Matthew 27

Asî kaǎcû̌ Ye̤shǔ dě Khwǐpilǎto ǒ

(Mǎ̤riko 15:1; Lǔka 23:1-3; Jowǎ̤ni̤ 18:28-32)

1Anǒti̤ni̤ lṳmṳlî wosò akhanu, lǒ̤꤮ bò pwa̤tòlûhtò̌ hǐkǒdû̌ toǒ ta khlilèphû̌ hǐkǒdû̌ toǒ ǒhtuhî̌bǎplǒbò nû̌û dě asî glè ma̤si Ye̤shǔ. 2Asî cokloměhto Běcǎ Ye̤shǔ dě a cǐcû̌kè nû̌û Khwǐpilǎto ǒ dě a cû̌ǐlò̤kè nû̌û a cǔdekû.

Yṳ̌da Isakarǐo sikè

(Pwa̤nophû̌ toǒ 1:18-19)

3Bǎ Yṳ̌da htě a shaǎlò̤kè nû̌ûnu tapwa̤ kè̌shǐ kò cèrò si Běcǎ Ye̤shǔ akhanu, a sǎpla̤sǎyṳ mè̤mè̤̌ dě a hè ǐwǒ gesǒ wûyî̌htǒo sakhò̌ dě pwa̤tòlûhtò̌ hǐkǒdû̌ toǒ a ǒ ta Yṳ̌daphû̌ wè̤khǔwè̤pwa̤ toǒ a ǒ. ^a 4Dě a hî̌ asî, “He ma̤sǔkè Cǒmara hǒ, ma̤tè̤hî̌dě he shaǎkè kòyò htě a ta̤sǔǒ dǐcǎ꤮ tò̤ htǒotapwa̤ hǒ.”

Dě asî hî̌shǔ gesǒ nû̌û, “Na ta nana̤tû̌ pa sî̌yato̤kû̌ na tò̤.”

5Asî hî̌hǐnu dě Yṳ̌da jalò̤te̤kè wûyî̌htǒo bǎ ta̤lṳhtò̌hokûnu dě a hǎhtò̌gekè. Htodě a hǎhtò̌cû̌ ahǔwa̤ tò̤glò dě a cû̌ cosikè ana̤.

6Pwa̤tòlûhtò̌ hǐkǒdû̌ toǒ htǔwǒge wûyî̌ htǒotoǒ dě a hî̌ lǒkho, “Wûyî̌htǒo pa Yṳ̌da a ta̤sû̌ta̤tòwò ǒ ta a to shû̌nṳdǒ yǎta ta̤lṳhtò̌ho awû tò̤, Ma̤tè̤hî̌dě wû htǒonumî̌ kò ǐ pwǎ yǎta la̤ma̤si kòyò.” 7Asî bè̌lò̤ lǒkho asò̌phlǒ ta a glè pwî̤ nû̌ûta pwa̤bǒpo̤hǎ tapwa̤ ahǎkhû̌ ta̤la̤ dě asî glè ǐ nû̌ûta Yṳ̌daphû̌ mè̤tò̤ toǒ alṳkhû̌. 8Hǐnu akhû̌akhî, tǒ̤khònò̤ hǎkhû̌ bǎnu tò̤glònu kò kaǎ nû̌ûta sǐhǎkhû̌. 9Pwa̤po̤ Jeremǐa ta̤hî̌nǎ htǒonu a lǒhtò̌behtò̌ hǒ, “Asî phî̌ wûyî̌ sakhò̌ dě Israelphû̌ toǒ hî̌ yǎ, pa bè̌ apwî̤ bǎo mî̌ a tohǒ. 10Dě asî pwî̤ wûyî̌nu toǒ ta pwa̤bǒpo̤hǎ ahǎkhû̌ ta̤la̤ pwǐ Běcǎ nopwî̤ henu.” ^b

Khwǐpilǎto gwè Ye̤shǔ

(Mǎ̤riko 15:2-5; Lǔka 23:3-5; Jowǎ̤ni̤ 18:33-38)

11Bǎnuakha Ye̤shǔ ihtǒ ǒ Khwǐpilǎto alo̤mo̤ dě a gwè nû̌û, “Na mî̌ Yṳ̌daphû̌ akhwǐ tapwa̤ mè̤mè̤̌ ya?”

Dě a hî̌shǔ Khwǐ, “O, a mè̤na̤cè̌ pwǐ na hî̌nu hǒ.”

12Bǎ pwa̤tòlûhtò̌ hǐkǒdû̌ toǒ ta Yṳ̌daphû̌ wè̤khǔwè̤pwa̤ htě a htû hǐkǒdû̌ toǒ nè̌ nû̌û ta̤sǔ akhanu, a hî̌ geshǔ dǐmû̌꤮ tò̤. 13Khwǐpilǎto gwè nû̌û, “Kò nè̌bò na ta na ma̤sǔma̤plě pwǐhè̌o hǐnumî̌ na gana̤de tò̤꤮ ya?” 14Pwǎ̤ta Běcǎ Ye̤shǔ hî̌geshǔ nû̌û yo̤ dǐmû̌꤮ tò̤ akhû̌akhî, Khwǐ sû̌pi̤sò̌pi̤ mè̤mè̤̌.

Asî hî̌phlǔkè yo̤sǎ ta a glè ma̤si Běcǎ

(Mǎ̤riko 15:6-15; Lǔka 23:13-26; Jowǎ̤ni̤ 18:39-19:16)

15Khwǐnu ala̤klo ǒ ta pṳ̂̌taně꤮ ta̤cû̌tûlû̌pwè dè khîbǎ hî̌nu, A hî̌ kòyò saprṳ̂ toǒ glè wû̌lǎhǎhtò̌ kòyòjî htě kò dǒlò̤te̤ nû̌û dě apo̤kûnu toǒ tapwa̤. Dě asî wû̌lǎhǎhtò̌ bǎtè꤮ tapwa̤ bǎbǎ, Khwǐ plûhǎhtò̌ pwǎbǎ asî. 16Bǎnuakha kò dǒlò̤te̤ kòyò mi̤dû̌ htě ajî tokho dě ami̤ ta Barǎba ǒtapwa̤. 17Dě bǎ kòyò saprṳ̂ hèǒpo̤bò nû̌û akha, Khwǐpilǎto gwè asî, “Sî sò̌yṳ noplûhǎhtò̌ he ta bǎtè tapwa̤tè? Mî̌ sî sò̌yṳ noplûhǎhtò̌ he ta Barǎba ya? Mè̤tò̤mî̌ Ye̤shǔ htě kò kaǎ nû̌ûta Khrî̌stu htǒotapwa̤nu ya?” A gwè asî hǐnu. 18Ma̤tè̤hî̌dě a sî̌yahto ta ta̤saba hǐkǒdû̌ toǒ sò̌khě Ye̤shǔ dě asî hèǐlò̤kèpwǎ Ye̤shǔ dě aǒ.

19Bǎ Khwǐpilǎto hǎnòò̌lò̤ bǎ a la̤cèrò kò gògohtahtò̌yî̤ alo̤ akhanu, ama nohèsû kò ta̤wi̤ta̤kè̌ tacǎ bǎ awṳ̂ Khwǐpilǎto a ǒ dě a hî̌, “Cû̌ma̤sha pûma̤ kòyò htě ata̤sǔ ǒtò̤ htǒotapwa̤nu dî̌kî̌꤮ ma̤ nî̌꤮, Ma̤tè̤hî̌dě he hǎmoǒmi̤mò̤wî̤ awi̤akè̌ dî̌kî̌꤮ tò̤.”

20Pwǎ̤ta pwa̤tòlûhtò̌ hǐkǒdû̌ toǒ ta Yṳ̌daphû̌ wè̤khǔwè̤pwa̤ htě a htû hǐkǒdû̌ toǒnu a cû̌plò̤ kòyò saprṳ̂ toǒ ta a glè kwihǎhtò̌ Barǎba dě glè cèròsikè Ye̤shǔ.

21Dě Khwǐpilǎto gwè asî, “Htǒosò̌gini̤ akla sî sò̌yṳ noplûhtò̌kè he ta bǎtè tapwa̤tè?”

Dě asî yi̤kǒhtò̌shû̌ ta, “Barǎba.”

22Dě Khwǐpilǎto gwè asî, “Dè ma̤hǐnudě Ye̤shǔ htě kò kaǎ nû̌ûta Khrî̌stu htǒotapwa̤nu he bǎ ma̤ yǎ hî̌tè?”

Dě asî hî̌shǔ, “Htǎwa̤sikè yǎ dě nò̌dòhtǔlo̤nu,” A hî̌ lǒkho hǐnu.

23Dě Khwǐpilǎto gwè asî, “Cû̌ htǎwa̤sikè yǎ ma̤tè? A cû̌ ma̤sǔma̤plě kwè̌꤮ titè?”

Dě asî tǐ̤꤮ yi̤kǒhtò̌shû̌khlo po̤, “Htǎwa̤sikè yǎ dě nò̌dòhtǔlo̤nu.”

24Bǎ Khwǐpilǎto kè̌shǐ sî̌ya ta kò gana̤depe nû̌û ta̤hî̌bǎ tò̤, htohǒtò̤ kòyò htǒotoǒ glè sahtò̌ ma̤kèsè̌kosǒ shû̌shǎ hè akhû̌akhî, a phî̌ shigûjû dě a shǔbòkè acǔde kòyò saprṳ̂ a lo̤mo̤ dě a hî̌, “Kòyò htǒotapwa̤ asǐnu a lò̤te̤bǎ to̤pe dě hekhû̌ tò̤ hǒ. Sî ta sîna̤tû̌.” ^c

25Dě kòyò lǒ̤꤮ bò hî̌shǔ, “Asǐnu nolò̤bǎtû̌ yǎdě pa ta paphû̌pali̤ toǒ akhû̌nu.”

26Dě a plûhǎhtò̌kè bǎ asî Barǎba dě a nokliphû̌ toǒ dě glè po̤ Běcǎ Ye̤shǔ ta sǒpli̤wî̤, htodě a ǐlò̤ nû̌û kliphû̌ toǒ a cǔdekû dě a glè cû̌ htǎwa̤sikè Běcǎ Ye̤shǔ dě nò̌dòhtǔlo̤.

Kliphû̌ toǒ ma̤tukutakǎ Běcǎ Ye̤shǔ

(Mǎ̤riko 15:16-21; Jowǎ̤ni̤ 19:2-3)

27Htodě Khwǐ akliphû̌ toǒ kaǎcû̌ Běcǎ Ye̤shǔ dě kliphû̌ la̤ǒ bǎ Khwǐho we̤kûnu dě kliphû̌ ya̤susǒ hèǒplǒ te̤we̤bò nû̌û. 28Htodě asî plû̌kè Běcǎ Ye̤shǔ ahǐdo dě a sǒhtò̌ bǎ nû̌û hǐdopo̤to̤ lî̤lǒso tṳpṳ. 29Htodě asî khû̌ te̤we̤ ta̤shî̌shǒmṳ sǒsǒta khû̌glû nudě a glûhtò̌ bǎ nû̌û dě asî hî̌ tukutakǎ, ma̤lò̤we̤lò̤sobò nû̌û. Asî nopṳ̂ nû̌û nò̌htǒ acǔdemû tokho dě asî gene̤lò̤ nû̌ûlo̤mo̤ dě a hî̌ lò̤we̤bò nû̌û, “Kǒ꤮ Yṳ̌da akhwǐdû̌, ǒhtûpwa̤ nědû̌lahtû tû̌pû nî̌꤮!” 30Asî htû̌phlě nû̌û ta plěshi, asî phî̌ nò̌htǒ dě po̤hto po̤sǒsǒ nû̌û hǐkǒ. 31Bǎ asî ma̤yǒma̤lè luya̤hto nû̌ûnu a plû̌lò̤te̤kèsǒ hǐdopo̤to̤nu tṳpṳ dě a sǒhtò̌ tèplè̌gesǒ bǎ nû̌û ta ahǐdonu tṳpṳ. Htodě a kaǎhǎhtò̌cû̌kè nû̌û dě a glè cû̌ htǎwa̤sikè nû̌û nò̌dòhtǔlo̤.

Kliphû̌ toǒ htǎwa̤si Ye̤shǔ dě nò̌dòhtǔlo̤

(Mǎ̤riko 15:22-32; Lǔka 23:27-42; Jowǎ̤ni̤ 19:17-27)

32Bǎ asî hǎhtò̌cû̌ akhanu, a kè̌shǐ ta Cyrenewî̤phû̌ htě ami̤ ta Shîmǒ̤nè̤nu tapwa̤ dě kliphû̌ toǒ noò̌ nû̌û ta Ye̤shǔ nò̌dòhtǔ. 33Asî cû̌ gûla̤ tò̤glò htě kò kaǎ yǎta Gò̌lǎgò̌tǎ htǒonutò̤glò. (Gò̌lǎgò̌tǎ amûasǎ mî̌ hǐkǒkhwǐ agûla̤). 34Bǎnuakha, asî ǐo nû̌û sobîshisî̌yo̤ htě a kloshîlo̤dǒ nû̌ûta ta̤khû̌khǎ tacǎ dě kò kaǎ nû̌ûta, “Gòle” dě Ye̤shǔ pukè̌bǎ htodě a sò̌otò̤. ^d 35Bǎ asî htǎwa̤sihto Ye̤shǔnu, asî bèphî̌ wo̤wǒ̤nû̌û Ye̤shǔ ahǐdo toǒ. Bǎ asî ǐbè nû̌û hǒtò̤ akhanu, asî bǒ lǒkho ta̤bèbwǐ tacǎ, ma̤tè̤hî̌dě a bǒ tapwa̤ hto tapwa̤, dě a lò̤te̤to bǎtè tapwa̤, tophî̌ bǎtè tokhotènu, jǔ꤮ tû̌ abwǐ lò̤te̤to pwǎ. ^e 36Htodě asî hǎnòò̌lò̤ lǒkho dě ǒpo̤kè̌ǐ Ye̤shǔ. 37Dě a hǐkǒ khû̌conu, asî khwè̌htò̌ lî̤bè̌ta̤sǔ tòkrò, “A mî̌ Ye̤shǔ, Yṳ̌daphû̌ toǒ akhwǐ.” 38Kò htǎwa̤si kû̌dǒ nû̌ûta pwa̤phî̌sigwi we̤saphǎ kò sò̌gini̤, dě cǔdemû tapwa̤ dě cǔcocî̌ tapwa̤. 39Kòyò htě a cû̌phǔgephǔ lǒkho bǎ akòshî̌ toǒ nǒlò̤ lǒkho ahǐkǒ, pi̤jishǐcǒ dě a hî̌ lǒkho nû̌û, ^f 40“Na hî̌ ta na glè ma̤lò̤te̤jakè ta̤lṳhtò̌ho dě suni̤ akû na ma̤htò̌bò̌gepwǎ na hî̌ yahî̌. Ma̤lû̌htò̌ge tû̌mò̌ nana̤ ta. Na dè mè̤na̤cè̌ Cǒmara aphû̌khû hî̌dě hǎte̤mò̌ nò̌dòhtǔlo̤ htǒonu ta.” ^g

41Pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ ta ta̤subusaba a hǐkǒdû̌ toǒ hî̌takǎ sǒsǒbò nû̌û hǐnu ta, 42“A ma̤lû̌htò̌gejò kò yolahtûpwa̤ pwǎ̤ta a ma̤lû̌htò̌gejò tû̌ ana̤tò̤ lè꤮. A mî̌ Israel akhwǐ mè̤tò̤ya. Nohǎte̤ tû̌mò̌ yǎ dě nò̌dòhtǔlo̤nu ta, dě pa yṳǎ kû̌dǒ kò̌. 43A yṳǎ Cǒmara yahî̌. Cǒmara dè sò̌phlǒǒ nû̌û hî̌dě noma̤lû̌htò̌ge mò̌ yǎ khònò̤htǒonu kò̌? Ma̤tè̤hî̌dě a hî̌ ana̤ ta, ‘He mî̌ Cǒmara aphû̌khû’ nî̌.” ^h 44Pwa̤pṳ̂sigwi we̤saphǎ kò htě kò htǎwa̤si plǒkû̌ nû̌ûta Ye̤shǔ htǒosò̌gini̤nu a pi̤jishǐcǒ kû̌ nû̌û hǐnuhǒ.

Běcǎ Ye̤shǔ si

(Mǎ̤riko 15:33-41; Lǔka 23:44-49; Jowǎ̤ni̤ 19:28-30)

45Tèhtò̌ bǎ lṳmṳbǎ tò̌nò̌dè̌nu to̤htû̌ lṳmṳgwilò̤ suna̤rî akûnu ga khǐsuwulò̤bò taga. 46Te̤we̤lṳ̂bò bǎ lṳmṳgwilò̤ suna̤rî akhanu, Ye̤shǔ jipwi̤ yi̤kǒhtò̌, “Elǐ, Elǐ, Lamǎ sabakǎ tanǐ,” Amûasǎ mî̌ “He Cǒmara, He Cǒmara, na wîkè he ma̤tè?” ⁱ

47Kòyò ihtǒ ǒ bǎnu toǒ gana̤de lǒkho Ye̤shǔ yi̤kǒhtò̌ pwǐhè̌onu dě asî hî̌ lǒkho, “A yi̤kǒhtò̌ pwa̤po̤ Èlî̌a.”

48Bǎ asîklanu tapwa̤, taplǎpa a khlè̌cû̌phî̌ ta̤tacǎ htě asǒsǒta sèphè̌nu dě a cû̌junṳ nû̌û shisî̌yo̤shî̌ sokû dě a coklomě nû̌û nò̌polokhi dě a ǐhtò̌ nocî̌o nû̌ûta Běcǎ Ye̤shǔ. ^j 49Lǒ̤꤮ bò a ǒkènu toǒ hî̌ nû̌û, “A ǒ tû̌ta hǐnu, pa ǒpo̤kè̌ǐ kû̌nǎ teděsǎpe, mî̌ pa kè̌shǐ pwa̤po̤ Èlî̌a hè ma̤lû̌htò̌ge nû̌û pě ya, mî̌ tò̤ ya,” A hî̌ lǒkho hǐnu.

50Bǎ Běcǎ yi̤kǒhtò̌shû̌ htopo̤sǒ taplǎnu asǎlò̤te̤kè.

51Bǎnuakha hǔgòpwî̌pṳdû̌ htě kò cote̤tṳbǐ yǎta ta̤lṳhtò̌hokû nutṳpṳ htò̌lè̌ kihtò̌kilò̤ phlǔkè ginǐ̤kho. Tṳtṳhtû̌dî̌ ma̤htodě lo̤ toǒ nûphò̌bò. ^k 52Lṳkû toǒ kûmohtò̌bò dě pwa̤cahtǐphû̌ htě a sihtonu toǒ htûpwa̤ geplṳ̂sǒ. 53Asî ǒ lṳkû dě hǎhtò̌ge. Htodě anǒkò bǎ Běcǎ Ye̤shǔkhrî̌stu si htûpwa̤gehtosǒnu asî geginṳ lǒkho bǎ Ye̤rǔshèlèwî̤ cahtǐ akû dě kò kè̌shǐ plṳ̂ asî. 54Bǎ Rò̌mǎ klita̤ya̤ hǐkǒdû̌ htǒotapwa̤ ta kòyò htě a ǒpo̤ǐ Ye̤shǔ htǒonu toǒ kè̌shǐ tṳtṳhtû̌dî̌ ta lǒ̤꤮ bò ta̤htûhtò̌ ana̤ htǒotoǒ akhanu, asî ǐsha dě a hî̌ lǒkho, “A mî̌ Cǒmara aphû̌khû na̤cè̌nu hǒ.”

55Mamǔ htě a ǒpo̤ kè̌cû̌tûcû dě ayî̤ toǒ ǒplṳ̂ǒphǎ bǎnu. Asî mî̌ mamǔ toǒ htě a ǒ bǎ Galilî̌aga dě a gûkû̌ ta Ye̤shǔ. Dě asî kè̌ǐkhwè̌ǐ lǒkho ta̤htě Běcǎ lo̤bǎ toǒ. ^l 56Dě asî htǒotoǒ aklanu Madalě̤na dokûmo̤ Marǐa, Jǎgomo̤ ta Jǒjè amo̤ Marǐa ta Sebedè̌ aphû̌ toǒ amo̤.

Ye̤shǔ a sû̌kho toǒ lǔ nû̌û

(Mǎ̤riko 15:42-47; Lǔka 23:50-56; Jowǎ̤ni̤ 19:38-42)

57Bǎ lṳmṳlò̤ akhanu, kòmakhûdû̌yò̤ ǒ bǎ Arimatǐawî̤phû̌ dě ami̤ ta Jǒjè htǒotapwa̤ hèto̤. A mî̌ a htûhto Běcǎ Ye̤shǔ akhophijaû̌ tapwa̤ hǒ. 58A cû̌ Khwǐpilǎto ǒ dě a cû̌kwi Ye̤shǔ alṳto̤ dě Khwǐpilǎto hî̌lò̤ kò ta kò glè ǐ Ye̤shǔ alṳto̤ htǒonu ta Jǒjè. 59Dě Jǒjè cû̌phî̌lò̤te̤ lṳto̤htǒo dě a bǒbǐ nû̌ûta hǔgòpwî̌bǎplo̤dû̌ tṳpṳ. 60Dě kò cû̌shû̌nṳ nû̌û lṳkhû̌sa tûkû. Lṳkhû̌sa htǒonumî̌ Jǒjè ata tû̌. A nokhǔkûnṳnǎ kò lṳkû. A htû̌toklobǐ lṳkû htǒonu ta lo̤bědû̌ tama htodě a gekè. 61Madalě̤na dokûmo̤ Marǐa ta Marǐa ahǔwa̤tapwa̤ hǎnòò̌lò̤ totǐ dě lṳkû alo̤mo̤.

Kli ǒpo̤ǐ Ye̤shǔ alṳkû toǒ

62Mṳyè̤̌ni̤ mî̌ mṳni̤ htě Yṳ̌daphû̌ toǒ ma̤wǒnǎ ta̤lǒ̤꤮ bò htû̌pe̤wo̤ mṳni̤dǔnu ti̤ni̤ aya. Mṳyè̤̌ni̤hto htû̌pe̤wo̤ mṳni̤dǔ htǒo akhanu, pwa̤tòlûhtò̌ hǐkǒdû̌ toǒ ta Pharisè̌phû̌ toǒ cû̌ lǒkho dě Khwǐpilǎto ǒ. 63Dě asî cû̌ hî̌ nû̌û, “Khwǐ pa to̤mǎǐpe ta bǎ phalòhodû̌nu tapwa̤ ǒhtûpwa̤pe akhanu, a hî̌, ‘Suni̤htopěnu, he htûpwa̤gesǒ pě,’ a hî̌ hǐnu. ^m 64Hǐnudě hî̌lò̤ kliphû̌ toǒ dě noǒpo̤ǐ te̤mǎbe a suni̤nu. Pěmî̌ akhophijaû̌ toǒ hèphî̌hǔ nû̌û dě a cû̌ hî̌ bǎ kò ta a htûpwa̤gesǒ hǒ, hǐnu. Pěmî̌ ta̤lòho anǒkò htǒotûmûnu ǐsha ta a jîkhlo ta ta̤lòho htě awǐ nutûmû hè̌.”

65Khwǐpilǎto hî̌shǔ, “Dè ma̤hǐnudě kaǎcû̌nṳ lǒkho pwa̤ǒpo̤ toǒ dě cû̌ lǒkho mò̌, jipwi̤ ǒpo̤ǐwǒ lǒkho pwî̌꤮ sî ǒpo̤ǐbò̌ tû̌nu.” 66Ma̤pûhǐ asî ma̤měma̤glo wǒ lṳkûhtǒo dě asî cû̌klǎhtò̌lṳ a ta̤dòǐ tacǎ dě lṳkû me̤htò̌lo̤ htodě a noǒpo̤ǐ nû̌ûta kliphû̌ toǒ.