Matthew 7

Ta̤hî̌bǐhî̌ǒ kòyò, ta̤gènè̤sǔbǐ gènè̤sǔǒ kòyò

(Lǔka 6:37-38, 6:41-42)

1“Hî̌bǐhî̌ǒ kòyò, gènè̤bǐaǒ pûma̤ kò ma̤ nî̌꤮. Cǒmara ma̤ geshǔ sî ta ali̤ hǐnu pě. 2Ma̤tè̤hî̌dě Cǒmara ma̤ geshǔ na ta ali̤ pwǐ na hî̌bǐhî̌ǒ kòyò, na gènè̤sǔbǐaǒ kònu pě. Na ma̤ kòyò na hî̌ kòyò pwî̌꤮ tènu, Cǒmara ma̤geshǔlè̌ na pwî̌꤮ nupě. ^a

3“Amǔaphî ǒpwǎ dě sî pṳwè̤ pwa̤yṳǎphû̌ tapwa̤ a mi̤sǎphlǒkû pwǎ dě sî kè̌shǐ, pò̤̌ta sǒglo to̤glo ǒ sî mi̤sǎphlǒkû dě, sî kè̌shǐ yǎtò̤ ma̤tè? 4Bǎ sǒglo ǒ sî mi̤sǎphlǒkû akhanu, sî cû̌hî̌tǒ̤ sî pṳwè̤ tapwa̤ ta, ‘He tèkhwè̌htò̌kè bǎ na amǔaphî ǒ na mi̤sǎphlǒkûnu,’ hî̌numî̌, a nî̤jò ya? 5Pwa̤ jîcǒjîtè̤ ana̤ sî꤮, phî̌htò̌wǐkè sǒglo ǒ sî mi̤sǎphlǒkûnu, dě sî kè̌shǐlṳwǒ dě sî tèkhwè̌htò̌jòkè amǔaphî ǒ sî pṳwè̤ a mi̤sǎphlǒkû htǒonu pě.

6“Ta̤cahtǐnu ǐpûma̤ yǎta Chyǐ toǒ ma̤, wîlò̤pû lo̤po̤lòsè̌ toǒ dě htǒ toǒ alo̤mo̤nu ma̤, sî dè wîlò̤ bǎ yǎ hî̌numî̌ a yî̤cǎpǎbòkè nû̌û pě, htopědě a ě gesǒ sî pě.”

Kwi lǒkho, kè̌lǎ lǒkho, to̤glo lǒkho

(Lǔka 11:9-13)

7“Kwi lǒkho pû, sî nî̤bǎ pě! Kè̌lǎ lǒkho pû, sî kè̌shǐ pě. To̤glo lǒkho pû takhanu, Cǒmara bòmo bǎ sî pě. 8Ma̤tè̤hî̌dě kòyò lǒ̤꤮ bò htě a kwita̤ toǒnu, a nî̤bǎ pě, dě kòyò lǒ̤꤮ bò htě a kè̌lǎ ta̤ toǒnu, a kè̌shǐ pě, dě kòyò lǒ̤꤮ bò htě a to̤glo takha toǒnu, Cǒmara bòmo bǎ nû̌û pě.

9“Dě sîklanu sîphû̌ dè kwiǎ sî mû̌ hî̌dě sî ǐǎ asî ta lo̤ numî̌ a ǒnǒ tapwa̤pwa̤ ya? 10Tò̤hî̌kǎlè̌ sîphû̌ dè kwiǎ sî tò̤phû̌ hî̌dě sî ǐǎ asî wṳ̂ numî̌ a ǒ tapwa̤pwa̤ ya? 11Sî mî̌ kòyò htě aphû̌mò̤ toǒ pwǎ̤tadě sî sî̌ya ǐǎ sîphû̌sîli̤ toǒ ta ta̤htě awǒ toǒ dèhî̌dě, gènè̤kè̌mò̌ lǒkho sîpha dě mǒkhû̌ htǒotapwa̤nu, a ǐ te̤mǎ mè̤mè̤̌ ta̤wǒ toǒ ta kòyò htě a kwihtò̌ nû̌ûnu toǒ pě. 12Ma̤ bǎ kò pwǐ sî sò̌yṳ noma̤ kò ta sîna̤nu nî̌꤮. Ma̤tè̤hî̌dě lǒ̤꤮ bò Mǒ̤jè a ta̤sû̌ta̤tòwò ta pwa̤po̤ toǒ a ta̤mǎlò̤ toǒnu, a sò̌yṳ hî̌ amûasǎ numî̌ htǒonu hǒ.” ^b

Klè̌ginǐ̤bo

(Lǔka 13:24)

13“Cû̌nṳ lǒkho we̤takha î̌nî̌nu tûkû, ma̤tè̤hî̌dě we̤takhalè̤ htǒotûkûnu ta klè̌lè̤ htǒotabonu a sûcû̌ kò ta ta̤si tûjûpwa̤ agûla̤ dě kò cû̌ nṳǒwo̤ǒphǎ mè̤mè̤̌. 14Pò̤̌ta we̤takha î̌nî̌ htǒotûkû ta klè̌î̌nî̌ htǒotabo dě a sûcû̌ kò ta ta̤htûpwa̤ tûjûpwa̤ htǒonu kòyò kè̌shǐ pî̌tî̌꤮ mè̤mè̤̌ nû̌û.”

Sǒsǎ ta amṳ

(Lǔka 6:43-45)

15“Ǒsè̌rè̌ lǒkho sîna̤ ta pwa̤sûlû lòho ana̤ pwǐ pwa̤po̤ sî toǒnu nî̌꤮. A sûlûhè lòho ana̤ pwǐ sophû̌ htě a sò̌dohobî̌nu pwǎ̤tadě asî sò̌phlǒkû numî̌ a phû̌mò̤shî̌hto lò̤kèta chyǐmi̤nu. 16Dě asî ma̤ ta̤phû̌mò̤ akhû̌akhî, sî sî̌yajò yǎta asî mî̌ pwa̤sûlû lòho ana̤ toǒ pwǎ. Kòyò htě a cû̌kè̌lǎ běǎ sobîsǎ dě ta̤shî̌shǒmṳlo̤, dèmè̤tò̤mî̌ a cû̌kè̌lǎ běǎ dǐshisǎ dě ta̤shî̌shǒmṳlo̤ numî̌ a ǒnǒ ya? 17Hǐnudě, sǒmṳ htě awǒnu, a glè sǎhtò̌ ta awǒ. Pwǎ̤ta sǒmṳ htě awǒtò̤nu, a glè sǎhtò̌pwǎ ta sǒsǎ awǒtò̤ pwǎ. 18Sǒmṳ htě awǒnu, asǎhtò̌jò sǒsǎ a phû̌mò̤ tò̤. Htodě sǒmṳ htě a phû̌mò̤nu, asǎhtò̌jò sǒsǎ awǒtò̤. 19Sǒmṳ lǒ̤꤮ bò htě asǎhtò̌ awǒtò̤ toǒnu, kò pe̤tṳkè yǎ pě dě kò bǎ wînṳkèbò nû̌û mî̌kla pě. ^c 20Ma̤hǐnudě sî glè sî̌yajò pwa̤sûlû lòho ana̤ htǒotoǒnu ta a ta̤sǎhtò̌phohtò̌nu toǒ pwǎ.” ^d

He sî̌yanǒ sî dǐkhò̌꤮ tò̤

(Lǔka 13:26-27)

21“Kòyò lǒ̤꤮ bò htě a kaǎ he ta, ‘Běcǎ꤮ Běcǎ’ nu, a nṳbò dě mǒkhû̌ shila̤gakû pṳ̂̌꤮ tapwa̤ mè̤tò̤. A nṳ pwǎpǒ̤ kòyò htě a ma̤toma̤bǎ hepha dě mǒkhû̌ tapwa̤ asò̌phlǒnu toǒ pwǎ. 22Htû̌꤮ mṳni̤ cèrò pě ti̤ni̤nu, kòyò hè pwe̤ǐlṳhtò̌plṳ̂ lǒkho pě dě a glè hî̌ lǒkho ta, ‘Běcǎ꤮ Běcǎ, pa dǒhtû̌ǐ bǎ kò pwǐ Běcǎ sǎcahtǐ pwe̤ǐ bǎ panu ta nami̤, htodě pa wṳ̂hǎhtò̌kè khînǎkhîno toǒ ta nami̤, htodě pa dǔlṳ ta̤cǒklî̌kî̌ya toǒ ta nami̤nu a ǒplṳ̂ hǒ, mè̤tò̤ya.’ 23Bǎnu akhapě he glè hî̌lîtîklî̌ asî ta, ‘He sî̌yanǒ sî dǐkhò̌꤮ tò̤. Kòyò htě ama̤ ta̤phû̌mò̤shî̌hto toǒ꤮, hǎhtò̌cû̌ tepheyî̤kè ta he.’” ^e

Pwa̤ ma̤htò̌hǐ sò̌gini̤

(Lǔka 6:47-49)

24“Hǐnudě kòyò tapwa̤pwa̤ a gana̤de hele̤heyo̤ dě a gana̤de gûma̤ pwǐ he hî̌nu hî̌numî̌, alò̤ta kòyò sî̌jò tapwa̤ ma̤htò̌ ahǐ dě lo̤khû̌nu hǒ. 25Khwè̌judû̌hè shidû̌gohtò̌, gili̤sǎpla̤hèbǎ hǐhtǒo pwǎ̤ta a lòkhǔtò̤, ma̤tè̤hî̌dě kò ma̤htò̌ yǎ dě lo̤khû̌. 26Pò̤̌ta kòyò tapwa̤pwa̤ a gana̤de hele̤heyo̤ dě a dè gana̤de gûma̤kû̌ pwǐ he hǐnu tò̤ hî̌nu, asǒsǒta kòyò gènè̤phlophǎ kû̌kò tò̤ tapwa̤ ma̤htò̌ ahǐ dě hǎsè̌sǒkhû̌nu hǒ. 27Khwè̌judû̌hè shidû̌gohtò̌, gili̤sǎpla̤hèbǎ hǐhtǒo dě a lò̤te̤ja bòmṳ̂sîglî pwǎ.”

Ye̤shǔ sîrîpo̤phǎ

28Bǎ Běcǎ Ye̤shǔ hî̌hto ta̤htǒotoǒ akhanu, kòyò saprṳ̂ htě a gana̤de nû̌û ta̤sû̌ta̤tòwò htǒotoǒnu, a sû̌pi̤sò̌pi̤bò. ^f 29Ma̤tè̤hî̌dě, a sû̌ǐtòwòǐ sǒsǒkû̌pwǐ pwa̤sû̌ǐ ta̤sû̌ta̤tòwò asaranu toǒ sû̌ǐnu tò̤. A sû̌ǐ lò̤kèta kòyò htě a ǒta a ta̤shû̌ta̤sho tapwa̤ sû̌ǐnu.