Matthew 22

Ta̤dǒnè khěkhǒ ta̤khòmò̤

(Lǔka 14:15-24)

1Běcǎ Ye̤shǔ dǒhtû̌ǐ khěkhǒ gesǒ bǎ asî dě a hî̌, 2“Mǒkhû̌ a shila̤gakû numî̌ asǒsǒta Khwǐ tapwa̤ htě a ma̤wǒnǎ bǎ a phû̌makhû khòmò̤pwè ta a glè bǔǎbǔoshǔ kòyò aya htǒonu tapwa̤hǒ. 3A nocû̌ kaǎhè ajûphû̌ toǒ ta kòyò htě a mǎhèǎhèo nû̌ûnu toǒ pwǎ̤tadě asî hî̌shǔ lǒkho, ‘Tò̤, pa hèkû̌ na tò̤.’

4“Htodě a nocû̌kaǎpo̤ ajûphû̌ hǔwa̤ toǒ ta kòyò htě amǎhèǎhèo nû̌û toǒ dě a hî̌cû̌ nû̌û, ‘Pwe̤ǐ kòyò htě he mǎhèǎhèo yǎnu toǒ ta, he ma̤wǒhtobò dî lṳmṳhǎ aya hǒ. He ma̤siǎ pṳ̂phadû̌ ta pṳ̂phû̌ abû̌ toǒ ayî̌. Hèǎhèo lǒkho ta̤khòmò̤ a ta̤ǎta̤o htǒonumî̌ anî̤ hǒ, cû̌pwe̤ǐ lǒkho asî htǒonu nî̌꤮’ a hî̌cû̌ jûphû̌ toǒ hǐnu.

5“Pò̤̌ta kòyò htě Khwǐ mǎhè nû̌û toǒnu a bè̌dubè̌na̤ dǐcǎ꤮ tò̤. A hǎhtò̌cû̌ khǒkèbò. Tapwa̤mî̌ a hè dě hǔklakhû̌, tapwa̤mî̌ a cû̌ ma̤guma̤khè̌. 6A ǒkèlè̌ toǒ dě a pṳ̂ ma̤jîma̤jû Khwǐ ajûphû̌ toǒ, htodě a ma̤si nû̌û jûphû̌ toǒ. 7Htǒotaplǎdě Khwǐ sò̌phlǒdû̌ dě a nocû̌ akliphû̌ toǒ, dě asî cû̌ma̤sikèbò kòyò htě a ma̤si nû̌û jûphû̌nu toǒ dě shû̌gèkèbò asî wî̤.

8“Dě a hî̌ jûphû̌ toǒ, ‘Kò ma̤wǒnǎbò ta̤khòmò̤ a ta̤ǎta̤o pwǎ̤tadě kòyò htě he mǎhè yǎ toǒ numî̌ kòyò htě a gwata mǎhè tò̤. 9Cû̌ lǒkho mò̌ klè̌ta̤ klè̌shěshǔ nû̌ûnu dě kè̌shǐ ûpèpè̌ bǎbǎ kaǎhèbò asî dě pwèkûbǎo nî̌꤮.’ 10Hǐnudě ajûphû̌ toǒ hǎhtò̌cû̌ klè̌dû̌ toǒ akû dě a cû̌kaǎplǒ lǒ̤꤮ bò kòyò htě a kè̌shǐnu toǒ. Ajî bǎbǎ, awǒ bǎbǎ, a hî̌pe tò̤, a kaǎhèbò nû̌dě ta̤khòmò̤ ahǐkûnu shǐtè̤mè̤ betî̌pî̌.

11“Pò̤̌tadě bǎ Khwǐ hènṳkè̌ shǐpwa̤shǐmè̤ akhanu, a kè̌shǐ shǐtè̤mè̤ htě a kûsǒ kû̌kò ta̤khòmò̤ a hǐdo tò̤ ǒ tapwa̤. 12A gwè nû̌û, ‘Khòmò̤̌꤮, na kûsǒ kû̌kò ta̤khòmò̤ hǐdopo̤to̤ tò̤ dě na cû̌ hènṳjò kû̌kò hî̌tè?’ Pwǎ̤tadě a hî̌shǔ nû̌û dǐmû̌꤮ tò̤.

13“Htǒotaplǎdě Khwǐ hî̌ apwa̤ma̤ta̤ toǒ, ‘Coklomě acǔde khò̌lopo̤nu dě wîhǎhtò̌kè a bǎ akhǐklanu. Gûla̤ bǎnu tò̤glòmî̌ ta̤hǎta̤wo agûla̤ ta ta̤ ěgwî khû̌khî agûla̤.’ ^a

14“Ma̤tè̤hî̌dě Cǒmara mǎhèplṳ̂ kòyò pwǎ̤tadě a wû̌lǎ pî̌tî̌pwǎ kò pwǎ.”

Yṳ̌daphû̌ toǒmî̌ a toǐ Khwǐkèsa ta̤kûta̤cî̌ ya?

(Mǎ̤riko 12:13-17; Lǔka 20:20-26)

15Htodě ma̤pûhǐ Pharisè̌phû̌ toǒ pṳ̂měǐ Běcǎ Ye̤shǔ hî̌bǎsǔ yo̤sǎ toǒ ayanudě, a hǎhtò̌cû̌ ǒhtuhî̌bǎplǒ nû̌û. 16Asî nocû̌ kû̌dǒ akhophijaû̌ toǒ ta Khwǐherǒ asaprṳ̂phû̌ toǒ bǎ Běcǎ a ǒ dě asî cû̌hî̌ Běcǎ, “Saradû̌, pa sî̌ya ta na mî̌ kòyò cǒtè̤ tapwa̤. Na sû̌ǐ kò pwǐ Cǒmara sò̌yṳ noǒhtûpwa̤ kònu toǒ. Na dè sû̌ǐtòwòǐ kò hî̌numî̌ na sû̌ǐpwǎ bǎ kò ta̤te̤ta̤mǎ pwǎ. Kòyòhǎkhû̌phû̌ toǒ gènè̤ na hî̌tè bǎbǎ, na ǐsha kû̌kò dǐcǎ꤮ tò̤. Na kè̌dû̌ kè̌pî̌tî̌ kû̌kò tò̤tò̤. 17Pwǎ̤tadě na hî̌bǎkè̌ pa htǒotacǎ, mî̌ na gènè̤ hî̌tè? Mî̌ pa tobǎǐ Rò̌mǎ akhwǐdû̌kèsa ta̤kûta̤cî̌ ya? Mî̌ pa toǐ tò̤ ya?”

18Pwǎ̤tadě Běcǎ Ye̤shǔ sî̌yǎnǎhto asî glè̌ pṳ̂ nû̌ûyo̤sǎ dě a hî̌shǔ asî, “Kòyò jîcǒjîtè̤ na̤ sî꤮, mî̌ma̤tè̤dě sî nè̤̌hè gwèkhǒ yo̤sǎ hǐnu ma̤tè? 19Dǔlṳ bǎkè̌ he wûyî̌ htě sî ǐ yǎta ta̤kûta̤cî̌ htǒonu,” dě asî hèǐ nû̌û wûyî̌ Dina̤ri tabǎ. 20Dě a gwè asî, “Htǒomî̌ ûpè hǐkǒyola pè? A khwè̌ nû̌ûta ûpè ami̤pè?”

21Dě asî hî̌shǔ, “Khwǐ a hǐkǒyola ta Khwǐ ami̤.”

Htodě Běcǎ hî̌shǔ asî, “Khwǐdû̌kèsa ata dèhî̌dě ǐ yǎta Khwǐdû̌nu, Cǒmara ata dèhî̌dě ǐ yǎta Cǒmaranu.”

22Bǎ asî gana̤de Ye̤shǔ hî̌ hǐnu akha, asî te̤pe̤ lǒ̤bò dě asî hǎhtò̌ tephekèbò nû̌ûla̤.

Kògwè ta̤ǒhtûpwa̤ htû̌꤮ sihto pě awi̤akè̌

(Mǎ̤riko 12:18-27; Lǔka 20:27-40)

23Bǎnu ti̤ni̤, Sadugè̌phû̌ htě a yṳǎtû̌ aya ta htû̌꤮ sihtopěnu ta̤htûpwa̤ge ǒpe tò̤ tṳmṳnu a hè Běcǎ a ǒ dě a hè gwè nû̌û yo̤ tûmû. ^b 24Dě asî gwè Běcǎ Ye̤shǔ, “Saradû̌, Mǒ̤jè hî̌ pa ta makhû tapwa̤pwa̤ dè si dě aphû̌ dè ǒkè dǐpwǎ̤꤮ tò̤ hî̌nu, ma̤pûhǐ akhlialè ǒkè kû̌kò nudě, a pṳmakhû bǎ phî̌sǒ akhi ǒkèhtǒo, a hî̌ hǐnu. ^c 25Khònò̤dě paklanu pṳ ta wè̤ makhû ǒ susǒtapwa̤. A wè̤pwa̤lǒ tapwa̤ phî̌ ama dě anǒkònu a sikè ama la̤, dě aphû̌ ǒkè dǐpwǎ̤꤮ tò̤ akhû̌akhî, apṳ hǒla̤ tapwa̤ bǎphî̌sǒ akhi ǒkè htǒotapwa̤. 26Apṳ ginǐ̤pwa̤ tapwa̤ htodě supwa̤ tapwa̤ to̤htû̌ apwa̤ susǒtapwa̤ htǒotapwa̤nu a htûhtò̌ sǒsǒbò pwǐ awè̤pwa̤ htûhtò̌nu. 27Agutṳ̌lò̤ dě mamǔ htǒotapwa̤ si kû̌nǒ pwǎ. 28Hǐnudě htû̌꤮ si htûpwa̤gesǒ amṳni̤ pě ti̤ni̤nu, htǒo susǒtapwa̤ aklanu, bǎtè tapwa̤ glè htû awṳ̂ ya? Ma̤tè̤hî̌dě asî htûbò nû̌ûwṳ̂ nǔ꤮,” A gwè Ye̤shǔ hǐnu.

29Dě Běcǎ Ye̤shǔ hî̌shǔ gesǒ asî, “Sî sǔbò hǒ, ma̤tè̤hî̌dě sî sî̌ya te̤mǎ kû̌kò lî̤cahtǐ ta Cǒmara a ta̤po̤ta̤phǎ ma̤jòta̤ toǒ tò̤. 30Ma̤tè̤hî̌dě htû̌꤮ kò sihtûpwa̤gesǒ pěnu kò phî̌phû̌phî̌ma, kò phî̌phû̌phî̌wṳ̂ ǒpetò̤, asî sǒsǒbò pwǐ mǒkhû̌tanaphû̌nu toǒ pě. 31– 32Ta̤si htûpwa̤gesǒ awi̤akè̌ htǒonu, Cǒmara hî̌, ‘He mî̌ Abraham a Cǒmara, Yǎ̤kò a Cǒmara, ta Isǎko a Cǒmara,’ a hî̌ hǐnu numî̌ sî dǒnǒ kû̌kò tò̤ ya? Cǒmara mî̌ kòyòsi toǒ a Cǒmara mè̤tò̤, kòyò htûpwa̤ toǒ a Cǒmara.” ^d

33Bǎ kòyò saprṳ̂ gana̤de a ta̤sû̌ǐhtǒo akhanu, a sû̌pi̤sò̌pi̤bò.

Ta̤mǎlò̤ htě a lo̤bǎdû̌khlo kò

(Mǎ̤riko 12:28-34; Lǔka 10:25-28)

34Pharisè̌phû̌ toǒ gana̤de ta Sadugè̌phû̌ toǒ hî̌geshǔ Běcǎ Ye̤shǔ dǐmû̌꤮ tò̤, dě Pharisè̌phû̌ toǒ kaǎplǒ kè̌khînû̌û. 35Dě asî klanu, a sî̌ya lǒbekhlo Yṳ̌daphû̌ a ta̤sû̌ta̤tòwònu a ǒtapwa̤ dě a hè gwèkhǒ Běcǎ Ye̤shǔ, 36“Sara, ta̤mǎlò̤ a ta̤sû̌ta̤tòwò akla htǒotoǒ numî̌ bǎtè tûmû dě a lo̤bǎdû̌khlo ya?”

37Běcǎ hî̌shǔ gesǒ, “‘Mo̤ǐ lǒ̤sû̌lǒ̤sò̌ sî Cǒmara ta sî sò̌phlǒ tamabò, mo̤ǐ lǒ̤sû̌lǒ̤sò̌ a ta sî ta̤ǒhtûpwa̤ lǒ̤꤮ bò, mo̤ǐ lǒ̤sû̌lǒ̤sò̌ a ta sî ta̤gènè̤ lǒ̤꤮ bò.’ ^e 38Htǒomî̌ ta̤mǎlò̤ htě a lo̤bǎdû̌khlo tûmû hǒ. 39Ginǐ̤mûtûmû mî̌, alò̤ta awǐnu tûmû, ‘Mo̤ǐ kòyò htě a ǒphǔ ta sînu toǒ pwǐ sî mo̤ǐlò̤ sîna̤nu.’ ^f 40Lǒ̤꤮ bò Mǒ̤jè ta pwa̤po̤ sîtoǒ a ta̤sû̌ta̤tòwò a kòshî̌kòtṳ toǒnu a gètè̤htò̌bò ta ta̤mǎlò̤ htǒoginǐ̤mû alo̤ pwǎ.” ^g

Mè̤shǐa mî̌ ûpè akhlialè ya?

(Mǎ̤riko 12:35-37; Lǔka 20:41-44)

41Bǎ Pharisè̌phû̌ cû̌ ǒhtuhî̌bǎplǒbò nû̌û akhanu, Běcǎ Ye̤shǔ gwè asî, 42“Khrî̌stu htě a ma̤lû̌htò̌ge kò htǒotapwa̤ awi̤akè̌nu, sî gènè̤ nû̌û hî̌tè? Akhlialè gilò̤ ta ûpè ǒ?”

Dě asî hî̌shǔ, “Khwǐdǎ̤wi̤ akhlialè.”

43Dě a hî̌ asî, “Dè ma̤hǐnudě mî̌ma̤tè̤dě Běcǎ sǎcahtǐ htû̌bǎ Dǎ̤wi̤ sò̌phlǒ dě a cû̌no kaǎtǒ̤ Khrî̌stu htǒonu ta, ‘Běcǎ’ ma̤tè? Ma̤tè̤hî̌dě a cû̌hî̌ tǒ̤ ta,

44‘Běcǎ Cǒmara hî̌ he Běcǎ ta, “Bǎ he ma̤pè̤ bòmṳ̂sîglî kòyò htě a sò̌khě ▼

▼Khuwè̤

nanu toǒ dě he bè̌ǒbò asî dě na khǎlǎla̤ hǒtò̤nu, hǎnòò̌ dě he cǔdemû htǒotokho.”’ ⁱ

45Dě Khwǐdǎ̤wi̤ dè kaǎ nû̌û ta, ‘Běcǎ’ dèhî̌dě a cû̌ htûjò Khwǐdǎ̤wi̤ aphû̌khû hî̌tè?” 46Kò hî̌shǔ gejòpe nû̌û dǐpwǎ̤꤮ tò̤. Sahtò̌ hènè bǎnu ti̤ni̤nu kò gwèbǔpe nû̌û dǐpwǎ̤꤮ tò̤.