Mat 19 | KxfSCKRC | STEP | Bǎ Běcǎ Ye̤shǔ hî̌hto ta̤htǒo toǒ akhanu, a ǒ bǎ Galilî̌aga nudě a hǎhtò̌cû̌kè Yṳ̌daga bǎ Jòda shilo̤ bò̌kho tokho.

Matthew 19

Ma ta wṳ̂ bè̌kè nû̌û awi̤akè̌

(Mǎ̤riko 10:1-12)

1 Bǎ Běcǎ Ye̤shǔ hî̌hto ta̤htǒo toǒ akhanu, a ǒ bǎ Galilî̌aga nudě a hǎhtò̌cû̌kè Yṳ̌daga bǎ Jòda shilo̤ bò̌kho tokho. 2 Kòyò gûplṳ̂gûphǎ kû̌bò nû̌kò dě a ma̤bǎ bǎ kò ta̤shǐta̤sha bǎnu.

3 Dě Pharisè̌phû̌ toǒǒnu a hèdǒ Ye̤shǔ ǒ dě asî sò̌yṳ hè kè̌lǎpṳ̂ Běcǎ Ye̤shǔ ata̤sǔ dě a hè gwè takǎ nû̌û, “Kòyò tapwa̤pwa̤ bè̌kè ama mî̌ anî̤pwǎ pa ta̤sû̌ta̤tòwò hî̌ hǐnu ya?”

4 Běcǎ hî̌shǔ asî, “Mǒhtûlû̌hǎhtûsa akhanu, ‘Cǒmara bǒlò̤tû̌pwǎ mamǔ tapwa̤ ta makhû tapwa̤ pa,’ numî̌ sî dǒnǒ kû̌kò tò̤ ya? ^a 5 Htodě Cǒmara hî̌, ‘Ta̤wi̤ta̤kè̌ htǒo akhû̌akhî, makhû htǒonu a bǎ bè̌kè amo̤apha dě a bǎ cû̌ǒplǒ kû̌ ta ama, kòyò htǒosò̌gini̤nu a htûhtò̌kè tapwǎ̤꤮ pa.’ ^b 6 Hǐnudě asî mî̌ kòyò sò̌gini̤ mè̤petò̤ hǒ. A htûhtò̌kè nû̌û tapwǎ̤꤮ pa akhû̌akhî, ta̤htě Cǒmara bè̌htu nû̌ûnu, kòyòhǎkhû̌phû̌ bǎ htěpa̤jò yǎ dǐpwǎ̤꤮ tò̤.”

7 Dě Pharisè̌phû̌ toǒ gwèpo̤ nû̌û, “Dèhî̌hǐnudě, mî̌ma̤tè̤ Mǒ̤jè cû̌ hî̌tǒ̤ ta makhû tapwa̤pwa̤ dè khwè̌ lî̤bè̌kèma a ta̤khwè̌mǎnǎ tabǎnu a ǐnû̌ûta ama dě a dè bè̌kè ama hî̌numî̌ anî̤ pwǎ, a cû̌ noǐtǒ̤ hǐnumî̌ ma̤tè?” ^c

8 Dě Běcǎ Ye̤shǔ hî̌shǔ asî, “Mǒ̤jè plû sî ta sî bè̌kè ma pwǐhè̌onumî̌ anî̤pwǎ, ma̤tè̤hî̌dě sî mî̌ kòyò khlilèphû̌ htě a hǐkǒshò̌ khǒtû̌aya akhû̌akhî, a plûpwǎ bǎ sî hǐnu. Pwǎ̤tadě Cǒmara bǒlò̤khû̌lû̌ ta̤ akha numî̌, a nobè̌kè kò tò̤. 9 He hî̌ sî, kòyò tapwa̤pwa̤ dě ama cû̌sǔnṳ makhû mè̤tò̤ pwǎ̤ta a dè bè̌kè ama ta ta̤wi̤ta̤kè̌ ahǔwa̤ dě a dè cû̌phî̌tèplè̌ ama ta ahǔwa̤tapwa̤ hî̌numî̌ a cû̌sǔnṳ ta mamǔnu hǒ.” ^d

10 Dě akhophijaû̌ toǒ hî̌ nû̌û, “Ta̤wi̤ta̤kè̌ pwǐhè̌o glè htûhtò̌jò ta matawṳ̂ aplǎkû dèhî̌dě dè phî̌ma tò̤ mî̌ awǒkhlo kò̌?”

11 Pò̤̌ta Ye̤shǔ hî̌shǔ asî, “Kòyò jûle̤phî̌yo̤bò̌ kû̌ ta̤sû̌ǐ htǒo pṳ̂̌꤮ tapwa̤ tò̤. Ta̤sû̌ǐ htǒonu a jûle̤phî̌yo̤bò̌ pwǎpǒ̤ kòyò htě Cǒmara ǐ nû̌û ta a glè ǒhtûpwa̤bò̌ toǒ aya pwǎ. 12 Ma̤tè̤hî̌dě kòyò toǒǒnu, akhû̌aǎ ǒtò̤pe dě a mo̤phukûpe akhû̌akhî, a phî̌ lǒkho phû̌ma tò̤. Toǒǒnu kò shǔkè nû̌û dǐ. Cǒmara shigaya akhû̌akhî, toǒǒnu a bè̌lò̤ asò̌phlǒ ta a bǎ phî̌pe amaawṳ̂ tò̤. Kòyò htě a jûle̤phî̌yo̤bò̌ ta̤sû̌ǐ htǒotoǒnu, noma̤ asînu.”

Běcǎ Ye̤shǔ howi̤ phijaû̌phû̌ toǒ

(Mǎ̤riko 10:13-16; Lǔka 18:15-17)

13 Kò phǒhè phijaû̌phû̌ toǒ Běcǎ Ye̤shǔ a ǒ, ma̤tè̤hî̌dě asî sò̌yṳ nodò̌htò̌ Běcǎ Ye̤shǔ acǔde dě phijaû̌ htǒotoǒ alo̤ htodě a sò̌yṳ nokwisaba Ye̤shǔ. Pwǎ̤ta akhophijaû̌ toǒ sǎhtǎshǔ kòyò htě a kaǎhè phijaû̌ htǒotoǒ.

14 Dě Běcǎ Ye̤shǔ hî̌ asî, “Plûhè phijaû̌phû̌nu toǒ heǒbǎo, ma̤dî̌dò pûma̤ asî ma̤, ma̤tè̤hî̌dě mǒkhû̌ ashiaga numî̌ kòyò htě a shò̌lò̤ asò̌phlǒ lò̤ta phijaû̌ htǒotoǒ atahǒ.” 15 Dě a dò̌htò̌hto acǔde asî lo̤ dě a hǎhtò̌cû̌kè.

Běcǎ Ye̤shǔ ǐsè̌rè̌ kòyò dû̌yò̤ toǒ

(Mǎ̤riko 10:17-31; Lǔka 18:18-30)

16 Kòyò tapwa̤ hè Běcǎ Ye̤shǔ a ǒ dě a hè gwè nû̌û, “Sara, ma̤pûhǐ he bǎ nî̤bǎ yolahtûpwa̤ tûjûpwa̤ ayanu, ta̤ awǒ tacǎcǎ htě he tobǎ ma̤numî̌ kwè̌꤮ mî̌titè?”

17 Běcǎ Ye̤shǔ hî̌ yǎ, “Ma̤tè̤dě na cû̌ gwètǒ̤ he ta ta̤wǒ awi̤akè̌ ma̤tè? Kòyò htě awǒ mè̤mè̤̌ numî̌ a ǒ pwǎpǒ̤ Cǒmara tapwǎ̤ pa. Na dè sò̌yṳ nî̤bǎ yolahtûpwa̤ dèhî̌mî̌ lṳ̂kû̌ ma̤kû̌ pwǐ Cǒmara ta̤mǎlò̤nu.”

18 Kòyònu tapwa̤ hî̌shǔ nû̌û, “Bǎtè toǒtè?” Běcǎ Ye̤shǔ hî̌shǔ yǎ, “‘Ma̤si ma̤ kòyò ma̤, ^e cû̌sǔnṳ ma̤ kòphû̌kòma ma̤, ^f ǎhǔǎkě pûma̤, ^g khò lòhǎlòho pûma̤ ta̤ma̤. ^h 19 Bè̌dubè̌na̤ namo̤napha, ⁱ mo̤ǐ nahǐphòwò̤shî̌ toǒ pwǐ na mo̤ǐlò̤ nana̤nu.’” ^j

20 “Htǒotoǒnu he ma̤htobòhǒ. He lo̤bǎma̤pe kwè̌꤮ mî̌titè?” Makhû phû̌sǎ htǒotapwa̤ hî̌shǔsǒ nû̌û hǐnu.

21 Dě Běcǎ Ye̤shǔ hî̌ yǎ, “Na dè sò̌yṳ htûhtò̌ ta kòyò lǒbe tapwa̤ dèhî̌mî̌ ge shaǎkèbò na ta̤kî̌ta̤kû̌nu toǒ dě ǐkè yǎta kòyò shuphǔshèwèphû̌ toǒnu. Na dè ma̤hǐnu hî̌dě na nî̤bǎ ta̤dû̌yò̤htò̌sa dě mǒkhû̌ pě. Gema̤hto hǐnu dě hè gûkû̌ hekò.”

22 Makhû phû̌sǎ htǒotapwa̤nu, a dû̌yò̤htò̌sa tûlû̌shû̌lě akhû̌akhî, bǎ a gana̤dehto Běcǎ Ye̤shǔ hî̌ nû̌û pwǐhè̌o akhanu, a mi̤sǎpi̤ dě a hǎhtò̌gekè.

23 Htǒotaplǎdě Ye̤shǔ hî̌ akhophijaû̌ toǒ, “He hî̌ mè̤mè̤̌ sî, kòyò dû̌yò̤ tapwa̤ glè nṳdě mǒkhû̌ shila̤gakû numî̌, apò̤ mè̤mè̤̌ nû̌ûya. 24 He hî̌po̤ sî꤮, tîsî̌budû̌ tado glè plî̌nṳ dě htò̌nè̌kûnu ayûkhlope ta kòyò dû̌yò̤htò̌sa tapwa̤ glè nṳ dě mǒkhû̌ shila̤gakûnu.”

25 Bǎ akhophijaû̌ toǒ gana̤de a hî̌ pwǐhè̌o akha, a sû̌pi̤sò̌pi̤bò lǒkho dě a gwè nû̌û, “Dè ma̤hǐnudě ûpè tapwa̤ glè nî̤bǎpe ta̤ma̤lû̌htò̌ge pè?”

26 Běcǎ Ye̤shǔ kè̌wa̤ totǐ asî dě a hî̌ asî, “Kòyòhǎkhû̌phû̌ ma̤lû̌htò̌gejò ana̤tò̤ pwǎ̤ta Cǒmara ma̤jòta̤ pṳ̂̌꤮ tacǎ.”

27 Dě Petru hî̌shǔ yǎ, “Kè̌mò̌, pa bè̌kèbò ta̤pṳ̂̌꤮ tacǎ dě pa gûkû̌ nakò hǒ. Hǐnudě pa glè nî̤bǎdǒ khû̌kǎ titètè pě?”

28 Běcǎ Ye̤shǔ hî̌shǔ asî, “He hî̌ mè̤mè̤̌ sî꤮, bǎ Cǒmara ma̤wǒ satèplè̌bò ta̤lǒ̤꤮ bò pě, htodě he mî̌ kòyòphû̌khû htǒo hǎnòò̌ gògohtahtò̌yî̤ alîarakha htǒotabǎ akhû̌ pěnu, ^k sî gû hekò htǒotoǒ hǎnòò̌ kû̌dǒ gògohtahtò̌yî̤ shǐginǐ̤bǎ alo̤ htǒonu pě dě sî cèròtû̌ Israelphû̌ shǐginǐ̤mṳ htǒonu pě. ^l 29 Htohǒtò̤ ûpèpè̌꤮ bǎbǎ, he akhû̌akhîdě a bè̌kè ahǐaphò bǎbǎ, apṳawè̤ toǒ bǎbǎ, amo̤apha bǎbǎ, aphû̌ali̤ toǒ bǎbǎ, a nî̤bǎ dû̌khlope ta a bè̌kènu toǒ aplǎ aya̤kû pě, htodě a nî̤bǎ yolahtûpwa̤ tûjûpwa̤ talakhǎ pě. 30 Pwǎ̤ta kòyò ǒ anǒkò toǒnu, a ǒkè dě alo̤mo̤ pě. Dě kòyò ǒ alo̤mo̤ toǒnu, a ǒkè dě anǒkò pě. ^{▼▼Kòyò ǒ dě anǒkò amûasǎ mî̌ kòyò htě kò gènè̤pî̌tî̌ nû̌û. Kò lo̤bǎdû̌ nû̌û tò̤ toǒnu Cǒmara bè̌dû̌khlo lo̤bǎdû̌khlo nû̌û. Pwǎ̤ta kòyò htě a ǒ dě lo̤mo̤ numî̌ kòyòhǎkhû̌phû̌ bè̌dû̌khlo nû̌û gènè̤dû̌ nû̌û ma̤hǐnudě Cǒmara bè̌pî̌tî̌ yǎ pě.} ⁿ