Mark 6

Nǎ̤sèrèwî̤phû̌ yṳǎ Ye̤shǔ tò̤

(Matěo 13:53-58; Lǔka 4:16-30)

1Ye̤shǔ hǎhtò̌cû̌kè bǎnu dě a ta akhophijaû̌ toǒ gesǒ lǒkho adoashǒ Nǎ̤sèrèwî̤nu tî̤wî̤. 2Bǎ mṳni̤dǔ akhanu, Ye̤shǔ bòhtò̌ sû̌ǐtòwòǐ ta̤ dě ta̤sabahǐkû. Kòyò saprṳ̂saphǎ gana̤de a ta̤sû̌ǐtòwòǐ dě a sû̌pi̤sò̌pi̤bò dě a hî̌ lǒkho,

“A ta̤sî̌ta̤jò htǒonu ta ata̤ma̤ cǒklî̌kî̌ya lǒ̤꤮ bò htǒotoǒ numî̌ a cû̌nî̤bǎ bǎtèya? A ta̤sî̌ta̤jò htě a nî̤bǎ htǒotoǒ numî̌ ta̤sî̌ta̤jò hî̌tètacǎ tè? Htodě a cû̌ma̤jò tǒ̤ ta̤cǒklî̌kî̌ya htǒotoǒ numî̌ hî̌tètè? 3A mî̌ pwa̤ma̤jòhǐnu tapwa̤ yahî̌? Dě a mî̌ Marǐa aphû̌makhû yahî̌? Apṳ toǒ numî̌ Jǎgomo̤, Jose, Yṳ̌da, ta Shîmǒ̤nè̤ htǒotoǒ mî̌ amè̤tò̤ya? Dě a pṳmamǔ toǒ numî̌ a ǒ pwǎ bǎ dokûbǎo pwǎ amè̤tò̤ya?” Asî hî̌ lǒkho hǐnudě, asî sò̌khě Ye̤shǔ dě gòyò̤mò̤mṳshǔ nû̌û tò̤.

4Dě Ye̤shǔ hî̌ asî, “Kòyò htě a bè̌dubè̌na̤ pwa̤po̤ tò̤ toǒ numî̌ tû̌pwǎ adokûphû̌ tû̌, akhlialènu ta a hǐphû̌phòphû̌nu toǒ tû̌pwǎ.” ^a 5Asî yṳǎ tò̤ akhû̌akhî, Ye̤shǔ ma̤jòpe ata̤ma̤ cǒklî̌kî̌yanu toǒ dǐcǎ꤮ tò̤, a ma̤jò pwǎpǒ̤ a dò̌htò̌ acǔde dě kòyò shǐshanu toǒ alo̤ pwǎ, dě a ma̤hǎmǎ pwǎ bǎ kòshǐkòsha toǒ tîkî̌phû̌pa. 6Dophû̌shǒphû̌ toǒ yṳǎ nû̌û tò̤ akhû̌akhî, a sû̌pi̤sò̌pi̤ jò꤮ jî̌ tò̤.

Htǒotaplǎdě Ye̤shǔ hǎhtò̌cû̌shido do htě a ǒ te̤we̤bò bǎnu tadohtotado dě sû̌ǐtòwòǐ bǎ kò.

Ye̤shǔ nohǎhtò̌cû̌ akhophijaû̌ shǐsò̌gini̤

(Matěo 10:5-15; Lǔka 9:1-6)

7Htodě a kaǎhè plǒbò akhophijaû̌ shǐsò̌gini̤ dě a nohǎhtò̌cû̌ nû̌û tṳ̂prṳ̂ mî̌ sò̌gini̤ hǐnu. Htodě ma̤pûhǐ asî wṳ̂hǎhtò̌pè̤kè khînǎkhîno ayanudě, a ǐ asî sîrîshû̌sho.

8Ye̤shǔ mǎcû̌nṳ akhophijaû̌ toǒ ata̤hî̌bǎ ta, “Sî hǎhtò̌cû̌klè̌ dě phî̌cû̌nṳ pûma̤ dǐcǎ꤮ ma̤ nî̌, phî̌cû̌nṳ pûma̤ mû̌, hû̌khi, ta wûhû̌khi htǒotoǒ ma̤ nî̌꤮. Phî̌nṳ pwǎpǒ̤ nò̌htǒnu pwǎ nî̌꤮. 9Dò̌cû̌nṳ lǒkho khò̌phěnu pwǎ̤tadě phî̌cû̌ kwèkhlo pûma̤ hǐdo ginǐ̤pṳ ma̤ nî̌꤮. 10Sî dè cû̌nṳ ǒ dě hǐ tamama akû hî̌dě, sî hǎhtò̌cû̌ dě donu tado akû hǒtò̤nu, tûrû̌ ǒ sělě lǒkho bǎ hǐnu nî̌꤮. 11Do tadodo dě a dè sò̌yṳ kaǎ sî tò̤ a dè gana̤de sîyo̤ tò̤ hî̌dě bǎ sî hǎhtò̌cû̌kè akhanu, tèdè̌lòte̤kè hǎgûmṳ̂ dě sî khǎlǎlo̤nu toǒ, sî dè ma̤hǐnu hî̌mî̌ asǒsǒta sî dǔlṳkè ta̤ma̤dòǐ tacǎ htě Cǒmara cèrò asî pěnu hǒ.” ^b

12Akhophijaû̌ toǒ hǎhtò̌cû̌shido dǒhtû̌ǐ bǎ kòyò toǒ ta ato yò̤lò̤ge lǒkho asò̌, a cû̌shido dǒhtû̌ǐ bǎ kò hǐnu. 13Asî wṳ̂hǎhtò̌nṳ plṳ̂ khînǎkhîno dě a plṳnṳ plṳ̂ bǎ kòyòshǐkòyòsha toǒ ta htǒshi dě a ma̤hǎmǎplṳ̂gesǒ bǎ asî. ^c

Pwa̤ploshi Jowǎ̤ni̤ ata̤si awi̤akè̌

(Matěo 14:1-12; Lǔka 9:7-9)

14Ye̤shǔ ami̤ lṳshilṳga akhû̌akhî, Khwǐherǒ ▼

▼Khwǐherǒ htǒotapwa̤ numî̌ Khwǐherǒ Atipa

gana̤debò a ma̤ ta̤nu toǒ awi̤akè̌. Htohǒtò̤ kòyò toǒǒ hî̌ lǒkho, “Ye̤shǔ mî̌ pwa̤ploshi Jowǎ̤ni̤ sihtûpwa̤gesǒ pwǎ, ma̤hǐnudě a ma̤jò ta̤cǒklî̌kî̌yanu toǒ hǐnu.” ^e

15Toǒǒdě a hî̌, “A mî̌ pwa̤po̤ Èlî̌a pwǎ.”

Htohǒtò̤ toǒǒ dě a hî̌, “A mî̌ pwa̤po̤ khǒlè̌tû̌ tapwa̤ htě alò̤ta pwa̤po̤ dě꤮ wǐnu akla tapwa̤pwa̤ pwǎ,” a hî̌ lǒkho hǐnu.

16Bǎ Khwǐherǒ gana̤de Ye̤shǔ ma̤ ta̤cǒklî̌kî̌ya akhanu, a hî̌, “Jowǎ̤ni̤ htě he nope̤tṳkè agobo ta he kliphû̌nu tapwa̤ htûpwa̤gesǒ hǒ,” a hî̌ hǐnu.

17Dě awǐkhanu mî̌ Khwǐherǒ nocû̌pṳ̂ coklomě akliphû̌ toǒ ta Jowǎ̤ni̤ dě a nodǒlò̤te̤ nû̌û apo̤kû numî̌ Mo̤herǒdè khû̌khînu hǒ. Mo̤herǒdè mî̌ Khwǐcophǎherǒ akhi, apṳ Phǐlǐpo ama dě Jowǎ̤ni̤ hî̌dǐdòsala̤ Khwǐherǒ ta a to phî̌nṳ apṳ Phǐlǐpo ama tò̤. ^f 18Jowǎ̤ni̤ hî̌ Khwǐherǒ, “Na cû̌phî̌ gesǒ na khinu a khlè̌khǒkè ta Cǒmara ta̤sû̌ta̤tòwò hǒ.” 19Hǐnu akhû̌akhî, Khwǐ ama Mo̤herǒdè htǒonu a pṳ̂mě gutṳgla Jowǎ̤ni̤ ta̤sǔ dě a sò̌yṳ ma̤sikè nû̌û pwǎ̤ta a ma̤jò dǐcǎ꤮ tò̤. 20Ma̤tè̤hî̌dě Khwǐherǒ htǒonu a kè̌dû̌ tû̌ Jowǎ̤ni̤, ma̤tè̤hî̌dě a sî̌ya ta a mî̌ kòyò htě acǒatè̤ acahtǐ tapwa̤ akhû̌akhî, a ma̤kwaǐ nû̌û. Bǎ Khwǐcophǎ gana̤de Jowǎ̤ni̤ hî̌bǎ akhanu, a bǎgubǎgè hǐnudě a sò̌yṳ gana̤de pwǎ nû̌û hî̌bǎ pwǎ.

21Bǎ Khwǐherǒ ǒlò̤ amṳni̤ hèto̤sǒ akhanu, ashuakhwè wǒmè̤mè̤̌ ta Mo̤herǒdè glè ma̤sikè Jowǎ̤ni̤. Khwǐ ma̤pwè ǐ a ǒlò̤ amṳni̤ dě a bǔǎbǔo kli hǐkǒdû̌ toǒ, shiga hǐkǒdû̌ toǒ, ta kòyò htû hǐkǒdû̌ dě Galilî̌agakûnu toǒ. 22Bǎ Khwǐherǒ ama Mo̤herǒdè aphû̌mamǔphû̌ hènṳ kalî̌ akhanu, a ma̤ sò̌phlǒmo̤ sò̌phlǒbǎnṳ Khwǐherǒ ta ashǐpwa̤shǐmè̤ lǒ̤꤮ bò khû̌khî, Khwǐherǒ hî̌ phijaû̌mamǔphû̌ htǒonu tapwa̤, “Na sò̌yṳ titètè̌nu pwe̤ǐ he, he ǐ na pě.” 23Htodě a olò̤ dě a wṳ̂dò ayo̤ ta a ta̤hî̌bǎ hǐnu dě “Na kwi he titètè̌꤮ bǎbǎ he ǐ na pě, na kwi heshihega takama bǎbǎ, he ǐbò na pě,” a olò̤ hǐnu.

24Dě phijaû̌mamǔphû̌nu tapwa̤ khlè̌hǎhtò̌ akhlo dě hǎhtò̌gwè amo̤, “Mo̤꤮ he tobǎ kwi Khwǐ mî̌titè?”

“Kwi pwa̤ploshi Jowǎ̤ni̤ a hǐkǒnu” amo̤ hî̌shǔ nû̌û hǐnu.

25Dě a tṳplṳtî̤wî̤ khlè̌ginṳ sǒ Khwǐ ǒ dě “He sò̌yṳ nodò̌nṳ na pwa̤ploshi Jowǎ̤ni̤ ahǐkǒ bǎ dîbataadû̌kû dě hèǐ he khònò̤” a hî̌ nû̌û hǐnu.

26Khwǐnu a sò̌phlǒmo̤pe dî̌kî̌꤮ tò̤ pò̤̌ta a olò̤mèlò̤hto shǐtè̤mè̤ tṳ̂prṳ̂taphǎ a lo̤mo̤ hǒ akhû̌akhî, yo̤sǎ htě a olò̤mèlò̤hto ta phijaû̌mamǔphû̌ htǒonu, a sò̌yṳ ma̤pî̌kè tò̤. 27Hǐnudě taplǎpa a nocû̌phî̌ akliphû̌ pwa̤ǒpo̤ta̤nu tapwa̤ ta Jowǎ̤ni̤ ahǐkǒ dě akliphû̌ htǒotapwa̤ cû̌ kò la̤dǒ kòyò apo̤kû dě a cû̌pe̤tṳge Jowǎ̤ni̤ agobo. 28Htodě a dò̌nṳ Jowǎ̤ni̤ a hǐkǒhtǒo dîbataadû̌akû dě a hèǐ nû̌ûta phijaû̌mamǔnu tapwa̤ dě phijaû̌mamǔhtǒo ǐ nû̌û ta amo̤. 29Pwa̤ploshi Jowǎ̤ni̤ akhophijaû̌ gana̤de dě asî hèphî̌ge nû̌û na̤klû ǒkèhtǒo dě ge lǔkè nû̌û lṳkhû̌.

Ye̤shǔ bǔǎbǔo kòyò apwa̤yè̤̌rî̌

(Matěo 14:13-21; Lǔka 9:10-17; Jowǎ̤ni̤ 6:1-14)

30Pwa̤nophû̌ toǒ geǒplǒ te̤we̤bò Ye̤shǔ dě asî pwe̤ǐbò nû̌û ta lǒ̤꤮ bò asî ma̤hto ta̤nu toǒ awi̤akè̌ ta asî sû̌ǐtòwòǐ bǎ kònu toǒ awi̤akè̌. 31Pwa̤ hè dě aǒ toǒǒ dě hè, pwa̤gekè toǒǒ dě age ǒwo̤ǒphǎ tûlû̌shû̌ khû̌khî, Ye̤shǔ ta akhophijaû̌ toǒ la̤ǒkǔ ǎo akhîkhanu꤮ a ǒpe tò̤, dě Ye̤shǔ hî̌ akhophijaû̌ toǒ, “Pa cû̌ wo̤wǒ̤nû̌û dě gûla̤sî̌tukǔ tò̤glò htě kòyò ǒ dǐpwǎ̤꤮ tò̤nu dě pa ǒkǔkû̌nǎ hò̌꤮.”

32Dě Ye̤shǔ ta akhophijaû̌ toǒ cû̌ dò̌nṳ sǒkhli dě hǎhtò̌cû̌kè lǒkho tû̌ gûla̤sî̌tukǔ tò̤glò. 33Pwǎ̤tadě kòyò saprṳ̂ htě a kè̌shǐ asî cû̌ htǒotoǒnu, a sî̌ya te̤mǎ lǒkho Ye̤shǔ ta akhophijaû̌ toǒ mè̤nu akhû̌akhî, wî̤phû̌ pṳ̂̌tî̤wî̤ khlè̌cû̌ ta khò̌lopo̤ khosûkhû̌ dě khlè̌cû̌te̤we̤to̤ wǐ bǎ Ye̤shǔ ta akhophijaû̌ toǒ alo̤mo̤. 34Bǎ Běcǎ Ye̤shǔ ǒ sǒkhlikû hǎhtò̌ akhanu, a kè̌shǐ kòyò saprṳ̂dû̌ cû̌ ǒpo̤nǎwǐbò lo̤mo̤ dě a gwèbǎǐ jî̌ asî, ma̤tè̤hî̌dě kòyò htǒotoǒnu alò̤ta sophû̌ toǒ htě pwa̤gèǐ nû̌û tò̤nu akhû̌akhî, a bòhtò̌ sû̌ǐ bǎplṳ̂ asî ta̤wi̤ta̤kè̌. ^g

35Bǎnu akha lṳmṳhǎ hǒ dě, Ye̤shǔ akhophijaû̌ toǒ hè nû̌ûǒ dě a hèhî̌ nû̌û, “Gûla̤ bǎotò̤glò mî̌ do ǒphǔ dǐdǒ꤮ tò̤, htohǒtò̤ lṳmṳhǎ hǒ. 36Ma̤pûhǐ asî cû̌ pwî̤ǎpwî̤o lǒkho tû̌ a la̤ǎla̤o ayanudě, nocû̌kè mò̌ asî dě dokûshǒkû htě a ǒ te̤we̤lṳ̂ bǎo tò̤glònu.”

37Pwǎ̤ta Ye̤shǔ hî̌shǔ asî, “Kè̌ ǐǎǐo asî tacǎcǎnu.”

Dě asî gwè nû̌û, “Pa dè cû̌pwî̤ bǎ asî mû̌ dě ahǎbò gunò̤ ta pwa̤ma̤ta̤ tapwa̤ alakǎ alalǐ̤sǒ ▼

▼Wûyî̌ Dina̤ri tabǎ mî̌ a gunò̤ ta ti̤ni̤ ata̤ma̤ khû̌kǎ.

nu, wûyî̌ Dina̤ri ǒ pwǎ tokǒ pa dě a glè cû̌ pǒǎpǒo asî hî̌tè?”

38Ye̤shǔ gwè akhophijaû̌ toǒ, “Dě sîklanu mû̌ ǒ bematè? Cû̌kè̌kè̌,” a hî̌ asî hǐnu akha, asî cû̌kè̌ dě asî kè̌shǐ pwǎ, “Mû̌ yè̤̌ma ta tò̤phû̌ ginǐ̤plṳ̂ pwǎ,” asî hî̌ nû̌û hǐnu.

39Htodě Ye̤shǔ nohǎnòò̌ ǒplǒ asî tṳ̂prṳ̂ ta tṳ̂prṳ̂ dě mi̤khû̌. 40Dě asî hǎnòò̌ǒplǒ nû̌û tṳ̂prṳ̂ mî̌ apwa̤ yè̤shi toǒ apwa̤ ta̤ya̤ toǒ. 41Ye̤shǔ phî̌ mû̌ yè̤̌ma ta tò̤phû̌ ginǐ̤plṳ̂htǒo dě a kè̌htò̌ mǒla̤ a hî̌bwǐhî̌sîrîhtò̌ Cǒmara dě a bî̌phò̌ mû̌. Htodě a ǐlò̤ nû̌û akhophijaû̌ toǒ aǒ. Dě akhophijaû̌ toǒ yṳ̂ǎlò̤ tṳtṳ nû̌ûta kòyònu toǒ. Htodě a jotṳ dǒ tò̤phû̌nu ginǐ̤plṳ̂ hǐnunu. 42Asî ǎ pǒǎpǒo ǎkǒobebò pṳ̂̌꤮ tapwa̤. 43Akhophijaû̌ toǒ phî̌htuplǒge mû̌ ta tò̤phû̌ htě a bî̌phò̌ dě a ǒkè toǒnu, a ǒbepe ta phǒbě shǐginǐ̤ phǒbě. 44Makhûwè̤pwa̤ htě a ǎ lǒ̤꤮ bò mû̌ numî̌ a ǒ kòyò yè̤̌rî̌.

Ye̤shǔ cû̌ dě shikhû̌

(Matěo 14:22-33; Jowǎ̤ni̤ 6:15-21)

45Asî htǔplǒ htohto ta Ye̤shǔ nocû̌nṳ htò̌dò̌bò akhophijaû̌ toǒ sǒkhli dě a nohǎhtò̌cû̌ wǐkè asî Betasè̌dawî̤ htě a ǒ dě shikoǒ bò̌kho nutî̤wî̤. Dě bǎ akhophijaû̌ htò̌dò̌ sǒkhli akhanu, a dě a plûgebòkè kòyò saprṳ̂saphǎ. 46Htodě Ye̤shǔ hǎhtò̌cû̌kè dě a cû̌htò̌ kwisaba dě kholokhû̌.

47Bǎ lṳmṳkhǐpo̤lo̤ akhanu, akhophijaû̌ sǒkhli cû̌to̤ dě shikamakû hǒ pwǎ̤tadě Ye̤shǔ ǒkè tû̌ pwǎ shihtu tapwǎ̤ pa. 48Ye̤shǔ kè̌shǐ ta gili̤sǎ htû̌hèshǔ akhophijaû̌ toǒ akhû̌akhî, asî khlò̌shǔ gili̤ dě a lòdǒlòde lǒ̤bò. Bǎ shîphaû̌sayè̤ lṳmṳ glè̌ lîbû akhanu, Běcǎ Ye̤shǔ cû̌ shikhû̌ dě a hè akhophijaû̌ toǒ a ǒ. A glè̌ cû̌tûlû̌ ta akhophijaû̌ toǒ. 49Pò̤̌ta bǎ akhophijaû̌ toǒ kè̌shǐ nû̌û cû̌ dě shikhû̌ akhanu, asî gènè̤ nû̌û ta kòyola tapwa̤ dě a yi̤kǒyi̤htabò. 50Ma̤tè̤hî̌dě asî pṳ̂̌꤮ tapwa̤ kè̌shǐbò nû̌û dě ǐsha lǒ̤bò.

Taplǎpa Ye̤shǔ hî̌ asî, “Bè̌khubè̌hî lǒkho sî sò̌phlǒ. Ǐsha lǒkho pûma̤, htǒomî̌ he pwǎ.” 51Htodě a htò̌nṳ akhophijaû̌ toǒ a sǒkhlikû dě gili̤sǎ ǒkǔhèkè ta akhophijaû̌ toǒ sû̌pi̤sò̌pi̤ jîbò kè. 52Ma̤tè̤hî̌dě asî nò̌kudu akhû̌akhî, Ye̤shǔ dǔlṳ bǎ asî ta bǔǎ kò mû̌ ata̤ma̤ cǒklî̌kî̌ya htǒo hǐnudě asî sî̌yaphlo lǒkho tò̤.

Ye̤shǔ ma̤hǎmǎ bǎ kòyòshǐkòyòsha dě Gena̤sarè̌ga

(Matěo 14:34-36)

53Asî cû̌kǎbò̌hto shikoǒdû̌htǒo dě a cû̌to̤ lǒkho Gena̤sarè̌ga dě a cû̌ bè̌ǒkǔ lǒkho asîsǒkhli bǎnu. 54Asî hǎhtò̌ dě sǒkhlikû ta kòyò toǒ sî̌yamè̤mè̤̌ lǒkho ta Ye̤shǔ pwǎ. 55Asî khlè̌htokhlè̌lò̤bò lǒkho pṳ̂̌tò̤glò dě a sahtò̌ ò̌hè lǒkho kòyòshǐkòyòsha toǒ ta hǔjo dě ò̌hèto lǒkho bǎ asî gana̤de ta Ye̤shǔ ǒ agûla̤nu tò̤glò. 56Běcǎ Ye̤shǔ cû̌ bǎtè꤮ tò̤glò bǎbǎ, a cû̌ dě dokû bǎbǎ, a cû̌ dě wî̤kû bǎbǎ, a cû̌ dě wî̤khlo bǎbǎ, asî dò̌lò̤ lǒkho kòyòshǐkòyòsha toǒ klǎkû dě asî kwigwèbǎǐ Běcǎ ta notè̌bǎpwǎ na hǐdopo̤to̤kòpwè̤ htǒonu ta pwa̤shǐpwa̤sha htǒotoǒnu tîkî̌phû̌pwǎ. Dě kòyò htě a tè̌bǎ nû̌û hǐdopo̤to̤kòpwè̤ toǒnu, a ta̤shǐta̤sha hǎmǎbòkè.