa̤ mî̌ pwa̤gû Ye̤shǔ akò aklanu tapwa̤ pwǎ nî̌.” 70Pwǎ̤ta Petru la̤lò̤ gesǒ.

Ǒpo̤sǒ teděsǎ dě kòyò ihtǒ ǒ te̤we̤phǔ bǎnu toǒ hî̌ gesǒ Petru, “Na ǒpadǒ dě kòyònu tṳ̂prṳ̂ akla mè̤mè̤̌ hǒ, ma̤tè̤hî̌dě na mî̌ Galilî̌aphû̌ pwǎ.”

71Pwǎ̤tadě Petru sahtò̌ wṳ̂dò ana̤ Cǒmara lo̤mo̤ dě a hî̌, “Kòyò htě sî hî̌ awi̤akè̌ khònò̤ tapwa̤nu he sî̌ya yǎ tò̤,” a wṳ̂dòglòtṳ ayo̤ hǐnu.

72A wṳ̂dòglòtṳ htohto ta shîphaû̌ po̤sǒ ginǐ̤plǎtaplǎ. Bǎnukha Petru gènè̤htò̌ to̤bǎ Běcǎ Ye̤shǔ hî̌nǎkè nû̌û yo̤ ta, “Bǎ shîphaû̌ ginǐ̤plǎtaplǎ hǒtò̤nu, na la̤lò̤kè he pě suplǎ” a hî̌ nû̌û ta̤hî̌bǎ hǐnu akhû̌akhî, cî̌꤮ ashahtò̌ nû̌û sò̌phlǒ dě a hǎsihǎǒkè.