Matthew 6
Ǐpa̤ kû̌ kòyò shuphǔshèwèphû̌
1“Ma̤pûhǐ kò kè̌shǐ sî dě kò htû̌sò̌ǐ sî ayanu, pṳ̂měǐwǒ pwǎ ta̤ dě kòyò lo̤mo̤ numî̌ a totò̤. Sî dè ma̤hǐnu hî̌mî̌, pha Cǒmara dě mǒkhû̌ tapwa̤ ǐ sî ta̤ma̤khû̌kǎ tò̤. a 2“Ma̤hǐnudě, bǎ sî ma̤lṳma̤tò̌ kòyò shuphǔshèwèphû̌ toǒ akhanu, yi̤kǒyi̤hta dě pwe̤ǐlṳ pû kò pwǐ kòyò jîcǒjîtè̤ ana̤nu toǒ ma̤nu ma̤ nî̌꤮, ma̤tè̤hî̌dě ma̤pûhǐ kò bè̌dubè̌na̤ asî ayanu, asî ma̤lṳma̤tò̌ kòyò shuphǔshèwèphû̌ toǒ bǎ Yṳ̌daphû̌ ta̤sabahǐkû ta bǎ klè̌dakû. He hî̌ mè̤mè̤̌ sî, bǎ kò htû̌sò̌ǐ asî akhanu, asî nî̤bǎ lǒbehtobò a ta̤ma̤khû̌kǎ toǒhǒ. 3Pwǎ̤ta, ma̤pûhǐ sî lṳhtò̌hǔlṳhtò̌sè̌jò kû̌ kòyò shuphǔshèwèphû̌ toǒ ayanu, sî cǔdemû ǐta̤nu nosî̌ya pû cǔcocî̌ ma̤. 4Sî dè ma̤hǐnu dě, sîpha htě a kè̌shǐjò sî ta̤ǐhǔǐsè̌ tapwa̤nu, a ǐ sî ta̤ma̤khû̌kǎ toǒ pě.”Ta̤kwisabahtò̌ Cǒmara awi̤akè̌
(Lǔka 11:2-4)
5“Dě bǎ sî kwisaba akhanu, ma̤pû pwǐ kòyò jîcǒjîtè̤ ana̤ toǒ ma̤nu ma̤, ma̤tè̤hî̌dě, ma̤pûhǐ kò kè̌shǐ asînu, asî sò̌yṳ cû̌ihtǒ kwisaba lǒkho bǎ Yṳ̌daphû̌ ta̤sabahǐkû htodě a sò̌yṳ cû̌ihtǒ ǒ bǎ klè̌dǒklè̌ta̤ hǐnu. He hî̌ mè̤mè̤̌ sî, bǎ kò htû̌sò̌ǐ asî akhanu, asî nî̤bǎ lǒbehtobò ta̤ma̤khû̌kǎ toǒhǒ. b 6Pò̤̌ta sîhtǒo, bǎ sî kwisaba akhanu, ginṳ hǐdǒkû dě htǒbǐ takhanu. Htodě kwisabahtò̌ papha htě a ǒ ta̤tûdû agûla̤ tapwa̤ a ǒnu. Sîpha htě a kè̌shǐjò ta̤ǒtûdû tapwa̤nu, a ǐ sî ta̤ma̤khû̌kǎ pě. 7Sî kwisaba akhanu, kwisaba pû pwǐ kòyò htě a sî̌ya kû̌kò Cǒmara tò̤nu toǒ kwisabanu ma̤. Asî mî̌ a kwisabahto kwisabasǒ yo̤sǎ dě amûasǎ ǒtò̤nu toǒ. Dè kwisaba hî̌numî̌ Cǒmara ǐ pwǎ asî a gènè̤ lǒkho hǐnu. 8Ma̤ kû̌pû lǒkho pwǐ asî ma̤nu ma̤ nî̌꤮, ma̤tè̤hî̌dě bǎ sî kwi hǒtò̤nu, sîpha sî̌yawǐbò tû̌ sî ta̤lo̤bǎ toǒ hǒ. 9“Sî tobǎ kwisaba hî̌tè hî̌numî̌, kwi lǒkho pwǐhè̌o, ‘Kǒ꤮ papha Cǒmara ǒdě mǒkhû̌꤮ kò bè̌dû̌bè̌yǒ bè̌dubè̌na̤ tû̌ta nami̤ cahtǐ htǒo nî̌꤮. 10Na hè ma̤ tû̌ta nashinaga hǎkhû̌bǎo nî̌꤮. Pwǐ na ta̤sò̌yṳ lǒbehto dě mǒkhû̌nu, nolǒbe pû yǎ dě hǎkhû̌bǎo nunî̌꤮. 11Ǐlò̤pû pa la̤ǎla̤o htě pa lo̤bǎ yǎ khò̌ti̤ni̤ aya toǒ nî̌꤮. 12Pwǐ pa bòlû̌hto kòyò htě a ma̤sǔ pa toǒ a ta̤sǔnu, bòlû̌dǒ pû pa ta̤sǔ htě pa cû̌ma̤sǔ kò htǒotoǒ nî̌꤮. 13Nocû̌nṳ pû pa dě ta̤htû̌sǒbǎ aphû̌mò̤ aklanu ma̤ nî̌꤮. Mî̌tanu ma̤lû̌htò̌ge pû pa dě khînǎmo̤pha hǐkǒdû̌ a cǔdekû htǒonu nî̌꤮. (Ma̤tè̤hî̌dě shiga bǎbǎ, ta̤po̤ta̤phǎ bǎbǎ, ta̤sîrîdû̌sîrîhtû bǎbǎ htǒonumî̌ nata tûjûpwa̤ talakhǎ nî̌꤮. Amè̤.)’ ▼▼Lî̤phě dě꤮ wǐnukha toǒǒnu, a shû̌nṳpo̤ lî̤phlǒ ǒ bǎ sokomo sokobǐ akûnu toǒ.
14“Ma̤tè̤hî̌dě sî dè bòlû̌ kòyò htě a ma̤sǔ sînu toǒ ata̤sǔ dèhî̌dě, sîpha ǒ dě mǒkhû̌ htǒotapwa̤ bòlû̌ sî ta̤sǔ pě. d 15Pwǎ̤tadě sî dè bòlû̌ kòyò htě a ma̤sǔ sînu toǒ ata̤sǔ tò̤ dèhî̌dě, sîpha ǒ dě mǒkhû̌ htǒotapwa̤ bòlû̌kèdǒ sî ta̤sǔ tò̤tò̤.” Sû̌ǐtòwòǐ ta̤dǔǎ shǎǎshǎo awi̤akè̌
16“Bǎ sî dǔǎshǎ akhanu, jînojîja pû sîmi̤sǎ pwǐ kòyò jîcǒjîtè̤ ana̤nu toǒ ma̤ nî̌꤮. Ma̤pûhǐ kò sî̌ya ta asî dǔǎshǎ nudě a jînojîja ami̤sǎ. He hî̌ mè̤mè̤̌ sî, kò htû̌sò̌ǐ asî akhû̌akhî, asî nî̤bǎ lǒbebò akhû̌akǎ htǒo hǒ. Khû̌kǎ ahǔwa̤nu a nî̤bǎpe tò̤. 17Pò̤̌ta sîhtǒo, bǎ sî dǔǎshǎ akhanu, plṳ lǒkho sî hǐkǒ ta mòû̌shi, khwǐpwè̤ lǒkho sî khǔlṳ dě upla̤ lǒkho sî mi̤sǎ. 18Ma̤pûhǐ kò kè̌shî̌sî̌ya pû ta sî dǔǎshǎ tò̤nu, ma̤ lǒkho hǐnu. Pò̤̌ta sîpha ǒ ta̤tûdû htǒotapwa̤nu a kè̌shǐ ta̤ma̤ htě a tûdû toǒ dě a ǐ sî ta̤ma̤khû̌kǎ pě.”Mǒkhû̌ a ta̤dû̌yò̤htò̌sa
(Lǔka 12:33-34)
19“Ta̤dû̌yò̤htò̌sa hǎkhû̌ bǎonu, kè̌lǎ bè̌plǒ pû sîya ma̤, ma̤tè̤hî̌dě ta̤ htǒotoǒ numî̌ akrò̌ agwaǎjò, a htǎî̌htǎkrò̌ pî̌jò, pwa̤ǎhǔǎkě htò̌nṳ ǎhǔjò pwǎ yǎ. e 20Pwǎ̤ta bè̌nṳplǒ lǒkho sî ta̤dû̌yò̤htò̌sa dě mǒkhû̌ htě akrò̌ agwaǎjò tò̤, a htǎî̌htǎkrò̌ pî̌jòtò̤, pwa̤ǎhǔǎkě htò̌nṳjòtò̤ agûla̤nu. 21Ma̤tè̤hî̌dě, sî ta̤dû̌yò̤htò̌sa ǒbǎtè tò̤glònu, sî sò̌phlǒ ǒkû̌dǒ bǎnu.”Na̤saklû amî̌ko
(Lǔka 11:34-36)
22“Mi̤sǎphlǒ toǒ numî̌ asǒsǒta mî̌ko tama ta na̤saklû aya, sî mi̤sǎphlǒ dè lîshěwǒ hî̌dě, sî na̤saklû sapwa̤bò lṳlîtîklî̌ wǒbò pě. 23Pwǎ̤ta sî mi̤sǎphlǒ dè lîpo̤lo̤ hî̌numî̌, sîna̤ khǐbò pě. Ta̤lî htě a to ǒ sîkûnu, a dè ǒtò̤ hî̌dě, a khǐsuwu bǎ꤮ tènu gènè̤ kè̌tû̌ nî̌꤮.”Cǒmara ta wûhta
(Lǔka 16:13)
24“Kò ma̤jò ta̤ma̤ dě běcǎ sò̌gini̤ ata̤no ala̤nu a ǒ dǐpwǎ̤꤮ tò̤. A sò̌khě nû̌û pě tapwa̤, a mo̤ǐ nû̌û pě tapwa̤. Mè̤tò̤mî̌ a sò̌phlǒto nû̌û pě tapwa̤, a ma̤tukutakǎshǔkè nû̌û pě tapwa̤. Sî ma̤bò bǎ Cǒmara ayaya, wû ayaya ginǐ̤cǎbònu, anî̤ tò̤.”Ta̤guta̤gè
(Lǔka 12:22-31)
25“Ma̤hǐnudě he hî̌ sî, bǎgubǎgè pûma̤ ta sî ta̤ǒhtûpwa̤ ayanu ma̤. Sî la̤ǎla̤o aya bǎbǎ, sî la̤kûla̤sǒ aya bǎbǎ, bǎgubǎgè lǒkho pûma̤. Pa ta̤ǒhtûpwa̤nu a lo̤bǎdû̌khlo ta la̤ǎla̤o mè̤tò̤ ya? Pa na̤saklû htǒonu a lo̤bǎdû̌khlo ta la̤kûla̤sǒ mè̤tò̤ ya? 26Kè̌mò̌mṳ lǒkho htû̌tî̤pî̤dî̌dè dě mǒla̤nu toǒ. A shǒǐ kû̌kò tò̤, a kǎ kû̌kò bǔ tò̤, a phò ǒkû̌kò tò̤, pwǎ̤ta sî pha Cǒmara dě mǒkhû̌ tapwa̤ bǔǎ asî. Sî dě, sî le̤dû̌pwî̤htûkhlo ta htû̌tî̤pî̤dî̌dènu toǒ mè̤tò̤ ya? 27Dě sîgusîgè akhû̌akhî, sî cǐhtûhèjòpo̤ tû̌ sî mṳni̤mṳsa tîkî̌꤮ phû̌ pwǎnu a ǒ dǐpwǎ̤꤮ tò̤. 28“Sî cû̌bǎgubǎgè ta sî la̤kûla̤sǒ aya ma̤tè? Ta̤phota̤gî ya̤dakhû̌nu toǒ a phǎhtò̌phohtò̌ lǒkho hî̌tènu, gènè̤ kè̌mò̌ lǒkho. Asî ǎwè̤ kû̌kò ta̤ma̤ dǐcǎ꤮ tò̤, a hǐ kû̌kò sèphè̌ tò̤. 29Pwǎ̤tadě he hî̌ sî꤮, Khwǐshòlomo htě a ǒ ta a ta̤dû̌yò̤htò̌sa lǒ̤꤮ bò htǒotapwa̤nu, a hǐdohǐyò̤ htě awî̤ gunò̤ ta ta̤phonu topho pwǎnu a ǒ dǐpṳ̌꤮ tò̤. f 30Kòyò ta̤yṳpî̌tî̌ sî꤮, mi̤mṳ ta sǒgoto̤ htě adǒhtò̌ khò̌ti̤ni̤, pe̤wo̤pě dě kò bǎ shû̌nṳkè pwǎ yǎta mî̌ pwǎ htǒotoǒ dě Cǒmara ǐkûǐsǒ yǎ dèhî̌dě, sîhtǒo toǒnu, Cǒmara ǐkûǐsǒ te̤mǎ mè̤mè̤̌ sî pě. 31Ma̤hǐnudě, sû̌gûsò̌gè lǒkho pûma̤ nî̌꤮. ‘Pa glè ǎpe titè?’ ‘Pa glè ope titè?’ Tò̤hî̌kǎlè̌ ‘Pa glè kûsǒpe titè?’ Hî̌ lǒkho pûma̤ hǐnu ma̤. 32Ma̤tè̤hî̌dě kòyò htě a sî̌ya kû̌kò Cǒmara tò̤ toǒnu, a kè̌lǎ ma̤pwǎ lǒkho hǐnu. Pò̤̌ta sîpha dě mǒkhû̌ htǒotapwa̤nu a sî̌yabò sî lo̤bǎ toǒnu hǒ. 33Kè̌lǎ wǐ lǒkho Cǒmara ashiaga ta a ta̤cǒta̤tè̤ toǒnu, dě ta̤ lǒ̤꤮ bò htě sî lo̤bǎ htǒotoǒnu, Cǒmara ǐpo̤ tû̌ sî pě. 34Ma̤hǐnudě, pe̤wo̤pě ayanu gugè pû lǒkho ma̤ nî̌꤮, ma̤tè̤hî̌dě, pe̤wo̤pě ayanu, a ta̤guta̤gè ǒkhǒ tû̌ pě. Ti̤ni̤ ta ti̤ni̤ a ta̤guta̤gènu a shû tû̌ hǒ.”
Copyright information for
KxfSCKRC