Mat 8 | KxfSCKRC | STEP | Bǎ a ǒ khopa̤lo̤ dě a hǎte̤ akhanu, kòyò toǒ gûplṳ̂gûphǎ kû̌bò nû̌ûkò.

Matthew 8

Ye̤shǔ ma̤bǎ kòyò ta̤shakroǎ dě phělo̤ tapwa̤

(Mǎ̤riko 1:40-45; Lǔka 5:12-16)

1 Bǎ a ǒ khopa̤lo̤ dě a hǎte̤ akhanu, kòyò toǒ gûplṳ̂gûphǎ kû̌bò nû̌ûkò. 2 Kòyò ta̤shakroǎ dě phělo̤ tapwa̤ hè gene̤lò̤ nû̌ûlo̤mo̤ dě a hî̌ nû̌û, “Běcǎ, na dè ta̤sò̌yṳǒnu ma̤bǎ ^{▼▼Lî̤cahtǐ hî̌ ta ma̤bǎ mî̌ ma̤mṳ̂plî. Amûasǎ mî̌ kòyò htě a ta̤sha ǒhǐnu toǒnu, kò bǎ nocû̌ ǒtephe nû̌û. Bǎ asî ta̤sha mṳ̂plî (hǎmǎ) ge akhanu, a cû̌htukhahtu kû̌ta kò mî̌ anî̤ hǒ, a subusabahtò̌ Cǒmara mî̌ anî̤ hǒ.} bǎ he ta̤shahtǒo hî̌numî̌, na ma̤bǎjò pwǎ.”

3 Běcǎ Ye̤shǔ yṳ̂hè acǔde a tè̌bǎhto nû̌û dě a hî̌ nû̌û, “He ta̤sò̌yṳǒ pwǎ,” A hî̌ htodě “Ta̤sha꤮ hǎmǎkè mò̌,” A hî̌po̤ hǐnu, dě taplǎpa ta̤sha hǎmǎkè. 4 Dě Běcǎ Ye̤shǔ hî̌ nû̌û, “Pwe̤ǐlṳ ma̤ kò dǐpwǎ̤꤮ ma̤ nî̌꤮, pò̤̌ta cû̌ dǔlṳkè̌ nana̤ htǒonu dě pwa̤lṳhtò̌ta̤nu tapwa̤ a ǒnu nî̌꤮. Htodě ma̤pûhǐ a htûhtò̌ ta ta̤khòlṳ dě kò pṳ̂̌꤮ tapwa̤ a lo̤mo̤ ta na ta̤sha hǎmǎ ta a mṳ̂plî ayanu, lṳhtò̌ ta̤lṳta̤tò̌ pwǐ Mǒ̤jè mǎnǎnu nî̌꤮.” ^b

Běcǎ Ye̤shǔ ma̤bǎ Rò̌mǎphû̌ a klihǐkǒdû̌ pwa̤ma̤ta̤ tapwa̤ ta̤sha

(Lǔka 7:1-10; Jowǎ̤ni̤ 4:43-54)

5 Bǎ Běcǎ Ye̤shǔ hènṳ dě Kaperanòwî̤kû akhanu, Rò̌mǎ klita̤ya̤ ahǐkǒdû̌ tapwa̤ hèkwi nû̌û ta̤ma̤jè. 6 Dě a hî̌ nû̌û, “Běcǎ he pwa̤ma̤ta̤ tapwa̤ asha sitokho dě a hǎmoǒlò̤ pwǎ la̤mi̤khû̌ hǐnu. Ajî mè̤mè̤̌ nû̌û hǒ.”

7 Běcǎ Ye̤shǔ hî̌shǔ yǎ, “He cû̌ ma̤bǎtû̌ pě.”

8 Kliphû̌ ta̤ya̤ ahǐkǒdû̌nu tapwa̤ hî̌shǔ, “Běcǎ, na hènṳpwǎ dě hehǐkû pwǎnu he gwata na tò̤. Hî̌lò̤pwǎ nayo̤ tûmûpwǎ numî̌ he pwa̤ma̤ta̤ ǒmo̤ge tû̌hǒ. 9 Mî̌ma̤tè̤dě he hî̌ pwǐhè̌o mî̌ he bǎ gana̤de sana̤ tû̌ kòyò htě adû̌khlo ta he toǒ ayo̤. Hǐnudě kliphû̌ htě a ǒ hela̤ toǒnu a bǎ gana̤detû̌ heyo̤ hǐnunu. He dè hî̌ kliphû̌ tapwa̤pwa̤ ta, ‘Cû̌mò̌,’ hî̌numî̌ a bǎcû̌ pwǎ, he dè hî̌lè̌ ahǔwa̤tapwa̤, ‘Hèmò̌,’ hî̌numî̌ a bǎ hè pwǎ. Htohǒtò̤ he dè hî̌ hejûphû̌ ta, ‘Ma̤mò̌htǒo,’ hî̌numî̌ a bǎ ma̤ pwǎ.”

10 Bǎ Běcǎ Ye̤shǔ gana̤de ta̤hî̌bǎ htǒo akha, a sû̌pi̤sò̌pi̤ mè̤mè̤̌ dě a hî̌ kòyò htě a gû nû̌ûkò toǒ, “He hî̌ mè̤mè̌ sî, ta̤yṳta̤nǎsho pwǐhè̌o dě Israelphû̌ aklanu he kè̌shǐnǒ hǒtò̤. 11 He hî̌ sî, kòyò ǒ dě mṳhtò̌, mṳlò̤ toǒ hè ǒplṳ̂ pě. Asî hè hǎnòò̌ ǎhtukû̌ ta paphi Abraham, Isǎko, Yǎ̤kò dě mǒkhû̌ a shila̤gakû pě. ^c 12 Yṳ̌daphû̌ toǒnu, a tohtû Cǒmara akòyò dě Cǒmara ashiaganu, pò̤̌ta Cǒmara wînṳkè asî dě ta̤khǐta̤lo̤ agûla̤ pě. Gûla̤ bǎ asî cû̌ ǒ htǒotò̤glò pěnu, asî cû̌ hǎsihǎǒ dě asî ěgwîbò akhû̌khi pě.” ^d

13 Htodě a hî̌ klihǐkǒdû̌, “Gemò̌, a htûhtò̌tû̌ pwǐ na yṳǎnu pě.” Dě apwa̤ma̤ta̤nu tapwa̤ ǒmo̤ge totǐ bǎ Běcǎ hî̌ nû̌û akhîkhanu.

Běcǎ Ye̤shǔ ma̤bǎ plṳ̂ kòyò ta̤sha

(Mǎ̤riko 1:29-34; Lǔka 4:38-41)

14 Bǎ Běcǎ Ye̤shǔ cû̌nṳ Petru ahǐkû akhanu, a kè̌shǐ Petru a mipwa̤mamǔ shǐshana̤gû dě a hǎmoǒlò̤ pwǎ la̤mi̤khû̌. 15 A pṳ̂ nû̌ûcǔde dě a ta̤sha hǎmǎkè. Htodě a ihtǒ ma̤ǎma̤o bǎ Ye̤shǔ.

16 Bǎ lṳmṳhǎlò̤ akhanu, kò hèsûplṳ̂ kòyò htě khînǎkhîno ma̤sha nû̌û toǒ dě Ye̤shǔ a ǒ. A hî̌lò̤ pwǎ ayo̤ tûmûpa dě khînǎkhîno hǎhtò̌cû̌bòkè. Htodě a ma̤bǎ bò꤮ kòshǐkòshanu toǒ. 17 Ta̤ htǒotoǒnu a ma̤lǒma̤behtò̌ pwa̤po̤ Isaǐa a ta̤hî̌nǎ ta,

“A phî̌cû̌kè pa ta̤shǐta̤sha toǒ.” ^e

Kòyò htě a gû Běcǎ Ye̤shǔ akò toǒ akhû̌akǎ

(Lǔka 9:57-62)

18 Bǎ Běcǎ Ye̤shǔ kè̌shǐ ta kòyò saprṳ̂ hè ǒte̤we̤bò yǎ akhanu, a hî̌lò̤ ayo̤ dě akhophijaû̌ toǒ a ǒ ta pa cû̌ dě shikoǒdû̌ bò̌kho tokho hò̌꤮, a hî̌ hǐnu. 19 Bǎnuakha, pwa̤sû̌ǐ ta̤sû̌ta̤tòwò asara tapwa̤ hè nû̌û ǒ dě a hî̌ nû̌û, “Sara, na cû̌ bǎtè꤮ tò̤glò bǎbǎ, he cû̌kû̌ ta na.”

20 Ye̤shǔ hî̌shǔ yǎ, “Chyǐmi̤ toǒ ǒ ta akû, htû̌phû̌ wi̤ dě mǒla̤ toǒ ǒ ta api̤, pwǎ̤ta kòyòphû̌khû mî̌ hehtǒo, bǎ hehǐkǒ la̤dò̌lò̤ gûla̤ pwǎnu a ǒ dǐglò̌꤮ tò̤.”

21 Akhophijaû̌ ahǔwa̤tapwa̤ hî̌ nû̌û, “Běcǎ, ǐpûmò̌ he ashuakhwè dě he ge lǔwǐ kû̌nǎ hepha nî̌꤮.”

22 Pwǎ̤ta Běcǎ Ye̤shǔ hî̌shǔ yǎ, “Gûkû̌ hekò khònò̤htǒo, kòyò htě a gana̤de Cǒmara ayo̤ tò̤ toǒ numî̌ asǒsǒta kòyòsi htǒonuhǒ. Nocû̌lǔtû̌ yǎta kòyòsi htǒo ta asînu.”

A noǒkǔ gili̤sǎ

(Mǎ̤riko 4:35-41; Lǔka 8:22-25)

23 Bǎnuakha Běcǎ Ye̤shǔ nṳ sǒkhlikû dě akhophijaû̌ toǒ gûnṳkû̌ nû̌û dě asî hǎhtò̌cû̌kè. 24 Bǎ asî cû̌to̤ shikǎmakû akhanu, Gili̤sǎpla̤hè sumṳsòtò̤. Shipěpǒ dě a pla̤nṳbò sǒkhlikû. Bǎnuakha Běcǎ Ye̤shǔ hǎmoǒ shope̤. 25 Dě akhophijaû̌ toǒ cû̌ htû̌wè̤ihtǒ nû̌û dě a hî̌ nû̌û, “Běcǎ, ma̤jèmò̌ pa, pa glè̌ lòcǔsibò hǒ.”

26 Dě Běcǎ Ye̤shǔ hî̌ asî, “Kòyò ta̤yṳpî̌tî̌ sî꤮, sî ǐsha gètè̤̌nu ma̤tè?” A hî̌hto dě a ihtǒ sǎhtǎ gili̤htǒo ta shipěpǒ htǒotoǒ. Dě gili̤sǎ ǒkǔ hèsumṳkè.

27 Akhophijaû̌ toǒ sû̌pi̤sò̌pi̤ lǒ̤bò dě a hî̌ lǒkho nû̌û, “Kòyò htǒotapwa̤ mî̌ kòyò hî̌tètè? A sîrîcû̌dû̌ pwî̌nunu. Gili̤ ta shipěpǒ gana̤de jòjò̌ nû̌ûyo̤yo̤.”

Běcǎ wṳ̂hǎhtò̌kè khînǎkhîno dě kòmakhû sò̌gini̤ akû

(Mǎ̤riko 5:1-20; Lǔka 8:26-39)

28 Bǎ Ye̤shǔ cû̌to̤ shikoǒdû̌ bò̌kho, Kadarǎga akhanu, kòmakhû htě khînǎkhîno ma̤sha nû̌û htǒosò̌gini̤ a ǒ lṳkhû̌ hǎhtò̌ dě a hǎhtò̌cû̌ kè̌shǐshǔ nû̌û. Kòmakhû htǒosò̌gini̤nu, khînǎ ma̤sha nû̌û akhû̌akhî, ashû̌asho, a sò̌gònò̤ ǐshashû̌ mè̤mè̤̌ dě klè̌cû̌ bǎ lṳhtunu tabonu, kò cû̌phǔbǔ dǐpwǎ̤꤮ tò̤. 29 Asî kaǎgu ta, “Cǒmara aphû̌khû, na sò̌yṳ ma̤ pa hî̌tè? Cǒmara amṳni̤ cèrò kò akhîakha to̤ hǒtò̤ akhanu, na glè hèma̤ kwè̌꤮ pa titè?”

30 Bǎ aǒyî̤ ta asî tò̤nu, htǒ ǒ tṳ̂prṳ̂ dě a ǎ lǒkho ashǎ bǎnu. 31 Khînǎ ma̤sha kòmakhû htǒosò̌gini̤nu, a kwigwèbǎǐ Běcǎ Ye̤shǔ, “Na dè wṳ̂hǎhtò̌cû̌kè pa hî̌dě, nocû̌nṳǒ pû pa dě htǒnu toǒ akûnu nî̌꤮.”

32 Běcǎ hî̌shǔ asî, “Cû̌nṳǒmò̌ lǒkho!” Dě asî hǎhtò̌cû̌ nṳǒbò lǒkho htǒnu tṳ̂prṳ̂ akû, dě htǒ toǒ tukhlè̌ sagumṳbò gòpò̤lo̤ dě a lòcǔsikèbò shikoǒdû̌kû. 33 Pwa̤gèǐhtǒ toǒ khlè̌ge wî̤kû dě a khlè̌ge pwe̤ǐlṳ kò ta bò꤮ ta̤htûhtò̌ ana̤ htǒotoǒ ta ta̤ma̤ana̤ ta kòmakhû sò̌gini̤htǒo lǒ̤꤮ bò. 34 Kòyò tî̤wî̤bò hǎhtò̌kè̌bò Ye̤shǔ. Htodě bǎ asî kè̌shǐ Běcǎ Ye̤shǔ akha, a kwigwèbǎǐ nû̌û ta a glè hǎhtò̌cû̌ tephekè ta asî gakû bǎnu.