Mark 4

Yo̤sǎkhěkhǒ htě kò wi̤lò̤ ta̤khli awi̤akè̌

(Matěo 13:1-9; Lǔka 8:4-8)

1Ye̤shǔ bòhtò̌ sû̌ǐpo̤ kò bǎ shikoǒdû̌htu dě kòyò hèǒ te̤we̤plṳ̂te̤we̤phǎbò akhû̌akhî, a nṳ hǎnòò̌ sǒkhlikû dě kòyò lǒ̤꤮ bònu toǒ ǒ lǒkho bǎ shihtu. ^a 2Ye̤shǔ sû̌ǐtòwòǐ kî̌ya asî ta yo̤sǎkhěkhǒ pṳ̂̌tacǎ. Bǎ a sû̌ǐ asî akhanu, a hî̌, 3“Gana̤de te̤mǎ lǒkho! bǎtaplǎ, kòyò ǒ tapwa̤, a hèwi̤lò̤ ta̤khlita̤lè. 4Bǎ a wi̤lò̤ ta̤khli akha, toǒǒnu, a lò̤te̤to klè̌dakû dě htû̌tî̤pî̤ hècǒǎkèbò yǎ. 5Ta̤khli toǒǒnu a lò̤te̤to lo̤kla hǎsè̌sǒkhû̌ dě hǎkhû̌ gala̤ akhû̌akhî, a dǒhtò̌phwè. 6Dě akhò̌wi̤ yṳ̂lò̤yo̤tò̤ akhû̌akhî, bǎ lṳmṳhtò̌ dě a shělò̤ bǎ nû̌ûmṳ dǒjahtò̌htǒo akhanu, anosikè pwǎ. 7Ta̤khli toǒǒnu a lò̤te̤to ta̤shî̌shǒshî̌prûkla dě ta̤shî̌shǒmṳ htǒotoǒ dû̌htò̌ khè̌bǐbò nû̌û dě asǎhtò̌bò̌ dǐphlǒ꤮ tò̤. 8Ta̤khli toǒǒnu a lò̤te̤to hǎplǒhǎyî̌wî̤khû̌ dě a phǎhtò̌dû̌htò̌bò̌ ta asǎhtò̌ dû̌khlo aplǎ sushi toǒ, aplǎ shisusǒ toǒ, aplǎ ta̤ya̤ toǒ.”

9Htodě a hî̌, “Kòyò htě a ǒ ta anò̌ku toǒnu, nogana̤de lǒkho asî.”

Yo̤sǎkhěkhǒ toǒ a ta̤yè̤lò̤nǎ

(Matěo 13:10-17; Lǔka 8:9-10)

10Bǎ a ǒ kû̌ ta a khophijaû̌ shǐsò̌gini̤ ta kòyò htě a gûkû̌ nû̌ûkò toǒ akhanu, asî gwè Ye̤shǔ ta yo̤sǎkhěkhǒ htǒonu amûasǎ. 11Dě a hî̌shǔ asî, “Cǒmara ǐsî̌yaphlo bǎ sî ta a shila̤gakû a ta̤sî̌khû̌sî̌ya htě a bè̌hǔ nû̌û htǒotoǒ hǒ pwǎ̤ta kòyò ahǔwa̤ toǒ ayanu,

12‘Asî kè̌hto kè̌sǒ ta gana̤dehto gana̤desǒ pò̤̌ta ma̤pûhǐ asî kè̌shǐ sî̌yaphlo kû̌kò tò̤,’ ayanu, he hî̌pwǎ bǎ asî ta yo̤sǎkhěkhǒ toǒ. He dè hî̌bǎpe asî ta yo̤sǎkhěkhǒ tò̤ hî̌nu,

‘Pěmî̌ asî shò̌lò̤ lǒkho asò̌phlǒ dě Cǒmara bòlû̌ asî ta̤sǔ hè̌.’” ^b

(Matěo 13:18-23; Lǔka 8:11-15)

13Dě Ye̤shǔ hî̌ asî, “Yo̤sǎkhěkhǒ hè̌o, sî dè sî̌yaphlo tò̤ hî̌dě, sî cû̌ sî̌yaphlojòbò yo̤sǎkhěkhǒ htě he hî̌ htǒonu toǒ hî̌tè? 14Kòyò htě a wi̤lò̤ ta̤khli amûasǎ mî̌ kòyò htě a wi̤lò̤ Cǒmara ale̤ayo̤nu hǒ. 15Kòyò toǒǒnu, asǒsǒta ta̤khli lò̤te̤ klè̌dakû toǒ, asî gana̤de Cǒmara ale̤ayo̤ ta taplǎpa khînǎmo̤pha hǐkǒdû̌ hèphî̌ tephekè Cǒmara ale̤ayo̤ dě asî sò̌phlǒkûnu toǒ. 16Ahǔwa̤ toǒǒ lè̌dě asǒsǒta kò wi̤lò̤ ta̤khli lo̤klanu toǒ hǒ. Asî gana̤de taplǎpa a phî̌shǔ ta ta̤sò̌le̤sò̌lò̤. 17Pwǎ̤ta akhò̌wi̤ yṳ̂lò̤yo̤tò̤ akhû̌akhî, a htûpwa̤pwǎ teděsǎ pa. A yṳǎ Cǒmara ale̤ayo̤ bǎbǎ, bǎ ta̤jîta̤jû ta̤phû̌mò̤shî̌hto hèbǎ asî akhanu, taplǎpa asò̌phlǒ nûcû̌khǒkè dě a lòkhǔpo̤ gesǒ pwǎ. 18Toǒǒnu alò̤ta ta̤khli lò̤te̤to dě ta̤shî̌shǒshî̌prûkla toǒnu hǒ. Asî gana̤de Cǒmara ale̤yo̤. 19Pò̤̌ta asî bǎgubǎgè ta a ta̤ǒhtûpwa̤ htodě a sò̌yṳ dû̌yò̤htò̌sa lǒkho akhû̌akhî, asî ta̤sò̌yṳ htǒonu a lòho tû̌ asî hǒ. Asî sò̌yṳ tacǎ hto tacǎ dě a ta̤sò̌yṳ htǒotoǒnu a plû̌khè̌bǐbòkè nû̌û dě asǎapho htò̌bò̌pe tò̤. 20Kòyò toǒǒnu asǒsǒta ta̤khli lò̤te̤to hǎplǒhǎyî̌wî̤khû̌ toǒnu hǒ. Asîgana̤de Cǒmara ale̤ayo̤ dě a yṳǎ ta asǎhtò̌bò̌ dû̌khlo aplǎ sushi toǒ aplǎ shisusǒ toǒ, aplǎ ta̤ya̤ toǒ hǐnu.”

Yo̤sǎkhěkhǒ ta dǎ mî̌ko awi̤akè̌

(Lǔka 8:16-18)

21Htodě Ye̤shǔ hî̌ asî, “Sî phî̌nṳ mî̌ko hǐdǒkû dě sî nṳdǎ yǎ dòjola̤ ya? Tò̤hî̌kǎlè̌ sî nṳdǎ yǎdě la̤wa̤ ala̤ ya? Mî̌ sî dǎhtò̌ yǎ mî̌kowa̤khû̌ mè̤tò̤ya? ^c 22Ta̤ bè̌hǔbè̌jo lǒ̤꤮ bò toǒnu, kò dǔlṳhtò̌bò yǎ pě. Lǒ̤꤮ bò ta̤htě kò sî̌yaphlo tò̤ khònò̤ toǒnu, kò sî̌yaphlobò yǎ htû̌꤮ anǒkòpě. ^d 23Ta̤ htě sî gana̤de yǎ khònò̤ htǒotoǒnu sî to bè̌dubè̌na̤ yǎ.”

24Htodě a hî̌po̤ asî, “Gana̤de te̤mǎ lǒkho he ta̤hî̌bǎhtǒo. Na dè gana̤de te̤mǎ ta̤ hǐnumî̌, Cǒmara ǐ na ta̤sî̌yaphlo pě, htohǒtò̤ a nosî̌ya dû̌khlopo̤ na pě. ^e 25Kòyò htě ataǒnǎ pwî̌꤮ tè bǎbǎ, Cǒmara ǐ dû̌po̤ nû̌û pě, pwǎ̤ta kòyò htě ata ǒtò̤ tapwa̤nu, ata ǒpwǎ tîkî̌phû̌pwǎ bǎbǎ, Cǒmara phî̌kèbò po̤ nû̌ûta pě.” ^f

Yo̤sǎkhěkhǒ ta ta̤khli dǒhtò̌ awi̤akè̌

26Ye̤shǔ hî̌po̤, “Cǒmara ashiaganu asǒsǒta kòyò tapwa̤ wi̤lò̤ ta̤khlita̤lè dě hǎkhû̌nu. 27Lṳmṳkhǐ dě hǎmoǒ, lṳmṳshě dě ihtǒ, lṳmṳkhǐ dě hǎmoǒ, lṳmṳshě dě ihtǒ, a ma̤pwǎ hǐnu dě ta̤khli htǒo a phǎhtò̌dû̌htò̌ pwî̌tènu a sî̌ya dǐcǎ꤮ tò̤. 28Hǎkhû̌ ǐdû̌htò̌ tû̌pwǎ yǎ. Amṳ dǒjahtò̌ wǐ htodě aplo̤ htò̌nǒ, dě asǎpwa̤hènǒ anǒkò pě. 29Asǎ mi hè hǒta a hè kǎ ǐtû̌ ata̤sǎta̤pho htǒo ta gaja, ma̤tè̤hî̌dě kǎbǔ khîkha hèto̤hǒ.” ^g

Yo̤sǎkhěkhǒ ta saplǎphlǒ awi̤akè̌

(Matěo 13:31-32; Lǔka 13:18-19)

30Ye̤shǔ hî̌ ta “Cǒmara ashiaga htǒonu pa glè dǒtû kè̌mò̌mṳ bǎ kò hî̌tè? Mè̤tò̤dě pa glè dǒtû dǔlṳjò bǎ kò ta yo̤sǎkhěkhǒ hî̌tè? 31Cǒmara ashiaga numî̌ asǒsǒta saplǎphlǒnu. Bǎ kò wi̤lò̤ saplǎphlǒ dě hǎkhû̌ akha, ta̤khlita̤lè lǒ̤꤮ bò aklanu saplǎphlǒ mî̌ a pî̌tî̌khlo ta akho. 32Pwǎ̤tadě kò wi̤lò̤ htodě a dǒhtò̌ akhanu, bǎ hǎsǐbòlǎmṳbo aklanu adû̌khlo akho, a phòdû̌htò̌ tophǒhtò̌khlota ahǔwa̤ toǒ dě htû̌tî̤pî̤dî̌dè wi̤ dě mǒla̤ toǒ hèma̤ lǒkho api̤ bǎ aphò toǒ alo̤.”

(Matěo 13:34-35)

33Bǎ Ye̤shǔ dǒhtû̌ǐ bǎ kòyò ta Cǒmara ale̤ayo̤ akhanu, a pwe̤ǐ nṳdǒ bǎ kòyò ta yo̤sǎkhěkhǒ toǒ. Ma̤pûhǐ kò sî̌yaphlobò̌ wǒnu dě ǒǎtîkî̌ a pwe̤ǐ bǎ kò hǐnu. 34Ye̤shǔ hî̌bǎǐ sadape kòyò toǒ ta yo̤sǎkhěkhǒ sî, pwǎ̤tadě bǎ a ǒkû̌ ta akhophijaû̌ toǒ akhanu, a pwe̤ǐlṳbò bǎ asî ta yo̤sǎkhěkhǒ amûasǎnu toǒ.

Ye̤shǔ noǒkǔ gili̤sǎ

(Matěo 8:23-27; Lǔka 8:22-25)

35Bǎnu ti̤ni̤, lṳmṳhǎlò̤ akhanu, Ye̤shǔ hî̌ asî, “Pa cû̌ dě shikoǒ bò̌kho tokho hò̌꤮.” 36Dě asî hǎhtò̌ cû̌pa̤kè ta kòyò saprṳ̂saphǎ. Dě akhophijaû̌ toǒ cû̌nṳ dě Ye̤shǔ hǎnòò̌lò̤ sǒkhlinu tabǎ akû dě asî hǎhtò̌cû̌plǒbò nû̌û. Sǒkhli ahǔwa̤ toǒ ǒdǒ bǎnu. 37Gili̤sǎ dû̌hè dě shipěpǒ nṳ sǒkhlikû akhû̌akhî, shi glè̌ htò̌bekè ta sǒkhli hǒ. 38Pwǎ̤tadě Ye̤shǔ hǎmoǒ ta khû̌khǒ tama bǎ la̤khlò sǒkhlikòshî̌ tokho dě asî cû̌ htû̌wè̤ ihtǒ nû̌û dě a hî̌ nû̌û, “Kǒ꤮ sara, pa glè̌ lòcǔsibò hǒ ma̤tè̤dě na bè̌sû̌bè̌sǎ kû̌pe pa dǐcǎ꤮ tò̤ ya?”

39A ihtǒ sǎhtǎhto gili̤ dě a hî̌ shipěpǒhtǒo, “Ǒkǔ!” a hî̌ dě taplǎpa gili̤ ǒkǔkè ta shipěpǒpe꤮ tò̤.

40A hî̌ asî, “Sî ǐsha gètè̤̌nu ma̤tè? Sî ta̤yṳta̤nǎ ǒ hǒtò̤ ya?”

41Dě asî ǐsha tûlû̌shû̌ dě asî hî̌ kè̌khînû̌û, “A mî̌ kòyò hî̌tè tapwa̤tè? Gili̤ ta shipěpǒ gana̤de jòjò̌ nû̌ûyo̤yo̤.”