Mat 10 | KxfSCKRC | STEP | Ma̤pûhǐ akhophijaû̌ shǐsò̌gini̤htǒo wṳ̂hǎhtò̌pè̤kè khînǎkhîno phû̌mò̤ toǒ, htohǒtò̤ ma̤pûhǐ asî ma̤bǎpè̤bò ta̤shǐta̤sha pṳ̂̌꤮ tacǎ ayanu, Běcǎ Ye̤shǔ kaǎhè asî a ǒ dě a ǐ asî sîrîshû̌sho.

Matthew 10

Pwa̤nophû̌ shǐsò̌gini̤

(Mǎ̤riko 3:13-19; Lǔka 6:12-16)

1 Ma̤pûhǐ akhophijaû̌ shǐsò̌gini̤htǒo wṳ̂hǎhtò̌pè̤kè khînǎkhîno phû̌mò̤ toǒ, htohǒtò̤ ma̤pûhǐ asî ma̤bǎpè̤bò ta̤shǐta̤sha pṳ̂̌꤮ tacǎ ayanu, Běcǎ Ye̤shǔ kaǎhè asî a ǒ dě a ǐ asî sîrîshû̌sho.

2 Pwa̤nophû̌ shǐsò̌gini̤ ami̤ mî̌ kwè̌꤮ ûpè hî̌dě, awǐlǒ tapwa̤ mî̌ ami̤ ta Shîmǒ̤nè̤ mè̤tò̤mî̌ kò kaǎ nû̌ûta Petru ta apṳ Adrěa, htodě Sebedè̌o aphû̌makhû Jǎgomo̤ ta apṳ Jowǎ̤ni̤, 3 Htodě Phǐlǐpo ta Batolomě̤o, To̤mǎ̤jo ta pwa̤kwi ta̤kûta̤cî̌ Matěo, htodě Alphěo aphû̌khû Jǎgomo̤ htodě Tadè̌, 4 Htodě Shîmǒ̤nè̤, a mî̌ kò kaǎ nû̌ûta Sè̌lò ^{▼▼Sè̌lò mî̌ aprṳ̂aho ami̤, dě aprṳ̂aho htǒonumî̌ a sò̌yṳ ǒ lǒkho dě Rò̌mǎ a ta̤pǒala̤ tò̤. A sò̌yṳ ǒ tû̌ ashiaga.} Aprṳ̂ahophû̌ akla tapwa̤, htodě Yṳ̌da Isakarǐo htě a shaǎlò̤kè Běcǎnu tapwa̤.

Běcǎ Ye̤shǔ plûcû̌ pwa̤nophû̌ shǐsò̌gini̤

(Mǎ̤riko 6:7-13; Lǔka 9:1-6)

5 Bǎ Běcǎ Ye̤shǔ nocû̌ akhophijaû̌ shǐsò̌gini̤ htǒo akhanu, a mǎcû̌nṳ asî ta̤hî̌bǎ, “Cû̌ ma̤ dě Yṳ̌daphû̌ mè̤tò̤ toǒ aklanu ma̤ nî̌, htodě cû̌nṳ ma̤ dě Shamarî̌taphû̌ adoashǒkûnu ma̤ma̤ nî̌꤮. 6 Cû̌tû̌pwǎ dě pa khlilèphû̌ Israelphû̌ akla htě asǒsǒta sophû̌ hǎmǎnu toǒ a ǒnu pwǎ nî̌꤮. 7 Bǎ sî cû̌ akha, dǒhtû̌ǐ bǎ kò ta, ‘Mǒkhû̌ ashiaga phǔhèhǒ,’ hǐnu nî̌꤮. 8 Ma̤bǎ kòyò htě ashǐasha toǒ, ma̤htûpwa̤gesǒ kòyò htě a si toǒ, ma̤bǎge kòyò ta̤shakroǎ dě phělo̤ toǒ, wṳ̂hǎhtò̌kè lǒkho khînǎkhîno, sî nî̤bǎkobò ta̤htǒo toǒ akhû̌akhî, kwi ma̤ kò akhû̌akǎ ma̤ nî̌, ma̤ko pwǎbǎ kòyò nî̌꤮. 9 Htabǎbǎ, wûbǎbǎ, wûtîlî bǎbǎ shû̌cû̌nṳ lǒkho pûma̤ yǎdě sî wûkokû ma̤ nî̌꤮. 10 Hû̌khi bǎbǎ, phî̌cû̌kwèkhlo lǒkho pûma̤ nî̌, hǐdo bǎbǎ, khò̌phě bǎbǎ, tò̤mî̌ nò̌htǒ bǎbǎ phî̌cû̌nṳ lǒkho pûma̤ nî̌꤮. Ma̤tè̤hî̌dě kòyò htě a ma̤ ta̤ma̤ toǒnu a to nî̤bǎ ta̤htě a lo̤bǎ toǒ. ^b

11 “Bǎ sî cû̌nṳ dotado akûnu, kè̌lǎ kòyò htě sî la̤nǎla̤ǐ yǎ tapwa̤pwa̤ dě cû̌ǒkû̌ yǎ ahǐnu. Dě ǒsělě kû̌ta a bǎnu to̤htû̌ sî hǎhtò̌gepě taplǎnu nî̌꤮. 12 Bǎ sî cû̌nṳ hǐ tamakû akhanu, kwi Cǒmara htě a glè howi̤ hǐnu tama nî̌꤮. 13 Hǐnu tama a dè to nî̤bǎ ta̤howi̤ hî̌dě bè̌ǒkè sî sò̌phlǒ ta̤pè̤ta̤dû a ta̤howi̤ dě asî hǐkûnu. Asî dè kaǎshǔwǒ sî tò̤ hî̌dě phî̌gesǒ sî sò̌phlǒ ta̤pè̤ta̤dû htǒonu nî̌꤮. 14 Kòyò tapwa̤pwa̤ dè kaǎshǔ sî tò̤, a dè gana̤de sîyo̤ tò̤ hî̌dě, bǎ sî hǎhtò̌cû̌kè ta hǐnu tama akha, dèmè̤tò̤mî̌ donu tado akhanu, tèdè̌lòte̤kè hǎgûmṳ̂ dě sî khǎlǎlo̤nu toǒ. ^{▼▼Tèdè̌lòte̤kè hǎgûmṳ̂ amûasǎ mî̌, Cǒmara cèrò asî pě.} ^d 15 He hî̌ mè̤mè̤̌ sî, htû̌꤮ Cǒmara cèrò kòyòhǎkhû̌phû̌ pě akhanu, a cèrò jîkhlo kòyò htǒonu tado ta Sò̌dowî̤ ta Gòmò̤̌rawî̤phû̌ ^{▼▼Dě wǐnukha bǎ Abraham ǒhtûpwa̤pe hǎkhû̌ akha, kòyò ǒ wî̤nu ginǐ̤wî̤ akû toǒnu, a ma̤ mè̤mè̤̌ ta̤phû̌mò̤shî̌hto akhû̌akhî, Cǒmara ma̤pî̌bòkè wî̤nu ginǐ̤wî̤.} dě Cǒmara cèrò asî bǎ꤮ nukhanu toǒ pě. ^f

Ta̤ma̤jîma̤jû htě a glè hèbǎ pwa̤nophû̌ toǒ

(Mǎ̤riko 13:9-13; Lǔka 21:12-17)

16 “He nocû̌ sî lò̤ta he plûcû̌ sophû̌ dě Chyǐmi̤ aklanu. Ma̤hǐnudě lîmò kû̌ lǒkho pwǐ wṳ̂ toǒnu, dě sò̌phlǒ mṳ̂plî kû̌ lǒkho pwǐ htû̌li̤cò̌nu nî̌꤮. ^g 17 Ǒsè̌rè̌ lǒkho sîna̤, ma̤tè̤hî̌dě kò pṳ̂sûcû̌ sî dě ta̤sabahǐ hǐkǒdû̌ toǒ la̤ǒhtuhî̌bǎplǒ nû̌û ahǐkû pě dě a phlěpo̤ sî bǎ ta̤sabahǐ toǒ akû pě. ^h 18 Hekhû̌hekhî, kò cǐjûgrûhtû̌taa hè sî dě pwa̤pǒta̤ htě a htû hǐkǒdû̌ toǒ ta Khwǐ toǒ a ǒ pě. Sî dǒhtû̌ǐ nṳbǎ asî ta hewi̤hekè̌ pě. Sî bǎ khòlṳ sîsò̌ ta asînu toǒ ta Yṳ̌daphû̌ mè̤tò̤ toǒ pě. 19 Pwǎ̤ta bǎ asî pṳ̂ sî akhanu, bǎgubǎgènǎ pû ta sî glè hî̌bǎ titè pě mè̤tò̤mî̌ sî glè hî̌bǎ hî̌tènu ma̤. Khîkha hèto̤ pěnu, Cǒmara ǐ sî yo̤sǎ htě sî to hî̌bǎnu toǒ pě. 20 Yo̤sǎnu toǒ mî̌ sî ta̤hî̌bǎ tû̌ mè̤tò̤, a mî̌ papha Cǒmara a sǎcahtǐ hî̌bǎ sî dě sî bǎhî̌ pwǎ.

21 “Bǎnuakha pěnu, pṳ noma̤si tû̌ awè̤ ta kòhǔwa̤ pě, dě wè̤ noma̤si tû̌ apṳ ta kòhǔwa̤ pě, pha noma̤si tû̌ aphû̌ ta kòhǔwa̤ pě, phû̌ toǒ shě geshǔ tû̌ amo̤apha toǒ pě, dě a noma̤si tû̌ kò ta amo̤apha pě. ⁱ 22 Hekhû̌hekhî, kòyò pṳ̂̌꤮ tapwa̤ sò̌khěbò sî pě. ^j Pò̤̌ta kòyò htě a ihtǒtònò ǒměǒgle ta a ta̤yṳta̤nǎ akû to̤htû̌ agutṳ toǒnu Cǒmara ma̤lû̌htò̌ge asî pě.” ^k 23 Kò dè ma̤jîma̤jû sî bǎo tò̤glò dèhî̌dě khlè̌cû̌ tṳtṳ ahǔwa̤ tò̤glònu. He hî̌ mè̤mè̤̌ sî, bǎ sî cû̌ pṳ̂̌bò Israelphû̌ awî̤ htǒotoǒ hǒtò̤nu, kòyòphû̌khû htǒo hèlǎ pě. ^l

24 “Khophijaû̌nu asî̌ajòkhlo ta asara dǐkhò̌꤮ tò̤. ^m Jûphû̌ tapwa̤nu, adû̌khlo ta aběcǎ dǐkhò̌꤮ tò̤. ⁿ 25 Khophijaû̌ tapwa̤ dè jòpwî̌ asaranu, dě jûphû̌ tapwa̤ dè jòpwî̌ aběcǎnu hî̌mî̌ pǒhǒ. He htû hǐkǒdû̌ tapwa̤ dě asî dè kaǎ he ta khînǎkhîno a hǐkǒdû̌ htě ami̤ ta Belǎsebulǎ htǒo dèhî̌mî̌ sî htě a htû pwǎ hǐphû̌phòphû̌ toǒnu a kaǎjîkaǎjûkhlope sîmi̤ pě. ^o

Yṳǎ lǒkho Cǒmara nî̌꤮, ǐsha lǒkho ma̤ kòyòhǎkhû̌phû̌ ala̤ ma̤ nî̌꤮.

(Lǔka 12:2-7)

26 “Ma̤hǐnudě ǐsha ma̤ asîla̤ ma̤. Ta̤ bè̌hǔbè̌jo lǒ̤꤮ bò toǒnu, Cǒmara bòmohtò̌lṳbò yǎ pě, dě bò꤮ ta̤ma̤hǔma̤sè̌ toǒnu, Cǒmara ma̤htò̌lṳbò yǎ pě. ^p 27 Yo̤sǎ htě he hî̌ bǎ sî dě akhǐsuwukû toǒnu, cû̌hî̌bǎ lǒkho yǎdě alîklanu nî̌꤮. Yo̤sǎ htě sî gana̤de hǔsè̌ toǒnu, htò̌ yi̤kǒ lǒkho yǎ dě gukhětadǎkhû̌nu nî̌꤮. 28 Kòyò htě a ma̤sijò sî na̤klû pwǎ̤ta a ma̤sijò sî yola tò̤ toǒnu, ǐsha pûma̤ ala̤ma̤. Ǐsha lǒkho Cǒmara htě a ma̤sijò sî na̤klû ta sî yola ginǐ̤cǎbò htǒonu dě ngariǒkûnu tapwa̤ nî̌꤮. 29 Htû̌pwa̤phû̌ gǐnǐ̤bǎnu kò shaǎ pwǎ nû̌ûta wûyî̌ tṳmṳ̌ pwǎ, mè̤tò̤ya? Pwǎ̤ta pha Cǒmara dè nolò̤te̤ si asî tò̤ hî̌nu, tabǎ pwǎnu a lò̤te̤sinǒ dě hǎkhû̌tò̤. 30 Sî khǔlṳ lǒ̤꤮ bò dě sî hǐkǒlo̤ toǒnu, Cǒmara dǒbǎnǎhtobò hǒ. 31 Hǐnudě ǐsha pûma̤! Sî le̤dû̌pwî̤htûkhlo ta htû̌pwa̤phû̌nu tṳ̂prṳ̂taphǎ hǒ.

Ta̤kaǎshǔ Khrî̌stu ta ta̤la̤lò̤ Khrî̌stu

(Lǔka 12:8-9)

32 “Ûpèpè̌ bǎbǎ a dè olò̤ ta a yṳǎ he dě kòyò saprṳ̂ a lo̤mo̤ hî̌nu, he olò̤kû̌ yǎ hǐnu dě Cǒmara a mǒkhû̌tanaphû̌ toǒ a lo̤mo̤ pě. 33 Pwǎ̤ta ûpèpè̌ bǎbǎ a dè la̤lò̤kè ^{▼▼Toǒǒnu a hî̌ ta sumṳǐ} he ta a yṳǎ he tò̤ dě kòyò saprṳ̂ alo̤mo̤ pě tapwa̤pwa̤ hî̌nu, dě mǒkhû̌ hepha a lo̤mo̤ pěnu, a mî̌ hekòyò mè̤tò̤ he hî̌lè̌ hǐnu pě. ^r

Ta̤pè̤ta̤dû mè̤tò̤ ta̤shěta̤pe̤ pwǎ

(Lǔka 12:51-53, 14:26-27)

34 “Gènè̤ lǒkho pûma̤ ta he phî̌hè ta̤pè̤ta̤dû hǎkhû̌ bǎonu ma̤. He phî̌hè ta̤pè̤ta̤dû mè̤tò̤. He phî̌hè nò̌she tabǎ. 35 Ma̤tè̤hî̌dě, he hè ǐhtûhtò̌pwǎ

‘Phû̌makhû ta pha, phû̌mamǔ ta mo̤, dè̌ ta mi̤pwa̤mamǔ to̤klî̌ nû̌ûnu pě. 36 Kòyò tapwa̤pwa̤ dě kò sò̌khěkhû̌khwè nû̌û pě numî̌ a mî̌tû̌pwǎ a hǐphû̌phòphû̌ tû̌ pwǎ.’ ^s

37 “Kòyò tapwa̤pwa̤ a mo̤ǐkhlo amo̤apha ta he hî̌nu, a gwa ta he tò̤. Kòyò tapwa̤pwa̤ a mo̤ǐkhlo a phû̌mǔphû̌khû ta he hî̌nu, a gwa ta he tò̤. 38 Kòyò tapwa̤pwa̤ aò̌ tûû̌ a nò̌dòhtǔ tò̤tò̤, agû hekò tò̤tò̤nu, a gwa ta he tò̤. ^t 39 Kòyò tapwa̤pwa̤ a sò̌le̤ǐ ata̤htûpwa̤nu, a yolahtûpwa̤ lò̤jûkè pě. Kòyò htě a khòsi ta̤htûpwa̤ ta heyanu, a kè̌shǐ yolahtûpwa̤ tûjûpwa̤ pě. ^u

Mî̌ûpè bǎbǎ htě a kaǎ Běcǎ Ye̤shǔ akhophijaû̌nu, a dǒshuǐ Ye̤shǔ hǒ.

(Mǎ̤riko 9:41)

40 “Kòyò htě a kaǎshǔ sînu mî̌ a kaǎshǔ he hǒ. ^v Dě kòyò htě a kaǎshǔ he numî̌, a kaǎshǔ pha Cǒmara htě a nohè he htǒonu tapwa̤ hǒ. ^w 41 Kòyò tapwa̤pwa̤ htû Cǒmara apwa̤po̤ dě kòyò tapwa̤pwa̤ glè kaǎshǔ pwa̤po̤ htǒotapwa̤nu, Cǒmara ǐyǎ ta̤ma̤khû̌kǎ pwǐ a ǐ pwa̤po̤ toǒnu pě. Kòyò tapwa̤pwa̤ htû kòyòcǒkòyòtè̤ dě kòyò tapwa̤pwa̤ glè kaǎshǔ kòyòcǒkòyòtè̤ htǒotapwa̤nu, Cǒmara ǐyǎ ta̤ma̤khû̌kǎ pwǐ a ǐ kòyòcǒkòyòtè̤ toǒnu pě. 42 He hî̌ mè̤mè̤̌ sî, kòyò tapwa̤pwa̤ htû he khophijaû̌ a pî̌tî̌gutṳ̌ tapwa̤ akhû̌akhî, ûpèpè̌ bǎbǎ htě a ǐo kòyò htǒotapwa̤ ta shigûjû taba pwǎnu, Cǒmara ǐ mè̤mè̤̌ nû̌û ta̤ma̤khû̌kǎ pě.”