Matthew 26

Asî gènè̤ guma̤si Běcǎyo̤

(Mǎ̤riko 14:1-2; Lǔka 22:1-2; Jowǎ̤ni̤ 11:45-53)

1Bǎ Běcǎ pwe̤ǐlṳbòhto htǒotoǒ akhanu, a hî̌ akhophijaû̌ toǒ, 2“Sî sî̌yahǒ, alo̤bǎpe ginǐ̤ni̤ mî̌ pwè htě kò kaǎ yǎta ta̤cû̌tûlû̌pwè hèto̤ hǒ. Kò shaǎlò̤kè kòyòphû̌khû htǒo pě dě kò htǎwa̤sikè nû̌û dě nò̌dòhtǔlo̤ pě.” ^a

3Bǎnukhanu, pwa̤tòlûhtò̌ hǐkǒdû̌ toǒ ta Yṳ̌daphû̌ ta̤subusaba hǐkǒdû̌ toǒ ǒplǒbò nû̌û pwa̤tòlûhtò̌ hǐkǒdû̌gutṳ̌ Kaǐpha ahokû. 4Asî ma̤wǒnǎbò ta a glè pṳ̂ ma̤sihǔkè Ye̤shǔ. 5Pwǎ̤ta asî hî̌ kè̌khînû̌û, “Bǎ pa ma̤pwè akhahtǒonu pa to pṳ̂ yǎ tò̤, Pěmî̌ kòyò saprṳ̂ toǒ sò̌phlǒdû̌ dě a ma̤kèsè̌kosǒbò hè̌.”

Kò lò̌lò̤ shinṳmû̌ dě Ye̤shǔ a hǐkǒlo̤ bǎ Betanǐdokû

(Mǎ̤riko 14:3-9; Jowǎ̤ni̤ 12:1-8)

6Bǎ Běcǎ Ye̤shǔ ǒ dě Betanǐdo, Shîmǒ̤nè̤ htě ta̤shakroǎ nû̌û phělo̤nu tapwa̤ ahǐkû dě a ǎdî akhanu, 7Mamǔ tapwa̤ hè nû̌ûǒ dě a phî̌hènṳ pò̤ htě kò ma̤ yǎ ta lo̤bû dě a ǒbe ta shinṳmû̌ le̤dû̌pwî̤htû htǒotò̤pò̤ dě a hè lò̌lò̤ nû̌û Běcǎ Ye̤shǔ hǐkǒlo̤. ^b

8Bǎ akhophijaû̌ toǒ kè̌shǐ akhanu, a sò̌phlǒdû̌ dě a gwè nû̌û, “Cû̌ma̤bò nòdû̌kèyǎ ma̤tè? 9Dè shaǎ shinṳmû̌ htǒonu hî̌mî̌ a nî̤ le̤dû̌pwî̤htû mè̤mè̤̌ dě a nî̤ wû htǒonu ǐ yǎta kòyò shuphǔshèwèphû̌nu kò̌.”

10Běcǎ Ye̤shǔ sî̌ya akhû̌akhî, a hî̌ asî, “Sî cû̌ ma̤dî̌dò mamǔ htǒotapwa̤ ma̤tè? A ma̤ta̤htǒo numî̌ awǒ mè̤mè̤̌ heya hǒ. 11Kòyò shuphǔshèwèphû̌ toǒ ǒkû̌dǒ ta sî pṳ̂̌꤮ taplǎ, pwǎ̤tadě hehtǒonu he ǒkû̌sayè̤ nǒ sî tò̤. ^c 12Bǎ a lò̌lò̤ shinṳmû̌ htǒo dě he na̤lo̤ akha htǒonumî̌, a ma̤wǒnǎ bǎ he ta kò lǔlò̤ he dě lṳkû pěnu hǒ. 13He hî̌ mè̤mè̤̌꤮ sî, htû̌꤮ kò cû̌shido dǒhtû̌ǐ ta̤sò̌le̤sò̌lò̤ awi̤akè̌ htǒo bǎ hǎkhû̌ bǎotebě bǎtè꤮ tò̤glò pě bǎbǎ, kò gènè̤htò̌to̤bǎ yǎ pě dě kò pwe̤ǐlṳ ta̤htě a ma̤hto htǒonu pě.”

Yṳ̌da sò̌phlǒto ta a glè shaǎkè Běcǎ

(Mǎ̤riko 14:10-11; Lǔka 22:3-6)

14Dě Běcǎ Ye̤shǔ akhophijaû̌ shǐsò̌gini̤ akla ami̤ mî̌ Yṳ̌da Isakarǐo htǒotapwa̤nu, a cû̌ dě pwa̤tòlûhtò̌ hǐkǒdû̌ toǒ a ǒ. 15Dě a cû̌ gwè asî, “He dè ǐlò̤kè Ye̤shǔ dě sî cǔdekû hî̌dě sî ǐ he pwî̌tè?” Dě asî ǐ nû̌û wûyî̌ sakhò̌. ^d 16Sahtò̌ bǎnu dě Yṳ̌da kè̌ ashuakhwèwǒ dě a glè te̤bǎte̤to ta a glè shaǎlò̤kè Ye̤shǔ.

Ta̤cû̌tûlû̌pwè lṳmṳhǎ shǎǎcahtǐ

(Mǎ̤riko 14:12-21; Lǔka 22:7-13; Jowǎ̤ni̤ 13:21-30)

17Bǎ pwè ǎmû̌ shodo ta̤bû awǐlǒ ti̤ni̤nu, akhophijaû̌ toǒ hè Ye̤shǔ ǒ dě a hègwè nû̌û, “Ta̤cû̌tûlû̌pwè lṳmṳhǎ shǎǎcahtǐ htǒonu, na sò̌yṳ nocû̌ma̤wǒ pa bǎtè tò̤glòtè?”

18Dě a hî̌shǔ asî, “Cû̌nṳ wî̤kûnu dě cû̌ makhûnu tapwa̤ ǒnu, dě cû̌ hî̌ yǎ, ‘Sara hî̌ ta, khîkhaphǔ ta heya hǒ, he bǎǎo plǒ ta̤cû̌tûlû̌pwè lṳmṳhǎ shǎǎcahtǐ ta he khophijaû̌ dě nahǐkû’ hî̌ yǎ hǐnu nî̌꤮.” 19Dě akhophijaû̌ toǒ ma̤pwǐ a hî̌ asînu dě asî cû̌ ma̤wǒnǎ lǒkho ta̤cû̌tûlû̌pwè shǎǎcahtǐ lṳmṳhǎ aya bǎnu.

20Bǎ lṳmṳkhǐpo̤lo̤ akhanu, Běcǎ ta akhophijaû̌ shǐsò̌gini̤ hǎnòò̌ te̤we̤plǒbò nû̌û la̤ǎdîjowa̤ akòshî̌. 21Dě bǎ asî ǎdî akhanu, a hî̌ asî, “He hî̌ mè̤mè̤̌꤮ sî, dě sîkla htǒonu, kòyò htě a shaǎlò̤kè he pěnu a ǒ tapwa̤.”

22Htǒotaplǎdě asî sò̌phlǒmo̤pe dî̌kî̌꤮ tò̤, dě a gwè lǒkho Běcǎ tapwa̤ hto tapwa̤, “Běcǎ, na hî̌nu tapwa̤mî̌ he mè̤tò̤ yahî̌?”

23Běcǎ hî̌shǔ asî, “Kòyò htě a bǒnṳǎ kû̌dǒ ta he dě balo̤kûnu tapwa̤ mî̌ pwa̤htě a shaǎlò̤kè he pěnu tapwa̤ hǒ. ^e 24Pwǐ lî̤cahtǐkû hî̌nǎ ta kòyòphû̌khû mî̌ hehtǒo a bǎ si pě pwǎ̤ta kòyò htě a glè shaǎlò̤kè kòyòphû̌khû htǒotapwa̤nu, Cǒmara cèrò yǎ pě. A dè ǒphijaû̌lò̤ tò̤ hî̌numî̌ awǒkhlope nû̌ûya.”

25Htǒotaplǎdě Yṳ̌da htě a glè shaǎlò̤kè nû̌û htǒotapwa̤ gwè nû̌û, “Sara, na hî̌nu tapwa̤mî̌ he mè̤tò̤, yahî̌?” Běcǎ hî̌shǔ nû̌û, “Tò̤, na mè̤hǒ.”

(Mǎ̤riko 14:22-26; Lǔka 22:14-23; Kòrî̌tiaphû̌ awǐlǒ tabǎ 11:23-25)

26Bǎ asî ǎshǎ akhanu, Běcǎ Ye̤shǔ phî̌ mû̌ dě a hî̌bwǐhî̌sîrîhtò̌ Cǒmara, htodě a bî̌phò̌ mû̌ dě a ǐlò̤ nû̌û akhophijaû̌ toǒ a cǔdekû, dě a hî̌ asî, “Phî̌ǎmò̌ lǒkho, htǒomî̌ he na̤klû hǒ.”

27Htodě a phî̌htò̌ ba, a hî̌bwǐhî̌sîrî dě a ǐlò̤ tṳtṳ nû̌û akhophijaû̌ toǒ a ǒ dě a hî̌ asî, “Omò̌ lǒkho htǒo. 28Bahtǒo mî̌ ta̤wṳ̂dò asa htě a mî̌ hesǐ dě a sǐlò̤ ta a bǎ bòlû̌ kòyò saprṳ̂ ata̤sǔ pě. ^f 29He pwe̤ǐ bǎ sî, sahtò̌ khònò̤nu tǒ̤hè he openǒ sobîshi htǒo tò̤hǒ. He geoplǒsǒ sobîshi asa ta sî dě hepha ashiaga pě.”

30Htodě asî sò̌po̤ htû̌sò̌ǐ Cǒmara alî̤sò̌po̤ to̤to̤ dě a hǎhtò̌cû̌kè Olivekholokhû̌.

Běcǎ Ye̤shǔ hî̌po̤phǎ ana̤ ta Petru la̤kè nû̌û pě

(Mǎ̤riko 14:27-31; Lǔka 22:31-34; Jowǎ̤ni̤ 13:36-38)

31Htodě Běcǎ Ye̤shǔ hî̌ asî, “Lî̤cahtǐkû hî̌,

‘He po̤ pwa̤gèǐsophû̌ pě, dě sophû̌ toǒ khlè̌pò̌khlè̌shîbò pě.’

Ma̤tè̤hî̌dě htǒotasa pěnu, ta̤ htûhtò̌ ta he pwǐhè̌onu pě akhû̌akhî, sî hǎhtò̌khlè̌ cû̌khǒkèbò hela̤ pě,” A hî̌ hǐnu. ^g

32“Pwǎ̤tadě htû̌꤮ he si htûpwa̤gehtosǒ pěnu, he cû̌nǎwǐ sî dě Galilî̌a gakûnu pě.” ^h

33Petru hî̌shǔ, “Kò glè sò̌phlǒpî̌kèbò na gûla̤ bǎbǎ, he sò̌phlǒpî̌kè lòtṳ̌nǒ na dî̌kî̌꤮ tò̤.”

34Mî̌tadě Běcǎ Ye̤shǔ hî̌shǔ yǎ, “He hî̌ mè̤mè̤̌ na, khò̌tasa bǎ shîphaû̌ hǒtò̤nu, he sî̌yanǒ yǎ tò̤, na la̤lò̤kè he pě suplǎ.”

35Pwǎ̤tadě Petru hî̌shǔ, “He tobǎ si kû̌dǒ ta na bǎbǎ, he sî̌yanǒ yǎ tò̤nu he hî̌nǒ dî̌kî̌꤮ tò̤.” Dě akhophijaû̌ ahǔwa̤ toǒ gûhî̌kû̌bò hǐnunu.

Běcǎ Ye̤shǔ cû̌ kwisaba dě Jèshè̌mani agûla̤ tò̤glò

(Mǎ̤riko 14:32-42; Lǔka 22:39-46)

36Htodě Běcǎ Ye̤shǔ ta akhophijaû̌ toǒ cû̌ gûla̤ tò̤glò htě kò kaǎ yǎta Jèshè̌mani dě a hî̌ asî, “Bǎ he cû̌saba děnu tò̤glò akhapěnu, hǎnòò̌ǒkè kû̌nǎ lǒkho bǎo nî̌꤮.” 37A kaǎcû̌nṳ Petru ta Sebedè̌o aphû̌makhû sò̌gini̤ dě a sǎpla̤sǎyṳ hè dě a sò̌phlǒgûgè hè. 38Htodě a hî̌ asî, “He sǎpla̤sǎyṳ sikèhǒ, a lò̤kèta he glè̌ sitè̤tè̤nu hǒ. Ǒkè lǒkho bǎo dě ǒsòklò lǒkho nî̌꤮.”

39A cû̌ hèpo̤ alo̤mo̤ tîkî̌phû̌ dě a hǎmoǒ û̌tṳglulò̤ hǎkhû̌ a kwisaba dě a hî̌, “Kǒ꤮ pha꤮ na dè phî̌ tephekè bǎ he ta̤jîta̤jû aba htǒotabǎ mî̌ anî̤ pwǎ dèhî̌dě phî̌tephekè bǎ he, pwǎ̤tadě jǔ꤮ he sò̌yṳ ma̤ tû̌ he sò̌phlǒ tò̤. Jǔ꤮ tû̌pwǎ na sò̌phlǒ nî̌꤮.”

40Htodě a gesǒ akhophijaû̌ toǒ a ǒ dě a gekè̌shǐ asî hǎmoǒ shope̤bò, dě a gwè Petru, “Sî ǒsòklò yî̤kû̌ ta he ta̤na̤rîpwǎnu dě sî sòklò khòbò̌tò̤ ya? 41Ma̤pûhǐ sî cû̌nṳ kû̌dǒ pû dě ta̤htû̌sǒbǎ aphû̌mò̤ akû tò̤nu, sòklò dě kwisaba lǒkho nî̌꤮. Sî sò̌phlǒshû̌sho mè̤mè̤̌ ta̤htě ato pwǎ̤tadě sî na̤klû htǒonu a khû̌ǎyû̌lò̤ jî̌kè.”

42A cû̌ gesǒ ginǐ̤plǎtaplǎ dě a kwisaba, “Kǒ꤮ he phasò̌do, he bǎ o lòtṳ̌ ta̤jîta̤jû a bahtǒo, phî̌tephekè dě anî̤ tò̤ dèhî̌dě, jǔ꤮ tû̌pwǎ na sò̌phlǒnî̌꤮.”

43Bǎ a gekè̌sǒ akhophijaû̌ toǒnu, a gekè̌shǐ asî hǎmoǒshope̤bò. Asî sǎhǎmoǒ jîtûlû̌shû̌ dě a kè̌htò̌bò̌pe tò̤. 44Dě a hǎhtò̌cû̌ kwisaba gesǒ suplǎtaplǎ dě a hî̌sǒsǒ gesǒ pwǐ a hî̌ wǐ nupwǎ.

45Htodě a gesǒ akhophijaû̌ toǒ a ǒ dě a hî̌ asî, “Sî hǎmoǒ sadape lǒkho, sî ǒkǔ sadape lǒkho hî̌tè? Gana̤de kè̌mò̌ lǒkho, khîkha htě kò glè shaǎlò̤kè kòyòphû̌khû htǒo dě ta̤ma̤sǔphû̌ toǒ a cǔdekûnu, a hèto̤hǒ. 46Ihtǒ lǒkho mò̌, dě pa bǎ cû̌꤮, pwa̤ shaǎkè henu tapwa̤ hèto̤hǒ.”

Yṳ̌da kaǎhènṳ kòyò toǒ dě a hèpṳ̂ Běcǎ Ye̤shǔ

(Mǎ̤riko 14:43-50; Lǔka 22:47-53; Jowǎ̤ni̤ 18:3-12)

47Bǎ Běcǎ Ye̤shǔ hî̌bǎ pepwǎ akhanu, Yṳ̌da htě a ǒkû̌ ta akhophijaû̌ shǐsò̌gini̤ akla htǒotapwa̤nu a hèto̤ bǎnu. Dě kò gûhèkû̌ nû̌û tṳ̂prṳ̂taphǎ dě a phî̌hènṳ lǒkho nò̌plè, nò̌po̤ ta nò̌she toǒ. Kòyò htǒotoǒ numî̌ mî̌pwǎ pwa̤tòlûhtò̌ hǐkǒdû̌ toǒ ta khlilèphû̌ a hǐkǒdû̌ toǒ nohè asînu toǒ pwǎ. 48Pwa̤shaǎlò̤kè Běcǎ htǒotapwa̤nu a ǐsî̌yanǎwǐhto asî ta, “Kòyò htě he gomo̤ yǎ tapwa̤ numî̌ Ye̤shǔ htě pa sò̌yṳpṳ̂ yǎnu tapwa̤ hǒ dě hèpṳ̂ lǒkho yǎ nî̌,” A pwe̤ǐnǎ asî hǐnu. 49A hè totǐ taplǎhèpa dě Běcǎ Ye̤shǔ ǒ dě a hè hî̌ nû̌û, “Sara, na ǒmo̤ǒwǒ ya?” Htodě a gomo̤ nû̌û.

50Dě Běcǎ hî̌geshǔsǒ nû̌û, “Khobǒsû̌, na hè bǎo dě na hè ma̤titènu tûrû̌ ma̤mò̌.”

Htodě kòyò toǒ hèpṳ̂kè Ye̤shǔ. 51Kòyò htě a gû hèkû̌ ta Běcǎ Ye̤shǔ akla tapwa̤nu a běhtò̌ anò̌she dě a pe̤tṳkè pwa̤tòlûhtò̌ hǐkǒdû̌gutṳ̌ ajûphû̌ tapwa̤ anò̌ku tokho.

52Běcǎ hî̌ nû̌û, “Wo̤nṳwǒkè nanò̌she dě aklǒkûnu. Ma̤tè̤hî̌dě kòyò htě a pṳ̂ nò̌shenu a sige ta nò̌she pě. 53Ma̤pûhǐ mǒkhû̌tanaphû̌ toǒ hèlò̤ hǔbǐnṳ he ayanu, he dè kwi hepha dě a glè nohǎte̤ asî klimṳdû̌ ▼

▼Tṳmṳ mî̌ aǒ rî̌susǒ

shǐginǐ̤mṳ hî̌nu taplǎpa hepha ǐlò̤ he mî̌ anî̤ numî̌ sî sî̌yatò̤ ya? 54He dè ma̤hǐnu hî̌dě lî̤cahtǐ a ta̤khwè̌nǎ htě a bǎ htûhtò̌ pwǐhè̌onu a cû̌lǒbehtò̌jò hî̌tè?”

55Htodě Běcǎ Ye̤shǔ hî̌ kòyò saprṳ̂, “He mî̌ kòyò htě a ma̤sǔ ta̤mǎlò̤ tapwa̤nu ya? Sî hèpṳ̂ he dě sî hè ta nò̌she ta nò̌po̤nò̌ta̤ hî̌tè? He hǎnòò̌ sû̌ǐtòwòǐ kò bǎ ta̤lṳhtò̌hokû pṳ̂̌ni̤pṳ̂̌sa dě sî pṳ̂ he tò̤tò̤. ^j 56Pò̤̌ta ta̤htûhtò̌ ana̤ pwǐhè̌o numî̌ ma̤pûhǐ pwa̤po̤ khwè̌nǎ toǒ lǒbehtò̌ aya pwǎ.” Htodě akhophijaû̌ toǒ lǒ̤꤮ bò hǎhtò̌khlè̌ tephekèbò nû̌ûla̤.

Yṳ̌daphû̌ hǐkǒdû̌ toǒ cèrò Ye̤shǔ

(Mǎ̤riko 14:53-65; Lǔka 22:54-55, 22:63-71; Jowǎ̤ni̤ 18:13-14, 18:19-24)

57Kòyò htě a hèpṳ̂ Ye̤shǔ htǒotoǒnu, a pṳ̂ge nû̌û dě pwa̤tòlûhtò̌ hǐkǒdû̌gutṳ̌ Kaǐpha htǒo tapwa̤nu ahǐ. Bǎnu mî̌ pwa̤sû̌ǐ ta̤sû̌ta̤tòwò asara toǒ ta ta̤subusaba hǐkǒdû̌ toǒ ǒplǒbò nû̌û bǎnu. 58Petru gûcû̌ tûcû kû̌ pwǎ Běcǎ Ye̤shǔ. A cû̌ nṳto̤kû̌ ta pwa̤tòlûhtò̌ hǐkǒdû̌gutṳ̌ htǒotapwa̤ aho we̤kû dě a nṳ hǎnòò̌ kû̌dǒ ta kliphû̌ htě a ǒpo̤ ma̤kwaǐnu toǒ. Dě Petru ǒpo̤kè̌ǐ ta kò glè cèrò ma̤kwè̌꤮ Běcǎ hî̌tè pě, hǐnu.

59Ma̤pûhǐ asî cèrò ma̤sikè Ye̤shǔ ayanudě, pwa̤tòlûhtò̌ hǐkǒdû̌ toǒ ta Yṳ̌daphû̌ htě a ǒ ta a ta̤shû̌ta̤sho htò̌yî̤khlo kò toǒ kè̌lǎ lǒkho la̤nè̌lòhǎlòho Ye̤shǔ ata̤sǔ toǒ. 60Kòyò hèkhò lòhǎlòho plṳ̂ nû̌ûta̤sǔ htǒonu pwǎ̤ta a htû hǐkǒdû̌ kûshû̌htû toǒ kè̌shǐ ta a nè̤̌lòho nû̌û ta̤sǔ htǒotoǒnu a te̤mǎ tò̤.

Dě agutṳ̌lò̤ kòyò sò̌gini̤ hǎhtò̌ dě a hî̌, 61“Kòyò htǒotapwa̤nu a hî̌ ta, ‘He ma̤lò̤te̤jakè Cǒmara ta̤lṳhtò̌ho htǒo dě suni̤ akû he ma̤htò̌bò̌ gepwǎ’ a hî̌ hǐnu.” ^k

62Htodě pwa̤tòlûhtò̌ hǐkǒdû̌gutṳ̌ tapwa̤ ihtǒ gwè Ye̤shǔ, “Na hî̌ geshǔ kò hèbè̌ na ta̤sǔ htǒotoǒ dǐmû̌꤮ tò̤ ma̤tè? Kò hènè̌le̤nè̌ge na ta̤sǔ htǒonumî̌ na gana̤de tò̤ ya?” 63Pwǎ̤tadě a dò̌tûklû̌ pwǎ.

Pwa̤tòlûhtò̌ hǐkǒdû̌gutṳ̌nu tapwa̤ hî̌, “He bè heyo̤ ta Cǒmara htě a htûpwa̤ htǒotapwa̤ dě he glè gwè na, na mî̌ Mè̤shǐa htě Cǒmara aphû̌khûnu tapwa̤ mè̤mè̤̌nu hî̌bǎkè̌ pa.”

64Dě Běcǎ Ye̤shǔ hî̌shǔ nû̌û, “O, na hî̌numî̌ amè̤ pwǎ̤ta he hî̌bò bǎ sî pṳ̂̌꤮ tapwa̤ ta anǒkòpěnu sî kè̌shǐ kòyòphû̌khû htǒo hǎnòò̌ bǎ pwa̤ htě a ta̤po̤ta̤phǎ dû̌gutṳ̌ htǒotapwa̤ acǔdemûnu tokho pě. Htodě he dò̌hè poǒlṳ pěnu sî kè̌shǐ pě.” ^l

65Htǒotaplǎdě pwa̤tòlûhtò̌ hǐkǒdû̌gutṳ̌nu tapwa̤ cǐhtò̌yè̌kè ahǐdo dě a hî̌, “A hî̌sǔ Cǒmara hǒ. Pa cû̌lo̤bǎpe pwa̤lò̤sasî̌ toǒ hî̌tè? Kè̌ lǒkho mò̌, sî gana̤de lǒkho a hî̌bǎsǔ Cǒmara ta ana̤ hǒ. ^m 66Sî gènè̤ hî̌tè?”

Dě asî hî̌shǔ lǒkho, “A to sinu hǒ,” hǐnu.

67Htodě asî htû̌phlě nû̌ûmi̤sǎ, po̤ nû̌û, htu nû̌û, toǒǒ dě a pla̤ nû̌û. ⁿ 68Dě asî hî̌ nû̌û, “Kǒ꤮ Khrî̌stu, hî̌bǎkè̌ pa, mî̌ûpè po̤ napè?”

Petru la̤lò̤kè Ye̤shǔ

(Mǎ̤riko 14:66-72; Lǔka 22:56-62; Jowǎ̤ni̤ 18:15-18, 18:25-27)

69Bǎnuakha Petru hǎnòò̌lò̤ we̤kû dě pwa̤ma̤ta̤ mamǔphû̌ tapwa̤ hè nû̌ûǒ dě a hî̌ nû̌û, “Na mî̌ Galilî̌aphû̌ Ye̤shǔnu tapwa̤ aprṳ̂kû pwǎ lè.”

70Pwǎ̤ta Petru la̤lò̤bò asî bǎnu toǒ dě a hî̌, “He ǒkû̌dǒ tò̤. Mamǔ htǒotapwa̤ hî̌ htǒonumî̌ he sî̌yanǒ kû̌kò tò̤.”

71Htodě a hǎhtò̌cû̌ we̤takhahtu dě pwa̤ma̤ta̤ mamǔphû̌ ahǔwa̤ tapwa̤ kè̌shî̌lè̌ nû̌û dě a hî̌ kò bǎnu toǒ, “Htǒotapwa̤ mî̌ a gûkû̌ ta Nǎ̤sèrèwî̤phû̌ Ye̤shǔkhrî̌stunu tapwa̤ lè꤮.”

72A la̤lò̤ gesǒ dě a wṳ̂dò ana̤, “He sî̌yanǒ nû̌û tò̤.”

73Ǒpo̤sǒ teděsǎ dě kòyò ihtǒ te̤we̤phǔ bǎnu toǒ hè Petru ǒ dě a hî̌ nû̌û, “Na mî̌ akhophijaû̌ tapwa̤ mè̤mè̤̌ hǒ, na hî̌bǎ yo̤sǎnu a lò̤ta Galilî̌a yo̤sǎ hǒ.”

74Htǒotaplǎdě Petru sahtò̌ wṳ̂dò ana̤ Cǒmara lo̤mo̤ dě a hî̌, “Kòyò htǒotapwa̤ mî̌ he sî̌yanǒ yǎ dǐkhò̌꤮ tò̤,”

A hî̌htohto ta shîphaû̌. 75Htǒotaplǎdě Petru gènè̤htò̌ nṳbǎ Běcǎ Ye̤shǔ hî̌nǎkè nû̌û ta̤hî̌bǎ, “Bǎ shîphaû̌ hǒtò̤ akha, na la̤lò̤kè kò ta he sî̌yanǒ yǎ tò̤pě suplǎ,” akhû̌akhî a hǎhtò̌cû̌ akhlo dě a cû̌ hǎsihǎǒkè.